HISTORY OF CANDUMARAO SDA CHURCH
Sang tuig 1978, ang mag-asawa nga sanday Consortia Plesis kag Nacio Plesis nga lunsay Adventista gikan sa Marayo, Pontevedra nagkadto diri sa Candumarao tungod may duta sila nga paga-umahon. Nakita nila nga wala sang mga Adventista sa sini nga duog, gani kaupod sang lima (5) ka mga manugpangabudlay gikan sa Marayo nga ginpangunahan ni Bro. Sila nag-hatag sang ila
tion sa pagpangabudlay kag pagpahibalo sang maayong balita sa sini nga duog. Sa ila sini kapisan kag dedikasyon sa buluhaton, nag-bunga ang ila pagpangabudlay. Sang tuig 1980, may ara anum (6) ka hamili nga mga kalag ang nadala sa tiilan sang Diyos, kanday Sis. Exaltacion Adolfo, Sis. Flor Panuela, Sis. Rosemylie Aledo, kag Sis. Ini sila nga anum natugmawan sa idalum sang pagdumala ni Ptr. Arcadio Montano, nga amu anay ang pastor sa sini nga distrito. Ang mga kabanwahanan nga sakop sang pagdumala ni Ptr. Montano amu ang San Enrique, Pontevedra, Hinigaran, Binalbagan kag Himamaylan. Tungod nga ang mga bag-o nga miyembro sang iglesia wala pa sang duog nga tipunan kada Sabado. Sila nagalakat pakadto sa barangay sang Aranda kag didto magsimba kada adlaw sang Sabado. 1981, nag-abot sanday Cerela kag Ernesto Paguio kaupod sang ila mga kabataan. Tuig 1982, madamo ang natugmayan didto sa Kabankalan kag isa na diri ang pamilya Jamora. Sila kanday Bro. Jose Morito Jamora, Sis. Delfina Jamora, Sis. Joedel Jamora, Sis Joena Jamora, Bro. Freddie Trinidad nangin dugang nga mga miyembro sang iglesia tungod ini sa pag-panikasog ni Sis. Encar Porras, nga anay miyembro sang Iglesia Adventista sa barangay sang Aranda. Isa ka matutom kag maluluy-on nga anak sang Diyos nga amo ang nangita sang paagi nga mapatindugan sang Iglesia Adventista ang Candumarao. Tuig 1983, sa kaluoy kag bulig sang Diyos nakapatukod sang isa ka simbahan sa sini nga duog nga himu sa kahoy kag kawayan. Kag amo yadto ang una nga tinukod nga gintipunan sang tanan nga mga miyembro sang Iglesia Adventista. Nagligad ang duwa (2) ka tuig kag padayon nga nangin matutom ang mga miyembro sang iglesia. Tuig 1985, gintalaga nga bag-o nga distict pastor amu si Ptr. Ordonia. Sa iya pagdumalahan ang Iglesia sang Candumarao nag-pili sang mga opisyales halin sa Tigulang sa Iglesia nga amu si Bro. Jose Morito Jamora, Sabbath School Superintendent amu si Sis. Delfina Jamora, Treasurer, amu si Sis. Mercedita Evangelista pakadto sa Church Clerk nga amu si Sis. Joedel Jamora. Sa bulig sang Diyos, nagpabilin nga matutom kag nangin mapinadayunon ang mga miyembro sang iglesia sang Candumarao.
1989, nag-abot ang isa ka pagtilaw sa Iglesia. Isa ka bagyo ang nag-abot kag nagguba gid sang tinukod nga iglesia. Sa pihak sang pagtilaw nga nag-abot, wala gid ini nag-upang sang kagustuhan sang mga miyembro sa pagdayaw kag pagpasalamat sa buhi nga Diyos. Gani, nagpadayun ang ila pagtipun kada Sabado sa idalum sang kahoy. Paagi sang pagbinuligay sang mga kauturan, natukod liwat ang iglesia kag padayun ang ila pagsimba sa sini.
1993, nag-abot sa Candumarao ang pamilya Acero. Kanday Aris Acero kag Jean Acero kaupod sang ila mga kabataan, mga tagalog gikan sa Maynila nga mga miyembro na nga daan sang Iglesia Adventista didto pa. Kag sa sunod man nga tuig nag-abot ang pamilya Dagatan, sanday Nestor Dagatan kag Ofelia Dagatan kaupod ang ila ginikanan kag mga kabataan. Sa amu sini nga tion madamo ang napakamaayo tungod sang ila kadasig sa buluhaton sang Diyos sa sini nga lugar. Sa pagdumalahan ni Ptr. Onny Buhat, naghiwat sang isa ka revival kag ginsundan ini sang krusada sa iglesia. Tungod ang Diyos may mga tinawag gid sa sini nga duog, madamo sang mga gintugmawan lakip na ang mga kabataan sang dumaan na nga miyembro sang iglesia. Nagpadayun ang pag-uswag sang iglesia paagi sa pangamuyo kag pagbinuligay sang kada miyembro. Madamo nga mga kahiwatan sa distrito ang ginhiwat sa sini nga iglesia kag madamo pa gid nga mga krusada ang ginhimu.
1999, gin-destino bilang district pastor sa sini nga distrito amu si Ptr. Hermogenes Gumban. Kag nagligad ang madamo nga mga tinuig, madamo nga mga kauturan ang nag-pahuway sa pag-alagad. Salamat sa pamilya Dagatan nga nagpabilin nga matutom kag padayon ang paghimo sang mga programa sa iglesia para magpabilin nga malig-on kag mabakod ang nabilin nga mga kauturan. Sa sunod nga tuig nag-abot ang manugpangabudlay nga ginpadala sang Diyos nga amu si Bro. Joel Maquinto. Siya nagpamisita sang mga nagluluya nga mga kauturan kag nagpang-bible study sa Bormeo nga sakop sang barangay Camalobalo. May ara pipila ka mga gintugmawan kag nangin miyembro sang iglesia. Tuig 2002, nag-saylo sa Iloilo ang pamilya Dagatan tungod sang oportunidad sa ila nga negosyo. Kag ang nabilin nga mga kauturan, amu ang nagpadayun sa pagsimba sa amu nga iglesia. Madamo ang nagluluya sa pag-alagad pero may ara man sang mga nagpadayon sa kaluoy sang Diyos. Tuig 2005, sa kaluoy sang Diyos may isa naman ka pamilya ang ginpadala sang Diyos sa sini nga duog. Ang pamilya Sudario nga sanday Christopher Endong Sudario kag Nita Sudario kaupod sang ila mga kabataan, ang nangin kaupod sang nabilin nga mga kauturan sa pagpadayun sang panimbahon kada Sabado sa amo nga iglesia. Ini paagi man sang wala untat nga pag-suporta ni Bro. Siya ang nagserbi bilang manugpangabudlay sa sini nga iglesia sa madamo nga mga tinuig. Ini sa idalum sang pagdumalahan ni Pastor Alvarez nga amu anay ang District Pastor sa amu man nga tuig. Tuig 2010, sa ikaduwa nga hitabo, isa naman ka bagyo ang nagguba gid sing matuod-tuod sang bug-os nga tinukod. Sugod sadto nga hitabo, wala na gid ini napatukod liwat sa amu nga duog. Ang mga nabilin nga mga miyembro didto na naga-simba kada Sabado sa Hinigaran SDA Church. Ma-sobra (2) ka tuig ang ila pagkadto sa amu nga iglesia para mag-simba. Si Pastor Alejandro Nepomuceno amu ang District Pastor sa amu ni nga mga tinuig. Tuig 2012, may isa ka maayo nga balita ang nag-abot sa mga miyembro nga naga-simba didto sa Hinigaran. Isa ka balita nga kung sa diin nagpakig-saad si Sis. Elizabeth Aguirre nga magapatukod siya sang simbahan sa ila duta diri sa Candumarao. Paagi sa kaayo kag kaalwan sang pamilya Aguirre nga kanday Bro. Gilberto kag Sis. Elizabeth Aguirre, kag paagi man sa bulig sang mga kauturan sa bug-os nga distrito natukod ang Iglesia sang Candumarao sa bag-o sini nga lokasyon. Ini himu sa kahoy kag kawayan. Ang iban nga mga materyales nga pwede pa magamit halin sa daan kag guba nga simbahan amu man ang gingamit sa pagpatukod sang bag-o nga simbahan. Sa amo man nga tuig may gintalaga nga manugpangabudlay sa sini nga iglesia nga amu si Bro. Nelson Geronca. Ini nangin posibli sa suporta sang pamilya Aguirre. Tuig 2013, sa kapisan sang manug-pangabudlay nga gindestino diri, madamo nga mga krusada ang ginhiwat sa nagkalain-lain nga duog, sa Camatio, sa Proper ukon Site, pati man sa Bormeo nga sakop sang barangay Camalobalo. Ini tanan nga buluhaton natuman sa pag-isa sang mga kauturan, sang mga manugpangabudlay, kag sa liderato ni Ptr. Levy Laput nga amu anay ang district pastor diri. May ara sang pipila ka mga kalag ang gintugmawan sa bulig kag giya sang Diyos. Disyembre 2019, sa wala ginapaabot nga hitabo, isa ka disgrasya ang nag-luntad, naaksidente ang motor nga ginasakyan ni Bro. Gino Aguirre, agot nga anak sang mag-asawa nga Gilberto kag Elizabeth Aguirre, nga gintuna-an gid sang iya sini kamatayon. Nagpa-uli sa Pilipinas ang mag-asawa nga may kasubo, apang sila may dako nga paglaum nga ini nga pagtilaw sa ila kabuhi may ara gid sing dako nga katuyu-an. Kabangdanan nga makapatindog sang isa ka madako kag konkreto nga simbahan.
2020, una nga bulan sang tuig. Sa pihak sang ila kasubo, sa gihapon wala sila nalipat sang ila tinutuyo kag padayon ang pag-suporta sa buluhaton sang Diyos diri sa Iglesia sang Candumarao. Gin-planuhan nga makapatindog sang isa ka konkreto kag matahum nga simbahan. Ginsugdan ang konstruksyon sini kag natapos sa bulan sang Marso tuig 2020. Ini nga handum nangin posibli sa kaalwan kag wala untat nga pagsuporta pinansyal sang pamilya Aguirre. Amo man nga tuig ang pag-abot sang mag-asawa nga sina Bro. Gilbey Aguirre kag Sis. Jeska Aguirre, nga amu ang naghimu sang mga programa sa iglesia para mapa-dasig pa gid ang mga kauturan diri. Paagi sa suhestyon sang isa natun ka manugpangabudlay, Bro. Nelson Geronca kag paagi man sa kooperasyon sang mga kauturan, naghimu sang lima (5) ka grupo sang Caregroup, amu ang grupo sang The Messenger, The Journeyer, The Seeker, The Light, kag ang The Favorites. Ang kada grupo may mga responsibilidad kag tinutuyo sa pagtatap kag pagpapabakod sang kada miyembro. Tuig 2021, bulan sang Oktubre, nag-abot ang bag-o nga manug-pangabudlay. Ginpadala diri sa Candumarao ang mag-asawa nga sanday Ptr. Daniel Egonia kag Glory Ann Egonia. Madamo sang mga plano ang mag-asawa sang pagpadasig kag pagpalambo sang buluhaton sa sini nga iglesia. Gani, sa dedikasyon sang tagsa ka mga kauturan, ginpadasig pa gid ang Caregroup Ministry. Naghimu sang mga programa para sa mga pamatan-on. Nagpamisita sang mga kauturan nga nagluluya kag naghiwat sang mga cottage meeting sa duog sang Bormeo. Madamo sang nagbaton kag gintugmawan, lakip na ang pamilya Legaspi, pamilya Gallaza, pamilya Gerale, upod ang tatlo (3) ka mga pamatan-on sa amu nga duog. Sa idalum ini sang pagdumalahan sang bag-o naman nga District Pastor nga amu si Ptr. Ezequiel Alojepan. Ini tanan nangin madinalag-on sa pangamuyo kag pag-binuligay sang mga kauturan sa sini nga iglesia. Karun, dako kag matahum na ang Iglesia sang Candumarao kag madamo na ang nag-balik sa pag-alagad, kag halus mapuno na ang mga pulungku-an sa tion sang pagtipun kada adlaw nga pagsimba. Dalayawon gid ang Diyos sang iya kaayo.
