15/08/2026
Ikasiyam ka Adlaw kang Santo Rosario kag Novena kay Sr. San Roque, Mananabang sa mga Peste
Orasyon sa Ikasiyam ka Adlaw
🙏Mahimayaon nga gayud nga San Roque, nga sang pagpauli mo na sa Montpelier nga imo banwa, ginbilanggo ka sa sulod sa Lima ka tuig hasta sa imo nga pagkamatay; nga Wala sing hinungdan, kon dili lamang ang katahap nila sa imo, nga sinugo ka ayhan sang ila mga kaaway sa pagpanilag sa banwa, tungod kay wala ka nila makilal-i kay nabalhin na man ang imo nga bayhon tungod sang imo nga pagpenitensya; bisan pa gani ang tiyo mo nga Gobernador nga amo ang imo ginbilinan sang imo nga panubli-on, wala na makakilala sa imo; busa ginpabilanggo ka kag imo nga gin-agwanta hasta sa imo nga pagkamatay: nagaampo kami kami sa imo nga bulngon mo, dili lamang ang mga balatian sang lawas, kon dili man ang makamamatay nga kalimot sang kalag sa kaayohan; kay agud kon hikalimtan kami sang kalibutan, kag sang iya mga paglimbong, maagwanta namon ang mga pgadaug-daug sang amon nga isigkatawo; subong man ginapangayo namon sa imo nga ipahilayo mo kami sa mga balatian nga tanan sa kalag kag kon dili uyon sa kabubut-on sang Dios, ig-ampo mo na lamang kami nga mabaton namon unta ang mga Sakramento sa Oras sang amon nga kamatayon, agud makadangat sang patawad sang amon mga sala kag agud man hatagan kami sang Dios sang kalipay nga dayon did to sa langit. Amen.
(Magpangadi sing Siyam ka Maghimaya ka Maria kag isa ka Himaya sa Amay)
🎶Ang hampak sa katarungan,
di unta namon hiaguman;🎶
🎶Imo kami nga tabangan San Roque,
dakung bulahan.🎶
🎶 Ginpabilanggo ka dayon
sa madulom nga presohan,
kag dira ginhulat mo man
ang imo nga kamatayon;
busa Ikaw ginpamatian
sang aton Dios nga gamhanan.🎶
🎶Imo kami nga tabangan San Roque,
dakung bulahan.🎶
🎶Ikaw sang Anghel gindalhan
sang ginsulatan nga tapos,
sang saad nga labing hamili
sang Diosnon nga kaayuhan;
nga ikaw ang Mananabang
sa mga peste nga tanan.🎶
🎶Imo kami nga tabangan San Roque,
dakung bulahan.🎶
