24/05/2026
𝐀 𝐂𝐁𝐂𝐏 𝐏𝐀𝐒𝐓𝐎𝐑𝐀𝐋 𝐒𝐓𝐀𝐓𝐄𝐌𝐄𝐍𝐓 𝐎𝐍 𝐏𝐄𝐀𝐂𝐄 𝐈𝐍 𝐀 𝐖𝐎𝐔𝐍𝐃𝐄𝐃 𝐖𝐎𝐑𝐋𝐃
(Pinaikling Bersyon na isinalin sa Tagalog ng Gumaca Chancery)
Isang Pastoral na Pahayag ng CBCP tungkol sa Kapayapaan sa Isang Sugatang Mundo
“Kapayapaan ang iiwan ko sa inyo. Ang aking kapayapaan ang ibinibigay ko sa inyo.” (Jn 14:27)
Minamahal na Bayan ng Diyos,
Biyaya at kapayapaan sa ating Panginoong Muling Nabuhay!
Taglay ang mga pusong nabibigatan ng lungkot at pag-aalala, kami, ang mga obispo ng Catholic Bishops’ Conference of the Philippines (CBCP), ay nakikiisa sa Santo Papa at sa pangkalahatang Simbahan sa pananalangin para sa kapayapaan sa gitna ng nagpapatuloy na mga digmaan at tunggalian sa Gitnang Silangan at sa buong mundo.
Ang digmaan ay palaging isang trahedya. Sa likod ng mga ulo ng balita at mga kalkulasyong militar ay mga buhay ng tao: mga batang nawalan ng kaligtasan, mga pamilyang nagkahiwalay, mga komunidad na nawasak, at hindi mabilang na mga inosenteng tao na naiwan upang magdusa. Ipinapahayag namin nang malinaw na ang bawat buhay ng tao ay banal at ang bawat tao ay may dignidad na bigay ng Diyos. Ang karahasan, galit, terorismo, at paghihiganti ay lalo lamang nagpapalalim ng pagkakawatak-watak at nagpapahaba ng pagdurusa.
Ang Sigaw ng Sangkatauhan, Sigaw ng Daigdig, Sigaw ng Sambayanang Pilipino
Tulad ng paalala sa atin ni Papa Leo XIV, “Hindi tayo maaaring manatiling tahimik sa harap ng pagdurusa ng napakaraming tao, mga inosenteng biktima ng mga tunggaling ito. Ang anumang nakasasama sa kanila ay nakasasama sa buong sangkatauhan” (Angelus Address, Vatican City, March 22, 2026). Sinusugatan din ng digmaan ang ating iisang tahanan. Ang pagkawasak na dulot ng mga bomba at pakikidigma ay nag-iiwan ng pangmatagalang pinsala sa kapaligiran, na nagpaparumi sa hangin, tubig, at lupa, at inilalagay sa panganib ang mga susunod na henerasyon. Kaya, ang digmaan ay nagiging parehong sigaw ng sangkatauhan at sigaw ng daigdig.
Ang krisis na ito ay umaabot din sa buhay ng mga Pilipino. Maraming Overseas Filipino Workers (OFWs) at ang kanilang mga pamilya ang nakararanas ng takot at kawalan ng katiyakan, habang ang tumataas na presyo ng gasolina at mga presyur sa ekonomiya ay nagpapabigat sa mahihirap at mahihina.
Para sa mga Pinuno ng mga Bansa at mga Mamamayan: Nakikiusap kami sa mga pinuno ng mga bansa na piliin ang pag-uusap kaysa karahasan at ang kapayapaan kaysa pananalakay. Hinihikayat namin ang mga relihiyosong pamayanan na magsilbing mga tulay ng pagkakapatiran at pag-unawa, at hinihikayat namin ang mga g**o at mga pinunong sibiko na itaguyod ang katotohanan, dignidad ng tao, at ang kabutihang panlahat.
Isang Panawagan sa Moral na Pagkilatis: Nanawagan kami sa lahat ng mananampalataya na iwasan ang galit, maling impormasyon, at pagkakahati-hati ng kaisipan. Nawa’y mahubog ang ating isip at puso ayon sa Ebanghelyo ni Hesukristo, hindi ng galit at propaganda. Bilang mga Kristiyano, hindi natin pinupuri ang digmaan ni kinokondena ang buong mga bayan at relihiyon; sa halip, tinatawag tayo sa katotohanan, malasakit, katarungan, at pagkakasundo.
Bilang tugon ng Simbahan, tinatawagan namin ang lahat ng diyosesis, parokya, relihiyosong komunidad, paaralan, at mga organisasyong laiko na:
𝟭. 𝗠𝗮𝗻𝗮𝗹𝗮𝗻𝗴𝗶𝗻 𝗽𝗮𝗿𝗮 𝘀𝗮 𝗸𝗮𝗽𝗮𝘆𝗮𝗽𝗮𝗮𝗻 𝘀𝗮 𝗽𝗮𝗺𝗮𝗺𝗮𝗴𝗶𝘁𝗮𝗻 𝗻𝗴 𝗕𝗮𝗻𝗮𝗹 𝗻𝗮 𝗠𝗶𝘀𝗮, 𝗘𝘂𝗰𝗵𝗮𝗿𝗶𝘀𝘁𝗶𝗰 𝗔𝗱𝗼𝗿𝗮𝘁𝗶𝗼𝗻, 𝗥𝗼𝘀𝗮𝗿𝘆𝗼, 𝗮𝘁 𝗽𝗮𝗻𝗮𝗹𝗮𝗻𝗴𝗶𝗻 𝗻𝗴 𝗽𝗮𝗺𝗶𝗹𝘆𝗮.
𝟮. 𝗦𝘂𝗽𝗼𝗿𝘁𝗮𝗵𝗮𝗻 𝗮𝗻𝗴 𝗺𝗴𝗮 𝗢𝗙𝗪 𝗮𝘁 𝗺𝗴𝗮 𝗣𝗮𝗺𝗶𝗹𝘆𝗮𝗻𝗴 𝗡𝗮𝗮𝗽𝗲𝗸𝘁𝘂𝗵𝗮𝗻 𝗻𝗴 𝗞𝗿𝗶𝘀𝗶𝘀 𝘀𝗮 𝗽𝗮𝗺𝗮𝗺𝗮𝗴𝗶𝘁𝗮𝗻 𝗻𝗴 𝗸𝗼𝗻𝗸𝗿𝗲𝘁𝗼𝗻𝗴 𝗽𝗮𝗸𝗶𝗸𝗶𝗶𝘀𝗮 𝗮𝘁 𝗸𝗮𝘄𝗮𝗻𝗴𝗴𝗮𝘄𝗮.
𝟯.𝗜𝘁𝗮𝗴𝘂𝘆𝗼𝗱 𝗮𝗻𝗴 𝗣𝗮𝗴-𝘂𝘂𝘀𝗮𝗽 (𝗱𝗶𝘆𝗮𝗹𝗼𝗴𝗼) 𝗮𝘁 𝗣𝗮𝗴-𝘂𝗻𝗮𝘄𝗮 𝘀𝗮 𝗽𝗮𝗴𝗶𝘁𝗮𝗻 𝗻𝗴 𝗺𝗴𝗮 𝗺𝗮𝗺𝗮𝗺𝗮𝘆𝗮𝗻, 𝗸𝘂𝗹𝘁𝘂𝗿𝗮, 𝗮𝘁 𝗿𝗲𝗹𝗶𝗵𝗶𝘆𝗼𝗻.
Kahit sa madidilim na panahon, ang mga Kristiyano ay hindi sumusuko sa kawalan ng pag-asa. Napagtagumpayan ng Kristong Muling Nabuhay ang p**t sa pamamagitan ng Krus at nagwagi laban sa kamatayan sa pamamagitan ng Kanyang Muling Pagkabuhay. Ang kapayapaan ay nagiging posible kapag ang mga puso ay nagbabalik-loob, ang katarungan ay isinusulong, at ang sangkatauhan ay muling natutong mamuhay bilang isang pamilya sa ilalim ng Diyos.
Hayaang ang bawat parokya ay maging isang santuwaryo ng panalangin, ang bawat pamilya ay maging isang duyan ng kapayapaan, at ang bawat Kristiyano ay maging saksi ng awa at pakikipagkasundo.
Nawa ang Mahal na Birheng Maria, Reyna ng Kapayapaan at Ina ng lahat ng mga mamamayan, ay manalangin para sa atin sa Diyos at gabayan ang sangkatauhan tungo sa pangmatagalang kapayapaan. Amen.
Para sa Catholic Bishops’ Conference of the Philippines:
(Sgd.) + GILBERT A. GARCERA, D.D.
Arsobispo ng Lipa
Pangulo ng CBCP
20 May 2026
