SPPC Brooklyn Heights - Bisita ni Santa Teresita ng Niño Hesus

24/05/2026

Mayo 24, 2026
Banal na Misa sa araw ng Linggo

Napakagandang Pagninilay para sa Linggo ng Pentekostes

Sa pagdiriwang natin ng Linggo ng Pentekostes, ginugunita natin ang pagbaba ng Espiritu Santo sa mga apostol. Isang makapangyarihang tagpo kung saan ang mga dating takot, nagtatago, at nag-aalinlangan ay napuspos ng tapang, pag-asa, at pananampalataya. Ang Pentekostes ay hindi lamang paggunita sa isang pangyayari noon, kundi paalala na hanggang ngayon ay buhay at kumikilos ang Espiritu Santo sa ating bawat isa.

Ang salitang Pentekostes ay nangangahulugang “ikalimampung araw.” Ito ay limampung araw matapos ang muling pagkabuhay ng Panginoong Hesus. Sa araw na ito, ipinagkaloob ng Diyos ang Espiritu Santo bilang gabay, lakas, at buklod ng Simbahan.

Ang Espiritu Santo ang siyang nagdadala ng pagkakaisa. Sa Mabuting Balita, kahit iba’t ibang tao, iba’t ibang wika, at iba’t ibang pinagmulan ang naroroon, nagkaunawaan sila dahil sa kapangyarihan ng Espiritu. Ganito rin sa ating buhay. Kapag ang Espiritu Santo ang naghahari sa puso ng tao, namamayani ang pag-ibig, pagpapatawad, pag-unawa, at kapayapaan. Natututo tayong magpakumbaba, makinig, at maghilom ng sugatang relasyon.

Ngunit bakit nga ba nagkakaroon ng pagkakahati-hati? Madalas, ito ay nagsisimula sa kagustuhan ng tao na maging mas magaling kaysa iba, mas kilala, mas makapangyarihan, o laging masunod ang sariling kagustuhan. Kapag nanaig ang yabang at pansariling interes, nawawala ang tunay na diwa ng paglilingkod at pagmamahalan. Sa halip na magtulungan, nagkakaroon ng inggitan, kompetisyon, at pagmamataas. Ang puso ng tao ay madaling matukso na unahin ang sarili kaysa kapakanan ng kapwa.

Dito natin mauunawaan ang gawain ng diyablo. Ang salitang “diyablo” ay nagmula sa salitang Griyego na diabolos na ang ibig sabihin ay “tagapaghati,” “tagapanira,” o “tagapagbintang.” Kaya saan man may pagkakawatak-watak, matinding galit, paninira, at kawalan ng kapatawaran, doon kumikilos ang espiritu ng kasamaan. Ang diyablo ay masaya kapag ang pamilya ay nag-aaway-away, kapag ang magkakaibigan ay nagkakahiwalay, at kapag ang tao ay nabubuhay sa inggit at pagmamataas.

Subalit ang Espiritu Santo ay kabaligtaran nito. Hindi Siya nagtataas ng sarili kundi nagtuturo ng pagpapakumbaba. Hindi Siya naghahasik ng galit kundi nagdudulot ng pagpapatawad. Hindi Siya naghihiwalay kundi nagbubuklod. Kapag tunay na kumikilos ang Espiritu Santo sa puso ng tao, natututo tayong kilalanin na ang bawat biyaya at kakayahan ay hindi para ipagyabang kundi para ibahagi at ipaglingkod sa kapwa.

Kaya ngayong Pentekostes, inaanyayahan tayo ng Panginoon na buksan ang ating puso sa Espiritu Santo. Hayaan nating alisin Niya ang galit, inggit, pagmamataas, at pansariling ambisyon. Palitan nawa ito ng habag, pag-unawa, at pagpapatawad. Sapagkat ang taong puspos ng Espiritu Santo ay nagiging instrumento ng kapayapaan, pagkakaisa, at tunay na pagmamahalan.

Espiritu Santo, pumasok Ka sa aming puso. Paghilumin Mo ang anumang pagkakahati-hati sa aming pamilya, komunidad, at Simbahan. Alisin Mo ang aming pagmamataas at turuan Mo kaming magmahal at magpatawad. Gawin Mo kaming daan ng pagkakaisa at kapayapaan. Amen.

23/05/2026

✨ Halina at makiisa sa pagdiriwang ng Linggo ng Pentekostes! ✨

Inaanyayahan po namin ang lahat na makibahagi sa Banal na Misa bukas Mayo 24, ganap na 6:00 n.u.

Sama-sama nating buksan ang ating puso sa pagkilos ng Espiritu Santo at muling pagningasin ang ating pananampalataya, pag-asa, at pagmamahal sa Diyos.

🔥🕊️ “Sila ay napuspos ng Espiritu Santo.” — Gawa 2:4

Magkita-kita po tayo sa Banal na Misa.

Come, Holy Spirit! ❤️

22/05/2026

Panalangin para sa Halalan ng Brooklyn Heights HOA

Ama naming makapangyarihan,
Ikaw ang bukal ng karunungan, katotohanan, at mabuting pamumuno.
Sa halalan ng Brooklyn Heights HOA,
hinihiling namin ang Iyong paggabay at pagpapala sa bawat miyembro ng aming komunidad.

Buksan Mo po ang aming isip at puso
upang makapili ng mga pinunong may takot sa Diyos,
tapat sa tungkulin, makatarungan, at tunay na naglilingkod para sa kapakanan ng nakararami.

Nawa’y manaig hindi ang pansariling interes,
kundi ang pagkakaisa, katapatan, malasakit, at pagmamahalan sa aming komunidad.

Tulungan Mo po kaming piliin ang mga kandidatong may integridad at mabuting asal, marunong makinig at makipagkapwa, responsable at may malasakit sa bawat residente, marunong mamuno nang may katarungan at pagpapakumbaba, at handang maglingkod nang tapat at hindi para sa sariling kapakinabangan.

Ipaalala Mo rin po sa amin na ang pagboto ay isang mahalagang pananagutan.
Nawa’y maging matalino, mapanuri, at makadiyos kami sa aming pagpili, ayon sa Iyong aral at turo.

Ito po ang aming dalangin,
sa ngalan ni Hesus na aming Panginoon.
Amen.

10/05/2026

𝐏𝐚𝐠𝐧𝐢𝐧𝐢𝐥𝐚𝐲 𝐬𝐚 𝐌𝐚𝐛𝐮𝐭𝐢𝐧𝐠 𝐁𝐚𝐥𝐢𝐭𝐚
𝐌𝐚𝐲𝐨 𝟏𝟎, 𝟐𝟎𝟐𝟔

Sa Mabuting Balita ngayong Linggo, malinaw na ipinapaalala sa atin ng Panginoon na ang tunay na nagmamahal sa Kanya ay ang taong tumutupad sa Kanyang salita at utos. Hindi lamang sapat ang pagmamahal sa Diyos sa pamamagitan ng salita, dasal, o panlabas na gawain. Mahahalaga ang pagdarasal, pagsisimba tuwing Linggo, at pagbibigay ng donasyon sa simbahan, ngunit may mas malalim pang sukatan ang tunay na pag-ibig sa Diyos.

𝐏𝐚𝐚𝐧𝐨 𝐧𝐠𝐚 𝐛𝐚 𝐧𝐚𝐭𝐢𝐧 𝐦𝐚𝐬𝐚𝐬𝐚𝐛𝐢 𝐧𝐚 𝐦𝐚𝐡𝐚𝐥 𝐧𝐚𝐭𝐢𝐧 𝐚𝐧𝐠 𝐏𝐚𝐧𝐠𝐢𝐧𝐨𝐨𝐧?

Una, ang tunay na pagmamahal sa Diyos ay may kasamang tapat na paglilingkod.

Ang taong tunay na umiibig sa Diyos ay handang maglingkod hindi para purihin o kilalanin, kundi dahil nais niyang ipakita ang kanyang pagmamahal sa Panginoon sa pamamagitan ng paglilingkod sa kapwa. Ang paglilingkod ay hindi lamang nasa loob ng simbahan. Ito ay makikita sa pagiging mabuti, mapagkumbaba, matulungin, at tapat sa ating mga tungkulin araw-araw.
Kapag tayo ay naglilingkod nang may pagmamahal at kababaang-loob, doon tunay na sumasalamin ang puso ni Kristo sa ating buhay.

Pangalawa, ang tunay na pagmamahal sa Diyos ay marunong magsakripisyo at magpasan ng krus.
Hindi madaling sumunod sa Panginoon. May mga pagkakataong masasaktan tayo, mapapagod, maiintindihan nang mali, o mapagsasalitaan ng hindi maganda kahit mabuti naman ang ating ginagawa. May mga taong inaalipusta at pinupuna sa kabila ng kanilang kabutihan at paglilingkod.

Ngunit sinabi ng Panginoon na pinagpala ang mga nagtitiyaga at nananatiling mabuti sa kabila ng hirap at pagsubok. Ang bawat sakripisyong iniaalay natin nang may pagmamahal ay hindi nasasayang sa mata ng Diyos. Ang mga umiiyak, nasasaktan, at nagdurusa alang-alang sa kabutihan ay may nakahandang gantimpala mula sa Panginoon.

Ang tunay na nagmamahal sa Diyos ay hindi umaalis kapag mahirap na ang daan. Patuloy siyang lumalakad dala ang kanyang krus kasama si Kristo.

Panghuli at pinakamahalaga, ang tunay na nagmamahal sa Diyos ay tumatanggap at sumusunod sa Kanyang mga utos. Ito ang pinakadiwa ng pagmamahal sa Diyos — ang pagsunod. Sapagkat madaling magsabi ng “Mahal ko ang Diyos,” ngunit ang tunay na tanong ay: sinusunod ba natin Siya? Tinatanggap ba natin ang Kanyang kalooban kahit mahirap? Iniiwasan ba natin ang kasalanan? Pinipili ba nating gumawa ng tama kahit walang nakakakita?

Ang pagsunod sa Diyos ay hindi lamang tuwing Linggo o kapag nasa simbahan tayo. Ito ay araw-araw na pamumuhay ayon sa Kanyang salita.

Mga kapatid, ang tunay na pagmamahal sa Diyos ay hindi nasusukat sa dami ng ating sinasabi, kundi sa lalim ng ating pagsunod, paglilingkod, at pagtitiis alang-alang sa Kanya.

𝐏𝐚𝐧𝐚𝐥𝐚𝐧𝐠𝐢𝐧
Panginoon, turuan Mo po kaming magmahal nang tapat at totoo. Hindi lamang sa salita kundi sa gawa, sa paglilingkod, at sa pagsunod sa Iyong banal na kalooban.
Bigyan Mo kami ng lakas upang makapagtiis sa gitna ng hirap, paninira, at pagsubok. Tulungan Mo kaming magpasan ng aming krus nang may pananampalataya at pag-asa.

Buksan Mo ang aming puso upang lagi naming piliing sundin Ka at mahalin Ka higit sa lahat.
Nawa’y ang aming buhay ay maging patunay ng aming pagmamahal sa Iyo.

Amen.

10/05/2026

Ang SPPC ay malugod na bumabati sa ating masipag na tagapaglingkod na si Sister Jenneth C.Arellano sa kanyang tinanggap na pagkilala mula sa ating Parokya ni San Ildefonso de Guiguinto

"NATATANGING INA, LINGKOD NG SIMBAHAN, IGINAGALANG SA PAMAYANAN at PAROKYANG KINABIBILANGAN."

Maraming Salamat and Congratulations po sis Jenneth.

09/05/2026

SIMBA PO TAYO BUKAS
MAYO 10, 2026 ARAW NG LINGGO
GANAP NA IKA-6:00 NG UMAGA

PLEASE SHARE! KITA-KITA PO TAYO MULI.

04/05/2026

02/05/2026

Mayo 3, 2026 - Banal na Misa

Sa pangunguna ng ating minamahal na pari Reb. P. Nel Santos.

Ikaw ba ay natatakot?
Maraming iniisip?
Naguguluhan?
Punong-puno ng alalahanin?

Sa araw na ito, pakinggan mo si Kristo na nagsasabing:
“Huwag kang mabalisa!”

Isa ito sa mga pinakapanatag at pinakamasarap marinig na paalala mula sa Diyos—isang paanyaya na bitawan ang takot at magtiwala sa Kanya.

May tatlong bagay tayong dapat pagnilayan kung bakit hindi tayo dapat mabalisa:

Una, hindi nagpapabaya ang Diyos.
Sa bawat yugto ng ating buhay—kahit sa gitna ng dilim at kawalan ng katiyakan—naroroon ang Diyos na patuloy na kumikilos. Hindi man natin agad makita ang Kanyang plano, tapat Siya sa Kanyang pangako. Hindi Niya tayo iiwan ni pababayaan kailanman.

Ikalawa, ang Diyos ang ating sandigan.
Kapag tayo’y nanghihina, Siya ang ating lakas. Kapag tayo’y nawawala, Siya ang ating gabay. Sa Kanya tayo maaaring kumapit nang buong tiwala, sapagkat Siya ang matibay na pundasyon na hindi matitinag ng anumang pagsubok.

Ikatlo, ang nananalig sa Kanya ay makagagawa ng Kanyang mga gawa—at higit pa.
Hindi tayo tinatawag ng Diyos para manatiling takot, kundi para mamuhay nang may pananampalataya. Sa pamamagitan ng pagtitiwala sa Kanya, nagiging posible ang mga bagay na akala natin ay hindi natin kayang gawin. Ginagawa Niya tayong instrumento ng Kanyang pag-ibig at kapangyarihan.

✨ Panalangin:
Panginoon, sa dami ng aking iniisip at pinangangambahan, tinuturuan Mo akong magtiwala. Alisin Mo ang aking pagkabalisa at punuin Mo ang aking puso ng kapayapaan. Turuan Mo akong kumapit sa Iyo sa gitna ng pagsubok, at palakasin Mo ang aking pananampalataya upang magawa ko ang Iyong kalooban. Amen.

02/05/2026

Simba po tayo bukas.

Mayo 3, 2026, araw ng Linggo
6:00 ng umaga