16/07/2019
NOVENARIONG PARANGAL KANG SANTIAGO, APOSTOL NING GUINU, PATULUNAN NING PAROKYA AT NING BETIS
MUMUNANG ALDO
JULIO 16
PAMAMASA (Mateo 4:18-22)
Ibat king Evangelio agpang kang San Mateo
King pamaglakad nang Jesus king bebe ning Dayatmalat ning Galilea, ikit no ring aduang mikapatad a magliligo, i Simon a meyaus Pedro, at i Andres a uali na; mibabaldug lang lambat king dayatmalat. At ngana karela, “Tara, tuki ko kanaku, at gauan da kayung magliligo karing tau.” Kanita mu rin likuan do ring karelang lambat at tinuki la kaya.
Ibat karin, sinulung na pa ing keyang pamaglakad at ikit no ring adua pang mikapatad, i Santiago a anak nang Zebedeo ampon i Juan a uali na; atilu king karelang bangka kayabe re i Zebedeong tata ra, lalarinan do ring karelang lambat. Inaus na la naman deti. Kanita mu rin likuan de ing bangka kang tata ra, at tinuki la kang Jesus.
PANALANGIN
O Maligayang Apostol Santiago, a king kamumulan a siualang dimdam mu king Divino Maestro, inyang pilinan na kang maging disipulu na, agad mung inari king lub mu king tuki ka Keya. Sikuil mung agad ing kanauan a yampang na keka ning yatu, at pati na ing pamilya mu, ban lubus kang magdaun at sumuyu king Dios. Alang kapupusan a kapasalamatan ing babie mi king Mayupayang Guinu kaniting kalam a depat Na keka. Sasaplala ra ka at babantug uli ning ganap mung kapamintuan at katapatan a lub a inablas mu Keya. Balamu pin, kekaming patulunan, ing pangakulaput mi karing silung na ning pita ning laman at ing pangasukul kami king sinta ming sarili, iyang makasumbagal king kapamintuan mi king kaburyan na ning Dios at mamintu king mayupayang aus Na. Pakiyabutan mu sana king Guinung Dios ing matapat ming lub Keya antimo Ika, ban king upaya na, apatad mi at siran ing taling gagapus kekami. Ulinita mikabus kami king sablang maka-ibie batabat king pamanyuyu king Dios. Pagkalaman mu na ke mang metung a masampat a pamaningid king tigtig na karing kekaming pusu, ba ming apakamalan at apamintuan ing kaburyan Na antimo Ika, ban keta nung ayapusan da ka king pamanuki mi kang Jesus keti king yatu, makapakyabe na ke man Keka, numabang tangal Keya karin banua. Amen.
