19/09/2026
𝗣atrona 𝗗el 𝗕icol, 𝗚ran 𝗠adre 𝗗e 𝗗ios
𝘌𝘷𝘢𝘯𝘨𝘦𝘭𝘪𝘰: 𝘓𝘶𝘤𝘢𝘴 2,27-35 (𝘚𝘰𝘭𝘦𝘮𝘯𝘪𝘥𝘢𝘥 𝘯𝘪 𝘕𝘴𝘵𝘳𝘢. 𝘚𝘳𝘢. 𝘥𝘦 𝘗𝘦ñ𝘢𝘧𝘳𝘢𝘯𝘤𝘪𝘢).
…
Cada ikatolóng Domingo kan Septiembre kitá digdi sa Bicol nagcecelebrár kan Solemnidad kan satóng Inâ, Nuestra Señora de Peñafrancia. Sabi sa himnong Resuene Vibrante, siya an “𝘗𝘢𝘵𝘳𝘰𝘯𝘢 𝘥𝘦𝘭 𝘉𝘪𝘤𝘰𝘭, 𝘎𝘳𝘢𝘯 𝘔𝘢𝘥𝘳𝘦 𝘥𝘦 𝘋𝘪𝘰𝘴, 𝘴𝘦 𝘴𝘪𝘦𝘮𝘱𝘳𝘦 𝘭𝘢 𝘳𝘦𝘪𝘯𝘢 𝘥𝘦 𝘯𝘶𝘦𝘴𝘵𝘳𝘢 𝘳𝘦𝘨𝘪𝘰𝘯.”
An devoción na iní dinará sa Kabikolan ni Padre Miguel Robles de Covarrubias kan 1710. Labí daá dos milyones katawo an nagpi-pilgrimage sa Naga City cada taón para magsungkô ki Inâ sa mga aldaw na iní.
Ngonian na taon kaiba sa celebración an ika-75 aniversario o diamond jubilee kan pagtugdas kan Arkidiócesis kan Caceres, kan satóng Diócesis kan Legazpi, asín kan Sorsogón.
Sa tahaw kan gabós na iní, marhay na maghapót: Anó man nanggad an totoong devoción sa mahál na Inâ? Ta may mga nagsasabi na iní daáng devoción niatong mga Catolico suwáy sa biblía, o pagsamba na ki María, o singkogan sa tunay na pagtubód.
May duwáng dokumento nin katukdoán kan Simbahan an pwede tang pagkuahan nin simbag: an 𝘔𝘢𝘳𝘪𝘢𝘭𝘪𝘴 𝘊𝘶𝘭𝘵𝘶𝘴 na sinurat ni Papa San Paolo VI kan 1974 asín 𝘈𝘯𝘨 𝘔𝘢𝘩𝘢𝘭 𝘯𝘢 𝘉𝘪𝘳𝘩𝘦𝘯 na sinurat kan CBCP kan 1975. Makua kitá nin tolóng simbag halè sa mga iní.
𝗔𝗻 𝘁𝘂𝗻𝗮𝘆 𝗻𝗮 𝗱𝗲𝘃𝗼𝗰𝗶𝗼𝗻 𝗸𝗶 𝗠𝗮𝗿𝗶𝗮 𝗺𝗮𝗶𝗺𝗯𝗼𝗱 𝘀𝗮 𝗕𝗶𝗯𝗹𝗶𝗮.
Siya an virgen na mangangakì kan Mesías susog sa mga profesía sa Lumang Tipan. Sa Lucas 1,28, sabi saiya ni arcangel Gabriel: “paladan na babae. An Kagurangnan yaon saimo!” Nag-awit man siya sa Lucas 1,48: “poón ngonian aapodón akóng paladan kan gabós na kapag-arakian.” Kayâ kaidtó pa man an Simbahan maogmáng nag-óotób kan profesíang iní ni María.
Asín an enot niyang mga devotos iyo si San José, saiyang agóm, asín si Jesu Cristo, saiyang Akì. Sabi ni San Maximilian Kolbe: “Daí nanggad matakot na masobrahan nin pagkámoót ki María. Ta daí nindo kayang kamòtan siyá labí pa sa pagkámoot ni Jesús.”
𝗔𝗻 𝘁𝘂𝗻𝗮𝘆 𝗻𝗮 𝗱𝗲𝘃𝗼𝗰𝗶𝗼𝗻 𝗸𝗶 𝗠𝗮𝗿𝗶𝗮 𝗱𝗶𝗻𝗮𝗱𝗮𝗿𝗮 𝗸𝗶𝘁𝗮 𝗽𝗮𝘀𝗶𝗿𝗶𝗻𝗴 𝗸𝗶 𝗖𝗿𝗶𝘀𝘁𝗼.
Inoomaw si María nin huli ta siya an Inâ kan Diós, o Theotokos, susog sa katukdoán kan Consejo kan Efeso kaidtóng 431 AD. Siya an pinilì kan Amâ na magin Inâ kan Saiyang Akì. Duminatóng an ilaw kan kinâban na iyó si Cristo huli kan pagsunód ni María sa kabôtan kan Amâ.
Kayâ si San Louis-Marie de Montfort nakapagsabi: “𝘢𝘥 𝘑𝘦𝘴𝘶𝘮 𝘱𝘦𝘳 𝘔𝘢𝘳𝘪𝘢𝘮,” pasiring ki Jesús sa paagi ni María. An devoción ki María na daí nakakaparaní ki Jesús, ginigibo siyang idolo o diós-diósan. Kayâ an satóng devoción ki María dapat dinádará kitá sa devoción man sa Eucaristía, ta kun daí, kulang an satuyang pagtubód.
𝗔𝗻 𝘁𝘂𝗻𝗮𝘆 𝗻𝗮 𝗱𝗲𝘃𝗼𝗰𝗶𝗼𝗻 𝗸𝗶 𝗠𝗮𝗿𝗶𝗮 𝗯𝗶𝗻𝗮𝗯𝗮𝗴𝗼 𝗮𝗻 𝗯𝘂𝗵𝗮𝘆 𝗸𝗮𝗻 𝗦𝗶𝗺𝗯𝗮𝗵𝗮𝗻 𝗮𝘀𝗶𝗻 𝗻𝗶𝗻 𝗹𝗮𝗺𝗯𝗮𝗻𝗴 𝗖𝗿𝗶𝘀𝘁𝗶𝗮𝗻𝗼.
Sabi ni Jesús sa Mateo 7,16: “Mamimidbid nindo sindá sa mga gibo ninda.” Bilang Simbahan na biniyayaan, inaantabayan, asín sinusugò sa misyon, pinapatalubò daw kitá kan satóng pagdevoción ki María sa kabanalan asín sa paghirás kan Evangelio? Nagigi daw kitáng mas maboot, mas mamomòtón, asín mas matinabang sa kapwa?
Si María bakô saná inâ ni Jesús, kundî siyá man nin gabos n ngtutubod k Cristo!
- Father
