18/05/2026
PAGBATI NI PADSAC: Domingo sa Kabanhawan 7
“Hangad ngadto sa Naghalad”
Ang paghangad sa langit usa ka timaan sa pagdayeg ngadto sa Labing Halangdon ug Labawng Makagagahum nga Dios kinsa naghalad sa Iyang bugtong Anak aron luwason ang kalibutan ug aron kapasidunggan ang Iyang Balaan nga Ngalan. Ang paghangad usa ka porma sa pagsalig ug paglaum ngadto sa Dios diin ang tanang panghitabo sa kinabuhi adunay maayong tumong alang sa kaayohan sa Iyang Gingharian.
Diha sa katapusang Domingo sa Kabanhawan, miyahat o mihangad si Hesus sa Langit aron ipadayag ang hingpit nga paninguha sa Dios nga mao ang pagpasidungog diha sa Iyang Balaan nga Ngalan. Gipahinumdom kanato ni Hesus nga diha sa Iyang kalibutanon nga panaw, gihimo Niya ang pagpasidungog sa Iyang Amahan diha sa pagbuhat nga matinud-anon sa mga Sugo pinaagi sa pagsangyaw sa Mensahe aron ma-ila-ila sa kalibutan ang Dios, ug aron magpabilin diha sa mga tinu-an ang mga maayong panag-ingnan nga gipakita ni Hesus nga angayang masunod ug mapadayon.
Daghan kanato karong panahona ang galakaw nga gadungo. Busa daghan ang nakatutok sa yuta. Dinhi sa yuta, nasayod kita nga daghang pagsulay ug pag-antos. Bisan si Hesus nakasinati niana sa dihang gipatay Siya sa Krus. Busa gidasig kita karon nga dili kanunay modungo sa paglakaw niini nga kalibutan. Mohangad usab kita sa Langit tungod kay anaa ang Dios andam kanunay mohatag sa Iyang mga gasa sa Espiritu nga atong gikinahanglan aron mahimo usab nato ang pagpasidungog sa Iyang Halangdon nga Ngalan.
Samtang anaa pa kita niining yuta sa pagsulay ug pag-antos, magpabilin kita nga matinugyanon sa kaugalingon diha sa mga Sugo sa Dios ug mapa-ila-ila Siya pinaagi sa Iyang mga Mensahe aron maangkon nato ang hingpit nga kalinaw ug kahiusahan nga kanunay gi-ampo sa atong Ginoong Hesukristo alang kanato.
MAHANGARON NGA PAGPANIMBAYA KANATONG MGA TIG-PASIDUNGOG NGA KATAWHAN SA GINOO.
