https://www.facebook.com/106912397892190/

San Antonio de Padua Family, Dipolog City (2026)

13/08/2026

AGOSTO 13, 2026 – HUWEBES
Ikanapulog-Siyam nga Semana Sulod sa Tuig
San Ponciano, Papa ug Martir
(Green or Red)

PUDYOT SA EBANGHELYO

Kita isip tawo, masakitan gayod ug tungod niini buot usab kitang mobalos pagpasakit sa uban. Mao kini ang tawo gumikan sa iyang kakulang sa kahingpitan. Bisan tuod subo nga palandongon nga ingon niini ang tawo, dili kinahanglang atong sundon ang lihok sa kasuko ug kasakit. Mahimo nato kining undangon ug palabyon pinaagi sa pagpasaylo. Makapasaylo kita apan kinahanglang ipatuhop ang bili sa gugma – nga ang atong paghigugma molabaw sa atong kasuko ug kasakit. Ang gugma sa Ginoo kanato hilabihan ka dako nga makapasaylo Siya kanato. Unsa ra ang atong sala kon itandi sa gugma sa Dios. Ug tungod kay nakasinati kita sa iyang gugma ug pasaylo, makahimo usab kita sa paghatag niini ngadto sa uban.

ANG PAGBASA GIKAN SA BASAHON NI PROPETA EZEQUIEL (Ez. 12:1-12)

Giingnan ako sa GINOO, “Tawo, nagpuyo ka tipon sa katawhan nga masupilon. May mata sila, apan dili makakita; may dalunggan, apan dili makadungog, kay masupilon man sila.”
“Busa pag-andam ug sudlanan sa imong mga dad-onon, ug sa atubangan nila, lakaw ngadto sa laing dapit sama sa usa ka binihag. Himoa kini panahon sa adlaw; tingali makasabot sila bisan tuod masupilon sila. Pakit-a sila inigdala mo sa gawas sa imong dad-onon; ug sa gabii maoy imong igikan sinaksihan nila. Busloti ang paril ug lusot niini sinaksihan usab nila. Pakit-a sila inig-pas-an mo sa imong dad-onon ug adto agi sa ngitngit nga dapit. Taboni ang imong nawong aron dili mo makita ang imong laktan. Himoon ko ikawng panig-ingnan alang sa katawhan sa Israel.”
Gituman ko ang gisugo kanako sa GINOO. Sa adlaw giandam ko ang akong mga dad-onon, ug sa pagkagabii naglungag ako sap aril ginamit ang kaugalingon kong mga kamot. Naglakaw ako sa ngitngit dala ang akong dad-onon sinaksihan nila.
Sa pagkabuntag giingnan ako sa GINOO, Tawo, kon mangutana kanimo ang masupilong katawhan sa Israel kon unsay imong gibuhat, ingna sila nga nag-ingon ang GINOONG DIOS, ‘Kining maong panagna alang sa pangulo sa Jerusalem ug sa tibuok katawhan sa Israel nga nagpuyo niini.’ Ingna sila, ‘Panig-ingnan ako alang kaninyo; mahitabo kaninyo ang akong gibuhat; mangabihag kamo.’ Ang inyong pangulo magpas-an sa iyang dad-onon diha sa ngitngit samtang maglakaw siya; maglungag siya sa paril ug molusot siya niini. Tabonan niya ang iyang nawong aron dili siya makakita sa iyang laktan.
ANG PULONG SA GINOO.
SALAMAT SA DIOS.

SALMO RESPONSORYO
(Ps. 78:56-57, 58-59, 61-62)

T. Ayaw hikalimti ang mga buhat sa Ginoo.

Gisulay nila ug misukol sila batok sa Dios nga Labing Halangdon, ug wala nila ampingi ang Iyang kasugo-an. Mitalikod sila ug wala magtuman sama sa ilang katigulangan; misumbalik sila sama’g mabudhiong gapasan.
T. Ayaw hikalimti ang mga buhat sa Ginoo.

Gisuko nila Siya sa ilang tag-as nga halaranan ug sa ilang mga diosdios gihaling nila ang Iyang pagpanibubho. Ang Dios nakadungog ug napungot ug gisalikway pag-ayo ang Israel.
T. Ayaw hikalimti ang mga buhat sa Ginoo.

Iyang gitahan ang Iyang kusog aron mabihag, ang Iyang himaya ngadto sa mga kamut sa kaaway. Gibiyaan Niya ang Iyang katawhan aron laglagon ug napungot Siya batok sa Iyang kabilin.
T. Ayaw hikalimti ang mga buhat sa Ginoo.

ALELUYA (Ps. 119:135)
T. Aleluya.
Ipadan-ag ang imong nawong ngari sa imong sulugoon, ug tudloi ako sa imong mga balaod.
T. Aleluya.

ANG PAGBASA GIKAN SA EBANGHELYO SUMALA NI SAN MATEO (Mt. 18:21-19:1)

Unya miduol si Pedro kang Jesus ug nangutana, “Ginoo, makapila ba makasala kanako ang akong isigkatawo ug ako gihapon siyang pasayloon? Makapito ba ?”
Si Jesus mitubag, “Dili kay makapito ra, kondili kapitoan ka pito. Kay ang Gingharian sa Langit sama man sa usa ka hari nga nakighusay sa mga utang sa iyang mga sulugoon. Sa diha nga nagsugod siya paghusay, gidala ngadto kaniya ang usa ka sulugoon nga nakautang kaniya’g milyon ka pesos. Ug tungod kay wala man siyay igong ikabayad sa iyang utang, misugo ang iyang agalon nga ibaligya siya ingon nga usa ka ulipon, lakip ang iyang asawa ug ang iyang mga anak ug ang tanan nga iyaha, aron makabayad siya sa utang. Miluhod ang sulugoon atubangan sa iyang agalon, ug nagpakiluoy nga nag-ingon, ‘Sir, ayaw intawon ako apikiha, kay bayran ko ra ikaw sa tanan!’ Naluoy kaniya ang agalon, busa gipapas niya ang utang sa sulugoon ug iyang gipalakaw.
“Milakaw ang tawo ug gikasugat niya ang usa sa iyang mga kaubang sulugoon nga nakautang kaniya’g pipila lamang ka pesos. Gilabni dayon niya ug gituok, ug giingnan, ‘Bayri na ko sa imong utang!’ Ang iyang kaubang sulugoon miluhod ug nagpakiluoy kaniya sa pag-ingon, ‘Ayaw intawon ako apikiha kay bayran ko ra ikaw!’ Apan, wala siya mosugot; hinonoa, gipapriso niya hangtud nga makabayad sa utang. Sa pagkakita sa ubang sulugoon sa nahitabo, nasubo sila pag-ayo, ug nangadto sila sa ilang agalon ug siya gisuginlan nila sa tanan. Busa gipatawag sa agalon ang sulugoon ug giingnan, ‘Banyaga ka! Gipapas ko ang tanan mong utang kay nagpakiluoy ka man kanako. Angay ka untang malooy sa imong isigkasulugoon, ingon nga ako nalooy kanimo.’ Nasuko pag-ayo ang agalon, ug gipapriso niya ang sulugoon aron silotan hangtud nga makabayad siya sa tanang utang.” Ug gitapos ni Jesus ang sambingay sa pag-ingon, “Ingon usab niana ang buhaton kaninyo sa akong Amahan nga atu-a sa langit kondili kamo mopasaylo sa inyong isigkatawo sa kinasingkasing gayud.” Tapos si Jesus makasulti niining mga butanga, mibiya siya sa Galilea ug miadto sa Judea, tabok sa Suba sa Jordan.
ANG EBANGHELYO SA GINOO.
DAYGON IKAW, O CRISTO

KATILINGBANONG PAG-AMPO

P: Mag-ampo kita sa Ginoo nga isip iyang katawhan nga nakasinati sa iyang pagpasaylo kita makadala sa kalipay sa pakig-uli ngadto sa kalibutan: MALOLOY-ONG HARI, TUGOTI NGA MOBANAW ANG IMONG PASAYLO.

1. Nga ang katawhan sa Dios nga nahimong gawasnon pinaagi sa dugo ni Cristo dili unta magkabahin-bahin apan magpuyo nga masinabtanon ug malinawon. Mag-ampo kita sa Ginoo.

2. Nga kadtong gihapdosan sa mga samad sa mga dautang binuhatan makapahawa unta sa kayugot gikan sa ilang mga kasingkasing ug mahimong bukas alang sa kalinaw ni Cristo. Mag-ampo kita sa Ginoo.

3. Nga kadtong ania uban kanato nga naglisod gayud sa pagpasaylo makaamgo unta sa manggihatagong kaluoy sa Dios alang sa matag usa ug makahimo kita sa pagpasaylo sa kinasingkasing. Mag-ampo kita sa Ginoo.

4. Nga kadtong gihapdusan sa lawum nga lawasnon ug espirituhanong mga samad makakaplag og kaayohan diha sa pasaylo sa Ginoo. Mag-ampo kita sa Ginoo.

5. Nga ang mga magtutuo nga nangamatay mapasaylo sa ilang mga sala. Mag-ampo kita sa Ginoo.

P: Langitnong Amahan, tan-awa uban sa kaluoy ang among mga kapakyasan, luwasa kami gikan sa kagahi sa among mga kasingkasing ug itugot nga kanunay kaming andam mopasaylo sa kasakit ug moalim sa pagkabahin-bahin. Kini among gipangayo pinaagi ni Cristo among Ginoo. Amen.

11/08/2026

AGOSTO 12, 2026 – MIYERKOLES
Ikanapulo’g Siyam nga Semana Sulod sa Tuig
(Green)

KINSA MAN ANG ANGAY’NG MAGLANTAW SA KAAYOHAN SA USAG-USA? Gipaklaro ni Kristo nga matag sakop sa iyang katilingban adunay kaakohan sa iyang mga kauban. Dili kita angay’ng mahisama kang Cain nga moingon, “Magbalantay ba diay ako sa akong igsoon?” Kon aduna kitay igsoon nga motipas ngadto sa daotang dalan, dili nato siya pasagdan. Imbis nga libakon, ato siyang duolon ug tambagan. Kon siya nakapasakit kanato, ato siyang duolon ug pangutan-on kon nganong iya kining gihimo. Ang tuyo sa atong pagduol kaniya dili ang paghukom ug pagpanimalos kondili ang pagpasaylo ug pagpakighiuli. Si Thich Nhat Hanh nag-ingon: “When another person makes you suffer, it is because he suffers deeply within himself, and his suffering is spilling over. He does not need punishment, he needs help.”

ANG PAGBASA GIKAN SA BASAHON NI PROPETA EZEQUIEL (Ez. 9:1-7; 10:18-22)

Unya misinggit ang Dios, “Duol kamong manlalaglag sa siyudad ug dad-a ang inyong hinagiban sa paglaglag.” Ug dihay unom ka tawo nga miduol gikan sa ganghaan didto sa ganghaan sa Templo nga nag-atubang sa amihanan. Nagdala silag hinagiban sa pagpatay ug kuyog kanila ang usa ka tawo nga nagbistig lino, ug nagdalag sulatanan. Unya nanulod sila ug mibarog tupad sa halaran nga tumbaga.
Niining higayona ang himaya sa Dios sa Israel nga diha sa kerubin mikayab ngadto sa pultahan sa balay. Unya gitawag niya ang tawo nga nagbistig lino ug nagdalag sulatanan, ug giingnan siya sa GINOO, “Suroy sa siyudad sa Jerusalem ug butangig patik ang agtang sa tanan nga nanghupaw ug nag-agulo tungod sa mga ngilngig nga buhat nga gihimo sa mga molupyo niini.
Giingnan usab niya ang uban, “Sunod kamo kaniya ug pamatya ninyo sa walay kukaluoy ang mga molupyo sa siyudad. Pamatya ang mga tigulang ug ang mga batan-on ingon man ang kabataan ug kababayen-an, apan ayaw ilakip pagpatay kadtong may patik sa ilang agtang. Sugdi ninyo kini paghimo didto sa akong Templo.” Busa giuna nila pagpamatay ang kadagkoan nga didto sa Templo.
Unya giingnan sila sa Dios, “Lakaw na kamo; hugawhugawi ninyo ang Templo ug lukpa ninyo ang hawanan sa inyong mga pinatay.” Busa nanlakaw sila ug gipamatay ang mga molupyo sa siyudad
Unya gikan sa pultahan sa Templo, ang himaya sa GINOO miadto sa ibabaw sa mga kerubin ug mipabilin didto. Ang mga kerubin milupad uban sa ilang mga ligid, ug mibarog sila sa pultahan sa ganghaan sa Templo sa Ginoo. Kining maong ganghaan diha dapit sa sidlakan. Diha sa ibabaw sa mga kerubin ang himaya sa Dios sa Israel. Mao kini ang mga mananap nga akong nakita didto daplin sa suba sa Sebar, nga nagyayong sa Dios sa Israel nga naglingkod sa iyang trono.
May upat ka nawong ang matag usa kanila ug upat usab ka pako, ug daw kamot sa tawo ang ilang kamot nga diha ilalom sa ilang mga pako. Ang ilang mga nawong mao gayod ang mga nawong nga akong nakita didto sa daplin sa Suba sa Sebar. Silang tanan mipanaw sa walay likoliko.
ANG PULONG SA GINOO.
SALAMAT SA DIOS.

SALMO RESPONSORYO
(Ps. 113:1-2, 3-4, 5-6)

T. Ang himaya sa Ginoo labing taas kay sa kapanganuran.

Dayga ninyo, kamong mga sulugoon sa Ginoo, dayga ang ngalan sa Ginoo. Daygon unta ang ngalan sa Ginoo karon ug hangtud sa kahangturan.
T. Ang himaya sa Ginoo labing taas kay sa kapanganuran.

Gikan sa pagsubang hangtud sa pagsalop sa adlaw, daygon unta ang ngalan sa Ginoo. Labaw sa tanang kanasuran mao ang Ginoo; labaw sa kalangitan ang iyang himaya.
T. Ang himaya sa Ginoo labing taas kay sa kapanganuran.

Kinsay sama sa Ginoo nga atong Dios, nga naglingkod sa trono sa kahitas-an ug nagadung-aw gikan sa langit ug sa yuta nga anaa sa ubos?
T. Ang himaya sa Ginoo labing taas kay sa kapanganuran.

ALELUYA (2 Cor. 5:19)
T. Aleluya.
Ang Dios diha ni Cristo aron pagpasig-uli sa kalibutan ngadto kaniya ug ang Maayong Balita sa pakighiuli iyang gitanyag kanato.
T. Aleluya.

ANG PAGBASA GIKAN SA EBANGHELYO SUMALA NI SAN MATEO (Mt. 18:15-20)

Si Jesus miingon sa iyang mga tinun-an: “Kon ang imong igsoon makasala kanimo, adtoa siya ug pakit-a siya sa iyang sayop. Apan himoa kini nga kamo rang duha. Kon mamati siya kanimo, magkauli ang inyong maayong kabubut-on. Apan kon siya dili mamati kanimo, pagdalag usa o duha ka tawo, aron ‘ang matag sumbong kapamatud-an sa duha o tulo ka saksi’ sumala sa giingon sa kasulatan. Ug kon dili gayod siya mamati kanila, isulti ang tanan ngadto sa iglesia. Ug kon dili siya mamati sa iglesia, isipa siya nga usa ka langyaw o kobrador sa buhis.
Ug busa sultihan ko kamo: ang inyong idili dinhi sa yuta, idili usab didto sa langit, ug ang inyong itugot dinhi sa yuta, itugot usab didto sa langit.
Ug sultihan ko pa gayod kamo: kon duha kaninyo dinhi sa yuta magka-uyon pagpangayo bisag unsang butanga, kini ihatag kaninyo sa akong Amahan nga atua sa langit. Kay kon may duha kun tulo nga magkatigom sa akong ngalan, atua ako uban kanila.
ANG EBANGHELYO SA GINOO.
DAYGON IKAW, O CRISTO

KATILINGBANONG PAGAMPO

P. Maghiusa kita pag-ampo sa Dios Amahan nga mohatag kanila nga makauyon pagpangayo bisag unsang butanga. Sa matag pangamuyo, kita moingon: DUNGGA KAMI KANUNAY, GINOO.

1. Nga ang Simbahan sa kanunay mahimong instrument sa pakig-uli ug pagsinabtanay. Mag-ampo kita sa Ginoo.

2. Nga ang nangulo sa kanasuran motahod unta sa ilang mga kasabutan ug mahimong abli sa pagpatalinghog sa uban. Mag-ampo kita sa Ginoo.

3. Nga ang mga huwes magbaton kanunay sa hustisya ug mahimong balanse sa ilang pagtimbangtimbang sa mga kaso nga gisang-at kanila. Mag-ampo kita sa Ginoo.

4. Nga ang mga kabus, mga masakiton, mga walay trabaho, ug mga nabug-atan sa nagkadaiyang suliran sa kinabuhi, nga tabangan ug lig-onon sila sa Dios. Mag-ampo kita sa Ginoo.

5. Nga ang mga nangamatay maputli ug maangayan alang sa presensya sa Dios didto sa langit. Mag-ampo kita sa Ginoo.

P. Langitnong Amahan, patalinghugi ang imong katawhan nga nagkatigom diha sa pag-ampo sa ngalan ni Cristo nga among Ginoo. Amen.

11/08/2026

AGOSTO 11, 2026 – MARTES
Ikanapulo’g Siyam nga Semana Sulod sa Tuig
Santa Clara, Birhen; Memorial
(White)

Si SANTA CLARA usa ka relihiyosa. Sa nagpanuigon pa siya og 15 nadani na siya sa pagsangyaw ni San Francisco. Nahimo siya nga higala ni San Francisco nga iyang magbalantay sa espirituhanong kinabuhi. Sa pag-abot sa panuigon nga 21, si San Francisco nagmando kaniya sa pagsunod sa pagdawat sa katungdanan isip usa ka pangulo sa mga madre nga diin iyang gipadayon hangtud sa iyang kamatayon.

PUDYOT SA EBANGHELYO

Daghan kaayo ang mga hiyas sa mga bata nga angayan natong sundugon aron makasulod kita sa Gingharian. Apan ang labawng nakahatag ug pagtagad sa atong Ebanghelyo karon mao nga, sa mga nagsunod nga pagbasa gihulagway ang usa ka bata nga sama sa usa ka nawala nga karnero. Ang kabataan, sama sa karnero malagmit mahisalaag ug wala kanunay kanila ang maayong panig-ingnan. Apan ang mga butang nga makahaw-as kanila sa kadaot mao kini : Ang mga kabataan ug ang mga nawala nga karnero - sayon rang ibalik ngadto sa hustong dalan. Sayon ra ang pagbadlong ug pagtudlo sa mga kabataan; Ang nahisalaag nga karnero wala gayud makalakaw sa layu ug malagmit nga anaa ra nagpahulay sa unahan. Bisan pa niining atong nastinati ug bisan unsa pay mahitabo kanato, magpabilin kitang andam kanunay nga makakat-on.

ANG PAGBASA GIKAN SA BASAHON NI PROPETA EZEQUIEL (Ez. 2:8-3:4)

Ang Ginoo miingon kanako, “Apan ikaw, tawo, ayaw pagmasupilon sama kanila; bukha ang imong ba-ba ug kan-a ang ihatag ko kanimo.” Unya dihay kamut nga gituy-od ngari kanako ug may gikuptan kining linukot nga basahon.
Gibukhad niya kini sa akong atubangan ug may sulat kini sa luyugluyo; ang nahisulat niini bahin sa pagbangotan ug kagul-anan.
Unya miingon ang Dios kanako, “Tawo, kan-a kining basahon ug Iakaw ug sultihi ang katawhan sa Israel.” Busa ginganga ko ang akong ba-ba ug gihatag niya kanako ang basahon.
Ug miingon siya, “Tawo, kan-a kini aron mabusug ka.” Busa gikaon ko kini ug sama kini katam-is sa dugos.
Unya miingon na usab siya kanako, “Tawo, lakaw ngadto sa katawhan sa Israel ug sultihi sila sa akong mga pulong.”
ANG PULONG SA GINOO.
SALAMAT SA DIOS.

SALMO RESPONSORYO
(Ps. 119:14, 24, 72, 103, 111, 131)

T. Katam-is tagamtamon sa imong saad.

Sa paagi sa imong mga gimbut-an nalipay ako, ingon ug diha sa tanang mga bahandi.
T. Katam-is tagamtamon sa imong saad.

Oo, ang imong mga sugo mao ang akong kalipay; sila ang akong mga magtatambag.
T. Katam-is tagamtamon sa imong saad.

Ang balaod sa imong ba-ba mas bililhon alang kanako kay sa linibo nga bulawan ug plata.
T. Katam-is tagamtamon sa imong saad.

Katam-is tagamtamon sa imong mga saad, mas matam-is kay sa dugos alang sa akong ba-ba.
T. Katam-is tagamtamon sa imong saad.

Ang imong mga sugo maoy akong sulondon hangtud sa kahangturan; sila ang kalipay sa akong kasingkasing.
T. Katam-is tagamtamon sa imong saad.

Naghingahinga ako sa kahidlaw alang sa imong mga sugo.
T. Katam-is tagamtamon sa imong saad.

ALELUYA (Mt. 11:29)
T. Aleluya.
Isangon ang akong yugo ug sunda ninyo ako, kay malumo ako ug mapa-ubsanon sa espiritu, ug makapahulay kamo.
T. Aleluya.

ANG PAGBASA GIKAN SA EBANGHELYO SUMALA NI SAN MATEO (Mt. 18:1-5,10,12-14)

Niadtong higayona ang mga tinun-an nangadto kang Jesus ug nangutana, “Kinsa man ang labing dako sa Gingharian sa Langit?”
Si Jesus mitawag ug usa ka bata ug gipatindog niya sa atubangan nila, ug miingon siya, “Hinumdomi kini: gawas kon mausab kamo ug mahimong sama sa mga bata, dili gayod kamo makasulod sa Gingharian sa Langit. Ang labing dako sa Gingharian sa Langit mao ang magpaubos sa iyang kaugalingon ug magpakasama niining bataa. Ug ang magadawat ug usa ka bata nga sama niini sa akong ngalan, magdawat kanako.”
“Matngoni ninyo nga dili kamo magtamay bisag usa niining mga gagmayng bata. Kay sultihan ko kamo nga ang ilang mga anghel atua kanunay sa atubangan sa akong Amahan didto sa langit.”
“Sa inyong hunahuna, unsa may buhaton sa usa ka tawo kon kawad-an siyag usa sa iyang usa ka gatos ka karnero? Iya gayong biyaan ang kasiyaman ug siyam nga manibsib didto sa bungtod ug molakaw siya aron pagpangita sa nawala. Sultihan ko kamo nga inigkakaplag niya niini, mas malipay pa siya pag-ayo tungod niining karneroha kay sa kasiyamag-siyam nga wala mawala. Sa mao nga pagkaagi, ang inyong Amahan nga atua sa langit dili buot nga may mawala bisag usa niining mga gagmayng bata.”
ANG EBANGHELYO SA GINOO.
DAYGON IKAW, O CRISTO

KATILINGBANONG PAGAMPO

P. Mag-ampo kita sa Dios Amahan nga andam mobiya sa tanan aron pagpangita sa usa nga nawala. Sa matag pangamuyo kita moingon: PATALINGHUGI KAMI, GINOO.

1. Nga ang mga lideres sa simbahan makabaton unta sa mapaubsanon ug malumo nga kasingkasing ni Cristo. Mag-ampo kita sa Ginoo.

2. Nga panalipdan unta sa atong panggamhanan ang mga kabataan ug kababayen-an gikan sa pag-asdang sa organisadong krimen sa Human Trafficking. Mag-ampo kita sa Ginoo.

3. Nga mahisama kita sa kinaiya sa mga bata nga adunay dakong pagsalig sa Amahanong pag-atiman ug pagpangga sa Dios. Mag-ampo kita sa Ginoo.

4. Nga kanatong tanan nga gihasol niining COVID-19, nga buhi-on dinhi kanato ang paglaum ug masumpo na kining epidemiya. Mag-ampo kita sa Ginoo.

5. Nga ang mga magtutuong nangamatay dad-on unta sa mga angeles ngadto sa himaya sa Dios. Mag-ampo kita sa Ginoo.

P. Langitnong Amahan, dili ka buot nga may usa sa imong mga anak nga mawala. Hikaplagan unta kami nga kanunay uban ni Cristo nga among Ginoo. Amen.

10/08/2026

AGOSTO 10, 2026 – LUNES
Ikanapulo ug Siyam nga Semana Sulod sa Tuig
SAN LORENZO, Diyakono ug Martir
(Red)

PUDYOT SA EBANGHELYO

Isip diyakono sa Roma si San Lorenzo gisangonan og kaakuhan alang sa material nga panginahanglan sa Simbahan ug sa paghatag og hinabang sa mga timawa. Sa dihang nahibalo-an ni San Lorenzo nga siya sikopon sama sa Santo Papa, iyang gipangita ang mga timawa ug mga ilo sa Roma ug gihatag niya ang tanan niyang salapi, gipamaligya lakip ang mga balaang mga butang aron sa paggamit sa salapi alang sa mga kabus. Sa dihang nahibalo-an kini sa mga pangulo sa Roma ilang nahunahunaan nga ang mga kristiyanos adunay igong katigayonan nga makasuporta sa gahum sa emperador. Apan, wala misanong si San Lorenzo sa ilang gusto. Hinuon, gitigum ni San Lorenzo ug ang daghang mga buta, piang, mga sanglahon, mga ilo ug balo ug iyang gipresentar ngadto sa atubangan sa pangulo uban sa pag-ingon:” kini ang katigayonan sa simbahan.” Tungod niini nasuko kaniya ang tanang mga pangulo sa Roma ug ilang gipapatay sa hinahinay si San Lorenzo pinaagi sa pagsugba kaniya sa nagdilaab nga sugbaanan. Malipayon si San Lorenzo sa pagdawat sa maong pagpaantus ug miingon siya ngadto sa mga nagsugba kaniya, “natapos na, bahina ug kan-a ninyo ang akong lawas.”

ANG PAGBASA GIKAN SA IKADUHANG SULAT NI SAN PABLO NGADTO SA TAGA-CORINTO (2 Cor. 9:6-10)

Timan-i nga ang nagpugas ug diyotay, mag-anig diyotay; apan ang nagpugas og daghan, mag-anig daghan. Busa kinahanglan mohatag ang tagsatagsa sumala sa iyang gusto, ug dili magbagutbot ni maghunahuna nga gipugos siya, kay ang Dios nahigugma sa nahatag nga malipayon. Ug makahatag ang Dios kaninyo og labaw pa kay sa inyong gikinahanglan, nga tungod niini makabaton kamo sa tanan ninyong kinahanglanon, ug sobra pa gani alang sa tanang maayong buhat. Sumala sa giingon sa Kasulatan, “Mahinatagon kaayo siya sa mga kabus, Ug nagpadayon sa walay katapusan ang iyang kaluoy.” Ug ang Dios nga maoy naghatag og binhi sa magpupugas ingon man sa pan aron kan-on, maghatag usab kaninyo sa binhi nga inyong gikinahanglan, ug magpatubo niini aron makaanig dako gikan sa inyong pagkamahinatagon.
ANG PULONG SA GINOO.
SALAMAT SA DIOS.

SALMO RESPONSORYO
(Ps. 112:1-2, 5-6, 7-8, 9)

T. Bulahan ang tawo nga maloloy-on ug nagapahulam kanila nga nagkinahanglan.

Bulahan ang tawo nga mahadlokon sa Ginoo, nga naglipay pag-ayo diha sa iyang mga sugo. Ang iyang kaliwat mahimong gamhanan ibabaw sa yuta; ang matarong nga kaliwat pagadaygon.
T. Bulahan ang tawo nga maloloy-on ug nagapahulam kanila nga nagkinahanglan.

Maayo ang tawo nga manggihatagon ug magpahulam, nga nagadumala sa iyang kabtangan uban sa katarong; Dili gayod siya matarog; ang matarong nga tawo hinumduman kanunay.
T. Bulahan ang tawo nga maloloy-on ug nagapahulam kanila nga nagkinahanglan.

Dili siya mahadlok sa dautang taho; malig-on ang iyang kasingkasing, masaligon sa Ginoo. Ang iyang kasingkasing dili matarog; dili siya mahadlok hangtud masud-ong niya ang iyang mga kaaway.
T. Bulahan ang tawo nga maloloy-on ug nagapahulam kanila nga nagkinahanglan.

Kusog siya nga mohatag sa mga kabus; ang iyang kamanggihatagon molungtad sa gihapon; ang iyang gahum ibayaw ngadto sa himaya.
T. Bulahan ang tawo nga maloloy-on ug nagapahulam kanila nga nagkinahanglan.

ALELUYA (Jn. 8:12)
T. Aleluya.
Ako mao ang kahayag sa kalibutan, nag-ingon ang Ginoo; ang tawo nga magsunod sa akong kabubut-on makabaton sa kahayag sa kinabuhi.
T. Aleluya.

ANG PAGBASA GIKAN SA EBANGHELYO SUMALA NI SAN JUAN (Jn. 12:24-26)

Si Jesus miingon sa iyang mga tinun-an: “Sultihan ko kamo: ang usa ka Iugas nga trigo magpabilin nga usa ra gayod ka lugas gawas kon kini ipugas sa yuta ug mamatay. Kon kini mamatay, mamunga kinig daghan. Ang magmahal sa iyang kaugalingong kinabuhi mawad-an hinoon niini, apan ang dili mahinugon sa iyang kinabuhi niining kalibutana, magpatunhay niini alang sa kinabuhing dayon. Ang buot mag-alagad kanako kinahanglan mosunod kanako aron kon hain ako, atua usab ang akong sulugoon. Ang akong Amahan magpasidungog kaniya nga mag-alagad kanako.”
ANG EBANGHELYO SA GINOO.
DAYGON IKAW, O CRISTO

KATILINGBANONG PAG-AMPO

P: Sa tumang pagsalig, ato karong ihalad sa Dios ang atong mga pag-ampo. Ug sa matag pangamuyo kita moingon: GINOO PATALINGHOGI ANG AMONG MGA PAG-AMPO

a.) Alang sa atong Santo Papa, Francisco, nga Obispo, mga kaparian ug mga relihiyoso, nga sa tanang higayon makabaton sila ug dakung pagsalig sa Ginoo ug ang Espiritu Santo kanunay magagiya ug magalamdag kanila. Mag-ampo kita sa Ginoo.

b.) Alang sa mga opisyales sa atong gobyerno, nga unta ilang mahuptan ang hiyas sa pagkamaalagaron sa tanang katawhan pinasubay sa hustisya, kalinaw ug gugma. Mag-ampo kita sa Ginoo.

c.) Alang sa mga ginikanan nga ilang anak midawat sa bokasyon sa pagkapari ug pagkarelihiyoso, nga sa kanunay ila silang dasigon sa pagpadayon sa pag-alagad sa tibuok katawhan sa Dios. Mag-ampo kita sa Ginoo.

d.) Alang sa atong mga kaigsoonan nga mihalad sa ilang kaugalingon ngadto sa Dios isip pari ug madre, nga unta sa ilang pagtubag ang tawag sa Dios, ilang maamgohan ang dakong responsibilidad nga gisangon sa Dios kanila ug nga sila makalahutay hangtud sa katapusan sa ilang kinabuhi. Mag-ampo kita sa Ginoo.

e.) Alang kanatong tanan nga nagkahiusa karon, nga unta atong mapanaminan ang kinabuhi sa atong mga kaigsoonan nga nahimong santos ug nga kini maoy himoon natong panig-ingnan alang sa atong pagpakabuhi karon. Mag-ampo kita sa Ginoo.

P: Ginoong Dios namo, amo nang gipadayag nganha Kanimo ang among mga panginahanglan. Dasiga kami kanunay sa pagsunod sa Imong kabubut-on pinaagi ni Jesus nga among Ginoo. Amen.

08/08/2026

AGOSTO 9, 2026 - DOMINGO
Ikanapulo’g Siyam nga Domingo sa Ordinaryong Panahon
(Green)

Tema: Pagtoo sa Ginoo, Palambuon ug Lig-onon.

Buot usab kitang mosinati sa kinabuhi nga nagalakaw uban ni Jesus. Ang pagtulon-an sa Balaang Kasulatan nagdala kanato sa pagpamalandong: Unsa ba ang mga babag sa atong paglakaw uban ni Jesus? Ang gisaysay sa Ebanghelyo nagpadayag sa unang babag: Kahadlok. Bisan asa, ang kahadlok makapaundang ug makawala sa atong pagsalig sa kaugalingon, ngadto sa uban, ug sa Ginoo. Si Pedro nakahimo sa unang higayon hangtud nga ang kahadlok miigo kaniya. Dili gayud ikatingala nga kon ang Ginoo magtawag ug tawo ngadto kaniya, ang makanunayon niyang pulong mao gayud ang: “Ayaw kahadlok....” Ang Espiritu sa Ginoo mao ang kalinaw, ug ang kalinaw magwagtang sa tanang kahadlok. Ang makatandog nga pulong sa Ebanghelyo karong adlawa mao ang mga pulong ni Pedro - “Ginoo, kon ikaw ka na, palakwa usab ako sa tubig.” Kining mga pulonga nagpadayag og dakung pagtoo ngadto kang Jesus. Apan makaingon ba kita nga kining iyang gipakita nga pagtoo tungod ba lamang kay una, iyang nakita si Jesus nga naglakaw sa tubig taliwala sa mga dagkung balud. Adunay nagsulat: “Leadership can be defined as the art of showing the way by going first.” Alang sa mga desipulo nga naninggit: “Multo kana!”. - Busa ang gibuhat ni Pedro usa ka timaan sa pagkapangulo. Dili ikahibulong nga gipili siya ni Jesus nga pangulo sa pundok sa mga sumusunod.

ANG PAGBASA GIKAN SA UNANG BASAHON SA MGA HARI (1 Kgs. 19:9, 11-13)

Miabot si Elias sa usa ka langob ug mipuyo siya didto; ug giingnan siya sa GINOO, “Unsay gibuhat mo dinhi, Elias?” Ang GINOO miingon, “Lakaw ug barog sa tumoy sa bukid atubangan sa GINOO.” Unya miaagi ang GINOO ug may kusog nga hangin nga mihapak sa kabukiran, ug nangatipak ang ang mga bato, apan ang GINOO wala diha sa hangin, Ug human sa hangin, miabot ang linog, apan ang GINOO wala diha wala diha sa linog. human sa linog, misunod ang kalayo, apan ang GINOO wala diha sa kalayo ug human sa kalayo may hinay ug malumong tingog.
Sa pagkabati niini ni Elias, gitabonan niya ang iyang nawong sa iyang bisti ug migawas siya ug mibarog sa agianan sa langob. Ug may tingog nga miingon kaniya, “Unsay gibuhat mo dinhi Elias?”
Ang Pulong sa GINOO.
Salamat sa DIOS.

SALMO RESPONSORYO
(Ps. 85:9-10, 11-12, 13-14)

T. Ginoo, patan-awa kami sa Imong kaayo, ug ihatag kanamo ang Imong kaluwasan.

Pamati-on ko ang gisangyaw sa Dios; sa Ginoo-kay nagasangyaw siya sa kalinaw. Haduol gayod ang Iyang kaluwasan kanila nga mahadlokon Kaniya, ang himaya nagapuyo sa atong yuta.
T. Ginoo, patan-awa kami sa Imong kaayo, ug ihatag kanamo ang Imong kaluwasan.

Ang kaluoy ug ang kamatuoran magatagbo; ang katarung ug kalinaw maghagkanay. Ang kamatuoran mogitib gikan sa yuta, ug ang katarong modung-aw gikan sa langit.
T. Ginoo, patan-awa kami sa Imong kaayo, ug ihatag kanamo ang Imong kaluwasan.

Ang Ginoo mohatag sa Iyang mga kaayohan; ug ang atong yuta mohatag sa Iyang abot; Ang katarong maglakaw sa Iyang atubangan, ug ang kaluwasan diha sa Iyang pagaagian.
T. Ginoo, patan-awa kami sa Imong kaayo, ug ihatag kanamo ang Imong kaluwasan.

ANG PAGBASA GIKAN SA SULAT NI SAN PABLO NGADTO SA TAGA-ROMA (Rom. 9:1-5)

Mga igsoon: Matood ang giingon ko nga iya ako ni Cristo ug wala ako mamakak. Ang akong konsensya nga gilamdagan sa Espiritu Santo maoy akong saksi nga wala ako magbakak. Gibati ko ang hilabihang kasubo ug kaguol nga walay hunong alang sa akong isigka-Judio-mga kabanay ug mga kadugo ko. Tungod kanila palabihon ko nga tunglohon ako sa Dios ug mahimulag kang Cristo. Sila mao ang piniling katawhan sa Dios; gisagop sila ingon nga mga anak sa Dios ug gipaambit sa iyang himaya; ug nagahimo siyag mga kasabotan uban kanila ug gihatagan sila sa balaod. Ila ang matuod nga pagsimba, ug nakadawat sila sa mga saad sa Dios. Kaliwat sila sa mga patriyarka, ug sa ilang kaliwatan natawo si Cristo. Ang Dios nga labaw sa tanan daygon unta hangtod sa kahangtoran. Amen.
Ang Pulong sa GINOO.
Salamat sa DIOS.

ALELUYA (Ps. 130:5)
A leluya! Aleluya!
Naghulat ako nga mahinangpon sa panabang sa GINOO,
ug misalig ako sa iyang pulong.
Aleluya! Aleluya!

ANG PAGBASA GIKAN SA EBANGHELYO SUMALA NI SAN MATEO (Mt. 14:22-33)

Unya gipasakay ni Jesus ang mga tinun-an sa sakayan ug gipauna niya ngadto sa tabok sa lanaw, ug iyang gipalakaw ang mga tawo. Tapos niya palakta ang mga tawo, mitungas siya nga nag-inusara sa usa ka bungtod aron pag-ampo. Ug sa pagkagabii na, si Jesus nag-inusara didto. Niadtong tungora ang sakayan didto na sa lawod, gikusokuso sa mga balod, kay ang hangin sungsungon man.
Sa may mga alas tres sa kaadlawon, si Jesus miadto kanila nga naglakaw sa tubig. Sa pagkakita sa mga tinun-an kaniya nga naglakaw sa tubig, nangahadlok sila pag-ayo. “Anaay multo!” miingon sila, ug naniyagit sila sa kalisang.
Si Jesus miingon kanila, “Ayaw kamo kahadlok! Ako kini!”
Unya si Pedro miingon, “Ginoo, kon ikaw kana, palakta ako sa tubig nganha kanimo.”
“Dali ngari,” mitubag si Jesus. Busa mikawas si Pedro sa sakayan ug milakaw sa tubig ngadto kang Jesus. Apan sa pagkamatikod niya sa hangin, nahadlok siya ug misugod pagkaunlod. “Ginoo, luwasa ako!” misinggit siya. Dihadiha gidawat siya ni Jesus ug gibira ug miingon si Jesus kaniya, “Pagkadiyutay sa imong pagtuo! Nganong nagduhaduha ka man?” Ug nanakay silang duha sa sakayan, ug milurang ang hangin. Ang mga tinun-an nga didto sa sakayan misimba kang Jesus, ug miingon, “Ikaw gayod ang Anak sa Dios!”
ANG EBANGHELYO SA GINOO.
DAYGON IKAW, O CRISTO.

The Creed is said.

KATILINGBANONG PAG-AMPO

P: Mag-ampo kita isip maunongong katawhan sa Dios nga naglantaw kang JesuCristo. Sa atong kasayuran sa iyang pagdasig sa nagka-awop nga pagtoo ni San Pedro, kita nakamatngon nga ania ra diay siya kanunay uban kanato, ang iyang kamot gituyhad aron sa paglig-on ug pagpabakod kanato: ANAK SA DIOS, LUWASA KAMI.

1. Nga ang Simbahan sa Dios nga tatawng nahiusa libot sa sumusunod ni Pedro ug sa mga apostoles, maggiyahan pinaagi sa gahum sa presensiya sa Dios taliwala sa mga suliran ug mga unos nga ilang nasugamak. Mag-ampo kita sa Ginoo.

2. Nga maanaa unta ang kalinaw ug hustisya sa mga nasud nga gibahin-bahin sa gubat ug sa panagbingkil. Mag-ampo kita sa Ginoo.

3. Nga kadtong gipadpad nga walay tumong sa unos sa kadagatan sa kinabuhi makadangup sa Simbahan nga maoy malinawon nga tagoanan. Mag-ampo kita sa Ginoo.

4. Nga ang mga masakiton makakaplag og kahupayan diha sa makaayong kalooy ni Cristo. Mag-ampo kita sa Ginoo.

5. Nga ang mga magtotoo nga nangamatay makadangat sa langitnong kapahulayan diha sa presensiya sa Ginoo. Mag-ampo kita sa Ginoo.

P: Ginoong Dios, sa imong pagdawat niining mga pag-ampo, hatagi kami sa kalig-on sa pagtoo ug masunoron nga pagsalig sa imong Anak among Manluluwas kinsa nagapuyo ug nagahari uban kanimo hangtod sa kahangturan. Amen.

San Antonio de Padua Family

13/08/2026

11/08/2026

11/08/2026

10/08/2026

08/08/2026

Address

Website

Alerts

Shortcuts

Share

Category

Listing takedown request