https://www.facebook.com/106912397892190/

San Antonio de Padua Family, Dipolog City (2026)

18/05/2026

MAYO 19, 2026 - MARTES
Ikapito nga Semana sa Pasko sa Pagkabanhaw
(White)

PUDYOT SA EBANGHELYO

UNSA MAN ANG KINABUHING DAYON?

Ang kinabuhing dayon wala lamang magpasabot og kinabuhing walay katapusan. Ang natad sa syensa ug medisina nagsigig pangitag mga paagi sa pagpalungtad sa kinabuhi sa tawo, apan kini dili garantiya sa usa ka maayong kinabuhi para kanato. Para asa man ang kinabuhi nga taas kon kini dili malipayon o makahuloganon? Para sa Balaang Kasulatan, ang kinabuhing dayon dili lamang katas-on sa kinabuhi (quantitative) kondili kalidad sa kinabuhi (qualitative). “Kini ang kinabuhing dayon, nga sila makaila Kanimo, ang bugtong matuod nga Dios, ug ang Imong gipadala, si HesuCristo.” Nga sa ato pa, ang kinabuhing dayon mao ang usa ka kinabuhi nga nahilambigit pag-ayo sa Buhing Dios, ug tungod niini, puno sa kalinaw, kalipay ug gugma nga walay sama.

KINUTLO GIKAN SA MGA BUHAT SA MGA APOSTOLES (Acts 20:17-27)

Samtang didto si Pablo sa Mileto gipasugoan niya ang mga pangulo sa simbahan sa Efeso aron paghangyo kanila sa pagpakigkita kaniya. Sa pag-abot nila, miingon siya, “Nasayod kamo giunsa ko paggamit ang tibuok kong panahon samtang ako uban pa kaninyo, sukad sa unang adlaw pag-abot ko sa lalawigan sa Asia. Uban sa dakong pagpaubos ug mga luha, nag-alagad ako ingon nga sulugoon sa Ginoo, bisan pa sa mga kalisdanan nga midangat kanako gumikan sa mga dautang laraw sa mga Judio. Nasayod kamo nga wala akoy gihikaw bisan unsa nga makatabang kaninyo samtang nagwali ug nagtudlo ako kaninyo sa atubangan sa katawhan ug diha sa inyong mga puloy-anan. Giawhag ko ang mga Judio ug ang mga dili Judio sa paghinulsol ug pagbalik ngadto sa Dios ug sa pagtuo sa atong Ginoong Jesus. Ug karon, minandoan sa Espiritu Santo, moadto ako sa Jerusalem ug wala ako masayod kon unsay mahitabo kanako didto. Ang nahibaloan ko lamang mao nga ako gipasidan-an sa Espiritu Santo nga sa matag siyudad naghulat kanako ang prisohan ug ang mga kasamok. Apan giisip ko ang akong kinabuhi nga walay bili basta lamang matapos ko ang buluhaton nga gihatag sa Ginoong Jesus kanako nga mao ang pagsangyaw sa Maayong Balita sa grasya sa Dios.
“Naduaw ko na kamong tanan ug nawalihan mahitungod sa Gingharian sa Dios. Ug karon nasayod ako nga dili na kita magkita pag-usab. Busa niining adlawa sultihan ko kamo sa walay lipod-lipod nga kon aduna man kaninyoy dili maluwas, ayaw ako ninyog basola. Kay wala ako magpanuko sa pagpadayag kaninyo sa bug-os nga tuyo sa Dios.
ANG PULONG SA GINOO.
SALAMAT SA DIOS

SALMO RESPONSORYO
(Ps. 68:10-11, 20-21)

T. Awiti ang Dios, O mga gingharian sa yuta.

Daghang ulan imong gibubo, O Dios, sa imong kabilin; imong kabilin; imong igulian ang yuta sa iyang katambok. Ang panon sa imong mga karnero imong gipapuyo didto; sa imong kaayo, O Dios, imong giandam kini alang sa mga hangol.
T. Awiti ang Dios, O mga gingharian sa yuta.

Dalaygon sa tanang adlaw ang Ginoo, nga nagapas-an sa atong karga; ang Dios nga atong kaluwasan. Ang Dios maoy Dios nga Manluluwas kanato; ang Ginoo, akong Ginoo, maoy magbuot sa kamatayon.
T. Awiti ang Dios, O mga gingharian sa yuta.

Alleluia
ALELUYA (Jn. 14:16)
T. Aleluya.
Mangayo ako sa Amahan, ug hatagan kamo niyag laing Manlalaban, ang Espiritu sa kamatuoran, aron makig-uban kaninyo hangtod sa kahangtoran.
T. Aleluya.

KINUTLO GIKAN SA EBANGHELYO SUMALA NI SAN JUAN (Jn. 17:1-11)

Human makasulti si Jesus niini, miyahat siya sa langit ug miingon, “Amahan, miabot na ang takna! Pasidunggi ang imong Anak aron ang Anak magpasidungog kanimo, kay gihatagan mo siyag gahum pagmando sa tanang tawo aron hatagan niyag kinabuhing dayon ang tanan nga imong gitugyan kaniya. Ug kini mao ang kinabuhing dayon: nga ang mga tawo moila kanimo, ang bugtong matuod nga Dios, ug kang JesuCristo nga imong gipadala. Gipasidunggan ko ikaw dinhi sa kalibutan ug gituman ko ang imong gipabuhat kanako. Karon, Amahan, pasidunggi ako diha sa imong pagpakig-uban kanako, sa dungog nga akong gihuptan uban kanimo sa wala pa buhata ang kalibutan.”
“Gipaila ko ikaw sa mga tawo nga imong gikuha gikan sa kalibutan ug gihatag mo kanako. Imo sila ug gitugyan mo sila kanako. Gituman nila ang gisulti mo kanila, ug karon nahibalo sila nga ang tanan nga gihatag mo kanako naggikan kanimo. Gihatag ko kanila ang mensahe nga imong gitugyan kanako ug kini gidawat nila; nasayod sila nga tinuod nga ako gikan kanimo, ug nagtuo sila nga ikaw ang nagpadala kanako.”
“Nag-ampo ako alang kanila; wala ako mag-ampo alang sa kalibutan kondili alang sa mga tawo nga imong gitugyan kanako, kay imo man sila. Ang tanan nga akoa, imo; ug ang tanan nga imo, akoa; ug diha kanila gipasidunggan ako. Ug karon moanha ako kanimo; dili na ako magdugay dinhi sa kalibutan, apan magpabilin sila dinhi. Balaang Amahan, bantayi sila diha sa gahom sa imong ngalan ang ngalan nga imong gihatag kanako, aron sila mausa ingon nga ikaw ug ako usa lamang!”
ANG EBANGHELYO SA GINOO.
DAYGON IKAW, O CRISTO

KATILINGBANONG PAG-AMPO

P: Gitagna ni Cristo atong Ginoo ang iyang makaluwas nga kamatayon ug pagkabanhaw. Pinaagi kaniya, ang maantosong sulugoon, atong dalhon ang atong mga hangyo ngadto sa Amahan sa tanang kaluoy: DUNGGA KAMI, GINOO.

1.Nga ang mga nangulo sa Simbahan makapakita unta kanato sa tataw nga panglantaw sa mapailubong paglahutay diha sa kaguliyang sa atong panahon. Mag-ampo kita.

2.Nga ang mga nasud makaila lamang sa usa ka Dios ug ni JesuCristo kinsa iyang gipadala. Mag-ampo kita.

3.Nga ang kasakitan sa mga masakiton mahiusa sa mga kasakitan ni Jesus didto sa krus. Mag-ampo kita.

4.Nga kadtong nangamatay una kanato makadawat sa walay katapusang ganti nga gisaad alang kanila. Mag-ampo kita.

P: Amahan, Dawata ang among mga pangaliyupo tungod kay imo kami. Kini among gipangayo pinaagi ni Cristo nga among Ginoo. Amen.

16/05/2026

MAY 17, 2026 - DOMINGGO
SOLEMNIDAD SA PAGSAKA SA LANGIT SA GINOO
(White)

TUDLING SA EBANGHELYO

Kasagaran kanato naglaum gayud nga matuman ang mga saad nga atong nadawat ug nadunggan. Ang tanang saad nga kanunay natong madawat og gilauman mao ang kaayohan. Nagalaum kita sa mga saad nga makahatag kanato og higayon nga makatagamtam og kahayahay, kabantugan, maayong panginabuhi, maayong panglawas ug makapahilayo kanato sa kadautan. Sama sa saad nga kita tabangan sa pagbayad sa atong nagasto sa pag-eskuwela gikan sa gobyerno o saad nga mahatagan kita og maayong trabaho ug ang saad nga hatagan kita og regalo panahon sa atong birthday ug Christmas.
Tanang gidawat nato nga mga saad maayo ug naglaum kita nga kung matuman lamang kini mahimong mabag-o ang estado sa atong kinabuhi. Apan, bisan tuod dili kita sigurado sa katumanan niining mga saad nagpabilin gihapon kita nga malaumon nga ato untang madawat ug maangkon kini. Ang uban sa kanato nakasinati na og kapakyasan sa mga saad, apan dili nato ikalimod nga nagpabilin gihapon kitang malaumon. Kalipay ug pasalamat ang kanunay natong mabati sa matag saad nga natuman sa atong kinabuhi. Kung naglaum kita sa mga saad sa kalibutan ug malipayon kita nga nidawat niini, unsa pa kaha sa mga saad sa Ginoo. Si Jesukristo mao ang gisaad nga moanhi sa kalibutan aron pagluwas kanatong tanan ug karon Siya naghatag kanato sa paglaum sa katumanan sa atong pangandoy; ang hingpit nga kalipay ug kinabuhing walay katapusan.
Ang Ginoo dili gayud motugot nga dili matuman ang Iyang mga saad. Si Jesus nga atong paglaum nagpahinumdom kanato karon nga angayan lamang kita molaum Kaniya. Busa karong adlawa ang tibuok Simbahan nagsaulog sa Solemnidad sa Pagsaka sa atong Ginoong Jesukristo sa langit. Ang pagsaka ni Jesus sa langit naghatag og paglaum nga matuman gayud ang mga saad sa Amahan. Ang pagsaka sa langit ni Jesus kabahin sa misteryo sa Iyang kinabuhi sa kalibutan. Kini usab usa sa makaluwasnong hitabo alang kanato. Ang pagbalik ni Jesus sa Iyang Amahan gikinahanglan aron mapadala ang Espiritu Santo. Apan ang pagsaka ni Jesus sa langit wala makapahimulag Kaniya sa kalibutan, misamot hinuon ang Iyang pagkaana-a uban sa Iyang mga tinun-an. Si Jesus mipadayon sa paghatag og kadasig sa pagsangyaw sa Maayong Balita ug ang mga Apostoles nagmalaumon kanunay pinaagi sa Iyang mga saad.
Ang pagkayab sa langit sa atong Ginoo wala lamang naghiuli sa Gingharian sa Israel sama sa gilauman sa tibuok banay sa Israel ug sa mga Apostoles nga gihisgotan sa Unang Pagbasa (Buhat 1:6). Apan nagtukod hinuon Siya og bag-ong gingharian nga alang sa tanang katawhan sa tibuok kalibutan. Ang langitnong gingharian nga nagpatuman sa kamatuoran, kabalaan, hustisya, gugma, kalinaw, kahiusahan, ug grasya sa kinabuhi. Ug kini mao ang atong gilauman nga atong matagamtaman pinaagi sa pagtuo.
Sa atong Ebanghelyo karon si Jesus nagsaad nga mopadala sa gisaad sa Amahan nga gasa alang kanato (Lk. 24:49). Kini naghatag kanato og paglaum nga madawat gayud nato ang gisaad nga Espiritu Santo sa Amahan. Natuman gayud kini diha sa Pentekostes. Naghatag usab kini og paglaum nga kita sa umaabot nga panahon makasunod kita kang Jesus didto sa gingharian sa Amahan.
Pagkanindot pamation nga ang atong Ginoo kanunay naghatag og paglaum pinaagi sa pagtuman sa Iyang mga saad. Apan ang paglaum nga gihatag Niya kanato naghagit kanato una, sa pagsangyaw sa Maayong Balita ngadto sa tibuok kalibutan (Lk. 24:47) ug kini mahitungod sa langitnong gingharian nga puno sa kalipay, gugma ug panaghiusa. Ikaduha, sa pagpaambit sa paglaum nga atong natagamtaman. Nga kita unta mamahimong paglaum sa uban ug mamahimong instrumento sa katumanan sa saad sa Dios ngadto sa uban. Mohatag unta kita og kadasig sa uban pinaagi sa paglikay sa pagpangdaut, pagpanglupig ug pagdumot. Ikatulo, gihagit kita sa pagpasaka sa dignidad sa uban nga pinaagi sa pagrespeto sa atong isigkatawo ilabina sa mga dinaugdaug ug mga kabus makakita unta sila og bag-ong paglaum. Gitawag kita sa pagtabang kanila sa pagpasaka sa ilang kaugalingon aron matagamtaman nila ang ilang dugay nang gilauman nga makasinati og tunhay nga gugma ug kalipay.
Mag-ampo kita nga ang Ginoo kanunay magpahinumdum kanato sa atong mga kaakuhan isip mga malaumon nga katawhan. Unta mamahimo kitang instrumento sa paglaum sa uban ug makapaambit sa grasya sa pagtuo aron matuman ang saad sa Ginoo alang kanatong tanan; ang makaangkon og kinabuhing dayon.
Giya alang sa Pamalangdong:
1. Nakahatag ba ako og paglaum sa uban isip binunyagan? Kun wala pa kanus-a pa man ako mohatag?
2. Nagtuman ba ako sa akong mga saad sa Ginoo ug sa akong isigkatawo?

PASIUNA

Karon mao ang Pagsaka sa Langit ni Cristo, atong gihinumduman ang pagkamahimayaon ni JesuCristo isip tao nga nakig-ambit sa himaya sa Dios. Ang iyang pagsaka nagpahinumdum kanato nga ang langit mao ang atong padulngan ug mao ang giandam alang kanato. Didto nato masinati ang tiunay nga kalampusan. Buot ni Jesus nga makiglambigit kita sa pagtuman sa plano sa Ginoo alang kanato ug sa tanang katawhan.
Dinhi sa atong Eukaristiya, ato usab iapil sa atong mga pag-ampo ang tanang nagasangyaw sa Maayong Balita diha sa pagsaulog sa tibuok simbahan sa Catholic Communication’s Sunday.

Unang Pagbasa
Ang mga libro sa Mga Buhat sa Apostoles nagasugod kung asa nahuman ang ebanghelyo ni San Lucas: ang mahimayaong pagsaka ni Jesus sa Langit. Iyang gisaad sa iyang mga apostoles nga ang Espiritu Santo magagiya diha sa ilang mga misyon nga mahimong saksi sa iyang mga mahimayaong buhat sa tibuok kalibutan.

KINUTLO GIKAN SA MGA BUHAT SA MGA APOSTOLES (Acts 1:1-11)

Minahal kong Teofilo:
Sa una kong sulat gihisgotan ko ang tanang butang nga gibuhat ug gitudlo ni Jesus, sukad sa pagsugod niya sa iyang buluhaton hangtud sa adlaw nga gibayaw siya ngadto sa langit. Sa wala pa siya bayawa, gipahimangnoan niya pinaagi sa Espiritu Santo ang mga tawo nga iyang gipili nga mga apostoles. Sulod sa kap-atan ka adlaw human siya mamatay, nagpakita siya kanila sa makadaghan, sa mga paagi nga nagmatuod nga buhi gayod siya. Nakita siya nila ug nakigsulti kanila mahitungod sa paghari sa Dios. Ug samtang si Jesus uban pa kanila gitugon niya sila, “Ayaw una kamo pagbiya sa Jerusalem; hulata ninyo ang gasa nga gisaad sa akong Amahan, sumala sa gisulti ko kaninyo. Kay si Juan namunyag pinaagi sa tubig, apan pipila na lamang ka adlaw gikan karon bunyagan kamo pinaagi sa Espiritu Santo.”
Sa pagkatigum nila, gipangutana nila si Jesus, “Ginoo, tukoron mo ba pag-usab niining panahona ang gingharian sa Israel?” Si Jesus mitubag kanila, “Ang mga panahon ug mga adlaw gilatid nang daan sa pagbuot sa akong Amahan; dili kamo angay magpakisayod kon kanus-a kini mahitabo. Apan kon mokunsad na kaninyo ang Espiritu Santo, makadawat kamo’g gahum ug mahimo kamong akong mga saksi sa Jerusalem, sa tibuok Judea ug Samaria, ug sa tibuok kalibutan.” Human niya isulti kini, gibayaw siya ngadto sa langit samtang nagtan-aw sila kaniya, ug siya wala na nila makita kay gisalipdan man siya’g panganod.
Samtang nagtutok sila sa langit sa pagkayab ni Jesus, may duha ka tawo nga nagbisti’g puti nga mitungha pagkalit ug mibarog tupad kanila. Miingon sila, “Mga taga-Galilea, nganong nagbarog man kamo dinhi ug nagsigig hangad sa langit? Si Jesus nga gibayaw ngadto sa langit mobalik sa samang paagi sa iyang pagkayab ngadto sa langit.”

ANG PULONG SA GINOO.
SALAMAT SA DIOS.

SALMO RESPONSORYO
Ps. 47:2-3, 6-7, 8-9

T. Misaka ang Dios sa Iyang trono uban sa mga singgit sa kalipay, usa ka tingog sa mga trumpeta alang sa Ginoo.

Kamong tanang mga tawo, pamakpak kamo, singgit kamo ngadto sa Dios sa mga singgit sa kalipay, Kay ang Ginoo, ang Labing Halangdon, ang katahaan, dakung hari sa tibuok nga kalibutan.

T. Misaka ang Dios sa Iyang trono uban sa mga singgit sa kalipay, usa ka tingog sa mga trumpeta alang sa Ginoo.

Kay hari sa tibuok yuta ang Dios; awiti siya’g mga imno sa pagdayeg. Maghari ang Dios diha sa kanasuran, magalingkod ang Dios diha sa Iyang balaang trono.

T. Misaka ang Dios sa Iyang trono uban sa mga singgit sa kalipay, usa ka tingog sa mga trumpeta alang sa Ginoo.

Ikaduhang Pagbasa
Ang kamaturan sa himaya ni Cristo ug ang tawag sa iyang mga sumusunod sa pag-ambit sa iyang himaya mao ang mga pipila ka timailhan sa pagtuo sa mga unang Kristiyanos. Pinaagi sa usa ka pag-ampo gipadayag ni San Pablo ang iyang pagtoo.

KINUTLO GIKAN NI SAN PABLO NGADTO SA TAGA-EFESO (Eph. 1:17-23)

Ug naghangyo ako sa Dios sa atong Ginoong JesuCristo, ang gamhanang Amahan, nga hatagan unta kamo sa Espiritu nga maghimo kaninyong maalamon ug magpadayag sa Dios kaninyo aron makaila kamo kaniya. Naghangyo usab ako nga malamdagan unta ang inyong salabutan aron masayod kamo unsa ang paglaum nga alang niini gitawag kamo. Ug hinaut usab unta nga masayod kamo sa kahupong sa mga panalangin nga gisaad niya sa Iyang katawhan. Dugang pa niini, gipanghinaut ko nga masayran ninyo ang kadaku sa Iyang gahum nga ania kanato nga nagtuo kaniya. Kining gahuma nga ania kanato mao ang gigamit niya pagbanhaw kang Cristo, ug pagpalingkod kaniya sa Iyang tuo didto sa langit. Didto naghari si Cristo labaw sa tanang mga hari, ug sa mga anaa sa gahum ug sa mga punoan ingon man sa mga kaginoohan; labaw siya sa tanan bisan unsa pa ang ilang katungdanan niining kalibutana ug sa sunod. Gibutang sa Dios ang tanan ubos sa pagmando ni Cristo, ug alang sa simbahan gihimo siyang pangulo nga labaw sa tanan. Ang simbahan mao ang lawas ni Cristo, ang kahingpitan niya nga mao ang naghingpit sa tanang butang.

ANG PULONG SA GINOO.
SALAMAT SA DIOS.

ALELUYA (Mt. 28:19a, 20b)
T. Aleluya.
Busa panlakaw kamo ngadto sa tibuok kalibutan ug himoa silang akong mga tinun-an. Ug ako mag-uban kaninyo hangtud sa katapusan sa kalibutan.
T. Aleluya.

KINUTLO GIKAN SA EBANGHELYO SUMALA NI SAN MATEO (Mt 28:16-20)

Ang napulog-usa ka tinun-an miadto sa Galilea, didto sa bungtod nga paadtoan kanila ni Jesus. Ug sa ilang pagkakita kaniya, gisimba nila siya, bisan tuod may pipila kanila nga nagduhaduha. Miduol si Jesus ug miingon kanila, "Gihatag kanako ang tanang gahom sa langit ug sa yuta. Busa panlakaw kamo ngadto sa tanang katawhan sa tibuok kalibutan ug himoa sila nga akong mga tinun-an, ug bunyagi sila sa ngalan sa Amahan, sa Anak, ug sa Espiritu Santo, ug tudloi sila pagtuman sa tanan nga akong gisugo kaninyo. Ug hinumdomi! Ako mag-uban kaninyo sa kanunay hangtod sa katapusan sa kalibutan."

ANG EBANGHELYO SA GINOO.
DAYGON IKAW, O CRISTO.

KATILINGBANONG PAG-AMPO
P: Atong ipadayag karon ngadto sa mahigugmaong Amahan ang atong mga panginahanglan ilabina niining atong pagsaulog sa Pagsaka sa langit sa atong Ginoong JesuCristo. Sa matag pag- ampo, kita moingon: GINOO, PAMATI-A KAMI.

a. Alang sa atong Santo Papa, Francisco, mga obispo, mga pari ug mga relihiyoso, nga sa kanunay giyahan sila sa gahum sa Espiritu Santo aron molahutay sila sa ilang pag-alagad sa katawhan. Mag-ampo kita sa Ginoo.

b. Alang sa mga namunoan sa atong nasud, nga ang mga pagtulun-an ni Cristo maoy ipatigbabaw sa ilang kaugalingon aron magmaalagaron sila sa tanang katawhan inubanan sa diwa sa paghigugmaay ug pagpakigdait. Mag-ampo kita sa Ginoo.

c. Alang sa tanang Kristiyanos nga midawat sa kaakuhan sa pagkamagsasangyaw sa Pulong sa Dios nga sa kanunay molahutay sila bisan pa sa mga pagsulay nga ilang nahiaguman. Mag-ampo kita sa Ginoo.

d. Alang sa mga ginikanan, nga unta sila maoy maghatag og kadasig ug maayong sumbanan ngadto sa ilang mga anak aron magkinabuhi kini subay sa kabubut-on sa mahigugmaong Amahan. Mag-ampo kita sa Ginoo.

P: Ginoo, masaligon kami nga Imong dunggon ang among mga pangaliya nga among gihalad nganha Kanimo. Kini among gilauman nga madawat pinaagi Kanimo among Ginoo. Amen.

16/05/2026

MAYO 16, 2026 - SABADO
Ikaunom nga Semana sa Pagkabanhaw
(White)

PUDYOT SA EBANGHELYO

UNSA MAY GIPASABOT SA GIINGON NI JESUS, “BISAN UNSAY INYONG PANGAYOON SA AMAHAN SA AKONG NGALAN IYANG IHATAG KANINYO”? Kini wala magpasabot nga makapangayo kita bisag unsa nga atong gusto basta lamang gamiton nato ang mga pulong “kini among gipangayo sa ngalan ni Jesus, Amen”. Ang pag-ampo “sa ngalan ni Jesus” nagpasabot nga kita mag-ampo sama sa iyang paagi ug kagustohan. Sama kang Jesus, atong himoon ang pag-ampo nga kabahin sa atong kinabuhi. Matag karon ug unya, moduol kita sa Dios sama sa usa ka anak nga mamarayeg sa iyang mapinanggaong Amahan. Ug kon aduna man kitay pangayoon, kadto lamang mga butang nga subay sa Iyang kabubut-on. Adunay nagsulat: “Prayer is not an attempt to force God’s hand. It is a humble acknowledgement of helplessness and dependence on Him.”

ANG PAGBASA GIKAN SA MGA BUHAT SA MGA APOSTOLES (Acts 18:23-28)

WaIa madugay, migikan si Pablo ug miagi sa kayutaan sa Galacia ug Frigia, ug gidasig niya ang tanang mga magtutuo.
May usa ka Judio nga ginganla’g Apolos, taga-Alejandria, miadto sa Efeso. Maayo siyang mosulti ug batid sa Kasulatan. Namatuto siya sa pagtulon-an sa Ginoo, ug sa dakung kadasig nagsulti siya ug nagtudlo sa husto mahitungod kang Jesus. Hinoon, ang bunyag lamang ni Juan ang iyang nahibaw-an. Misulti siya nga maisogon didto sa sinagoga. Sa pagkadungog ni Priscila ug ni Aquila, gidala nila si Apolos sa ilang balay ug gisaysayan sa hustong kahulogan sa pagtulon-an sa Dios. Sa dihang mihukom si Apolos pag-adto sa Grecia, ang mga magtutuo sa Efeso mibulig kaniya pinaagi sa pagsulat ngadto sa mga kaigsuonan sa Grecia aron siya dawaton nila. Pag-abot niya nakatabang siya’g daku sa mga tawo nga tungod sa grasya sa Dios nahimong mga magtutuo. Gilupig niya sa lantugi ang mga Judio pinaagi sa malig-on niyang mga katarungan nga nagmatuod gikan sa Kasulatan nga si Jesus mao ang Mesiyas.
ANG PULONG SA GINOO.
SALAMAT SA DIOS.

SALMO RESPONSORYO
(Ps. 47:2-3, 8-9, 10)

T. Ang Dios maoy hari sa tibuok kalibutan.

Kamong tanang mga tawo, pamakpak kamo, singgit kamo sa Dios sa mga singgit sa kalipay kay ang Ginoo, ang Labing Halangdon, ang katawhan, maoy dakung hari sa tibuok kalibutan.
T. Ang Dios maoy hari sa tibuok kalibutan.

Kay hari sa tibuok kalibutan mao ang Dios; awiti siya’g mga awit sa pagdayeg. Maghari ang Dios diha sa kanasuran, maglingkod ang Dios diha sa Iyang balaang trono.
T. Ang Dios maoy hari sa tibuok kalibutan.

Ang mga punoan sa katawhan nagakatigum uban sa katawhan sa Dios ni Abraham. Kay ang mga magbalantay sa yuta iyaha sa Dios; siya gayod ang labaw.
T. Ang Dios maoy hari sa tibuok kalibutan.

ALELUYA (Jn. 16:28)
T. Aleluya.
Ako gikan sa Amahan ug mianhi sa kalibutan; ug karon mobiya ako sa kalibutan ug mobalik sa Amahan.”
T. Aleluya.

ANG PAGBASA GIKAN SA EBANGHELYO SUMALA NI SAN JUAN (Jn.16: 23-28)

Si Jesus miingon sa iyang mga tinun-an, “Inig-abot niadtong adlawa dili kamo mangayo kanako bisa’g unsa. Sultihan ko kamo: ang Amahan mohatag kaninyo bisa’g unsay inyong pangayoon kaniya sa akong ngalan. Hangtud karon wala pa kamo mangayo og bisa’g unsa sa akong ngalan; pangayo ug kamo hatagan, aron mahingpit ang inyong kalipay.”
“Gisulti ko kini kaninyo pinaagi’g mga sambingay. Apan moabot ang panahon nga dili na ako mogamit og mga sambingay, kondili mosulti ako kaninyo mahitungod sa Amahan sa yanong mga pulong. Inig-abot niadtong adlawa mangayo kamo kaniya pinaagi sa akong ngalan, ug ako dili moingon nga ako maoy mangayo alang kaninyo, kay ang Amahan mismo nahigugma man kaninyo. Nahigugma siya kaninyo kay nahigugma man kamo kanako ug nagtuo nga ako gikan sa Dios. Tinuod nga ako gikan sa Amahan ug mianhi sa kalibutan; ug karon mobiya ako sa kalibutan ug mobalik sa Amahan.”
ANG EBANGHELYO SA GINOO.
DAYGON IKAW, O CRISTO

KATILINGBANONG PAG-AMPO

P: Si Jesus nagdapit kanato sa paghimo sa atong matag hangyo ngadto sa Amahan pinaagi kaniya ug iyang gihatag kanato ang kasiguroan sa kalipay isip tubag sa atong mga pangamuyo: GINOO, HINGPITA ANG AMONG KALIPAY.

1.Nga ang nagdumala sa Simbahan, pinaagi sa ilang pagsangyaw ug paggiya, mohatud kanato ngadto sa himaya sa atong langitnong puluy-anan. Mag-ampo kita sa Ginoo.

2.Nga kadtong naghupot og katungdanan sa mga buhatan sa panggamhanan mahatagan sa grasya sa pag-alagad nga matinud-anon ug kahalangdon. Mag-ampo kita sa Ginoo.

3.Nga ang mga masakiton makakaplag og kahupayan ug pagdasig gikan sa mga minahal nila sa kinabuhi. Mag-ampo kita sa Ginoo.

4.Nga ang atong mga minahal nga nangamatay makadangat ngadto sa kalipay ug himaya sa langit. Mag-ampo kita sa Ginoo.

P: Amahan, imo kaming gipamati kanunay ug gihatag nimo ang tanan namong gipangayo pinaagi sa kaayohan sa imong Anak. Mopuyo unta uban kanamo ang imong Espiritu aron kami matudloan unsay angay nga pangayoon sa Ginoo ug buboan sa mga gasa diha sa among taliwala. Kini among gipangayo pinaagi ni Cristo among Ginoo. Amen.

14/05/2026

MAYO 15, 2026 - BIYERNES
Biyernes sa Ika-6 nga Semana sa Pasko sa Pagkabanhaw
San Isidro Labrador, Memorial
St. Marie Rivier (PM Foundress)
St. Justin Marie Russolillo (SDV Founder)
(White)

PUDYOT SA EBANGHELYO

Buot ni Jesus nga masabtan sa iyang mga tinun-an nga makabaton lamang kita’g bag-ong kinabuhi pinaagi sa pagksakripisyo, sa samang paagi nga mahimugso lamang ang tawo pinaagi sa usa ka inahan nga andam nga mosagubang sa kasakit sa pagpanganak. Gigamit ni Jesus ang maong kahimtang aron sa paghupay sa iyang mga tinun-an tungod sa iyang dili malikayan nga kamatayon, gipasabot pag-ayu ni Jesus nga ang kasakit sa babaye nga nagbati molungtad lamang sa makadiyot kon itandi sa malungtarong kahupayan ug kalipay nga mosunod human matawo ang bata. Ang kaugalingo’ng kamatayon ni Jesus, “sa makadiyot” lamang maoy sinugdanan sa bag-ong panahon sa kaluwasan nga mokaylap ngadto sa kahangturan.

ANG PAGBASA GIKAN SA MGA BUHAT SA MGA APOSTOLES (Acts. 18:9-18)

Usa ka gabii niana, pinaagi sa panan-awon, ang Ginoo miingon kang Pablo, “Ayaw kahadlok; padayon pagwali, kay ako nag-uban kanimo. Walay makapasipala kanimo kay daghan sa mga taga dinhi nagtuo kanako.” Busa si Pablo nagpabilin didto sulod sa usa ka tuig og tunga ug gitudloan niya ang mga tawo sa pulong sa Dios.
Sa dihang si Galio mao na ang Romanhong gobernador sa Grecia, naghiusa ang mga Judio ug gidakop nila si Pablo ug gitaral sa hukmanan. Miingon sila, “Kining tawhana nagdani sa mga tawo pagsimba sa Dios sa paagi nga supak sa atong Balaod!”
Sa dihang mosulti na unta si Pablo, miingon si Galio sa mga Judio, “Kon siya nakalapas pa sa balaod sa lungsod, tabangan ko unta kamo. Apan kay mahitungod man kini sa mga pulong ug mga ngalan ug sa inyong kasugoan, kamo ang angay mohusay niini. Dili ako maghukom niining mga butanga!” Ug sila iyang gipagula sa hukmanan. Unya ilang gidakop si Sostenes, ang pangulo sa sinagoga, ug gikulata atubangan sa hukmanan. Apan wala kini tagda ni Galio.
Sulod sa daghang mga adlaw, si Pablo nagpabilin sa Corinto uban sa mga kaigsuonan, unya mibiya siya kanila ug milawig kuyog ni Priscila ug Aquila paingon sa Siria. Sa wala pa siya mogikan naghimo siyag panaad didto sa Cencrea nagpaupaw siya.
ANG PULONG SA GINOO.
SALAMAT SA DIOS

SALMO RESPONSORYO
(Ps. 47:2-3, 4-5, 6-7)

T. Ang Dios maoy hari sa tibuok kalibutan.

Kamong tanang mga tawo, pamakpak kamo, singgit kamo sa Dios sa mga singgit sa kalipay kay ang Ginoo, ang Labing Halangdon, ang katahaan, maoy dakong hari sa tibuok kalibutan.
T. Ang Dios maoy hari sa tibuok kalibutan.

Kay hari sa tibuok kalibutan mao ang Dios; awiti siyag mga awit sa pagdayeg. Ang Dios nagahari sa tanang kanasuran, Ang Dios nagalingkod sa iyang balaan nga trono.
T. Ang Dios maoy hari sa tibuok kalibutan.

Misaka ang Dios sa iyang trono taliwala sa mga singgit sa kasadya, Ang Ginoo, taliwala sa mga tingog sa trumpeta. Awitig pagdayeg ang Dios, awitig pagdayeg; Awitig pagdayeg ang atong hari, awitig pagdayeg.
T. Ang Dios maoy hari sa tibuok kalibutan.

ALELUYA (Lk.24:46,26)
T. Aleluya.
Ang Mesiyas kinahanglan mag-antos ug unya mabanhaw ug mosulod sa iyang himaya.
T. Aleluya.

ANG PAGBASA GIKAN SA EBANGHELYO SUMALA NI SAN JUAN (Jn. 16:20-23)

Si Jesus miingon sa iyang mga tinun-an, “Sultihan ko kamo: maghilak kamo ug magminatay, apan malipay ang kalibutan; maguol kamo, apan mahimong kalipay ang inyong kaguol. Kon ang usa ka babaye hapit na manganak, maguol siya kay miabot na man ang iyang takna sa pag-antus. Apan inigkatawo sa bata malimot siya sa iyang pag-antos, kay nalipay man siya nga natawo ang usa ka bata. Mao usab kini ang mahitabo kaninyo: karon naguol kamo, apan makigkita ra ako kaninyo pag-usab, ug malipay unya kamo pag-ayo—kalipay nga walay makaagaw gikan kaninyo.”
“Inig-abot niadtong adlawa dili kamo mangayo kanako bisag unsa. Sultihan ko kamo: ang Amahan mohatag kaninyo bisag unsay inyong pangayoon kaniya sa akong ngalan.”
ANG EBANGHELYO SA GINOO.
DAYGON IKAW, O CRISTO

KATILINGBANONG PAG-AMPO

P: Samtang kita nagalaum ug nagapaabot sa kalipay sa langit, kita mag-ampo nga makaangkon og kusog aron makapuyo sa dalaygon’ng kinabuhi sa pagtoo: TUPHA KAMI SA IMONG KALIPAY, O DIOS.

1. Nga kita isip katawhan sa Dios, mogakus sa krus ni Cristo ug mahimong buhing mensahe sa paglaum sa katawhan kansang pag-amuma gipiyal kanato. Mag-ampo kita sa Ginoo.

2. Nga kadtong nawad-an sa kadasig makasinati unta sa kalipay sa malahutayong gahum sa Ginoo. Mag-ampo kita sa Ginoo.

3. Nga kadtong nanag-antos mahatagan untag kalig-on ug makasagubang sa kasakit. Mag-ampo kita sa Ginoo.

4. Nga sa atong mga pamaagi sa pag-amuma, ang mga masakiton makakaplag sa espirituhanong kusog ug kahupayan. Mag-ampo kita sa Ginoo.

5. Nga ang mga nangamatay makapahulay sa kalinaw sa Ginoo. Mag-ampo kita sa Ginoo.

P: Ginoo, paluyohi kami sa among mga pagsulay pinaagi sa panig-ingnan sa imong Anak. Tabangi kami pinaagi sa grasya sa imong Espiritu aron kami makasugakod nga masadyaon sa mga kasakitan ning kinabuhia, malaumon sa kalipay nga nagpaabot kanamo didto sa langit. Kini among gipangayo pinaagi ni Cristo nga among Ginoo. Amen.🙏🩷

13/05/2026

MAYO 14, 2026 - HUWEBES
Ikapitong nga Semana sa Pasko sa Pagkabanhaw
SAN MATIAS, Apostol, Piyesta
(Red)

Si San Matias usa sa mga disipulo ni Jesus. Diha sa mga buhat sa mga Apostoles, atong mabasa ang pagsaysay kun giunsa ni San Pedro pagtanyag sa mga katawhan nga ang disipulo ni Cristo pagapilion aron sa pagpuli sa dapit ni Judas diha sa 12 ka mga apostoles. Kini nahitabo human sa pagsaka sa atong Ginoo sa Iangit. Gihimo ang pagbunot-bunot ug ang napilian mao si Matias. Sumala sa tradisyon kining abtik nga apostol mihago sa pagsangyaw sa pagtoo didto sa Ethiopia ug nahimong martir didto.

HAGIT SA KINABUHI

Usahay wala ta magdahum nga sugoon ug hatagan ug responsibilidad sa Ginoo. Niining mga kahimtanga, mosugot ba kita o mobalibad sa atong mga tulubagon? Mahimo unta natong sumbanan si San Matias sa pagdawat sa kabubut-on sa Ginoo.

KINUTLO GIKAN SA MGA BUHAT SA MGA APOSTOLES (Acts 1:15-17, 20-26)

Usa ka adlaw niana, samtang nagtigom ang mga usa ka gatos ug kawhaan ka magtutuo, mitindog si Pedro ug miingon, “Mga igsuon, kinahanglan matuman ang bahin sa Kasulatan diin ang Espiritu Santo, pinaagi kang David, mitagna mahitungod kang Judas, ang mitultol sa mga tawo nga nagdakop kang Jesus. Si Judas usa ka sakop kanhi sa atong pundok, kay napili man siya aron mahiapil sa atong buluhaton.” “Kay nasulat sa basahon sa mga Salmo, ‘Maawaaw unta ang iyang puloy-anan, ug wala nay magpuyo niini. Ug nasulat usab, “Aduna untay mopuli kaniya sa iyang katungdanan.”
“Busa kinahanglan moapil kanato ang usa ka tawo aron mosaksi sa pagkabanhaw sa Ginoong Jesus. Ug kinahanglan nga usa siya sa atong pundok sulod sa panahon nga ang Ginoong Jesus nakig-uban pa kanato, sukad sa panahon sa pagpamunyag ni Juan hangtud sa adlaw nga si Jesus gibayaw ngadto sa langit.”
Busa misugyot sila og duha ka tawo, si Jose nga ginganlag Barsabas (ginganlan usab siyag Justo), ug si Matias. Unya nag-ampo sila, “Ginoo, nasayod ka sa kasingkasing sa tanang tawo. Busa itudlo kanamo, Ginoo, kon kinsa niining duha ang imong gipili nga mopuli kang Judas sa pagka-apostol nga iyang gibiyaan aron pag-adto sa dapit nga angay kaniya.” Human niini nagripa sila kon kinsay mahipuli, ug si Matias mao ang napili. Ug gidugang siya sa pundok sa napulog-usa ka apostoles.
ANG PULONG SA GINOO
SALAMAT SA DIOS.

SALMO RESPONSORYO
(Ps. 113:1-2, 3-4, 5-6, 7-8)

T. Hatagan siya sa Ginoo og usa ka lingkuranan, uban sa mga kadagkoan sa iyang lungsod.

Dayga, kamong mga sulugoon sa Ginoo, dayga ang ngalan sa Ginoo. Daygon unta ang ngalan sa Ginoo karon ug hangtud sa kahangturan.
T. Hatagan siya sa Ginoo og usa ka lingkuranan, uban sa mga kadagkoan sa iyang lungsod.

Gikan sa pagsubang hangtud sa pagsalop sa adlaw, daygon unta ang ngalan sa Ginoo. Labaw sa tanang kanasuran mao ang Ginoo; labaw sa kalangitan ang iyang himaya.
T. Hatagan siya sa Ginoo og usa ka lingkuranan, uban sa mga kadagkoan sa iyang lungsod.

Kinsay sama sa Ginoo, atong Dios, nga gipalingkod sa trono sa kahitas-an ug nagadung-aw gikan sa langit ug sa yuta nga anaa sa ubos?
T. Hatagan siya sa Ginoo og usa ka lingkuranan, uban sa mga kadagkoan sa iyang lungsod.

Gibayaw niya ang ubos gikan sa abog; gikan sa kalapukan iyang gialsa ang kabus, Aron palingkuron sila uban sa mga kadagkoan sa iyang lungsod.
T. Hatagan siya sa Ginoo og usa ka lingkuranan, uban sa mga kadagkoan sa iyang lungsod.

ALELUYA (Jn. 15:16)
T. Aleluya.
Ako ang nagpili kaninyo gikan sa kalibutan nag-ingon ang Ginoo, aron mamungag daghan, mga bunga nga molungtad.
T. Aleluya.

ANG PAGBASA GIKAN SA EBANGHELYO SUMALA NI SAN JUAN (Jn. 15:9-17)

Si Jesus miingon sa iyang mga tinun-an, “Nahigugma ako kaninyo ingon nga ang Amahan nahigugma kanako; pabilin kamo sa akong gugma. Kon tumanon ninyo ang akong mga sugo magpabilin kamo sa akong gugma ingon nga ako nagtuman sa mga sugo sa akong Amahan ug nagpabilin sa iyang gugma.” “Gisultihan ko kamo niini aron mabatonan ninyo ang akong kalipay ug mahingpit ang inyong kalipay. Kini mao ang akong sugo: paghigugmaay kamo ingon nga ako nahigugma kaninyo. Ang labing dakong gugma nga ikahatag sa usa ka tawo ngadto sa iyang mga higala mao ang pagpakamatay alang kanila. Kamo akong mga higala kon buhaton ninyo ang gisugo ko kaninyo. Dili ko na kamo tawgon nga mga sulugoon, kay ang sulugoon, dili mahibalo sa gibuhat sa iyang agalon. Hinonoa, tawgon ko kamo nga akong mga higala, kay gisultihan ko man kamo sa tanan nga nadungog ko sa akong Amahan. Dili kamo maoy nagpili kanako; ako ang nagpili kaninyo, ug gipili ko kamo aron manglakaw ug mamungag daghang mga bunga nga molungtad. Busa ihatag kaninyo sa Amahan bisag unsay inyong pangayoon kaniya sa akong ngalan. Kini mao ang isugo ko kaninyo: paghigugmaay kamo.”
ANG EBANGHELYO SA GINOO.
DAYGON IKAW, O CRISTO.

KATILINGBANONG PAG-AMPO

P: Gipili sa Dios si Matias nga mahimong apostol, usa ka pari sa Pagkabanhaw. Mag-ampo kita nga ang kabubut-on sa Dios matuman dinhi sa yuta, sa tanang mga dapit ug mga buluhaton: PALUYOHI KAMI, O GINOO.

1.Nga ang Espiritu sa kaalam mogiya sa Santo Papa ug sa mga kaobispohan labi na diha sa pagbansay sa ilang pagpangalagad isip mga magbalantay sa Simbahan. Mag-ampo kita sa Ginoo.

2.Nga kadtong anaa sa gahum mahimong masibuton sa ilang panumpa sa pag-abag alang sa kaluwasan sa mga kalag. Mag-ampo kita sa Ginoo.

3.Nga modaghan unta ang bokasyon alang sa pagkapari ug relihiyoso diha sa atong katilingban ug mga panimalay. Mag-ampo kita sa Ginoo.

4.Nga ang mga konsagradong kalalakinhan ug kababaynhan makabaton sa tiunay nga Espiritu ni Jesus kinsa mianhi aron sa pag-alagad, dili aron alagaran. Mag-ampo kita sa Ginoo.

5.Nga ang mga magtutuo nga nangamatay makakita sa kaluwasan sa Dios diha sa iyang Gingharian. Mag-ampo kita sa Ginoo.

P: Gamhanang Amahan, ang imong Anak mipili kanamo ug namunga dinhi sa among kinabuhi. Tubaga kining among mga pag-ampo nga among gihalad uban sa pagpangama si San Matias pinaagi ni Cristo among Ginoo. Amen.

San Antonio de Padua Family

18/05/2026

16/05/2026

16/05/2026

14/05/2026

13/05/2026

Address

Website

Alerts

Shortcuts

Share

Category