13/05/2026
Mayo 13, gisaulog sa Gagmay’ng Kristohanong Katilingban sa Birhen sa Fatima IWHA, Barangay Dumoy ang ika- 47 nga kapistahan uban sa tema, Maria, Modelo sa Pagkamisugtanon sa Sugo sa Diyos. Ang kasaulugan nagsugod pinaagi sa Balaang Misa sa alas 9:00 sa buntag nga gipanguluhan ni Rev. Fr. Dionisio C. Tabiliran, DCD.
Sa iyang homiliya, iyang gipadayag ang dakong kalipay tungod sa kalig-on ug paglahutay sa pagtoo sa mga miyembro sulod sa hapit lima ka dekada. Iyang gipatin-aw nga ang Santos nga Misa sa adlaw sa pista usa ka hiniusang pagpasalamat sa tanang mga grasya ug alang sa hiniusang panaw isip mga miyembro sa katilingban.
Gihisgutan usab ni Fr. Diony, ang nagkalahi lahing higayon sa pagpakita sa Mahal nga Birhen sa tulo ka bata nga sila Lucia, Francisco ug Jacinta, kung diin naghatag ang Mahal nga Inahan ug pasidaan sa mga panghitabo ug paghangyo kanila sa hingpit nga pag-ampo sa Santos nga Rosaryo adlaw-adlaw alang sa kaluwasan ug kalinaw sa kalibutan. Isip pasidungog sa patron, iyang isaysay ang mga hiyas sa Birhen sa Fatima nga nag-aghwag sa katilingban nga mahimong sama Kaniya nga masinuptanon ug musalig sa kabubut-on sa Dios. Sama sa Mahal nga Birhen, hinaot nga mahimo ang matag-usa nga andam maminaw ug mutubag sa mga panginahanglan sa mga anak ug sa uban pang nanginahanglan.
Ang PSK, si Mrs. Amy Gentallan, kinasingkasing nga nagpasalamat sa mga miyembro tungod sa ilang walay hunong nga suporta sa nagkadaiyang kalihukan sa GKK nga maoy hinungdan sa kalampusan sa kasaulugan ingon man sa pagpanindot sa kapilya nga nagtindog na sulod sa hapit lima ka dekada. Iyang giila usab ang mga mass servers ug mga bisita nga nakigduyog sa maong selebrasyon.
Ang ika-47 nga kasaulugan sa pista nagpakita sa lawom nga panaghiusa, pag-inambitay ug panaghigalaay sa komunidad, nga nagdan-ag sa paglaum ug kalipay samtang nagpaabot sa pagsaulog sa ilang Bulawanong Anibersaryo sa umaabot nga mga tuig.
