24/07/2025
KINSA SI SANTIAGO APOSTOL?
By: Clark Arvin, SoCCom, Sr. Santiago Apostol GKK
Sa pagpangandam sa Kapistahan ni Sr. Santiago Apostol ugmang adlawa, 25 sa Hulyo 2025, atong ila-ilahon si San Tiago (Saint James), Apostol.
Si Tiago igsoon ni Juan. Si Sebedeo ang ilang amahan ug si Salome ang ilang inahan. Ang duroha gibansagan og "anak sa dalugdog" kay dali ra kaayo sila mosilaob sa kapungot.
Si Sebedeo nga ilang amahan nanag-iya og bangka nga panagatan. Nahunong lamang ang ilang pagkamananagat og isda sa dihang gitawag sila ni Kristo nga Iyang apostoles, aron managat sila dili sa isda kundili mga tawo.
Si Salome nga inahan sa duraha mihangyo kang Kristo nga ang iyang duha ka anak maoy ibutang sa una nga lugar sa gingharian ni Kristo sa langit. Sa pagkadungog sa ubang apostoles nagkadisgusto sila kay kaha mao lamang ilhanan nga wala makasabot og unsa may taas sa gingharian sa langit. Kadtong motuo ug mosunod kaniya maoy dako sa langit, dili ang kabuotan sa tawo, kundili ang binuhatan sa tawo diha sa sugo ug kabubot-on sa Dios isip sulugoon sa Dios.
Usa niana ka gabii, nanagat si Pedro, Andres, Tiago ug Juan. Wala silay kuha sa tibook gabi bisan usa na lang ka buok ibis. Ug unya sa ila nang pagdunggo sa lapyahan, gimandoan sila sa usa ka tawo, sa pagtaktak sa ilang pukot pag-usab. Ug tuod man nakakuha sila og daghan nga hapit dili na makarga sa sakayan. Nalipay silang tanan. Ang tawo nga nagmando kanila mao diay si Kristo.
Giingon sa uban nga si Tiago pinalabi nga apostol kay gidala siya ni Kristo ngadto sa bungtod sa Tabor kuyog ni Pedro ug Juan. Ug siya man tuod ang usa sa tulo nga saksi sa panagway ni Kristo nga nausab, uban sa presensya ni Moises ug Elias. Si Tiago usab ang usa sa nag-uban kang Kristo sa tanaman sa Gethsemane, diin gimandoan sila niini sa pagtukaw ug pag-ampo aron dili gayod sila madaog sa panulay.
Human sa pagbayaw ni Kristo sa langit, ug sa pagkunsad sa Espiritu Santo sa adlaw sa Pentekostes, mibiya si Tiago sa Jerusalem ug misangyaw sa ebanghelyo sa nasod sa Espanya. Didto gipanalipdan ni Tiago ang nasod sa Espanya batok sa mga barbayanong mga Moros. Siya nahimong patron sa Espanya. Human sa tahas niya sa Espanya, mibalik si Tiago sa Palestinia. Niining higayona gilutos pag-ayo ni Haring Herodes Agrippa ang mga Kristohanon ug gipasikop sa hari si Tiago. Wala madugay gipungotan siya sa liog sa tuig 44 A.D.
Si Tiago ang unang nahimong martir sa mga apostoles ni Kristo tungod sa kausa sa pagsangyaw sa ebanghelyo sa kaluwasan.
