30/05/2026
𝗔𝗣𝗣𝗥𝗘𝗖𝗜𝗔𝗧𝗜𝗢𝗡 𝗡𝗜𝗚𝗛𝗧 | 𝗦𝗧𝗢. 𝗡𝗜𝗡𝗢 - 𝗞𝗠. 𝟭𝟯 𝗙𝗟𝗢𝗥𝗘𝗦 𝗗𝗘 𝗠𝗔𝗬𝗢 𝟮𝟬𝟮𝟲 𝗖𝗨𝗟𝗠𝗜𝗡𝗔𝗧𝗜𝗢𝗡
Niadtong Mayo 29, 2026, malampusong gitapos sa GKK Sto. Niño – Km. 13 ang Flores de Mayo 2026 pinaagi sa usa ka makahuluganon ug malipayong pagsaulog nga nagpasiugda sa gugma ug debosyon ngadto kang Birhen Maria.
Gisugdan ang kalihokan pinaagi sa prosesyon sa Mahal nga Birhen, diin ang mga kabatan-onan nga nag-rosaryo maoy nanguna uban sa mga Reyna sa Santacruzan. Gisundan kini sa Kasaulogan sa Pulong (KSP) nga gipangunahan sa mga Pangulo sa Liturhiya (PsL), ug dayon sa usa ka yano apan mabulukon nga programa diin gipakita sa mga kabatan-onan ang ilang mga talento ug pagpasalamat.
Usab nga gihatagan og mga pahalipay ug pag-ila ang mga partisipante, ilabina ang mga kabatan-onan nga matinud-anong mitambong ug milahutay sukad sa unang adlaw sa Flores de Mayo hangtod sa katapusan niini.
Luyo sa kasimple sa maong selebrasyon, makita ang dakong paningkamot ug gugma sa mga nagpaluyo niini; ilabina sa mga Katekista nga sila Ate Vangie, Ate Elsa, ug Ate Raquel, uban sa pagtinabangay sa mga GSLs, Pundok Banay Leaders, ug sa tibuok katawhan sa katilingban. Pinaagi sa ilang pagkahiusa ug pagkamaayong piniyalan, nahimong malampuson ug makahuluganon ang maong kalihokan.
Sa paghalad sa labing matahum nga mga bulak ngadto sa Reyna sa Langit, atong gipadayag dili lamang ang katahum sa mga bulak, kundili usab ang gugma, pagpasalamat, ug pagtoo nga atong gihalad kang Mama Maria.
