26/05/2026
MAY 26, 2026 READINGS
Antipona sa Pagsugod
Ang Espiritu sa Ginoo ania kanako; tungod niana gidihugan ako, gipadala ako aron pagsangyaw sa Maayong Balita ngadto sa mga kabus ug aron pag-ayo sa mga mahinulsolon og kasingkasing. [Lk. 4: 18]
UNANG PAGBASA 1 Pt. 1: 10-16
Kinutlo gikan sa Unang Sulat ni San Pedro
Ang mga propeta nagsusi ug nagpakisayod mahitungod niining maong kaluwasan, ug nanagna sila mahitungod niining gasa nga ihatag sa Dios kaninyo. Nagpakisusi sila kon kanus-a ug sa unsang paagi moabot kini. Kining panahona may gitudlo sa Espiritu ni Cristo nga diha kanila sumala sa gitagna sa Espiritu mahitungod sa mga pag-antos ni Cristo ug sa himaya nga mosunod niini. Gipadayag sa Dios sa maong mga propeta nga ang gihisgotan nila dili alang sa ilang kaugalingong kaayohan kondili alang kaninyo. Kining mga butanga nadungog ninyo gikan sa mga magwawali sa Maayong Balita pinaagi sa gahom sa Espiritu Santo nga gipadala gikan sa langit. Kini ang mga butang nga buot sabton bisan gani sa mga anghel.
Busa andama ang inyong salabutan; pagmaugdang kamo ug ibutang ang inyong paglaum diha sa grasya nga ihatag kaninyo inigpadayag na ni Cristo. Pagmasinugtanon kamo sa Dios ug ayaw ninyo ipahiuyon ang inyong kinabuhi sa mga tinguha nga inyong gihuptan kaniadto sa wala pa kamo masayod sa kamatuoran. Hinonoa, pagkinabuhi kamo nga balaan ingon nga balaan ang Dios nga nagtawag kaninyo. Ang Kasulatan nag-ingon, "Pagbalaan kamo kay ako balaan man."
Ang pulong sa Ginoo.
Tubag: Salamat sa Dios.
SALMO RESPONSORYO Ps. 98: 1, 2-3, 3-4
Tubag: Ang Ginoo nagpahibalo sa iyang kaluwasan.
Awiti ang Ginoo og bag-ong awit, kay naghimo siya og katingalahang mga buhat; ang iyang tuong kamut nakadangat og kadaugan alang kaniya, ang iyang balaang bukton. [Tubag]
Ang Ginoo nagpahibalo sa iyang kaluwasan: sa atubangan sa kanasuran iyang gipahayag ang iyang katarong. Nahinumdum siya sa iyang kaluoy ug sa iyang kamatinud-anon alang sa balay sa Israel. [Tubag]
Ang tanang kautlanan sa yuta nakakita sa kaluwasan nga gihimo sa atong Dios. Awiti nga malipayon ang Ginoo, kamong tanang kayutaan; singgit kamo sa pag-awit; awita ang pagdayeg. [Tubag]
ALELUYA Mt. 11:25
Aleluya. Dalaygon ikaw, O Amahan, Ginoo sa langit ug sa yuta, kay gipadayag nimo sa mga gagmay ang mga misteryo sa gingharian. Aleluya.
EBANGHELYO Mk. 10. 28-31
Kinutlo gikan sa Ebanghelyo sumala ni San Marcos
Tubag: Himayaon ikaw, Ο Ginoo.
Unya misulti si Pedro kang Jesus, "Nasayod ka nga gibiyaan namo ang tanan ug misunod kami kanimo."
Miingon si Jesus kanila, "Tinuod ka na, ug sultihan ko kamo nga ang mobiya sa iyang panimalay o sa mga igsuon, o sa inahan, o sa amahan, o sa mga anak, o sa mga uma tungod kanako ug tungod sa Maayong Balita, makadawat og labi pang daghan niining kinabuhia. Makadawat siyag ginatos ka mga balay, mga igsuon, mga inahan, mga anak, ug mga uma - bisan tuod og lutoson siya; ug sa umaabot nga kalibutan makadawat siya sa kinabuhing dayon. Apan daghan karon nga nahiuna, maulahi; ug daghan karon nga naulahi, mahiuna.
Ang Ebanghelyo sa Ginoo.
Tubag: Daygon ikaw, O Cristo.
PANGALIYA SA KATILINGBAN
Sa atong kasayuran nga makuyaw ang pagsalmot sa mga lulinghayaw sa kalibutan, atong ibayaw ang atong mga kasingkasing diha sa mainitong pag-ampo ngadto sa Amahan. Sa matag pag-ampo kita moingon: Amahan, ikaw ang among tanan.
Nga ang Simbahan sa tibuok kalibutan mahimong usa ka masangputong timaan sa pamaagi sa kalipay ug kinabuhing dayon. Mag-ampo kita.
Nga ang mga namunoan sa panggamhanan dili unta maulipon sa gahum ug bahandi. Mag-ampo kita.
Nga makakat-on kita sa pagsalig sa mga espiritu-hanong mga hiyas nga makapalambo sa atong kaugalingon ug dili sa materyal nga kabtangan nga dili makalipay sa atong kalag. Mag-ampo kita.
Nga dili nato takpan ang atong mga kasingkasing ngadto sa mga nanginahanglan kondili mahuna-hunaong molambigit sa atong kaugalingon diha sa mga buhat ni Cristo sa pag-alim ug pakig-uli. Mag-ampo kita.
Nga ang atong mga nangamatay, makapahimulos sa kalinaw sa Dios didto sa langit. Mag-ampo kita.
Langitnong Amahan, sud-onga uban sa kaluoy ang mga nanginahanglan. Hatagig katin-awan ang among mga kinabuhi pinaagi sa imong kamatuoran ug hatagi kami sa grasya nga makapuyo sa dalaygong mga mithi nga gitunol dinhi kanamo sa imong Anak nga si Jesucristo, kinsa nagapuyo ug nagahari hangtod sa kahangturan. Amen.
