03/08/2026
A Legacy of Faith
The History of Faith Baptist Church
"Every great testimony has a humble beginning."
Sa matag ligid sa oras, adunay mga estorya nga dili masukod sa katahum sa building, sa kadaghan sa miyembro, o sa kadako sa mga materyales nga gigamit. Ang tinuod nga sukod sa usa ka simbahan makita sa pagtuo sa mga tawo nga nagtukod niini ug sa pagkamaunongon sa Diyos nga wala gayud mibiya.
Mao kini ang sugilanon sa Faith Baptist Church.
Pila na ka dekada ang nilabay sukad nga gisugdan sa Ginoo ang Iyang buluhaton dinhi sa among simbahan. Dili kini nagsugod sa usa ka dako ug elegante nga building. Dili usab kini nagsugod nga daghan na ang miyembro.
It started from almost nothing.
Gamay lamang. Yano. Simple.
Apan puno sa paglaom, pagtuo, ug pag-ampo nga usa ka adlaw, dili lamang motubo ang simbahan, apan mas daghang mga kalag ang makaila ug modayeg sa Ginoo.
Ang unang simbahan gitukod gamit ang mga materyales nga gikan sa Alimyon. Mga sinasa nga kawayan ug uban pang materyales nga gigamit pag-usab aron mahimong usa ka balay sa pagsimba. Tingali sa mata sa uban, ordinaryo lamang kini. Apan para sa among kongregasyon, matag kawayan, matag haligi, ug matag atop nagsaksi sa gugma sa Diyos ug sa panaghiusa sa Iyang katawhan.
Ang mga bangko nga among gigamit kaniadto, donasyon gikan sa pamilya Glinogo. Simple lamang nga mga lingkoranan, apan nahimo silang saksi sa liboan ka mga pag-ampo, mga luha, mga pagdayeg, ug mga kinabuhi nga giusab sa Ginoo.
Sulod niadtong yano nga simbahan, didto kami nakasimba nga adunay kagawasan. Didto kami nakakat-on sa Pulong sa Diyos. Didto kami nakatawa, nakahilak, ug nakasinati sa Iyang gugma ug grasya.
Daghan usab ang mga pastor nga gigamit sa Ginoo aron magpadayon ang ministeryo.
Pastor Kikoy Aranduque.
Pastor David Failog.
Pastor Sabeno Guiรฑares.
Pastor Junrey Rasonado.
Ug karon, pinaagi sa pagpangulo ni Pastor Noel Dalumatao, padayon nga nagatubo ang ministeryo ug ang pagtuo sa matag magtutuo.
Apan dili sayon ang mga katuigan nga among naagian.
Daghang Thanksgiving ang gisaulog.
Daghang anniversaries ang milabay.
Daghang celebrations ug espesyal nga mga higayon ang nahitabo sulod sa daang simbahan.
Tinood, usahay huot kaayo ang lugar.
Kulang ang bangko.
Init ang panahon.
Ug usahay dili naigo ang tanan sulod sa simbahan.
Apan bisan pa man sa tanan nga kakulang, wala gayud kami miundang sa pagpasalamat sa Ginoo. Tungod kay para kanamo, dili ang kadako sa building ang importante. Ang importante mao nga adunay lugar diin makadayeg kami Kaniya nga adunay kagawasan, kalinaw, ug kalipay.
Kaniadto, bisan ang Praise and Worship Team gamay pa kaayo. Pipila lamang ang miyembro. Limited ang mga instruments. Dili kompleto ang kagamitan.
Apan ang among pagdayeg walay limitasyon.
Kay dili ang kadaghan sa instrumento ang makapahimuot sa Ginoo, kondili ang mga kasingkasing nga matinud-anon sa pagsimba.
Sulod sa daghang katuigan, usa ka pag-ampo ang kanunay namong gidala ngadto sa Ginoo.
Sa matag Prayer Meeting.
Sa matag personal nga devotion.
Dili gayud mawala ang usa ka hangyo.
"Lord... unta ma-renovate na among simbahan."
Apan sa tanan namong mga pag-ampo, wala gyud namo damha nga mas dako pa diay ang plano sa buhing Diyos.
Usa ka adlaw, miabot sa among simbahan ang among minahal nga Late Pastor Danny Puig ug nagpahigayon og meeting.
Didto niya gipahibalo ang usa ka panan-awon nga murag lisod kaayo tuohan.
"Dili lang renovation ang kinahanglan. Magtukod ta og bag-ong simbahan."
Sa among hunahuna, imposible man paminawon.
Kami nga mga miyembro, yano lamang ang among panginabuhi. Kung basehan ang among kahimtang sa kinabuhi ug pinansyal, murag walay kasiguruhan nga matukod ang usa ka bag-ong simbahan.
Apan ang Ginoo wala magtan-aw sa kakulang sa atong resources.
Nagtan-aw Siya sa kadako sa atong pagtuo.
Padayon nga gidasig kami ni Pastor Danny Puig nga mosalig sa Diyos. Ug sa wala damha, usa ka miyembro ang mitunol og pinansyal nga tabang alang sa pagtukod sa bag-ong simbahan.
Didto nagsugod ang tanan.
Usa ka lakang sa pagtuo.
Usa ka lakang sa pagsalig.
Usa ka lakang sa pagpaningkamot.
Ug gikan niadto, sunod-sunod na ang mga panalangin nga among nasinati.
Sa matag higayon nga adunay moabot nga tabang, usa ra gyud among masulti...
"Grabe Ka, Lord. You are truly faithful."
Tinood...
Renovation lang ang among gipangayo.
Apan ang Ginoo mihatag ug labaw pa.
He gave us a brand-new church building.
Nagsugod kami gikan sa wala.
July 1, 2024, nagsugod ang pagplano.
Ug sukad niadto, wala na mihunong ang paglihok sa Ginoo.
Daghang mga kasingkasing ang malipayong mitabang.
Gikan sa KatGold Fitness Gym.
Gikan sa mga Southern Baptist Churches.
Gikan sa nagkalain-laing pamilya ug mga indibidwal nga gigamit sa Diyos isip panalangin.
Usa usab sa labing dako nga panalangin mao ang suporta sa Maragusan Baptist Church. Pinaagi sa pagpangulo sa Late Pastor Danny Puig, nagkahiusa ang tibuok miyembro sa pagtabang sa among simbahan. Ilang gipili nga iuna ang among panginahanglan bisan pa adunay usab silay kaugalingong plano alang sa ilang simbahan.
Kana usa ka buhing ehemplo sa tinuod nga gugma ug panaghiusa sa lawas ni Cristo.
Pinaagi sa bayanihan sa atong mga kaubang Kristohanon, nasugdan ang pagtukod sa atong bag-ong simbahan.
Ug ang labing makapahingangha...
Librehon ang labor.
Tungod kay kung ang Diyos ang naglihok, makahimo Siya og mga butang nga dili nato mahunahuna.
Pag-abot sa tuig 2025, sunod-sunod na usab ang mga panalangin.
Nakadawat kami og mga bangko.
Nakadawat og semento.
Window glasses.
Ug usa ka organ alang sa Praise and Worship Team.
Makalingaw hunahunaon nga sa dihang gihatagan kami og organ...
Wala pa gani mi organist.
Apan ingon ana ang Ginoo.
Usahay ihatag Niya una ang panalangin, unya Siya usab ang maghatag sa paagi kung giunsa kini gamiton.
Pila lamang ka bulan ang milabay, miabot usab ang panalangin alang sa ceiling ug sa daghan pang mga butang nga makita ninyo karon sa sulod niining simbahan.
Sa matag haligi.
Sa matag bungbong.
Sa matag bangko.
Sa matag kisame.
Makita nato ang tubag sa daghang tuig nga pag-ampo.
Gikan sa pag-ampo.
Sa paghilak.
Sa pagpangabudlay.
Sa pagtuo.
Karong adlawa, nagtindog kita sulod sa usa ka bag-o, mas lapad, mas lig-on, ug mas maayong balay sa pagsimba.
Apan ang pinakadako nga transformation dili makita sa semento, pintura, o kisame.
Ang pinakadako nga kausaban makita sa pagkamatinud-anon sa Diyos nga nag-usab sa among "Lord, renovation lang unta..." ngadto sa "Ania na ang bag-ong simbahan."
Kini nga building dili lang simbolo sa sakripisyo sa mga tawo.
Kini simbolo sa usa ka Diyos nga dili lang motubag sa pag-ampo, apan motubag labaw pa sa atong gilauman.
Mao nga karong adlawa, wala lang kita nagasaulog og anniversary.
Ginasaulog nato ang pagkamaayo sa Diyos.
Ginasaulog nato ang Iyang grasya.
Ginasaulog nato ang Iyang pagkamatinud-anon sa matag henerasyon.
Sama sa giingon sa Efeso 3:20,
"Now unto Him that is able to do exceeding abundantly above all that we ask or think, according to the power that worketh in us."
Renovation lang ang among gipangayo.
Apan ang Ginoo mihatag ug bag-ong balay sa pagsimba.
Gamay ra ang among sinugdanan.
Apan dako ang plano sa Diyos.
Ug tingali mao usab kini ang kahulugan nganong gitawag kita nga Faith Baptist Church.
Dili tungod kay dako ang among pagtuo.
Kondili tungod kay dako ang pagkamatinud-anon sa Ginoo sa matag higayon nga kami mituo Kaniya.
Sa matag pag-ampo nga among gihilakan.
Sa matag pagsulay nga among giatubang.
Sa matag panalangin nga wala namo gilauman.
Gipakita sa Diyos nga faithful Siya sa Iyang mga saad.
Ug karon, dili lang ang among simbahan ang mitubo. Mitubo usab ang among pamilya sa pagtuo.
Sa una, inihap ra ang mga miyembro. Karon, padayon nga nagadungag ang mga katawhan,
Mga bag-ong pamilya nga nagkahiusa sa pagsimba.
Mga kabatan-onan nga nagatubo sa ilang relasyon sa Ginoo.
Mga bata nga nagkat-on sa Pulong sa Diyos.
Ug mga kinabuhi nga padayon nga giusab pinaagi sa Iyang grasya.
Busa, ang ngalan nga Faith Baptist Church dili lang usa ka ngalan.
Kini usa ka pahinumdom.
Usa ka testimonya.
Ug usa ka buhing pamatuod nga kung adunay pagtuo sa Ginoo, dili gayud Siya mapakyas sa pagtuman sa Iyang mga saad.
Because this church was never built by human hands alone.
It was built by faith, sustained by grace, and stands today as a testimony of God's unwavering faithfulness.
This is Faith Baptist Church. This is our testimony. And above all, this is God's story.
To God be all the glory.
