03/05/2026
Flores De Mayo, Paghalad Og Bulak Ug Paghalad Sa Kasingkasing Sa Maayong Buhat
Gilunsad ang Flores de Mayo dinhi sa San Pedro Cathedral niadto Mayo 1, 2026, pinaagi sa usa ka Santos nga Misa nga gipanguluhan ni MSGR PAUL A CUISON, RECTOR niining maong katedral uban ni Fr Evan Esmade
Nalipay pag-ayo si Msgr Paul, sa mainiton nga presensya sa mga kabataan niining paglunsad sa Flores de Mayo. Nahimo nang batasan matag bulan sa Mayo ang paghalad og mga bulak alang kang Birhen Maria. Ingon pa sa among pari iyang na experience niadtong bata pa siya, nga halos maupaw ang mga tanom sa eskwelahan ug mga panimalay nga adunay mga kabulakan, kay maoy ilang panguhaon, apan imbis nga masuko ang tag-iya, mahimoot na lang kay nakahatag kini og dakong kalipay sa kasingkasing.
Nganong maghalad man kita og bulak? Ang bulak hulagway sa atong gugma ug paghigugma. Imbis masuko, kita mopahiyom na lang, ug gitudloan usab kita nga dili lamang ang bulak ang importante, kon dili ang kasingkasing nga naghalad niini. Giawhag ug nalipay usab ang pari sa mga katekista nga naningkamot paggiya sa mga bata nga magkinabuhi subay sa kabubut-on sa Dios, diha sa pagbuhat og maayo, sa paglikay sa dautan ug sa mga tintasyon.
Ang labing importante nga matudloan ang mga kabataan sa pagbaton og hiyas, sa pagtahod sa atong langitnong Amahan, pagbuhat og mga butang nga makapahimuot sa atong langitnong Inahan nga si Birhen Maria.
Ug atol niining adlawa mao ang kapistahan ni Sr San Jose ang mamumo-o, ug nga gipahimangnoan usab kita sa kahinungdanon sa atong trabaho. Ang atong trabaho nga maoy atong magamit sa pagsuporta sa pamilya, ug kini mahimong balaan kon ihalad nato sa Dios. Ang buhat sa Dios mao ang pagbalaan sa atong adlaw-adlaw nga panginabuhi.
Hinaut unta nga kining mga kabataan mahimong magmalampuson ug magmabungahon diha sa ilang buhat nga maayo.
Sa laktod: Ang Flores de Mayo dili lang paghalad og bulak. Paghalad kini sa kasingkasing, sa maayong buhat, ug sa kinabuhi nga nakahimuot sa Dios ug kang Birhen Maria.
