18/04/2026
APRIL 19,2026
Ikatulong Domingo sa Pasko sa Pagkabanhaw
PAGBASA GIKAN SA MGA BUHAT SA MGA APOSTOLES
Acts 2:14, 22-33
[Sa adlaw sa Pentecostes], mitindog si Pedro uban sa napulog usa ka apostoles ug sa makusog nga tingog miingon kanila, "Mga igsuon kong Judio, ug kamong tanan nga nagpuyo sa Jerusalem, Pamati-a ninyo ang akong isulti karon. "Mga taga-Israel, pamati kamo! Si Jesus nga Nazaretnon, usa ka tawo kansang Diosnong buluhaton sa matin-aw gipadayag kaninyo pinaagi sa mga milagro ug sa mga katingalahang butang, ug mga ilhanan nga gibuhat sa Dios pinaagi kaniya. Kamo mismo nasayod niini, kay dinhi man kini mahitabo. Ang Dios, sumala sa kaugalingon niyang laraw ug pagbuot, mitugyan kang Jesus nganha kaninyo; ug gipapatay ninyo siya sa mga makasasala pinaagi sa paglansang kaniya sa krus. Apan gibanhaw siya sa Dios ug giluwas gikan sa gahum sa kamatayon, kay dili mahimo nga bilanggoon siya sa kamatayon. Kay si David miingon mahitungod kaniya, 'Nakita ko kanunay ang Ginoo sa atubangan ko, kay ania man siya sa akong tuo aron dili ako matarog. Tungod niini masadya ang akong kasingkasing ug ang akong mga pulong puno sa kalipay; Ug ako, bisan tuod mamatay, magmalaumon, kay dili mo biyaan ang akong kalag didto sa kalibutan sa mga patay. Dili mo itugot nga madugta ang buotan mong sulugoon. Imong gipakita kanako ang mga agianan paingon sa kinabuhi, ug pinaagi sa imong pagpakig-uban kanako ako mapuno sa kalipay.' "Mga igsuon, kinahanglan isulti ko kaninyo sa matin-aw ang mahitungod kang David nga atong patriyarka. Namatay siya ug gilubong, ug ang iyang lubnganan ania pa dinhi hangtud karon. Propeta siya, ug nahibalo sa gisaad sa Dios kaniya. Nanumpa ang Dios nga himoon niyang hari ang usa sa mga kaliwat ni David, ingon nga si David hari. Nasayod nang daan si David sa buhaton sa Dios busa naghisgot siya mahitungod sa pagkabanhaw sa Mesiyas sa iyang pag-ingon: 'Wala siya biyai didto sa Hades. Ang iyang lawas wala madugta. Ug gibanhaw sa Dios kining maong Jesus, ug kaming tanan mga saksi niini. Gituboy siya ngadto sa tuo sa Dios ug gidawat niya ang Espiritu Santo sumala sa gisaad sa iyang Amahan, ug ang inyo karong nakita ug nadungog mao na ang iyang gasa nga gibubo niya kanamo.
ANG PULONG SA GINOO.
SALAMAT SA DIOS.
SALMO RESPONSORYO
Ps. 16:1-2, 5, 7-8, 9-10, 11
R. Ginoo, tudloan mo kami sa dalan sa kinabuhi. / R. Aleluya.
Ampingi ako, O Dios, kay nagadangop ako kanimo; nagaingon ako sa Ginoo, "Ikaw ang akong Ginoo." O Ginoo, ikaw ang akong bahin ug akong kopa, ikaw ang nagalig-on sa akong suwerte. (R)
Daygon ko ang Ginoo nga nagatambag kanako; bisan sa gabii nagpahimangno kanako ang akong kasingkasing. Gibutang ko ang Ginoo kanunay sa akong atubangan; kon anaa siya sa akong tuo wala akoy kahadlokan. (R)
Busa nalipay ang akong kasingkasing ug ang akong kalag nagmaya, ang ako usab nga lawas buhi nga masaligon; Kay dili nimo pasagdan ako didto sa kahiladman, ni motugot ka nga ang imong alagad madunot. Ampingi ako, O Dios, kay ikaw man ang akong kalauman. Pakitaon mo ako sa dalan sa kinabuhi, sa bug-os nga kasadya diha sa imong atubangan, ang mga kalipayan sa imong tuong kamut hangtud sa kahangturan. (R)
PAGBASA GIKAN SA UNANG SULAT NI SAN PEDRO
1 Pt. 1:17-21
Kon gitawag ninyo nga Amahan ang Dios nga maghuhukom sa tanang mga tawo sa walay pagpinig sumala sa ilang binuhatan, tahora ninyo Siya sa tibuok ninyong kinabuhi. Kay nasayran ninyo nga ang gibayad aron pagluwas kaninyo gikan sa daotang pagkinabuhi nga inyong nasunod sa inyong mga katigulangan, dili butang nga kawad-an ug bili sama sa salapi o bulawan. Kay giluwas naman kamo sa bililhong dugo ni Cristo kinsa sama sa nating karnero, walay buling o mansa. Gipili siya sa Dios sa wala pa buhata ang kalibotan, ug gipadayag siya niining kataposang mga adlaw tungod kaninyo. Pinaagi Kaniya nagtuo kamo sa Dios nga maoy nagbanhaw ug nagpasidungog kaniya aron ang inyong pagtuo ug paglaom adto ninyo ibutang sa Dios.
ANG PULONG SA GINOO.
SALAMAT SA DIOS.
BERSO SA DILI PA ANG EBANGHELYO
Lk. 24:32
Aleluya! Nag-ingnanay sila, "Dili ba ingon og may kalayo nga nagdilaab sa atong kasingkasing sa dihang nagsulti siya ug nagpatin-aw kanato sa Kasulatan didto sa dalan?" Aleluya!
PAGBASA SA SANTOS NGA EBANGHELYO SUMALA NI SAN LUKAS
Lk. 24:13-35
Sa maong adlaw, duha kanila naglakaw paingon sa usa ka balangay nga ginganla'g Emmaus, mga napulog-usa ka kilometro gikan sa Jerusalem, ug nagsultihanay sila mahitungod sa tanang mga butang nga nahitabo. Samtang nagsultihanay sila, miduol si Jesus ug mikuyog kanila; nakita nila siya, apan wala sila makaila kaniya. Unya miingon si Jesus kanila, "Unsa bay inyong gipanagsultihan samtang naglakaw kamo?" Mihunong sila nga subo og panagway. Ug ang usa kanila nga ginganlag Cleopas, nangutana kaniya, "Ikaw ra bay nagpuyo sa Jerusalem nga wala mahibalo sa mga nahitabo didto niining pipila ka adlaw nga milabay?" "Unsang mga hitaboa?" nangutana siya. "Ang nahitabo kang Jesus nga Nazaretnon," mitubag sila. "Usa siya ka propeta, ug giila sa Dios ug sa tanang mga tawo nga gamhanan sa pulong ug sa buhat. Ang mga kadagkoan sa mga pari ug ang mga punoan mitugyan kaniya aron silotan siya sa kamatayon, ug gilansang nila siya sa krus. Naglaum unta kami nga kadto siya mao ang moluwas sa Israel! Labot pa niini, ikatulong adlaw na karon sukad kini nahitabo. Ug pipila sa mga babaye nga among mga kauban nakapakurat kanamo; nangadlawon sila pag-adto sa lubnganan, apan wala nila hikaplagi didto ang iyang lawas. Ug namalik sila ug nanugilon nga nakakita kuno sila'g panan-awon diin may mga anghel nga misulti kanila nga buhi siya. Ug pipila sa among mga kauban nangadto sa Iubnganan, ug nakaplagan nila kini sumala gayod sa gisugilon sa mga babaye, apan wala sila makakita kaniya." Unya miingon si Jesus kanila, "Pagkabuang gayod ninyo! Pagkadugay ninyong motuo sa tanang gisulti sa mga propeta! Dili ba kinahanglan man nga mag-antus ang Mesiyas niining mga butanga ug unya mosulod sa iyang himaya?" Ug gipasabot ni Jesus kanila ang gisulti mahitungod kaniya sa tibuok Kasulatan, sugod sa mga basahon nga gisulat ni Moises hangtud sa mga sinulat sa tanang propeta. Niadtong tungora duol na sila sa balangay nga ilang adtoan, ug nagpasabot si Jesus nga daw mopadayon lang siya sa unahan; apan gihawiran nila siya ug giingnan, "Anhi lang ta mamahulay kay hapit na magabii." Busa midayon siya ug nagpabilin uban kanila. Sa ila nang pagpanihapon, mikuha siya sa pan ug gipanalanginan niya kini; unya gipikaspikas niya ug gihatag kanila. Dihadiha nabuka ang ilang mga mata ug nakaila sila kaniya, apan nahanaw siya. Nag-ingnanay sila, "Dili ba ingon og may kalayo nga nagdilaab sa atong kasingkasing sa dihang nagsulti siya ug nagpatin-aw kanato sa Kasulatan didto sa dalan?" Ug nanindog sila dayon ug namalik sa Jerusalem, diin hikaplagan nila ang napulog-usa ka tinun-an ug ang uban pa nga nagkatigum, ug nag-ingon, "Tinuod gayod nga nabanhaw ang Ginoo! Si Simon nakakita kaniya!" Unya gisaysay sa duha ka tawo ang nahitabo didto sa dalan, ug nga nakaila sila sa Ginoo sa iyang pagpikaspikas sa pan.
ANG EBANGHELYO SA GINOO.
DAYGON IKAW, O KRISTO.
