https://www.facebook.com/116038503638765/

South Luzon Jurisdiction - Christian Youth Fellowship, College (2026)

30/04/2026

LABOR DAY FORUM | Lagom, Pasasalamat, at Hamon sa Kristiyanong Kabataan

Inaanyayahan din namin kayong makiisa sa Liturgical Mass sa darating na Mayo 1 (Araw ng Paggawa), ganap na ika-10 ng umaga at ika-1 ng hapon sa UCCP Calamba, Crossing Calamba. Mula roon, tayo ay sama-samang kikilos upang ipahayag ang ating paninindigan para sa makatarungang sahod, disenteng pamumuhay, at tunay na pagbabago.

Sa pagkilos at pananampalataya, sama-sama nating isabuhay ang ebanghelyo ng katarungan at pagpapalaya.

Makibaka. Maglingkod. Manindigan.

28/04/2026

📣 Inaanyayahan ang lahat!

Makisama sa CYF SLJ para sa gaganaping Labor Forum—isang online na forum na naglalayong pag-usapan ang kahalagahan ng paggawa, at ang pakikiisa sa buhay ng mga manggagawa, gayundin ang layunin ng Diyos sa ating bawat gawain.

Ito ay pagkakataon upang matuto, magbahagi, at mapalalim ang ating pananampalataya bilang kabataan.

📅 Petsa: April 29, 2026
⏰ Oras: 8 PM
📩 I-message niyo lang kami para maipadala namin sa inyo ang Zoom details via private message.

Ang gawaing ito ay bahagi rin ng ating paghahanda para sa paparating na Mayo Uno o Labor Day. Kaya naman, inaanyayahan din namin kayong makiisa at magkita-kita sa May 1 sa Calamba Crossing.

Sama-sama tayong lumago at maglingkod. Kitakits!

19/03/2026

Kabataang Kristiyano Laban sa Taas-Presyo at Digmaang Mapaniil

Sa kasalukuyang panahon, muling nararanasan ng sambayanan ang walang humpay na pagtaas ng presyo ng langis—isang krisis na hindi lamang usapin ng merkado, kundi malinaw na bunga ng magkakaugnay na puwersang sosyo-ekonomiko at pampulitika. Sa ilalim ng dereguladong industriya ng langis, hinahayaan ang malalaking kumpanya na magtakda ng presyo ayon sa pandaigdigang galaw ng suplay at demand, habang pasan ng mamamayan ang bigat ng bawat pagtaas. Ang pagpataw pa ng Value-Added Tax (VAT) at iba pang buwis sa produktong petrolyo ay lalo lamang nagpapalala sa kalagayan ng mga maralita, manggagawa, at magsasaka.

Hindi maikakaila na ang pag-igting ng tensyon at digmaan sa Gitnang Silangan—lalo na ang agresyong militar na inuugnay sa alyansa ng Estados Unidos at Israel—ay may direktang epekto sa pandaigdigang suplay ng langis. Ang ganitong mga digmaan, na nakaugat sa interes ng kapangyarihan at kontrol sa yaman, ay nagdudulot ng artipisyal na kakulangan at spekulasyon sa langis, na siyang nagtutulak sa patuloy na pagtaas ng presyo nito sa pandaigdigang merkado. Sa huli, ang mga bansang tulad ng Pilipinas, na lubos na nakaasa sa inaangkat na langis, ang siyang higit na naaapektuhan.

Sa gitna ng krisis na ito, kinokondena rin namin ang administrasyon ni Pangulong Ferdinand Marcos Jr. sa pagpapatupad ng mga panandalian at “band-aid” na solusyon—mga hakbang na tila nagpapahupa lamang sa sintomas ngunit hindi tinutugunan ang ugat ng suliranin. Ang mga subsidiya at pansamantalang ayuda ay hindi sapat kung nananatili ang mga polisiyang nagpapahintulot sa deregulasyon, labis na pagbubuwis, at pag-asa sa dayuhang suplay ng langis. Ang ganitong uri ng pamamahala ay nag-iiwan sa mamamayan sa paulit-ulit na siklo ng krisis at paghihirap.

Bilang kabataang simbahan, naninindigan kami na ang pananampalataya ay hindi hiwalay sa panawagan para sa katarungan. Ang Ebanghelyo ay malinaw sa panig ng naaapi, at ang aming pagkilos ay tugon sa panawagang ito.

Kaya naman, kami ay nagsagawa ng isang online rally bilang kolektibong tinig laban sa patuloy na pagsasamantala sa mamamayan at sa mapanirang digmaan na nagpapahirap sa marami.

Mariin naming ipinapanawagan:
Ibasura ang Oil Deregulation Law!
Tanggalin ang VAT at iba pang labis na buwis sa langis!
Itigil ang agresyong militar at isulong ang kapayapaang nakabatay sa katarungan!

Sa panahong ito ng kagipitan, hindi kami mananahimik. Inaanyayahan namin ang kapwa kabataan at sambayanan: makiisa, magsalita, at mangalampag.

Ibahagi ang inyong paninindigan sa comment section ng post na ito o sa inyong sariling mga social media platform. Sama-sama nating palakasin ang tinig ng kabataan para sa katarungan, kapayapaan, at tunay na pagbabago.

10/03/2026

PANOORIN: Bilang panimula ng ikalawang araw ng CYF-SLJ Biennial Assembly nitong Marso 7, sama-samang sumayaw ng One Billion Rising ang mga Kristiyanong kabataan bilang pakikiisa sa International Women's Month.

Nagkaroon din ng maikling talakayan hinggil sa kinakaharap na abuso at pananamantala ng mga kababaihan sa ating lipunan at kung paanong ang mga Kristiyanong kabataan din naman ay nararapat na makiisa sa panawagang wakasan ang karahasan sa kababaihan at kasarian.

07/03/2026

Tinalakay ni Rev. Euvy Guerrero, Deputy Conference Minister ng Northeast Southern Tagalog Conference (NESTCON), sa kanyang Biblico-Theological Reflection sa panimulang pananambahan ng CYF-SLJ Biennial Assembly 2026 na ang paglalakbay kasama ang Panginoon ay nag-aalis ng takot at pangamba tungo sa isang malaki at matapang na hakbang sa pagsasabuhay ang misyon.

Binigyang-diin din niya na ang pagsasabuhay ng ating pananampalataya ay nararapat na yumayakap sa mga anawim—yaong mga taong itinutulak sa tabi, sa sulok, at inilulugmok sa kahirapan at ang tanging inaasahan na lamang ay ang Panginoon.

Kinakailangan ang ating pakikipagkaisa sa sa mga anawim sa paninindigan at paglikha ng espasyo upang mamuhay nang may dignidad sa gitna ng mapaniil na sistema ng ating lipunan.

Tangan ng CYF-SLJ Biennial Assembly 2026 ang temang "STRIDE: Walking with Jesus, Journeying with the Anawim" at mga batayang teksto mula sa Zefanias 3:12 at Marcos 8:34.

02/03/2026

Kaya mga kaCYF IPARAMDAM 🙌🤝NIYO NA MAHAL NIYO KAMI 🥰😍😘🥺😖🥹 sinasabi namin sainyo na sa MARCH 6-8 2026 SA UCCP LUISIANA, Laguna ay gaganapin ang ating Biennial Assembly! 📝📓🗒️💻 Kitakits mga kapatid! Ihanda ang buong puso ❤️‍🔥isip 🤯 at diwa 🧘

𝐒𝐓𝐑𝐈𝐃𝐄: 𝐖𝐚𝐥𝐤𝐢𝐧𝐠 𝐰𝐢𝐭𝐡 𝐉𝐞𝐬𝐮𝐬, 𝐣𝐨𝐮𝐫𝐧𝐞𝐲𝐢𝐧𝐠 𝐰𝐢𝐭𝐡 𝐭𝐡𝐞 𝐀𝐧𝐚𝐰𝐢𝐦

𝐁𝐈𝐁𝐋𝐄 𝐓𝐄𝐗𝐓:
𝐙𝐞𝐩𝐡𝐚𝐧𝐢𝐚𝐡 𝟑:𝟏𝟐� “𝐁𝐮𝐭 𝐈 𝐰𝐢𝐥𝐥 𝐥𝐞𝐚𝐯𝐞 𝐲𝐨𝐮 𝐭𝐡𝐞 𝐦𝐞𝐞𝐤 𝐚𝐧𝐝 𝐡𝐮𝐦𝐛𝐥𝐞. 𝐓𝐡𝐞 𝐫𝐞𝐦𝐧𝐚𝐧𝐭 𝐨𝐟 𝐈𝐬𝐫𝐚𝐞𝐥 𝐰𝐢𝐥𝐥 𝐭𝐫𝐮𝐬𝐭 𝐢𝐧 𝐭𝐡𝐞 𝐧𝐚𝐦𝐞 𝐨𝐟 𝐭𝐡𝐞 𝐋𝐨𝐫𝐝.”
𝐌𝐚𝐫𝐤 𝟖:𝟑𝟒� “𝐓𝐡𝐞𝐧 𝐡𝐞 𝐜𝐚𝐥𝐥𝐞𝐝 𝐭𝐡𝐞 𝐜𝐫𝐨𝐰𝐝 𝐭𝐨 𝐡𝐢𝐦 𝐚𝐥𝐨𝐧𝐠 𝐰𝐢𝐭𝐡 𝐡𝐢𝐬 𝐝𝐢𝐬𝐜𝐢𝐩𝐥𝐞𝐬 𝐚𝐧𝐝 𝐬𝐚𝐢𝐝: ‘𝐖𝐡𝐨𝐞𝐯𝐞𝐫 𝐰𝐚𝐧𝐭𝐬 𝐭𝐨 𝐛𝐞 𝐦𝐲 𝐝𝐢𝐬𝐜𝐢𝐩𝐥𝐞 𝐦𝐮𝐬𝐭 𝐝𝐞𝐧𝐲 𝐭𝐡𝐞𝐦𝐬𝐞𝐥𝐯𝐞𝐬 𝐚𝐧𝐝 𝐭𝐚𝐤𝐞 𝐮𝐩 𝐭𝐡𝐞𝐢𝐫 𝐜𝐫𝐨𝐬𝐬 𝐚𝐧𝐝 𝐟𝐨𝐥𝐥𝐨𝐰 𝐦𝐞.”

27/02/2026

Pahayag ng CYF-SLJ patungkol sa pagdinig ng kaso ni Duterte sa ICC.

Ngayong araw, habang ginaganap ang pagdinig ni Rodrigo Duterte sa International Criminal Court, ang taong simbahan ay muling tumitindig sa matagal na nitong pinaninidigan: ang buhay ay kaloob ng Diyos, at walang sinumang may kapangyarihang kumitil nito nang walang pananagutan.

Ang hustisya ay hindi paghihiganti. Ito ay pagpapanumbalik ng dangal. Ito ay pagkilala na ang bawat buhay ay banal. Hindi lamang numero ang mga nasawi sa tinaguriang “war on drugs.” Sila ay mga magulang na hindi na nakauwi. Mga anak na hindi na nayakap. Mga kapatid at kaibigang pinatahimik ng bala at takot. Ang dugo ng mahihirap ay hindi maaaring maging pundasyon ng kapayapaan. Ang kapayapaang itinayo sa bangkay ay hindi kapayapaan—ito ay katahimikan ng pangamba.

Kasama sa ating panalangin at pakikibaka ang mga bilanggong politikal na patuloy na nakakulong, ang mga aktibistang pinaslang dahil sa kanilang paninindigan, at ang mga pamilyang hanggang ngayon ay naghahanap ng hustisya para sa mga biktima ng extrajudicial killings. Ang Diyos ng buhay ay Diyos ng katarungan. At ang pananampalatayang walang pakialam sa inaapi ay pananampalatayang hungkag.

Sa gitna nito, nariyan pa ang mga usapin ng pagtakbo ng anak ni Rodrigo na si Sara Duterte na sa halip managot sa kaniyang mga kasalanan, kabilang ang 125 milyong pisong ginastos sa loob ng 11 araw, ay nagnanais pa ng pagtakbo wala pa man ang eleksyon. Tunay na wala sa interes ng pamilyang ito ang maglingkod sa mamamayang Pilipino.

Bilang simbahan, hindi kami tatahimik.
Sapagkat ang Ebanghelyo ay hindi neutral sa harap ng pagpaslang. Ang krus ay hindi dekorasyon—ito ay panawagan sa pakikiisa sa mga pinapasan ng pasakit. At ang muling pagkabuhay ay paalala na ang katotohanan ay hindi kailanman mananatiling nakalibing.

Never Again. Never Forget.

Huwag nating kalimutan ang madugong digmaan laban sa mahihirap. Huwag nating kalimutan ang mga inulila at pinatahimik.Huwag nating kalimutan ang mga tanong ng korapsyon at kapangyarihang walang pananagutan.

Kasama ng Taumbayan ang Simbahan sa panawagan na managot si Duterte sa kaniyang mga kasalanan. Ang alaala ay anyo ng paglaban.Ang pananalangin ay dapat humantong sa pagkilos. At ang pananampalataya, kung tunay, ay laging kakampi ng katarungan.

Sa Diyos ng buhay, kami naninindigan. Sa bayan, kami nakikiisa. Sa hustisya, kami magpapatuloy

24/02/2026

ITANGLAW ANG LIWANAG NG KATARUNGAN! PAGLIYABIN ANG APOY NG PAGBABAGO! KRISTIYANONG KABATAAN, TUMINDIG AT MANALANGIN LABAN SA KORAPSYON! NEVER AGAIN! NEVER FORGET!

Linisin ninyo ang inyong sarili at magbalik-loob sa akin; sa aking harapan, kasamaan ninyo’y tigilan. Pag-aralan ninyong gumawa ng makatuwiran; pairalin ang katarungan; tulungan ang naaapi; ipagtanggol ninyo ang mga ulila, at tulungan ang mga biyuda. (Isaias 1:16-17)

Ikaw ang tunay na kanlungan ng mahihirap at mga nangangailangan, matatag na silungan sa panahon ng unos at nakakapasong init. Sa harap mo’y mabibigo ang mararahas, sila’y parang bagyong humahampas sa matibay na pader. Ang ingay ng dayuhan ay parang init sa disyerto, ngunit napatahimik mo ang ingay ng mga kaaway; hindi na marinig ang awit ng malulupit, parang init na natakpan ng ulap. (Isaias 25:4-5)

Ngayong Pebrero 25, 2026, gugunitain ng sambayanang Pilipino ang ika-40 taon ng makasaysayang pagbabangon at pagkakaisa ng mga mamamayan na nagpabagsak sa diktadura ni Ferdinand Marcos Sr.

Sa loob ng malagim na panahon ng Batas Militar, kabi-kabilaan ang naging paglabag sa mga karapatang pantao, kabilang ang di makatarungang paghuli sa mga aktibista at pagkukubli ng katotohanan sa pamamagitan ng paglupig sa malayang pamamahayag. Sa kabilang banda, kasabay ng paglala ng kahirapan at kalagayan ng mga manggagawa’t magsasaka, nakapagkamal ang mga Marcos ng mahigit $10-B o mahigit Php600-B, na inilagay sa mga bangko sa ibang bansa at nilustay sa pamamagitan ng pagbili ng mga lupain, gusali, ari-arian, at negosyo kasabwat ang kanilang mga kroni.

Bunsod ng pagkamulat sa ganitong pasismo at pandarambong ng diktaturya ni Marcos Sr., isinulong ng iba’t ibang sektor ng lipunan, kasama ang mga taong simbahan, ang pakikibaka sa pamamagitan ng pagtungo sa mga lansangan upang ipanawagan ang panunumbalik ng demokrasya sa ating bansa.

Subalit bagama’t lumipas na ang apat na dekada, hindi pa rin tuluyang naiiba ang ating kalalagayan at hindi pa rin lubusang nababago ang bulok na sistemang nagpapahirap sa mga mamamayan at naglilingkod lamang sa iilang makapangyarihan.

Magpahanggang ngayon, kung saan isa muling Marcos ang nakaupo sa posisyon, talamak pa rin ang paglabag sa karapatang pantao at panunupil sa mga kritiko ng gobyerno. Dagdag pa, naglipana pa rin sa pamahalaan ang mga nagsasabwatang burukrata kapitalista na pinatatakbo ang gobyerno nang tila negosyo. Imbes na magsilbi sa taumbayan, ang kanilang mga pansariling interes ang kanilang pinaglilingkuran.

Ganito mismo ang inilantad ng pumutok na isyu sa ghost flood control projects—na matagal nang umiiral ang sistemikong katiwalian sa ating pamahalaan. Maging ang ating kasalukuyang pangulo na si Ferdinand “Bongbong” Marcos Jr. ay dawit din sa isyung ito, na siya na ring ibinunyag ng talaan ng natanggap niyang kickback na dinala sa kanilang bahay sa Forbes Park.

Hindi ito nakahiwalay na isyu sa iba pang mga suliraning panlipunan, sapagkat nagpapatunay ito na matagal nang nililinlang ng mga naghahari-harian ang sambayanan. Nagpapalala at nagpapanatili ito sa sistemang tanging ang mga nasa tuktok lamang ang nakikinabang, habang iniiwan ang mga nasa laylayan.

Bilang mga Kristiyanong mananampalataya, tinatanaw natin na ang laganap na korupsiyon sa pamahalaan ay paglabag sa kalooban ng ating panginoon. Ito ay gawaing hindi nakaangkla sa katapatan, sa halip ay mapanlamang, makasarili, at nagdudulot ito ng kahirapan sa mga mamamayan.

Itinuturo sa atin ng Panginoon na nararapat na ang ating mga gawain ay maging makatuwiran, at lagi’t lagi nating pairalin ang katarungan. Gayon din naman, gaya ng isinasaad sa mga sulat ni propeta Isaias, ang Panginoon ang ating kanlungan at kalakasan; at sa pamamagitan ng ating pakikiisa at pakikibahagi sa malawakang pakikibaka, magagapi natin ang pang-aaping matagal nang nagpapahirap sa masa.

Nahahamon ngayon ang bawat isang Kristiyanong kabataan na huwag limutin ang kasaysayan ng ating bayan at patuloy na sumulong at maging kabahagi sa pananalangin at paglaban upang makamit ang ganap na kapayapaan.

Tangan ang ating naglalagablab na pananampalataya, pagliyabin natin ang apoy ng pagbabago at itanglaw ang sulo ng katarungan sa mga taong matagal nang pinagkakaitan nito.

Kristiyanong kabataan, lumahok sa malawakang pagkilos sa Pebrero 25 sa EDSA!
Kapayapaang nakabatay sa katarungan, ipaglaban!
Lahat ng sangkot, dapat managot!
Marcos at Duterte, patalsikin!

10/12/2025

WALANG HUSTISYA SA BAYAN NA PINAPATAY ANG KARAPATAN
Opisyal na Pahayag ng Christian Youth Fellowship - South Luzon Jurisdiction para sa International Human Rights Day (IHRD)

Ipagtanggol mo ang mga di makalaban, ipaglaban ang kanilang karapatan. Ipahayag mo nang malinaw ang katotohanan at ang katuwiran, at igawad ang katarungan sa api at mahirap.
(Kawikaan 31:8-9)

Kalooban ng ating Panginoon ang maayos at mapayapang pamumuhay ng bawat isa, puspos ng kasaganaan at malaya mula sa kahirapan, inhustisya, at paniniil. Subalit sa isang bayang kinikitil at ipinagkakait ang karapatan, umiiral nga ba ang katarungan?

Bilang mga Kristiyanong mananampalatayang itinalagang mamuhay sa pamayanan kasama ng ating kapwa, bahagi ng ating gampanin ang pagtatatag ng isang makakatarungang kaayusang panlipunan. Makakamit lamang natin ito kung tuluyang natatamasa ng bawat isa sa atin ang ating mga karapatan sa isang matiwasay na buhay, kung saan natatanggap ng bawat isa ang kanilang mga pang-araw-araw na pangangailangan, malaya, walang takot o pangamba, at namumuhay nang may dangal.

Ngayong International Human Rights Day, kung kailan ginugunita natin ang anibersaryo ng pagtatatag ng Universal Declaration of Human Rights (UDHR), ipinapahayag ng Christian Youth Fellowship - South Luzon Jurisdiction (CYF-SLJ) ang masidhing paninindigan sa pagsasabuhay ng ating propetikong ministeryo at pagsaksi bilang mga Kristiyanong mananampalataya sa lipunang ating ginagalawan sa pamamagitan ng aktibong pagkilos at pakikibahagi sa laban tungo sa pagkamit ng karapatang walang-pagtatanging iginawad ng Panginoon sa lahat.

Sa panahon kung kailan lumalalang krisis sa karapatang pantao, higit lalong kinakailangan ang pakikiisa at pakikibaka ng mga Kristiyanong kabataan upang depensahan ang lahat ng mga nagiging biktima ng karahasan, inhustisya, at pang-aapi.

Dito mismo sa ating rehiyon ng South Luzon, maoobserbahan ang pagsasawalang-bahala sa karapatan ng mga magsasaka, mangingisda, at katutubo sa kanilang kabuhayan at mga panirahan matapos ang kaliwa’t kanan na development agresyon projects na magpapalayas sa kanila at kikitil sa ating kalikasan. Hindi rin sapat ang sahod na kinikita ng mga manggagawa, g**o, at iba pang propesyunal upang tugunan ang kanilang pangangailangan at suportahan ang kanilang mga pamilya. Lumalala na rin ang krisis sa edukasyon, subalit imbes na paunlarin ay patuloy pangtinatapyasan ang budget ng mga State Universities and Colleges (SUCs). Umaarangkada rin ang pribatisasyon sa mga batayang serbisyo kagaya ng tubig subalit tanging mga mayayaman lamang ang nakikinabang bunsod ng pagpapatakbo rito ng tila negosyo. At higit sa lahat, patuloy pa ring ang mga atake, red-tagging, at pagsasampa ng mga gawa-gawang kaso ng estado sa mga progresibo’t mahabaging indibidwal, maging mga kapwa natin mananampalataya at taong simbahan, na ang tanging nais lamang ay ipagtanggol ang karapatan ng kanilang mga kapwa.

Mula nang maupo sa pwesto ang kasalukuyang administrasyon ni Marcos Jr. noong 2022, mayroon nang naitalang 134 na political extrajudicial killings, 14 na desaparecidos, 822 na iligal o arbitraryong pag-aresto, mahigit 57,000 biktima ng indiscriminate bombings, at 10.8 milyong biktima ng mga banta, panliligalig, at intimidasyon.

Sa kabilang banda, habang patuloy na naghihikahos ang taumbayan sa pagbaha ng pang-aapi at karahasan, nagpapakasasa naman ang iilang mayayaman at nasa kapangyarihan sa kaban ng bayan. Kung tutuusin, hindi nahihiwalay ang isyu ng katiwalian sa krisis ng karapatang pantao sapagkat kung nagagamit lamang nang wasto ang perang pinagpagalan ng mga mamamayan, maaari sanang matugunan ang pangangailangan ng nakararami.

Sa ganitong mukha ng ating lipunang ginagalawan, kung saan ipinagkakait sa atin ang mga batayang karapatan sa buhay, dignidad, at pag-unlad, huwad ang kaayusan at kapayapaan. Hindi umiiral ang katarungang panlipunan. Hangga’t pinapatay ang karapatan, walang ganap na hustisya sa bayan.

Kaya naman, ito ang aming panawagan: Itaguyod ang karapatang pantao na kalooban ng Diyos para sa lahat. Ipaglaban ang lupa, sahod, trabaho, edukasyon, at karapatan. Depensahan ang mga nagtataguyod ng kapayapaang nakabatay sa katarungan.

KARAPATAN, HINDI KATIWALIAN!

20/08/2025

𝗞𝗿𝗶𝘀𝘁𝗼 𝗮𝗻𝗴 𝗔𝘁𝗶𝗻𝗴 𝗞𝗮𝗽𝗮𝘆𝗮𝗽𝗮𝗮𝗻: 𝑷𝒂𝒏𝒂𝒘𝒂𝒈𝒂𝒏 𝒏𝒈 𝑪𝒀𝑭 𝑺𝑳𝑱 𝒔𝒂 𝑷𝒂𝒈𝒑𝒂𝒑𝒂𝒏𝒖𝒎𝒃𝒂𝒍𝒊𝒌 𝒏𝒈 𝑫𝒂𝒏𝒈𝒂𝒍 𝒂𝒕 𝑲𝒂𝒕𝒂𝒓𝒖𝒏𝒈𝒂𝒏 𝒔𝒂 𝑴𝒊𝒏𝒅𝒐𝒓𝒐

"Mapapalad ang mga gumagawa ng daan sa kapayapaan, sapagkat sila’y tatawaging mga anak ng Diyos." (Mateo 5:9)
"Ako’y naparito upang sila’y magkaroon ng buhay, at magkaroon nito nang masagana." (Juan 10:10)

Sa liwanag ng Salita ng Diyos, pinaaalalahanan ang sambayanan na ang kapayapaan at buhay ay mga sagradong kaloob na ipinagkatiwala ng Maykapal sa sangkatauhan. Malinaw ang Ebanghelyo: ang ministeryo ni Kristo ay hindi nagbubunga ng pagkawasak, kundi ng pagkakasundo, kagalingan, at masaganang buhay para sa lahat. Kaya naman, ang pagsunod kay Kristo ay nangangahulugang pagtanggap at pagtataguyod ng dangal ng bawat tao at pagbabantay sa kabanalan ng buhay.

Ngayong Agosto, ginugunita natin hindi lamang ang International Youth Day kundi pati rin ang International Humanitarian Law, isang paalala na kahit sa gitna ng tunggalian, ang dangal ng bawat tao ay hindi dapat tapakan. Ipinapaalala nito sa lahat ng bansa at pinuno na tungkulin nilang tiyakin ang kaligtasan ng mga sibilyan, ang seguridad ng mga pamilya, at ang kabanalan ng buhay. Hindi lamang ito usapin ng batas, kundi ito ay usapin ng pananampalataya, sapagkat ang bawat tao ay nilikha sa wangis ng Diyos, at bawat pamayanan ay may karapatang mamuhay nang mapayapa.

Ngunit sa ating bansa, ang katotohanang ito ay mariing itinatanggi at isa dito ay ang kasalukuyang kalagayan sating hurisdiksyon, sa isla ng Mindoro. Sa likod ng bawat balita ng militarisasyon ay hindi lamang numero, kundi kwento ng tao. Kwento ito ng inang Mangyan na tangan ang kaniyang anak habang lumilikas mula sa kanilang sitio, walang katiyakan kung muli pa silang makakabalik. Kwento ito ng ama na dating magsasaka, na ngayo’y hindi makapagtanim dahil binabantayan ng mga sundalo ang lupang dati’y nagbibigay-buhay sa kaniyang pamilya. Kwento ito ng matatandang tagapangalaga ng kultura at alaala ng kanilang mga ninuno, na ngayo’y dumaraing habang dahan-dahang binubura ng mga proyektong ganid ang kanilang buhay at kultura. Sila’y hindi kaaway ng estado kundi mga inosenteng buhay—mga magsasaka, bata, ina, ama—na naghahangad lamang ng simpleng bagay; ang karapatang mabuhay, makalikha ng pagkain para sa kanilang mga hapag, at mangarap sa piling ng kapayapaan.

Ngayong Agosto ang International Humanitarian Law, ang mismong diwa nito ay tinatapakan sa Mindoro. Ang panawagan na protektahan ang sibilyan ay hindi pinapansin at ang dangal ng buhay ay binabalewala. Ang kapayapaang ipinangangaral ni Kristo ay binabago ng takot at dahas. Hindi ito ang kapayapaang ninanais ng Diyos. Ang tunay na kapayapaan ay hindi nakukuha sa pagpapatahimik ng mahihirap, o sa pagpapaalis sa mga katutubo mula sa kanilang lupang ninuno. Ang kapayapaang walang katarungan ay hindi tunay na kapayapaan—ito’y katahimikan na pinilit ng takot.

Gayunpaman, patuloy tayong kumakapit sa pag-asa. Sapagkat ang Diyos na ating pinananaligan ay Diyos ng buhay, Diyos na nakikinig sa daing ng mga naaapi, at Diyos na nangako na dadaloy ang katarungan na parang tubig at ang katuwiran na parang ilog na walang pagkatuyo. Ngayong buwan din ng Agosto ay ang pakikiisa ng ating simbahan sa Mission Month, kaya naman magsilbi nawa itong panawagan, na huwag tayong pumikit at huwag tayong manahimik. Damayan natin ang ating mga kapatid sa Mindoro, iparinig natin ang kanilang tinig, at ipagtanggol ang kanilang karapatan na mabuhay nang may dignidad sa sarili nilang lupain. Nanawagan tayo sa mga pinuno ng bayan at sa hanay ng militar, at mga rebolusyonaryong grupo na talikuran ang daan ng karahasan, at tahakin ang landas ng dayalogo at katarungan. Kasabay nito ay nananawagan tayo sa lahat ng may malasakit at sa lahat ng tagasunod ni Kristo na makiisa sa pakikibaka ng mga taga-Mindoro, sapagkat ang kanilang laban ay laban nating lahat—laban para sa kinabukasang may kapayapaang hindi lamang ipinapangako kundi tunay na isinasabuhay. Nananawagan tayo na dumaloy ang tulong sa paraan ng pagsasagawa ng agaran at malayang imbestigasyon sa kalagayan sa Mindoro, maglunsad ng makabuluhang relief operation para sa mga pamilyang apektado, maglaan ng sapat na kompensasyon sa mga nawalan ng kabuhayan at tahanan, at higit sa lahat, panatilihin ang paggalang at mahigpit na pagpapatupad ng International Humanitarian Law

Sa harap ng takot, pinipili natin ang tapang. Sa harap ng karahasan, pinipili natin ang kapayapaan. Sa harap ng kasakiman, pinipili natin ang katarungan. Ito ang ating pananampalataya, ito ang ating bokasyon, at ito ang ating patotoo sa mundo, na ang buhay ay banal, na ang kapayapaan ay posible, at si Kristo mismo ay nakikiisang naglalakbay kasama ng mga naghahanap ng kalayaan at dangal.

"Ngunit dumaloy nawa ang katarungan na parang tubig, at ang katuwiran na parang isang ilog na hindi natutuyo." (Amos 5:24)

South Luzon Jurisdiction - Christian Youth Fellowship

30/04/2026

28/04/2026

19/03/2026

10/03/2026

07/03/2026

02/03/2026

27/02/2026

24/02/2026

10/12/2025

20/08/2025

Address

Website

Alerts

Shortcuts

Share

Category