31/03/2026
MAY MALI SA CHURCH NAMIN
Dugay na nako ni napansin, sa tinuod lang. Adunay lahi nga kabug-at sa matag pagsimba, murag naay nagtuok sa matag kanta, ug adunay mga lamat sa matag ngisi nga akong makita sa palibot. Gisulayan nako pagpangita ang sayop—tingali sa Pastor nga sobra ka prangka mosulti? Tingali sa mga lider nga murag kulang sa buhat? O tingali sa mga miyembro nga murag nagpakaaron-ingnon lang matag Domingo?
Nagsugod ko’g lista sa ilang mga kakulangon. Ang kasaba sa palibot, ang kabugnaw sa pagdawat, ang matag usa , ang tradisyon nga murag wala na’y kalag.
Sa matag “Pangutana Ngano?” nga mosulod sa akong hunahuna, mas lalom ang akong pagduhaduha. Hangtod sa usa ka gabii, samtang akong giusisa ang matag sayop sulod sa upat ka kanto sa maong lugar, gidala ko sa Diyos sa usa ka higayon sa kahilom.
Didto nako nasabtan ang makusog nga kamatuoran.
Adunay sayop sa among simbahan—oo, wala ko nasayop, adunay gayuy sayop sa among simbahan—ug ang sayop diha mao AKO.
Sayop ko kay mas busy ko sa pagpangita sa hugaw sa sinina sa uban kaysa sa paglimpyo sa akong kaugalingong kasingkasing. Sayop ko kay misulod ko aron maghukom sa ospital imbis nga ako modawat nga ako mismo usa ka pasyente nga nasamdan ug masakiton. Sa matag pagkuwestiyon nako sa sistema, ug sa binuhatan sa uban nakalimot ko nga ang simbahan dili gitukod alang sa mga perpekto, kundili alang sa mga nangabuak ,ug nangagisi nga kasingkasing ug kinabuhi nga gitahi ra usab pag-usab sa gugma ug grasya sa Dios.
Makabaton gayud ug sayop sa matag organisasyon, sa matag grupo, ug sa matag tawo—kay kitang tanan hinimo sa abog. Walay perpektong simbahan kay walay perpektong tawo. Ug sa katapusan sa tanan nakong pangutana, usa ra gyud ang tubag nga nagpabilin: Ang Diyos ra ang hingpit. Siya ra ang pundasyon nga dili maguba bisan pa man ang mga tawo sulod niini masayop ug mapakyas usab.
![Psalm 56:3[3]When I am afraid, I put my trust in you.](https://img4.prayers1.com/701/155/1517902117011557.jpg)
