20/10/2024
Daily Mass Readings
OKTUBRE 20, 2024-DOMINGO
Ika-Kawhaa'g Siyam nga Domingo sa Ordinaryong Panahon
World Mission Sunday/Sunday of Cultures (Green)
ANG PAGBASA GIKAN SA BASAHON NI PROPETA ISAIAS (Is. 53:10-11)
Ang Ginoo nag-ingon, "Maoy akong kabubut-on ang pagpaantos ug pagsakit kaniya; sa dihang gihimo niya ang iyang kaugaligon ingon nga halad alang sa sala, makita niya ang iyang mga kaliwat ug makabaton siyag taas nga kinabuhi; ug pinaagi kaniya matuman ang laraw sa Ginoo.
Inigkatapos sa iyang mga pag-antos, malipay na usab siya ug masayod siya nga wala makawang ang iyang mga pag-antos. Siya ang matarong kong alagad ug siya maoy mopas-an sa silot sa katawhan aron mahimo silang matarong.
SALMO RESPONSORYO
Ps. 33:4-5, 18-19, 20, 22
T. O Ginoo, kaloy-i kami, sanglit nagasalig kami kanimo.
Matarong ang pulong sa Ginoo, ug ang tanan niyang mga buhat kasaligan. Nahigugma siya sa husto ug matarong; puno ang yuta sa kaluoy sa Ginoo.
T. O Ginoo, kaloy-i kami, sanglit nagasalig kami kanimo.
Tan-awa, ang mga mata sa Ginoo anaa kanila nga mahadlokon kaniya, kanila nga nagalaum sa iyang kaayo, Aron pagluwas kanila gikan sa kamatayon ug pag-amping kanila sa panahon sa gutom.
T. O Ginoo, kaloy-i kami, sanglit nagasalig kami kanimo.
Ang among kalag nagapaabot sa Ginoo, nga mao ang among hinabang ug among taming. Maania unta kanamo, O Ginoo, ang imong kaluoy, kami nga nagalaum kanimo.
T. O Ginoo, kaloy-i kami, sanglit nagasalig kami kanimo.
ANG PAGBASA GIKAN SA SULAT NGADTO SA MGA HEBREO (Heb. 4:14-16)
Busa lig-onon ta ang atong pagtuo kay duna kitay Pangulong Pari nga halangdon nga atua na sa presensya sa Dios-si Jesus, ang anak sa Dios. Ang atong Pangulong Pari dili sama sa ubang pari nga dili mobatig kaluoy sa atong mga kahuyang. Hinunoa, usa siya ka Pangulong Pari nga gitintal sa tanang paagi sama kanato, apan wala gayod makasala. Busa, magmasaligon kita ug moduol sa trono sa Dios diin atua ang grasya aron madawat nato ang kaluoy ug ang grasya nga atong gikinahanglan.
ALELUYA (Mk. 10:45)
T. Aleluya.
Ang Anak sa Tawo wala moanhi aron alagaran, kondili sa pag-alagad ug paghatag sa iyang kinabuhi aron pagtubos sa daghang mga tawo.
T. Aleluya.
ANG PAGBASA GIKAN SA EBANGHELYO SUMALA NI SAN MARCOS (Mk.10:35-45)
Unya si Santiago ug si Juan, mga anak ni Sebedeo, miduol kang Jesus ug miingon, “Magtutudlo, aduna kami ipabuhat kanimo.” “Unsa may ipabuhat ninyo kanako?” nangutana si Jesus kanila. Mitubag sila, “Kon molingkod ka na unya sa imong trono didto sa imong Gingharian nga mahimayaon, palingkura kami uban kanimo: ang usa sa imong tuo ug ang usa sa imong wala.” Miingon si Jesus kanila, “Wala kamoy kalibotan sa inyong gipangayo. Makainom ba kamo sa kupa sa pag-antos nga akong imnan? Makapabunyag ba kamo sa paagi nga ako bunyagan?” “Oo,” mitubag sila.
Miingon si Jesus kanila, “Makainom gayod kamo sa kupa nga akong imnan ug makapabunyag kamo sa paagi nga ako bunyagan. Apan wala akoy katungod sa pagpili kon kinsa ang palingkuron sa akong tuo ug sa akong wala. Ang Dios mao ang mohatag niining mga dapita ngadto sa gitagan-an niini.”
Sa pagkabati niini sa napulo ka tinun-an, nangasuko sila kang Santiago ug kang Juan. Tungod niini, gipaduol silang tanan ni Jesus ug giingnan, “Nasayod kamo nga ang mga punoan sa mga tawo naghari kanila, ug ang mga pangulo nagmando kanila; apan kaninyo dili kini mao ang paagi. Kon usa kaninyo buot madakong tawo, kinahanglan nga mag-alagad siya sa tanan; ug ang buot nga mahimong labaw sa tanan, kinahanglan nga siya magpaulipon sa tanan. Kay bisan gani ang Anak sa Tawo wala moanhi aron alagaran, kondili sa pagalagad ug paghatag sa iyang kinabuhi aron pagtubos sa daghang mga tawo.”
ANG EBANGHELYO SA GINOO.
DAYGON IKAW, O CRISTO.
- PAMALANDONG -
Ang pundok sa mga tinun-an ni Jesus aduna usab gipangadoy. Sa ila gayong pagkatawhanon naninguha usab sila sa kalibutanong kabantog inig abot sa higayon nga pagatukoron na sa ilang Labaw ang gingharian. Ang pangandoy, ilabina sa mga anak ni Sebedeo, nakahaling og kasuko sa ilang mga kaubanan. Dugang pa niana, ang magarbohon nilang gitinguha nadayag human mismo sa pagpahibalo ni Jesus nga siya mag-antus ug mamatay. Wala sa hustong higayon. Apan sa kahibulong sa mga nasuko nga mga tinun-an wala badlonga ni Jesus si Santiago ug si Juan o si bisan kinsa sa ilang pundok nga adunay tawhanong panghunahuna, niining paagiha gipadayag ni Jesus unsaon sa pagkab-ot sa tinuod nga kabantog pinaagi niini nga mga lakang, 1) pagpaubos diha sa pag-alagad 2) kamatinud-anon sa tinguha 3) andam nga mopas-an sa iyang krus ug ang ika-4) musunod sa Ginoo bisan sa kamatayon.
