San Rafael Arcángel de Cagayan

29/09/2026

𝗦𝗘𝗧𝗬𝗘𝗠𝗕𝗥𝗘 𝟮𝟵: 𝗞𝗔𝗣𝗜𝗦𝗧𝗔𝗛𝗔𝗡 𝗡𝗚 𝗠𝗚𝗔 𝗕𝗔𝗡𝗔𝗟 𝗡𝗔 𝗔𝗥𝗞𝗔𝗡𝗚𝗛𝗘𝗟 — 𝗦𝗔𝗡 𝗠𝗜𝗚𝗨𝗘𝗟, 𝗦𝗔𝗡 𝗚𝗔𝗕𝗥𝗜𝗘𝗟 𝗔𝗧 𝗦𝗔𝗡 𝗥𝗔𝗙𝗔𝗘𝗟

Ang mga “Arkanghel” ay mga anghel na may mas mahahalagang mensahe na dala sa tao mula sa Diyos. Sa kalendaryo ng pagdiriwang ng liturhiya, tatlong Arkanghel ang pinararangalan ngayon. Sila ay may titulong “San” upang ipakilala ang kanilang kabanalan, na sila ay tunay na sugo ng Diyos.

Karaniwang walang pangalan ang mga anghel sa Bibliya pero sa Lumang Tipan, ibinigay sa atin ang pangalan ng tatlong arkanghel na ating kinikilala ngayon.

Si 𝗦𝗮𝗻 𝗥𝗮𝗳𝗮𝗲𝗹 ay makikita natin sa Tobit 12:11-15, 18. Dito, isinugo siya ng Diyos upang pagalingin si Tobit at upang ibigay kay Tobias ang kanyang asawang si Sara. Ang pangalan ni Rafael ay may kahulugang “ang nagpapagaling na Diyos.”

Si 𝗦𝗮𝗻 𝗠𝗶𝗴𝘂𝗲𝗹 naman ay ipinakilala sa atin sa aklat ni Daniel 10:13, 21; 12:1. Dito, siya ang dakilang patron at tagapagtanggol ng bayang Israel. Ang kahulugan ng kanyang pangalan ay “kamukha ng Diyos.”

Si 𝗦𝗮𝗻 𝗚𝗮𝗯𝗿𝗶𝗲𝗹 naman ang mensahero ng Diyos na nakilala sa Daniel 8:16, 9:21 at Lk 1: 19. Dala niya ng magandang balita ng pagsilang ni Juan Bautista, at ang pagsilang ng ating Panginoong Jesukristo mula sa Mahal na Birheng Maria. Ang pangalan ni San Gabriel ay nangangahulugang “Lakas ng Diyos”.

Simula noong 1970, ang mga pista nina San Gabriel, at San Rafael ay idinagdag kay San Miguel. Sila ay tinatawag na mga “santo” dahil sila ay mga banal; sila ay mga anghel, ibig sabihin ay mga “Mensahero ng Diyos” na naghahatid ng pag-ibig at pag-asa. Binigyan ng Diyos ang bawat tao ng kanyang sariling anghel na tagapagbantay bilang tagapagtanggol at tagapamagitan. Nakasaad sa Katekismo: Mula sa pagsilang hanggang sa kamatayan, ang buhay ng tao ay pinalilibutan ng kanilang maingat na pag-aalaga at pamamagitan. Sa tabi ng bawat mananampalataya ay nakatayo ang isang anghel bilang tagapagtanggol at pastol na gumagabay sa kanya sa buhay.

Ang pagpaparangal sa tatlong arkanghel ay papuri at pasasalamat sa Diyos na lumikha sa kanila at nagsugo sa kanila upang mabatid natin ang kalooban ng Diyos.

(Pasasalamat at pagkilala sa mga nagmamay-ari ng mga larawang ito.)

26/08/2026

𝙁𝙀𝙇𝙄𝙕 𝘾𝙐𝙈𝙋𝙇𝙀𝘼Ñ𝙊𝙎, 𝙏𝙄𝙏𝘼 𝘾𝙃𝙄𝙉𝙂!

Mainit na pagbati sa ating minamahal na si Sis. Felicidad Arevalo, ang camarera ng orihinal at mapaghimalang imahen ng ating Mahal na Patron San Rafael Arcángel de Cagayan para sa pagsapit ng kanyang ika - 87 na kaarawan. Ipinagpapasalamat natin sa Diyos ang biyaya ng kanyang buhay at ang kanyang tapat na paglilingkod bilang tagapangalaga ng ating Mahal na Patron.

Dalangin natin ang kanyang patuloy na kalusugan at malakas na pangangatawan, ilayo sa lahat ng kapahamakan at palagi nawa siyang agapayan at gabayan ni San Rafael Arkanghel sa bawat araw ng kanyang buhay.

𝘏𝘢𝘱𝘱𝘺 𝘉𝘪𝘳𝘵𝘩𝘥𝘢𝘺, 𝘛𝘪𝘵𝘢 𝘊𝘩𝘪𝘯𝘨!

21/07/2026

𝙉𝘼𝙂𝘼𝙂𝘼𝙉𝘼𝙋: Banal na Misa sa karangalan ng minamahal na patron ng ating parokya – San Roque kaugnay ng Dalaw Patron sa ating sambayanan bilang bahagi ng mga panimulang gawain para sa nalalapit na kapistahan.

San Roque, Mahal naming Patron, Ipanalangin mo kami!
San Rafael Arkanghel, Ipanalangin mo kami!

05/05/2026

PAGBABAHAGI: Visitación de la Virgen – ang Pagdalaw ng orihinal at mapaghimalang imahen ng Nuestra Señora de Caridad ng ating mga kapatid mula sa Iglesia Filipina Independiente dito sa ating Barrio Cagayan bilang bahagi ng nalalapit na kapistahan ng Mahal na Ina.

¡Viva la Virgen!

27/04/2026

VISITACIÓN DE LA VIRGEN

Bilang bahagi ng mga paghahanda sa kapistahan at pagdiriwang ng taunang Flores de Mayo, sama-sama nating salubungin ang Mahal na Birhen ng Caridad sa kanyang pagdalaw sa ating sambayanan at buong galak siyang patuluyin sa ating mga puso at komunidad.

Ang orihinal at mapaghimalang imahen ng Mahal na Birhen ng Caridad na nakadambana sa kanyang parokya sa distrito ng Caridad ay bibisita sa atin sa kauna-unahang pagkakataon. Bukas, Abril 28, 2026, sama-sama natin siyang salubungin at makiisa tayo sa banal na misa sa kanyang karangalan sa ganap na ika – 5 ng hapon at mag-alay ng mga bulaklak bilang tanda ng ating pagmamahal sa ating minamahal na Ina.

¡Viva Nuestra Señora de Caridad!
¡Viva la Virgen!

𝐕𝐈𝐒𝐈𝐓𝐀𝐂𝐈𝐎𝐍 𝐃𝐄 𝐋𝐀 𝐕𝐈𝐑𝐆𝐄𝐍 𝟐𝟎𝟐𝟔

Sa pagdalaw ng Masintahing Ina, ang pakikiisa sa kaniyang pagbisita ay pagbibigay pitagan at pakikisaya!

Bilang paghahanda sa Kapistahan ng Mahal na Birhen ng Caridad, narito ang talaan ng mga pamayanan na kaniyang dadalawin ngayong Linggo.

𝐀𝐛𝐫𝐢𝐥 𝟐𝟖 (Martes) - Barangay 54A & 54M
𝐀𝐛𝐫𝐢𝐥 𝟑𝟎 (Huwebes) - Barangay 22M
𝐌𝐚𝐲𝐨 𝟐 (Sabado) - Barangay 13

Para sa iba pang gawain ng Santuario de Nuestro Padre Jesus Nazareno - Our Lady of Charity Parish, manatiling naka-antabay sa ating official page.

05/03/2026

¡Viva San Rafael Arcángel de Barrio Cagayan!
Magkita-kita po tayo mamayang ika - 1 ng hapon!

‎Malugod po namin kayong inaanyayahan sa dulang “Biyaya ng Dagat at Pananampalataya” bilang pag-alay at pagbibigay-pugay kay San Rafael Arkanghel ng Barrio Cagayan.
‎
‎Ito ay gaganapin sa ika-5 ng Marso sa ganap na 1:00 ng hapon at magkakaroon muli ng pagtatanghal sa ganap na 5:00 ng hapon sa Montaho Hall.
‎
‎Halina’t tunghayan ang makabuluhang dula na sumasalamin sa biyayang hatid ng dagat at sa matibay na pananampalatayang gumagabay sa ating komunidad. Sama-sama nating ipagdiwang ang pagkakaisa, pasasalamat, at debosyon sa ating mahal na patron.
‎
‎Viva SAN RAFAEL ARKANGHEL!

04/03/2026

MASDAN: Nakahanda na ang orihinal at matandang imahen ng ating minamahal na Patron – San Rafael Arcángel de Cagayan para sa gaganaping eksibit at musikal na pinamagatang "San Rafael Arkanghel: Biyaya ng Dagat at Pananampalataya" handog ng mga mag-aaral sa Natatanging Programa para sa Sining (SPA) mula sa Pambansang Mataas na Paaralan ng Cavite.

Ang pagtatanghal ay magaganap bukas, ika – 5 ng Marso sa ganap na ika – 1:00 ng hapon at ika – 5 ng hapon sa Bulwagang Panlungsod ng Cavite at ito'y katatampukan ng mga imahen ni San Rafael Arkanghel sa ating lungsod.

Taos-pusong pasasalamat sa pamunuan ng Pambansang Mataas na Paaralan ng Cavite para sa pagbibigay pugay at pagkilala sa natatanging ambag ng San Rafael Arkanghel ng Cagayan sa kasaysayan ng Lungsod ng Cavite.

¡Viva San Rafael Arcángel de Barrio Cagayan!

03/02/2026

Unang Martes ng Pebrero
ARAW NG PAMIMINTUHO KAY SAN RAFAEL ARKANGHEL

PANALANGIN KAY SAN RAFAEL ARKANGHEL

Maluwalhating Arkanghel San Rafael, dakilang prinsipe ng pangkat ng mga anghel sa langit. Ikaw ang ilaw na lubhang maliwanag. Isa ka sa pitong matataas na parating humaharap sa luklukan ng Diyos, na iisa at tatlo sa pagka-persona. Iniaamo namin sa iyo, nang buong kapakumbabaan, na ikaw nawa ang maging pintakasi namin, upang sa gayon, ay kamtan namin ang aming ninanasa at hinihingi sa panalanging ito, kung yaon ay mauukol sa lalong kaluwalhatian ng Diyos, at kung hindi Arkanghel na Mahal, ay hingin mong ipagkaloob sa amin, ang lalong maging dapat sa karangalan Niya at sa kagalingan ng kaluluwa namin. Siya nawa.

Magdasal ng tatlong (3) Ama Namin, Aba Ginoong Maria, at Luwalhati.

San Rafael Arkanghel, Ipanalangin mo kami!