07/08/2026
ORATIO IMPERATA SA PAGAADYA SA PANAHON NG KALAMIDAD
Ama naming makapangyarihan at mahabagin,
Sa Iyo kami dumudulog bilang Iyong sambayanang nagtitiwala sa Iyong walang hanggang pag-ibig at pagkalinga. Ikaw ang aming kanlungan at kalakasan, ang aming matibay na tanggulan sa oras ng panganib at kagipitan.
Sa harap ng mga bagyo, baha, lindol, pagguho ng lupa, at iba pang kalamidad na nagbabanta sa aming buhay at kabuhayan, buong kababaang-loob naming hinihiling ang Iyong habag. Ilayo Mo kami sa lahat ng kapahamakan at ipagkaloob Mo ang Iyong banal na pag-iingat sa aming mga tahanan, pamayanan, at buong bansa.
Patnubayan Mo ang mga namumuno sa aming pamahalaan, ang mga kawani ng mga ahensiyang tumutugon sa sakuna, ang mga manggagamot, mga tagapagligtas, mga boluntaryo, at lahat ng naglilingkod sa mga nangangailangan. Pagkalooban Mo sila ng lakas, karunungan, at pusong mapagmalasakit upang maipagpatuloy nila ang kanilang marangal na paglilingkod.
Pagaanin Mo ang dalamhati ng mga nawalan ng mahal sa buhay, pagalingin ang mga may karamdaman at nasugatan, at ibangon Mo ang pag-asa ng mga nawalan ng tahanan at kabuhayan.
Isinasamo rin namin ang pamamagitan ni San Rafael Arkanghel, tapat na lingkod ng Iyong kaluwalhatian, manggagamot ng mga maysakit at gabay ng mga naglalakbay. Nawa’y samahan niya kami sa aming paglalakbay sa gitna ng panganib, ipanalangin ang aming kaligtasan, at akayin kami sa landas ng kapayapaan, pagtitiwala, at ganap na pagsunod sa Iyong banal na kalooban.
Sa gitna ng bawat unos, nawa’y manatili kaming matatag sa pananampalataya, matibay sa pag-asa, at masigasig sa pag-ibig sa aming kapwa, upang sa lahat ng pagkakataon ay maparangalan Ka namin sa aming buhay.
Hinihiling namin ang lahat ng ito sa pamamagitan ni Hesukristo, na Iyong Anak, na nabubuhay at naghahari kasama Mo, kaisa ng Espiritu Santo, Diyos magpasawalang hanggan.
Amen.
Kristo, Maawa ka sa amin.
San Rafael Arkanghel,
Ipanalangin mo kami.
