19/09/2024
𝙉𝙊𝙑𝙀𝙉𝘼 𝙃𝘼𝙉 𝙂𝙄𝙎𝘼𝙎𝘼𝙉𝙏𝙊𝙎𝙄 𝙉𝙂𝘼 𝙑𝙄𝙍𝙂𝙀𝙉 𝙈𝘼𝙍𝙄𝘼
𝐍𝐔𝐄𝐒𝐓𝐑𝐀 𝐒𝐄Ñ𝐎𝐑𝐀 𝐃𝐄 𝐋𝐀𝐒 𝐌𝐄𝐑𝐂𝐄𝐃𝐄𝐒
+Ha ngaran han Amay, han Anak ug han Espiritu Santo, Amen.
𝘓𝘶𝘮𝘶𝘩𝘰𝘥 𝘶𝘨 𝘣𝘶𝘩𝘢𝘵𝘰𝘯 𝘢𝘯 𝘴𝘢𝘯 𝘵𝘪𝘨𝘢𝘮𝘢𝘯, 𝘶𝘨 𝘱𝘢𝘨𝘭𝘶𝘸𝘢𝘴𝘰𝘯 𝘩𝘢 𝘣𝘶𝘨-𝘰𝘴 𝘯𝘨𝘢 𝘩𝘪𝘨𝘶𝘨𝘮𝘢 𝘩𝘢 𝘬𝘢𝘴𝘪𝘯𝘨𝘬𝘢𝘴𝘪𝘯𝘨, 𝘪𝘯𝘦𝘯 𝘮𝘢𝘴𝘶𝘯𝘰𝘥 𝘯𝘨𝘢 𝘱𝘢𝘨 𝘣𝘢𝘴𝘶𝘭 𝘯𝘨𝘢 𝘤𝘰𝘯𝘵𝘳𝘪𝘤𝘪𝘰𝘯.
Ha Imo Guinoo guihapon
Kay dako an Imo gahum
Higugma pati karuyagon
An kadarayawan ha Imo guihapon.
Kon baga hi-aagui-an ko la
Kay dako ko nga higugma
An kahitas-an kabutang Niya
Takus ika-ipa Hiya.
Bisan damo an akon sala
An pag la-um guin huhulat ko la
An kalooy Mo pati gugma
Kadarayawan ha Imo la nga usa.
𝙋𝘼𝙂-𝘼𝙈𝙋𝙊
Makagarahum nga Virgen Maria / Reyna han mga Angeles / Emperatriz han mga langit / pinili nga Iroy han Dios / iguin panamkon han gracia / nga amo an guin sisingaba, han gamhanan nga Espiritu / ug guin luludhan ha pagdayaw han mga Santos / ha Imo atubangan napaharani / inen kapin hin kabungalos han katawhan ngatanan / ha pakimalo-oy Dimo / kay linusad ka tikang ha langit nganhi ha tuna / ha pag padayeg nga hi Ikaw an Iroy han pagpa-id ug pagkalo-oy han Imo devoto / basi ka mapirit, mananabang han ngatanan nga Imo oripon / nga igwaydong Mo ako / ipitad Mo, ngan tabangan Mo man Señora / agud hibaro-an ko an pag sirve dimo, ug dangaton ko man / an akon pinangangaro ug gin tutuyo, hine nga novena / kon baga ma-upayon / han Imo marahalon nga Anak nga hi Jesus / nga buhi ug naghahadi, upod an Dios Amay / pati an Espiritu Santo / ha mga tuig ug ha mga katuigan ngatanan, Amen.
𝙄𝙆𝘼𝙇𝙄𝙈𝘼 𝙆𝘼 𝘼𝘿𝙇𝘼𝙒
Malolooyon nga gayud nga Guinoo, Amay nga mahigugmaon ug gui-uupaye nga paratuha, nga tungod han amon mga sala, natakus kami patukan hin diri maisip nga kabudlayan, kasakitan, kakablasan ug kabiduan, nakikimalooy kami ha dako nga pagpaubos nga Imo kami tugutan ha pag-ayop ug katigayunan, ha pagdangat ngadto hadton maupay nga kaban ni Noe, nga amo an Imo guisasantosi nga Iroy, hi Maria, nga ugopan kami niya han kaisog han Imo kasinahon, ngan padayunon an amon pagsingba ha iya pagka Iroy ha Mercedes, ug ha Imo Diyosnon man nga pagkalooy basi kami mahilikay han mga kalunod, ug mga kabaskugan nga hangin hini nga kalibutan, abuton namon tungod han imo mga pagtabang, adton waray ruha-duha nga duru-ungan ha himaya. Amen.
(𝘔𝘢𝘯𝘨𝘢𝘥𝘪 𝘩𝘪𝘯 𝘮𝘢𝘬𝘢𝘵𝘶𝘭𝘰 𝘬𝘢𝘶𝘭𝘪 𝘩𝘢𝘯 𝘈𝘮𝘢𝘺 𝘕𝘢𝘮𝘰𝘯, 𝘔𝘢𝘨𝘩𝘪𝘮𝘢𝘺𝘢 𝘬𝘢 𝘔𝘢𝘳𝘪𝘢, 𝘶𝘨 𝘏𝘪𝘮𝘢𝘺𝘢 𝘴𝘢 𝘈𝘮𝘢𝘺, 𝘩𝘪𝘵𝘶𝘯𝘨𝘰𝘥 𝘵𝘢 𝘩𝘢𝘯 𝘵𝘶𝘭𝘰 𝘬𝘢 𝘰𝘳𝘢𝘴 𝘯𝘨𝘢 𝘯𝘢𝘬𝘢𝘥𝘵𝘰 𝘩𝘢 𝘱𝘶𝘯𝘰 𝘩𝘢𝘯 𝘊𝘳𝘶𝘻 𝘩𝘪 𝘔𝘢𝘳𝘪𝘢 𝘚𝘢𝘯𝘵𝘪𝘴𝘪𝘮𝘢 𝘯𝘨𝘢 𝘣𝘶𝘭𝘪𝘨 𝘩𝘪𝘺𝘢 𝘩𝘢𝘯 𝘱𝘢𝘯𝘶𝘣𝘰𝘴 𝘩𝘢 𝘢𝘵𝘰𝘯).
𝙋𝘼𝙂-𝘼𝙈𝙋𝙊 𝙃𝘼 𝙄𝙆𝙄𝙉𝘼-𝘼𝘿𝙇𝘼𝙒
Virgen Maria, Emperatriz ha mga langit, ha pag kalo-oy mo Señora han ngatanan nga manggad, Maria, Iroy ha Dios, parawahig han pag kalo-oy, tungod hito ha Imo nangangaro ako, ha dako nga pagpa-ubos, nga Imo ako idangat ha Imo Anak, han gracia nga guin tutuyo, ngan pasabuton mo tungod nala han pagkalooy, in buhi nga pagto-o hadton mga diri binunyagan, an pagdugang han Santa Iglesia, an diri pagka-burubalhin han mga matinumanon han ira mga tuloohan, an pagkasantos han mga kapadian, an kahadianon nga Cristianos, an kadayun nga pagka-arangay, an mga parawali, an mapasu nga panaliguha han tungud ha Dios; an mga Confesores, an pangurimot; an mga Obispo; an maupay nga pagtuman han ira katungdanan, an mga sakup, an pagsugut hin tuman; an mga bihag nga ira katungdanan nga hira kabuhi-i; an mga paratubos, tagan hin kusog; an justicia, hadton mga mahistrados, adton mga guin sisinulay, an karig-unan; an pag-ilob hin dayun hadton mga buotan; an mga kaminatyan, an ira paghinangput; an mga magpakasasala, an gracia; an mga Virgenes, an pagkaputli; an kamamingaw han mga inasawhan; an mga balo, an mga pag-ilub, an mga magsakit, an ira pag-upay; an mga nagkikinahanglan, katumanan han ira guin tutuyo; an mga naghihingutas, kabaskugan; an mga mag sarakay, an pagdangat han duru-ongan nga guin tatadong; an mga lumalakat, maghika-upay ha adlaw; an mga burud an makalilipay nga pag-anak; an mga ilo, panabangan; an mga baw-as, an ka himunganak; an mga umhanan, an pag hika-upay han mga tanum; an mga tiempo, an kamalinaw; an katapusan han ngatanan nga karautan; an pag tubo han mga manggad; an pag higugma han ngatanan nga mga virtudes; an pagkangalas han bisyo; an pag-andam han kamatayon; an imo pagtabang didto han pagkamatay; an Imo matam-is nga bendicion dinhe ha tuna; nga tungod hito, hinangput kami han imo mahigugmaon nga paghitig-ob, dinhe ug didto man ha langit, nga nag hahadi ka Señora hin kadayunan, upod an Dios Imo higugmaon nga Anak, kay amo hiya an amon guin papamulat ha pag hinangput, upod man an Imo pag tabang, tig-ub an Dios Amay ug Espiritu Santo ha mga katuigan ngatanan, Amen.
𝘼𝙉𝙏𝙄𝙁𝙊𝙉𝘼
An ngatanan nga mga gintuha ha langit ug ha tuna, nagkakaluhod ha pag dayaw han guisasantosi nga Virgen Maria, hin pag sering: “Maghimaya ka, Iroy han pagkalooy, kalipayan han mga nasusubo, para panubos han mga bihag, Ikaw an himaya han Jerusalem, hi Ikaw an kalipayan han Israel, Ikaw an kabantugan han amon bungto. Ilingi Diosnon nga Maria, iton Imo mga mata nga malolo-oyon hinen tanaman. Panginano-a ug paghingpita, kay Imo guin tanum ha to-o nga kamut.
𝙋𝘼𝙂 𝘼𝙈𝙋𝙊
Malolo-oyon nga Dios ug Ginoo namon, nga ha pagbuhi mo hadton mga matinumanon nga sakop, han imo usa la nga Anak, didto han kamabangis han gahum hadton mga kamorosan, Imo guin pahalu-ag, ug pinadamo an Imo Iglesia, nga dida ha Iya guin tuha tungod han mahimayaon nga Iroy han imo Anak, an bag-o nga relihiyon, nga mga parapanubos, ug mga sakop han Mercedes, nakikimalooy kami ha dako nga pagpa-ubos, nga hi kami nga mga nagdadayaw hadton siringbahon nga nagtuha hinin gisasantosi nga buhat, nga mahilikay kami ha pagkabihag han demonio, ug han pakasala tungod han imo Santos nga Anak, nga amon Guinoo Jesucristo, ug tig-ub ha imo, nga buhi ug naghahadi ha ngatanan nga katuigan, Amen.
𝐆𝐎𝐙𝐎𝐒
𝘽𝙖𝙠𝙖𝙮 𝙄𝙢𝙤 𝙣𝙖𝙨𝙖𝙮𝙪𝙧𝙖𝙣
𝘼𝙣 𝙠𝙖𝙗𝙞𝙝𝙖𝙜 𝙝𝙖𝙣 𝙗𝙪𝙤𝙩𝙖𝙣
𝙃𝙖𝙣 𝙠𝙖𝙡𝙤𝙤𝙮 𝙈𝙤 𝙡𝙞𝙗𝙧𝙚𝙝𝙖
𝙂𝙧𝙞𝙡𝙡𝙤𝙨 𝙪𝙜 𝙥𝙧𝙞𝙨𝙞𝙤𝙣 𝙗𝙪𝙣𝙜𝙠𝙖𝙜𝙖.
1. Damo nga lugar na-agaw nira
An kamorosan ha Africa
Kay na-uripon an España
Kundi an estandarte kinita
Tigaman han Imo gugma
Guintubos ni Jesus hira.
𝙃𝙖𝙣 𝙠𝙖𝙡𝙤𝙤𝙮 𝙈𝙤 𝙡𝙞𝙗𝙧𝙚𝙝𝙖
𝙂𝙧𝙞𝙡𝙡𝙤𝙨 𝙪𝙜 𝙥𝙧𝙞𝙨𝙞𝙤𝙣 𝙗𝙪𝙣𝙜𝙠𝙖𝙜𝙖.
2. Ha tuig nga ika-napulo kag-walo
Linusad ka nga hira magsubo
Ine nga adlaw tinuman mo
Han pagbuhi kan San Pedro
Ug ine namulong hadto
nga kanan Angel milagro.
𝙃𝙖𝙣 𝙠𝙖𝙡𝙤𝙤𝙮 𝙈𝙤 𝙡𝙞𝙗𝙧𝙚𝙝𝙖
𝙂𝙧𝙞𝙡𝙡𝙤𝙨 𝙪𝙜 𝙥𝙧𝙞𝙨𝙞𝙤𝙣 𝙗𝙪𝙣𝙜𝙠𝙖𝙜𝙖.
3. Han higugma nga hilarum Mo
Sinugo Mo an tulo katawo
Hi Jaime, Nolasco ug hi Raymundo
nga ipahamtang an instituto
hinin relihiyon nga bag-o
Agud sundon han mga devoto.
𝙃𝙖𝙣 𝙠𝙖𝙡𝙤𝙤𝙮 𝙈𝙤 𝙡𝙞𝙗𝙧𝙚𝙝𝙖
𝙂𝙧𝙞𝙡𝙡𝙤𝙨 𝙪𝙜 𝙥𝙧𝙞𝙨𝙞𝙤𝙣 𝙗𝙪𝙣𝙜𝙠𝙖𝙜𝙖.
4. Han ika-napulo han Agosto
nagtalinguha hi Nolasco
pagtuman hini nga sugo
Nagtikang dayon hiya hadto
Pag-Orden han mga novicio
Agud mahingpit inin tuyo.
𝙃𝙖𝙣 𝙠𝙖𝙡𝙤𝙤𝙮 𝙈𝙤 𝙡𝙞𝙗𝙧𝙚𝙝𝙖
𝙂𝙧𝙞𝙡𝙡𝙤𝙨 𝙪𝙜 𝙥𝙧𝙞𝙨𝙞𝙤𝙣 𝙗𝙪𝙣𝙜𝙠𝙖𝙜𝙖.
5. Hadton hin maka-usa
waray pa tutuki an kampana
Kundi ikaw pati Angeles
asay kinanta han Matines
hi Nolasco kay nahingaturog
nahimangno han kamuok.
𝙃𝙖𝙣 𝙠𝙖𝙡𝙤𝙤𝙮 𝙈𝙤 𝙡𝙞𝙗𝙧𝙚𝙝𝙖
𝙂𝙧𝙞𝙡𝙡𝙤𝙨 𝙪𝙜 𝙥𝙧𝙞𝙨𝙞𝙤𝙣 𝙗𝙪𝙣𝙜𝙠𝙖𝙜𝙖.
6. Ha pagsablig han bendita,
ha higdaan ka kinita.
Ha imo pagbisitaha,
kan Nolasco ginsalubong ka
kalag niya imo gindara
hadto dayon nga himaya
𝙃𝙖𝙣 𝙠𝙖𝙡𝙤𝙤𝙮 𝙈𝙤 𝙡𝙞𝙗𝙧𝙚𝙝𝙖
𝙂𝙧𝙞𝙡𝙡𝙤𝙨 𝙪𝙜 𝙥𝙧𝙞𝙨𝙞𝙤𝙣 𝙗𝙪𝙣𝙜𝙠𝙖𝙜𝙖.
7. An pamiste ha Barcelona
Upod an duron ug huraw pa
Kay ikaw ira Patrona
imo hadto ginlibre hira
kay ha imo nangamaya
hin tikus ha huna-huna.
𝙃𝙖𝙣 𝙠𝙖𝙡𝙤𝙤𝙮 𝙈𝙤 𝙡𝙞𝙗𝙧𝙚𝙝𝙖
𝙂𝙧𝙞𝙡𝙡𝙤𝙨 𝙪𝙜 𝙥𝙧𝙞𝙨𝙞𝙤𝙣 𝙗𝙪𝙣𝙜𝙠𝙖𝙜𝙖.
8. Tungod han tun-og pati tubig
hadto han Valencia guinsakit
kundi hi ikaw hadto napirit
hin kalooy waray sanglit
pag-hatag labi kadagmit
kay tikus mo nga pagpa-id.
𝙃𝙖𝙣 𝙠𝙖𝙡𝙤𝙤𝙮 𝙈𝙤 𝙡𝙞𝙗𝙧𝙚𝙝𝙖
𝙂𝙧𝙞𝙡𝙡𝙤𝙨 𝙪𝙜 𝙥𝙧𝙞𝙨𝙞𝙤𝙣 𝙗𝙪𝙣𝙜𝙠𝙖𝙜𝙖.
9. An mga kalag han gahum mo
nan-guwa dayun ha Purgaturio
sugad man an mga devoto
han Cofradia sakup nimo
han karat-an linibre mo
an nagsangpit han ngaran mo.
𝙃𝙖𝙣 𝙠𝙖𝙡𝙤𝙤𝙮 𝙈𝙤 𝙡𝙞𝙗𝙧𝙚𝙝𝙖
𝙂𝙧𝙞𝙡𝙡𝙤𝙨 𝙪𝙜 𝙥𝙧𝙞𝙨𝙞𝙤𝙣 𝙗𝙪𝙣𝙜𝙠𝙖𝙜𝙖.
10. Tungod han imo Concepcion
Putli ikaw ipinanamkon
Kinabuhi, tam-is nga paglaum
Kasingkasing namon imo pun-on.
𝙃𝙖𝙣 𝙠𝙖𝙡𝙤𝙤𝙮 𝙈𝙤 𝙡𝙞𝙗𝙧𝙚𝙝𝙖
𝙂𝙧𝙞𝙡𝙡𝙤𝙨 𝙪𝙜 𝙥𝙧𝙞𝙨𝙞𝙤𝙣 𝙗𝙪𝙣𝙜𝙠𝙖𝙜𝙖.
Bakay Imo nasayuran
An kabihag han buotan
Han kalooy Mo libreha
Grillos ug prision bungkaga
𝙑. 𝘿𝙞𝙜𝙣𝙖𝙧𝙚 𝙢𝙞 𝙡𝙖𝙪𝙙𝙖𝙧𝙚 𝙩𝙞 𝙑𝙞𝙧𝙜𝙤 𝙎𝙖𝙘𝙧𝙖𝙩𝙖
𝘙. 𝘋𝘢 𝘮𝘪𝘩𝘪 𝘷𝘪𝘳𝘵𝘶𝘵𝘦𝘮 𝘤𝘰𝘯𝘵𝘳𝘢 𝘩𝘰𝘴𝘵𝘦𝘴 𝘵𝘶𝘰𝘴
𝙊𝙍𝙀𝙈𝙐𝙎
Deus, qui Beatissimam Virginem Mariam dulcissimo titulo Matris Desirturom, nor venerare tribuisti ejus qui intercessione, tantam graciam confire dignatus est ut nullus ad ejus praesidium confugiens fuerit derelictus concede nobis famules tuis, otso tantam Matris protecione constituti desirramur per Christum, Dominum nostrum. Amen.
𝙆𝘼𝙏𝘼𝙋𝙐𝙎𝘼𝙉 𝙉𝙂𝘼 𝙋𝘼𝙂 𝘼𝙈𝙋𝙊
O matam-is nga gayud nga siringbahon ug pinanahus nga kasingkasing ni Jesus, ug Maria nga akon ginsisingba, guin dadayaw ha daco nga pagpa-ubos, guin sasalen-urog ko tikang han acon kasing-kasing. O kasing-kasing ni Jesus, nga mahigugma-on ano in sadang ha Imo hini nga taramayon, nga guti nga ulod ha tuna, nga diri sadang mo itugot tungud han maugayon nga putli nga kasing-kasing ni Maria. O kasing-kasing nga guin tahus ni Maria, ano an sadang ipakimalooy ha Imo, hini nga naghihidala-ag nga oveja, tungud han mabido-on nga kasing-kasing ni Jesus nga amo man la dadangaton han iya malolooyon. Tara Jesus ko, tungod nala han Gisasantosi nga kasingkasing ni Maria nga mabiduon tungod nala han marahalon nga kasing-kasing ni Jesus, nakikimalooy aco hin tikus ha kasing-kasing ko, nga ha oras nga katapusan han acon kinabuhi, ug hadton mapait nga paghingutas han akon kamatayon, mabu-ong kunta, ug magkapinit-pinit hin talagudti an akon kasing-kasing hin pagsubo, ug pag-sakit tungud han pagbido-a han akon mga sala, an kasing-kasing ni Jesus, ngan han pag bo-onga man, ug pagpinit-pinita han malolooyon guihapon nga kasing-kasing ni Maria, kasing-kasing ni Jesus pagsamara aco, ha kamatayon hadton mapait nga katapusan ha akon kinabuhi tungud nalamang hin kasakitan han kasing-kasing ni Maria, diri mo ako pagpabay-an, hadton makagirindal nga paghingutas han acon mabidu-on nga kasing-kasing, kay ticang niyan ngadto hadto nga oras akon ginbabasulan an acon mga sala, ha bug-os ko nga kasing-kasing. Ay, kasing-kasing ni Jesus, hino daw la in makakahatag hin kasingkasing ha imo, Ay kasingkasing ni Maria hino dawla in makakahatag ha imo hin kasingkasing kundi Jesus ug Maria, tikang niyan bubuhaton ko an katungdanan, kay agud hadton makaharadlok nga adlaw, han tagsa-tagsa hito nga kasing-kasing ihatag mo an acon kalag, Amen.
𝘔𝘢𝘨𝘩𝘪𝘮𝘢𝘺𝘢 𝘬𝘢 𝘏𝘢𝘥𝘪…
+ Ha ngaran han Amay, han Anak ug han Espiritu Santo, Amen.
