21/05/2026
Sa atong pagpaningkamot nga mulambo ug muhapsay ang atong mga pamaagi sa programa sa atong simbahan, dili kalikyan ang mga pagsaway, pagsukitsukit ug pagkwestyon.
Apan atong giklaro sa bisan kinsa nga dunay mga opinyon mahitungod sa atong pagpangalagad nga kami sa BPC inyong mga sulogoon, wala kami bati nga ibawos kaninyo.
Hinuon nalipay kami tungod kay nagpamatuod kini nga duna kamoy pagtagad sa atong simbahan.
Amo hinuon nga giawhag ang tanan o si bisan kinsa nga dunay ikapaabot sa BPC sa pagtingog o muduol sa BPC aron atong estoryahan ang inyong mga concerns. Andam kami sa pagpaminaw ug pagdawat og suhestyon alang sa kalamboan sa atong simbahan.
Ania ang pipila ka mga butang nga atong tubagon.
1. Ang BPC naghawod na ug naghari-hari na sa simbahan.
Tubag: Dili kana tinuod, ang BPC maoy nagdumala sa atong simbahan apan wala kami manubra, og gani wala kami sweldo, ang tanan nga mga programa nga among gipasiugdahan, gihimo aron magkaadunay pondo ang kapilya alang sa atong mga patrabaho. Walay pinugsanay ang pagtabang sa simbahan tungod kay walay otoridad ang BPC nga sama sa usa ka hari nga makamando sa tanan og dili pwede balion.
Ang pamatuod nga wala kami dakong otoridad mao nga sa kadugayan na namog pangengganyo sa tanan sa pagsimba, hangtod karon gamay lang gihapon kita. Kung naghawod ug naghari hari pa kami, unta amoa nang gipaguyod sa among mga soldados ang tanan para manimba.
Apan wala kita niana, tungod kay sulogoon lang kami sa espiritwal, wala kami gahom sama sa gobyerno nga dunay pondo, dunay pulis dunay army ug mga ahensya.
Kami inyong mga sulogoon tungod kay matud pa sa atong Ginoong HesuKristo, ang buot mahimong labaw kinahanglan magpakasulogoon sa tanan.
Bisan tuod may mga katungdanan kami sa simbahan, bolontaryo kini nga pagsakripisyo, walay sweldo, mao nga among gihangyo mao lang ang inyong pagtabang alang sa kaayohan sa atong kapilya ug sa atong barangay.
2. Nganong kadugay man ipatrabaho sa simbahan, nga naa namay pondo?
Tubag: Gamay pa ang atong pondo, ug dili kini kapahuman bisan sa usa lang ka parte sa kapilya. Sa atong mga plano, gikinahanglan ang igo nga kantidad mao nga magtigom kita og kwarta, pinaagi sa inyong mga donasyon ug monthly pledges sa sulod sa usa ka tuig.
Dili kita magpadalos dalos, tungod kay matud pa sa atong Ginoong HesuKristo, walay tawo nga mutukod ug usa ka balay o tore nga dili usa mulingkod og sutaon kung may igo ba siyang kwarta nga ikapahuman niini.
Ang gikinahanglan namo mao lamang ang inyong pagsalig nga pag abot sa panahon makita ninyo nga ang atong mga pangandoy, makita na nato sa atong kaugalingong mga mata.
3. Nganong may attendance paman nga wlaa man kita sa eskwelahan?
Tubag: Kini buwak buwak lamang nga ang atong tuyo mao nga masuta nato ang mga aktibo sa pagsimba, kung pila kabuok ang nagsimba, monitoring lang gud.
Walay maot sa maong inisyatibo, ug gani magbutang nalang kami og papel nga atong suwatan sa atong mga pangalan.
Sama nga ang Dios sa langit dunay libro sa kinabuhi, kita usab dunay listahan, tungod kay malipay kami nga makita ang inyong mga pangalan sa attendance.
Hinuon may mga pahalipay kita sama sa raffles matag pasko, ang aktibo sa attendence sa pagsimba, maoy priority nato sa raffle, isip pahalipay pod nato sa kanunay natong pagahin og oras sa pagsimba.
Salamat sa tanan nga makasabot sa among mga pamaagi.
Daghan pa kitag nadunggan, apan personal na ang tumong og wala nay kalabotan ang posisyon sa simbahan.
Maghari ang kalinaw sa matag usa kanato, dili nato patig ahon ang atong kasingkasing kay mao kanay kinahanglan alang sa atong kalamboan. Amen.
