30/08/2026
𝐋𝐮𝐧𝐞𝐬 𝐬𝐚 𝐈𝐤𝐚-𝐁𝐞𝐢𝐧𝐭𝐞-𝐃𝐨𝐬 𝐧𝐚 𝐒𝐞𝐦𝐚𝐧𝐚 𝐬𝐚 𝐎𝐫𝐝𝐢𝐧𝐚𝐫𝐢𝐨𝐧𝐠 𝐏𝐚𝐧𝐚𝐡𝐨𝐧
August 31, 2026
𝗘𝗡𝗢𝗧 𝗡𝗔 𝗕𝗔𝗕𝗔𝗦𝗔𝗛𝗢𝗡
𝟭 𝗖𝗼𝗿𝗶𝗻𝘁𝗼 𝟮:𝟭–𝟱
Mga tugang, kan ako nagpadiyan sa saindo, dai ako naggamit nin halangkaw na oratoria o hararom na filosopia sa pagpahayag kan katotoohan nin Dios. Kan yaon ako saindo daing iba akong boot na mamidbid kundi si Jesucristo asin an manunungod saiya bilang ipinako sa cruz. Ako nagpadiyan sa saindo sa sakong kaluyahan, sa dakulang takot asin takig. An sakong mga pagtaram, asin paghulit dai kan mahamis na tataramon sa filosopia kundi sarong kapahayagan nin Espiritu. Ini ginibo ko tanganing an saindong pagtubod dai magsarig sa kadonongan nin tawo kundi sa kapangyarihan nin Dios.
𝑻𝒂𝒕𝒂𝒓𝒂𝒎𝒐𝒏 𝒌𝒂𝒏 𝑲𝒂𝒈𝒖𝒓𝒂𝒏𝒈𝒏𝒂𝒏.
𝗦𝗔𝗟𝗠𝗢 𝗥𝗘𝗦𝗣𝗢𝗡𝗦𝗢𝗥𝗜𝗔𝗟
𝗦𝗮𝗹𝗺𝗼 𝟭𝟭𝟵:𝟵𝟳, 𝟵𝟴, 𝟵𝟵, 𝟭𝟬𝟬, 𝟭𝟬𝟭, 𝟭𝟬𝟮
𝑺𝒊𝒎𝒃𝒂𝒈: 𝗞𝗮𝗴𝘂𝗿𝗮𝗻𝗴𝗻𝗮𝗻, 𝗻𝗮𝗺𝗼𝗺𝗼𝘁𝗮𝗻 𝗸𝗼 𝗮𝗻 𝘀𝗮𝗶𝗺𝗼𝗻𝗴 𝗺𝗴𝗮 𝗽𝗮𝗴𝗯𝗼𝗼𝘁.
Kanigoan an pagkamoot ko
sa pagboot mo, Kagurangnan!
Bilog na aldaw
iyan an sakong hinohorop-horop.
Ako nagin orog pa kadonong
sa sakong mga kaiwal,
huli ta nagdadanay sako
an saimong kabotan.
Orog akong may pakasabot
ki sa gabos kong paratukdo,
huli ta an saimong mga pagboot
sakong hinohorop-horop;
asin orog pa sa mga gurang
an sakong pakamidbid, huli ta inuutob ko
an saimong mga kabotan.
Sa maraot na dalan ilinilikay ko
an sakong mga bitis, tanganing mautob ko
an saimong tataramon.
Sa saimong mga pagboot dai ako minasuhay,
huli ta ika an nagtutukdo sa sako.
𝗘𝗩𝗔𝗡𝗚𝗘𝗟𝗜𝗢
𝗟𝘂𝗰𝗮𝘀 𝟰:𝟭𝟲–𝟯𝟬
𝙋𝙖𝙜𝙧𝙤𝙠𝙮𝙖𝙬: Alleluia! Magtaram ka, Kagurangnan, an saimong sorogoon naghihinanyog; na sa saimo an tataramon nin buhay na daing kasagkoran. Alleluia!
Si Jesus naka-abot sa Nazareth, banwa na saiyang pinagdakulaan; sosog sa saiyang kinaugalian kun aldaw na sabado, naglaog siya sa sinagoga asin nagtindog sa pagbasa. Itinao saiya an libro ni Profeta Isaias, binuksan asin nakua ining nasusurat: An Espiritu nin Kagurangnan uya sako, huli ta linahidan niya ako asin sinugo sa pagdara kan Marahay na Bareta sa mga dukha, sa pagrokyaw kan kaligtasan sa mga bihag, sa pagpamuklat kan mga buta, sa pagtubos kan mga inaapi, sa pagrokyaw kan mabalaog na taon nin Kagurangnan (Isaias 61:1–2). Pininto an libro, itinao sa ministro asin nagtukaw. An mga mata nin gabos sa sinagoga nakatorohok saiya. Dangan nagsabi siya sainda: “Ngonian naotob na an nasurat digdi na saindong nadangog.” An gabos na yaon duman oyon saiya; saindang ipinagngalas an mga mahamis na tataramon na hale sa saiyang ngoso. Olay ninda: “Bakong iyo ini an aki ni Jose?” Si Jesus nagsabi sainda: “Saluba ko sasabihon nindo sako an kasabihan: Medico, bolonga an saimong sadiring buhay; giboha man daw digdi sa sadiri mong banwaan an nadangog ming ginibo mo duman sa Capernaum.” Alagad, sabi niya sainda: “Daing profeta na inako sa saiyang sadiring banwaan. Sa katunayan, giromdomon nindo, kan panahon ni Elias, dai nag-oran sa laog nin tolong taon may kabanga asin nagka-igwa nin makuring gutom sa bilog na rona. Kadakul na mga babaeng balo sa Israel, alagad si Elias dai ipinadara sa sainda; ipinadara sa sarong balo sa Sarepta sa rona nin Sidon. Siring man, kan panahon nin Profeta Eliseo, igwa nin kadakul na mga daoton sa Israel; alagad mayo nin na-omayan, kundi si Naaman sana, na taga-Siria.” Pakadangog kaini, an gabos sa sinagoga na-anggot, nagtirindog asin dinara siya sa luwas kan banwaan, sa itaas kan bukid na natutogdokan kan banwa, asin boot nindang ihulog siya sa ampas. Alagad si Jesus nag-agi sa tahaw ninda asin naghale.
𝑴𝒂𝒓𝒂𝒉𝒂𝒚 𝒏𝒂 𝑩𝒂𝒓𝒆𝒕𝒂 𝒌𝒂𝒏 𝑲𝒂𝒈𝒖𝒓𝒂𝒏𝒈𝒏𝒂𝒏.
