26/08/2026
PAHAYAG PANININDIGAN ng
Daupang-Palad ng mga Sektor at Taong-Simbahan (DPSTS)
DPSTS: Sama-samang Naglalakbay at Nagsusuri Tungo sa Iisang Misyon
Kami, mga kinatawan ng taong simbahan na binubuo ng kaparian, mga lider-layko ng MSK ng mga parokya, mga institusyon, relihiyoso at relihiyosa at iba't ibang batayang sektor ng lalawigan ng Aurora, kasama ang Mahal na Obispo Dave Dean Capucao, DD, ay nagtipon sa taunang Daupang Palad ng mga Sektor at Taong Simbahan (DPSTS) na ginanap sa Parokya ni Nuestra Señora de Salvacion, Brgy. Bianoan, Casiguran, Aurora, mula Agosto 20–22, 2026.
Sa aming sama-samang pagbabahaginan, pakikinig at pagsusuri sa lokal at pambansang kalagayan, malinaw naming nakikita at nararanasan ang patuloy na paglala ng kahirapan at pagyurak sa dignidad ng tao. Kabilang dito ang pagtaas ng presyo ng produktong petrolyo, presyo ng pangunahing bilihin, kuryente at pamasahe; mababang presyo ng mga lokal na produktong agrikultural; pagbaba ng ani dulot ng matinding tagtuyot at pagbabago ng klima; kawalang-hanapbuhay; mababang pasahod; at kawalan ng permanenteng trabaho.
Nakikita rin namin ang mga suliraning dulot ng isang ekonomiyang export-oriented at import-dependent, gayundin ang mga bagong batas at polisiya na naglalayong makahikayat ng mga dayuhang mamumuhunan, gaya ng Pax Silica.
Sa larangan naman ng pulitika, nasasaksihan namin ang patuloy na pag-iral ng kawalang-katarungan, korapsyon, palakasan, dinastiyang pulitikal at pagbili ng boto na kung minsan ay naisasagawa sa anyo ng ayuda. Nakikita rin ang tunggaliang pampulitika na higit na nakatuon sa posisyon at kapangyarihan kaysa sa tunay na paglilingkod at pagpapaunlad ng bansa. Dahil dito, patuloy na lumalaki ang agwat sa pagitan ng mayaman at mahirap—habang lalong yumayaman ang iilan, lalong naghihirap ang nakararami. Gaya ng binigyang-diin sa Dilexi Te, “Ang hindi pagkakapantay-pantay ang ugat ng mga suliraning panlipunan.”
Kasabay nito, nakikita rin namin ang epekto ng makabagong teknolohiya, social media at globalisasyon sa ating kultura at mga ugnayan. Unti-unting nanganganib na mawala ang kultura ng pagdadamayan, paggalang sa kapwa, pagpapahalaga sa katutubong sining at matibay na ugnayan sa pamilya. Higit na mabigat ang epekto ng pagkasira ng kalikasan at climate change sa mga mahihirap na magsasaka, mangingisda at katutubo na higit na umaasa sa likas na yaman para sa kanilang kabuhayan.
Dahil dito, kinikilala namin ang hamon na maging isang “field hospital”—isang Simbahang bumababad sa kalagayan ng mga tao, nakikinig sa kanilang hinaing at nagiging boses ng mga dukha at walang tinig. Nais naming isabuhay ang panawagan na kilalanin ang Diyos sa mga dukha at mga nagdurusa.
Naninindigan kami na itataguyod namin ang mga prinsipyong nakapaloob sa Panlipunang Aral at Turo ng Simbahan, partikular ang:
• pagkilala at paggalang sa dignidad ng bawat tao;
• pagpapahalaga sa pamayanan;
• pagtataguyod ng kapakanan ng higit na nakararami;
• katarungang panlipunan at kaunlaran para sa lahat;
• pakikiisa at pakikipagkapwa sa mga mahihirap at nasa laylayan ng lipunan;
• Ka-Yapakinig- isang simbahang sinodal na nakikinig, nagmamalay at nakikilakbay tungo sa iisang misyon; at
• pananampalatayang may kasamang konkretong gawa.
Naniniwala kami na ang tunay na pagsamba sa Diyos ay hindi maaaring ihiwalay sa pagtataguyod ng katarungan. Ang pananampalataya ay dapat makita sa pakikilahok sa buhay ng pamayanan at sa pagkilos para sa kapakanan ng mga higit na nangangailangan.
Sama-sama tayong maglakbay, magsuri at kumilos tungo sa iisang misyon -isang lipunang may dignidad, katarungan, pagkakapantay-pantay, malasakit sa kalikasan at tunay na kapakanan ng lahat.
Nilagdaan ngayong ika-22 ng Agosto 2026 sa Parokya ni Nuestra Senora de Salvacion, Brgy. Bianoan, Casiguran, Aurora
