https://www.facebook.com/112763727298733/

Hesus Nazareno Chapel - Looc, Cardona, Rizal, Cardona (2026)

26/08/2026

𝗣𝗔𝗚𝗚𝗨𝗡𝗜𝗧𝗔 𝗞𝗔𝗬 𝗦𝗔𝗡𝗧𝗔 𝗠𝗢𝗡𝗜𝗖𝗔 | 𝟮𝟳 𝘼𝙜𝙤𝙨𝙩𝙤, 𝟮𝟬𝟮𝟲

Huwaran ng mga may-asawa, mga ina at mga balo, Si Santa Monica ay isinilang sa Tagaste (ngayon, Souk-Ahras), Aprika noong 332. Upang makarating sa rurok ng kabanalan, tatlong krus ang tiniis ng santa — ang isang biyenang mabagsik, isang asawang malupit at isang anak na makasalanan.

Napangasawa niya si Patricio, isang di-binyagan na sa kanyang matimyas na pag-ibig at walang tigil na panalangin ay kanyang nahikayat na magpabinyag bago siya namatay noong 371. Kung itinatanong sa kanya ng ibang mga babae na binubugbog ng kanilang mga asawa, kung ano ang nararapat nilang gawain, ito ang laging ipinapayo ni Santa Monica: "Kung pipigilin lamang ninyo ang inyong mga dila ay marahil hindi kayo bubugbugin ng inyong mga asawa at sila'y magbabago ng buhay." Para magbalik-loob ang kanyang asawa, biyenan at anak na si San Agustin, dalawa ang kanyang ginamit na paraan — panalangin at pagpapakasakit.

Ganoon na lamang ang paghihinagpis ng santa nang malaman niyang nahulog sa kamalian ng Manikeismo ang kanyang anak at, higit sa lahat, sumama sa isang babae at nagkaroon ng anak, si Adeodatus. Sinabi sa kanya ng isang obispo: "Huwag kang mawalan ng pag-asa, Monica, hindi mangyayari na ang isang anak ay mapahamak sa kabila ng napakaraming luha!" Pinagtaguan siya ng kanyang anak at lihim na tumakas patungong Roma; subali't nang magpunta roon si Santa Monica, ay wala na si Agustin, nagpunta ito sa Milan, at dito, sa wakas, ay naganap din ang malaon nang hinihiling ng santa — ang pagbabalik-loob ng kanyang anak sa pangaral ni San Ambrosio, ang banal na obispo ng Milan.

Bago mamatay si Monica sa Ostia, noong 387, ito ang huling habilin sa kanyang anak: "Walang kuwenta sa akin kahit na saan mo ako ilibing; huwag mo lamang akong kalilimutan kung nasa altar ka na!"

Santa Monica, ipanalangin mo kami.

Halaw mula sa Talambuhay ng mga Santo at mga Kapistahan ng Mahal na Birhen ni +Mons. Jose C. Abriol

23/08/2026

𝗞𝗔𝗣𝗜𝗦𝗧𝗔𝗛𝗔𝗡 𝗡𝗜 𝗔𝗣𝗢𝗦𝗧𝗢𝗟 𝗦𝗔𝗡 𝗕𝗔𝗥𝗧𝗢𝗟𝗢𝗠𝗘 | 𝟮𝟰 𝘼𝙜𝙤𝙨𝙩𝙤, 𝟮𝟬𝟮𝟲

Nakita ni Jesus si Natanael na lumalapit sa Kanya at sinabi ang ganito: "Narito ang isang tunay na Israelita na sa kanya'y walang pagkukunwari." Sinabi sa Kanya ni Natanael: "Saan Mo ako nakilala?" Sumagot si Jesus: "Bago ka tinawag ni Felipe, nakita kita noong ikaw ay nasa ilalim ng punong igos." Sinagot siya ni Natanael na winika: "Maestro, Ikaw ang Anak ng Diyos; Ikaw ang hari ng Israel."

Tinugon siya ni Jesus: "Dahil sa sinabi Ko sa iyo na ikaw ay nakita Ko sa ilalim ng punong-igos, ay sumampalataya ka; mga bagay na lalong dakila pa sa rito ang makikita mo." At sinabi sa kanya: "Tunay na tunay Kong sinasabi sa inyo, na inyong makikitang bukas ang langit at ang mga anghel ng Diyos na pumapanhik at nananaog sa Anak ng Tao." (Jn. 1:47-51)

Ipinalalagay ng maraming dalubhasa na ang taong ito na pinuri ng Panginoon ay ang naging apostol San Bartolome, na taga-Kana sa Galilea. Sa kanyang wagas na pagmamahal sa Panginoong Jesus, nilakbay ang lupaing tinatawag noong Indiya, ang Arabya, Etiopya, Libya, Partiya, Persiya at ang iba pang lupain sa Silanganan upang ipangaral si Kristo at dalhin ang masaganang bunga ng Kaligtasan ng sangkatauhan. Sa pag-uutos ng Haring Astayages, si San Bartolome ay inalisan ng balat bago siya pinugutan ng ulo. Ayon naman sa ilan, siya'y ipinako nang patiwarik sa krus. Ang ibig sabihin ng Bartolome sa wikang Arameo ay anak ni Tolmai.

Apostol San Bartolome, ipanalangin mo kami.

Halaw mula sa Talambuhay ng mga Santo at mga Kapistahan ng Mahal na Birhen ni +Mons. Jose C. Abriol

22/08/2026

𝗣𝗔𝗚𝗚𝗨𝗡𝗜𝗧𝗔 𝗞𝗔𝗬 𝗦𝗔𝗡𝗧𝗔 𝗥𝗢𝗦𝗔 𝗗𝗘 𝗟𝗜𝗠𝗔, 𝗗𝗔𝗟𝗔𝗚𝗔 | 𝟮𝟯 𝘼𝙜𝙤𝙨𝙩𝙤, 𝟮𝟬𝟮𝟲

Ibaling natin ngayon ang ating alaala sa Bagong Daigdig (Hilaga at Timog America), ang lupang tinubuan ng isang masamyong bulaklak ng kabanalan noong 1586 — si Santa Rosa ng Lima. Siya ang kauna-unahang santa sa Bagong Daigdig at isa sa pintakasi ng Bayang Pilipinas.

Anak ni Gaspar de Flores at Maria de Oliva, si Isabel ay tinaguriang Rosa dahil sa kanyang ganda at kutis. Mula pa sa kanyang pagkabata, si Rosa ay nagpamalas na ng katangi-tanging hilig sa pagpapakabanal na nagdaan sa apoy ng mahigpit na pagsubok. Sa loob ng labinlimang taon, si Rosa ay tinukso ng demonyo, inusig ng kanyang mga kaibigan at sinapit ang di-mabilang na kahirapan at pagtitiis. Nang manghina ang pangangalakal ng kanyang mga magulang, si Rosa ay tumulong sa paghahanap-buhay sa pagbuburda at sa pag-aayos ng kanilang bahay. Sa kanilang halamanan ay nagtayo ng isang kubu-kubuhan si Rosa na pinagdausan ng kanyang mga panalangin, pagmumuni-muni at pagpapakasakit. Dahil sa pag-ibig sa Diyos, itinakwil niya ang pag-aasawa at gumawa ng mga paraan upang pumangit ang kanyang mukha hanggang sa putulin niya ang kanyang napakagandang buhok.

Siya ay pumasok na kasapi sa Orden Tersera ng mga Dominiko at nagkaroon siya ng malaking debosyon kay Santa Catalina ng Sena. Sa likod ng kanyang mga gawang kabanalan, si Rosa ay di nagkulang sa pag-ibig at paggalang sa kanyang mga magulang at kapatid. Bilang ganti sa dami ng mga pagpapakasakit niyang ginawa, tulad ng pagkain ng kaunti, pagtulog sa isang matigas at mabubog na tulugan at paglalagay ng isang koronang may matutulis na pako, si Rosa ay malimit pagpakitaan ng kanyang anghel na tagatanod, ng Mahal na Birhen at ng Panginoon. Malaki ang kanyang pamimintuho sa Santisimo Sakramento at sa Mahal na Birhen. Namatay ang santa noong 1617.

Santa Rosa de Lima, ipanalangin mo kami.

Halaw mula sa Talambuhay ng mga Santo at mga Kapistahan ng Mahal na Birhen ni +Mons. Jose C. Abriol

21/08/2026

𝗣𝗔𝗚𝗚𝗨𝗡𝗜𝗧𝗔 𝗦𝗔 𝗣𝗔𝗚𝗞𝗔-𝗥𝗘𝗬𝗡𝗔 𝗡𝗚 𝗠𝗔𝗛𝗔𝗟 𝗡𝗔 𝗕𝗜𝗥𝗛𝗘𝗡𝗚 𝗠𝗔𝗥𝗜𝗔 | 𝟮𝟮 𝘼𝙜𝙤𝙨𝙩𝙤, 𝟮𝟬𝟮𝟲

Ayon sa bagong kalendaryo ng Simbahan, ngayon ay araw ng Pagka-reyna ng Mahal na Birhen, na dati'y Kalinis-linisang Puso ni Maria.

Malaki ang ginawa ni San Juan Eudes noong ikalabim-pitong dantaon sa pagpapalaganap ng pamimintuho sa banal na puso ni Maria, na pagkaraan ay kinatigan ni Papa Pio VII sa pamamagitan ng pagpapahintulot ng isang pistang ukol sa Kalinis-linisang Puso ni Maria. Nang magpakita ang Mahal na Birhen (1830) kay Santa Catalina Laboure, nakita ng santa ang dalawang pusong mag-kaagapay, ang Mahal na Puso ni Jesus at ang Kalinis-linisang Puso ni Maria. Sa Fatima (1917), ay ipinahayag ng Birhen ang kanyang nasang ihandog sa kanyang Kalinis-linisang Puso ang daigdig at ang pamimintuho nito tuwing unang Sabado ng buwan. Sa Kalinis-linisang Puso ni Maria ay nakalarawan ang kanyang wagas na pagmamahal sa Diyos at sa atin at ang kanyang kalinisan. Noong 1942, inihandog ng Papa Pio XII ang sangkatauhan sa Kalinis-linisang Puso ni Maria, at pagkaraa'y ipinag-utos ang pagdiriwang ng pistang ito sa buong daigdig (1944).

Maria, Reyna ng Langit at Lupa, ipanalangin mo kami.

Halaw mula sa Talambuhay ng mga Santo at mga Kapistahan ng Mahal na Birhen ni +Mons. Jose C. Abriol

19/08/2026

𝗣𝗔𝗚𝗚𝗨𝗡𝗜𝗧𝗔 𝗞𝗔𝗬 𝗦𝗔𝗡 𝗕𝗘𝗥𝗡𝗔𝗥𝗗𝗢, 𝗔𝗕𝗔𝗗 𝗔𝗧 𝗣𝗔𝗡𝗧𝗔𝗦 𝗡𝗚 𝗦𝗜𝗠𝗕𝗔𝗛𝗔𝗡 | 𝟮𝟬 𝘼𝙜𝙤𝙨𝙩𝙤, 𝟮𝟬𝟮𝟲

Sa lawak ng kanyang kaalaman at sa tamis ng kanyang dila si San Bernardo (1090-1153) ay tinaguriang Doctor Melifluo (pulot-pukyutan) at sinasabing siya ang umakay sa buong Europa noong kapanahunan niya. Ipinanganak siya sa Pontaines, Dihon.

Sa pagpasok niya sa monasteryo, winika sa kanyang kapatid na bunso: "Nivardo, diyan ka na, ang lahat ng kayamanan ay iyo na." Sumagot ang bunso: "Bernardo, diyata't iiwanan mo sa akin ang lupa at kukunin mo ang langit? Hindi mabuti ang paghahatiang iyan." Ang lahat ng kanyang mga kapatid sampu ng kanyang ama at ng tatlumpung lalaking mayaman ay sumunod kay San Bernardo.

Pagkatatag ng monasteryo sa Klarabal, siya'y napabantog at sumangguni sa kanya ang mga hari, obispo at papa. Ang maraming katiwalian at kamaliang bumabagabag sa Santa Iglesya ay kanyang sinugpo: ang kamalian ni Abelardo, ang pagmamalabis ni Haring Luis ng Pransiya at ang sisma ng anti-papang si Anacleto II. Nilakbay ng santo ang Pransiya, Alemanya at Italya sa pagpapasimula ng ikalawang Krusada.

Sumulat ng maraming aklat tungkol sa pananampalataya at sa Mahal na Birhen; sinulat niya ang panalanging Memorare sa Mahal na Birhen at ang mga huling kataga ng Salve Regina (Aba po Santa Mariang Hari). "Kalooban ng Diyos," wika niya, "na ang lahat ng biyaya ay ating tanggapin sa kamay ng Mahal na Birhen." Maraming pagpapakasakit ang ginawa ng santo na ukol sa ikapagbabalik-loob ng mga makasalanan. "Ang mga banal," anang santo, "ay naghangad ng kamatayan upang makasama ang Panginoon, nguni't ako, dahil sa kasamaang nakikita ko." Pumayapa sa biyaya ng Diyos si Bernardo noong 1153.

San Bernardo, ipanalangin mo kami.

Halaw mula sa Talambuhay ng mga Santo at mga Kapistahan ng Mahal na Birhen ni +Mons. Jose C. Abriol

18/08/2026

𝗣𝗔𝗚𝗚𝗨𝗡𝗜𝗧𝗔 𝗞𝗔𝗬 𝗦𝗔𝗡 𝗘𝗭𝗘𝗞𝗜𝗘𝗟 𝗠𝗢𝗥𝗘𝗡𝗢, 𝗢𝗕𝗜𝗦𝗣𝗢 | 𝟭𝟵 𝘼𝙜𝙤𝙨𝙩𝙤, 𝟮𝟬𝟮𝟲

Nang taong 1871 ay inordenang pari ng Arsobispo ng Maynila ang isang lalaki na naging paring misyonero sa Pilipinas at sa timog America, na ang pangalan ay Ezequiel Moreno. Sumilang sa Espanya nang taong 1848, si Ezequiel ay pumasok na Agustino Recoleto at ipinadala sa ating Bayan upang tumulong sa ikalalaganap ng pananampalatayang Katoliko.

Sa kanyang 15 taong paglilingkod sa maraming bayan, katulad ng Calapan, Mindoro, Las Piñas, Puerto Princesa, Sta. Cruz, Maynila, Imus, Cavite at Santo Tomas, Batangas, si San Ezequiel ay nagpakita ng pambihirang malasakit sa mga kaluluwa, sa pagtuturo ng katesismo at pagtulong sa mga maysakit. Sa bayan ng Bacoor, Cavite, ay sinasabi na sa 3,200 biktima ng kolera ay tatlo lamang ang hindi niya natulungan bago namatay.

Siya ay nadestino rin sa Timog America na dito ay naging obispo ng Pasto. Marami siyang tiniis dahil sa mga pag-uusig ng mga kaaway ng relihiyon, na ang lahat ay binata alang-alang sa karangalan ng Diyos at sa ikaliligtas ng mga kaluluwang nasasakupan niya. Ang 17 taon sa America ay nagwakas ng 1905, nang siya ay nagkasakit ng kanser na kanyang ikinamatay noong Agosto 19, 1906 sa Espanya. Ang pinili niyang silid para ilaan ang huling sandali ng kanyang buhay ay iyong malapit sa Santisimo Sakramento upang makadalaw sa Panginoon nang malimit.

San Ezekiel Moreno, ipanalangin mo kami.

Halaw mula sa Talambuhay ng mga Santo at mga Kapistahan ng Mahal na Birhen ni +Mons. Jose C. Abriol

15/08/2026

𝗣𝗔𝗚𝗚𝗨𝗡𝗜𝗧𝗔 𝗞𝗔𝗬 𝗦𝗔𝗡 𝗥𝗢𝗤𝗨𝗘, 𝗡𝗔𝗚𝗣𝗔𝗣𝗔𝗚𝗔𝗟𝗜𝗡𝗚 | 𝟭𝟲 𝘼𝙜𝙤𝙨𝙩𝙤, 𝟮𝟬𝟮𝟲

Pinupuri at pinasasalamatan ka namin o butihing San Roque sapagka't Ikaw ang napili at itinalaga ng Diyos bilang tagapag-alaga ng mga taong may kapansanan sa katawan at kaluluwa. Isinasamo namin na lingapin mo ang lahat ng mga dumudulog sa iyo, ipagsanggalang sa lahat ng mga panganib sa katawan at kaluluwa, lalung-lalo na sa mga tukso laban sa kalinisan. Magalang kong iniluluhog sa iyo ang biyayang pagtibayin pa sa araw-araw ang aking pananampalataya at kamtan ko ang liwanag ng Espiritu ng Diyos para sa mga nasasadlak sa kasalanan, tulad ko. Saklolohan mo ako at ituon mo sa akin ang iyong butihing paningin upang mapaglabanan ko ang mga hirap ng katawan, puso at kalooban at nang sa gayon ay maging karapatdapat ako sa mga biyayang nais kong makamtan sa araw na ito.

Dakilang San Roque, inihahandog ko sa iyo ang buong buhay ko, kasama ang aking kaisipan, damdamin at gawain, nagpapasalamat din ako sa iyo sa lahat ng biyayang nakamtan ko sa Diyos sa iyong pamamagitan at nawa'y ang lahat ng ito ay makatulong sa akin upang makarating ako sa buhay na walang hanggan. Nawa'y ang banal na buhay mo ay maging uliran sa akin at kung sakaling ang paggawa ng mabuti ay maging mahirap para sa akin, ipagkamit mo na ako'y magkaroon ng biyaya at lakas ng loob na sumunod sa iyong mga yapak, ikaw na nagpakita ng mabuting halimbawa sa isang pamumuhay sa piling ng Diyos.

Dumating nawa ang sandali na sa iyong pamamagitan ay maging karapat-dapat ako sa mga pagpapala ng Maykapal upang sa langit ay makapiling ko rin ang Diyos na kasama mo. Amen.

Ampunin mo kami't kupkop, Roqueng, kapalara'y puspos.

San Roque, Pintakasi laban sa sakit at salot, ipanalangin mo kami.

14/08/2026

𝗗𝗔𝗞𝗜𝗟𝗔𝗡𝗚 𝗞𝗔𝗣𝗜𝗦𝗧𝗔𝗛𝗔𝗡 𝗡𝗚 𝗣𝗔𝗚-𝗔𝗔𝗞𝗬𝗔𝗧 𝗦𝗔 𝗟𝗔𝗡𝗚𝗜𝗧 𝗡𝗚 𝗠𝗔𝗛𝗔𝗟 𝗡𝗔 𝗕𝗜𝗥𝗛𝗘𝗡𝗚 𝗠𝗔𝗥𝗜𝗔 | 𝟭𝟱 𝘼𝙜𝙤𝙨𝙩𝙤, 𝟮𝟬𝟮𝟲

Sa araw na ito'y pinararangalan natin ang maluwalhating pag-kamatay ng Mahal na Birhen at ang pag-aakyat sa kanya sa kalangitan sa gitna ng dimasayod na kasayahan ng buong sangkalangitan na tumanggap sa kanya bilang reyna ng langit at lupa. Ito ang tinatawag na dogma ng Asunsiyon ng Mahal na Ina ng Diyos, na sapul pa noong ikalimang dantaon ay ipinagdiwang na ng mga taga-Silanganan.

Ayon sa mga huling tuklas sa kasaysayan, ang Mahal na Ina ay nabuhay pa sa ibabaw ng lupa, pagkaraan ng pag-akyat ng Panginoon, nang labindalawang taon; ayon naman kay San Epifanio, dalawampu't apat na taon. Siya ay namatay at inilibing sa Getsemani, bagama't may nagsasabing namatay sa lunsod ng Efeso noong taong 54 A.D., sa gulang na pitumpu't dalawang taon. Tulad ng Panginoon na nagtaglay ng tatlong pagtatagumpay — sa kasalanan, kalupaan at kamatayan — si Maria ay nagkaroon din ng ganitong pagtatagumpay: sa kasalanan, sa kalinis-linisang paglilihi sa kanya; sa kalupaan, sa kanyang palaging pagkabirhen; sa kamatayan, sa kanyang pagtulog at pag-aakyat sa langit.

Mahal na Birheng Maria na Iniakyat sa Langit, ipanalangin mo kami.

Halaw mula sa Talambuhay ng mga Santo at mga Kapistahan ng Mahal na Birhen ni +Mons. Jose C. Abriol

13/08/2026

𝗣𝗔𝗚𝗚𝗨𝗡𝗜𝗧𝗔 𝗞𝗔𝗬 𝗦𝗔𝗡 𝗠𝗔𝗫𝗜𝗠𝗜𝗟𝗜𝗔𝗡𝗢 𝗠𝗔𝗥𝗜𝗔 𝗞𝗢𝗟𝗕𝗘, 𝗣𝗔𝗥𝗜 𝗔𝗧 𝗠𝗔𝗥𝗧𝗜𝗥 | 𝟭𝟰 𝘼𝙜𝙤𝙨𝙩𝙤, 𝟮𝟬𝟮𝟲

Si Maximilian ay isinilang sa Zdunska Wola, Poland noong 1894. Bininyagan siya sa pangalang Raymond.

Sumapi siya sa Order of Friars Minor Conventual sa Lvov, sa bahagi ng Poland na sakop ng Austria. Dito niya tinanggap ang pangalang Maximilian. Bago ang kanyang ordinasyon bilang pari, itinatag ni Maximilian ang Kilusang Immaculata na nagdedebosyon sa Mahal na Birhen.

Matapos niyang matanggap ang doktorado sa teolohiya, lumaganap ang Kilusan sa pamamagitan ng babasahing pinamagatang The Knights of the Immaculata; at nakatulong ito sa pagbuo ng komunidad ng walong daang kalalakihan. Naordenahan si Maximilian noong Abril 28, 1918.

Nang masakop ng N**i ang bayan ng Poland noong 1939, nakulong si Maximilian subalit pansamantala ring napawalan. Pagsapit ng 1941, muli siyang hinuli at pinadala sa concentration camp sa Auschwitz, Poland, ang pinakamalaki at pinakamalagim na death camp ng mga N**i.

Noong Agosto 4, 1941, bilang ganti sa pagtakas ng isang bihag, sampung lalaki ang nahatulang mamatay. Pinagpalit ni Padre Kolbe ang kanyang buhay para sa buhay ng isang ama at asawa. Paglipas ng sampung araw, noong Agosto 14, 1941, pinatay si Padre Kolbe at mga kasama sa pamamagitan ng pag-iineksyon ng carbolic acid.

Tinanghal na martir ng Simbahan si Padre Maximilian Maria Kolbe noong Oktubre 10, 1982.

San Maximiliano Maria Kolbe, ipanalangin mo kami.

Halaw mula sa Talambuhay ng mga Santo at mga Kapistahan ng Mahal na Birhen ni +Mons. Jose C. Abriol

10/08/2026

𝗣𝗔𝗚𝗚𝗨𝗡𝗜𝗧𝗔 𝗞𝗔𝗬 𝗦𝗔𝗡𝗧𝗔 𝗖𝗟𝗔𝗥𝗔, 𝗗𝗔𝗟𝗔𝗚𝗔 | 𝟭𝟭 𝘼𝙜𝙤𝙨𝙩𝙤, 𝟮𝟬𝟮𝟲

Si Santa Clara (Lat., maningning), maningning sa pangalan at lalo na sa kabanalan, ay si Clara Scifi, anak ni Favorino at ni (beata) Ortolana de Fiumi. Sa bayang sinilangan niya noong 1193, sa Asis, ay minsang nangaral si San Francisco, at ang pangaral ng santo ay tumimong mabuti sa malinis at murang isipan ni Clara, at dahil diya'y nabuo sa huli ang pasiyang mabuhay nang alinsunod sa mabathalang aral ng Panginoon. Ang huling pagkakita sa kanya ng daigdig ay noong linggo ng palaspas nang isuot ang kanyang pinakamagandang damit. Nang gabing iyon, si Clara ay nagtanan sa kumbento ng San Francisco. Doon niya itinakwil ang lahat ng bagay sa daigdig, sinuutan siya ng makapal na abito ng mga Pransiskano at pinutulan ng buhok.

Sa kumbento ng San Angelo ay sinimulan ni Santa Clara ang tinatawag na Orden ng mga Madreng Klarisa sa ilalim ng pamumuno ni San Francisco ng Asis. Ang labing-anim na unang mga Klarisa ay nabuhay na tigib ng karukhaan, kababaang-loob at pagpapakasakit: hindi sila kumakain ng karne, natutulog sa sahig, walang sapin ang paa at hindi nagsasalita maliban kung kailangang-kailangan lamang. Isa sa mga pagpepenitensiyang ginawa ng santa ay ang pagsusuot ng isang damit na makapal na makati sa katawan. Ang kumbentong iyon ng mga monghang Klarisa ay pinamunuan ni Santa Clara sa loob ng apatnapung taon. Ang kanyang kapatid na si Ines at ang kanyang ina ay pumasok din sa samahang iyon. Ang kanyang mga mongha ay inakit ni Clara sa paggawa ng mga kagamitan ng altar ng Santisimo Sakramento.

Nang minsan magkasakit si Santa Clara ay nilusob ng mga Saraseno ang kanilang kumbento. Ang ginawa niya'y ipinakita sa mga tampalasan ang Santisimo Sakramento. Ang mga Saraseno ay biglang nagsialis. "Panginoon," wika niya, "ipagtanggol Mo ang iyong mga anak sa kamay ng mga tampalasang ito."

Sumalangit ang santa noong 1253, sa gulang na 60 taon.

Santa Clara, ipanalangin mo kami.

Halaw mula sa Talambuhay ng mga Santo at mga Kapistahan ng Mahal na Birhen ni +Mons. Jose C. Abriol

Hesus Nazareno Chapel - Looc, Cardona, Rizal

26/08/2026

23/08/2026

22/08/2026

21/08/2026

19/08/2026

18/08/2026

15/08/2026

14/08/2026

13/08/2026

10/08/2026

Address

Website

Alerts

Shortcuts

Share

Category

Listing takedown request