IFI-Banal na Krus ng Meyto

24/08/2026

22/08/2026

PABATID

Dahil sa hindi pa humuhupang baha sa loob at labas ng Parokya ng Banal na Krus, minarapat po nating ilipat ang ating Lingguhang Pagsamba sa ganap na alas-8:00 ng umaga.

Sa kasalukuyan, makikita sa live streaming ang ating pagsamba upang manatiling ligtas ang lahat habang patuloy pa ang pagbaha. Hinihiling po namin ang inyong pang-unawa at patuloy na pananalangin. Nawa’y patuloy tayong ingatan at bigyan ng lakas ng ating Panginoon sa gitna ng pagsubok na ito.

Manatiling ligtas, mag-ingat, at sama-sama tayong manalangin. God bless us all!

22/08/2026

Ingat po tayong lahat nga kapatid sa Pananampalataya.

15/08/2026

PABATID

Agosto 15, 2026

Ipinababatid po sa lahat na ang ating nakatakdang pagdiriwang ng 124th Proclamation Anniversary bilang Parokya ay ipagpapaliban muna dahil sa matinding pagbaha na ating nararanasan.

Ang desisyong ito ay para sa kaligtasan, kapakanan, at pagkakaisa ng bawat isa. Hinihiling po namin ang inyong pang-unawa at patuloy na panalangin para sa ating mga pamilya at buong pamayanan.

Maghihintay po tayo ng panibagong abiso tungkol sa bagong petsa ng ating pagdiriwang.

Maraming salamat po sa inyong pang-unawa.

Parokya ng Banal na Krus
Para sa Diyos at Bayan

14/08/2026

Panginoon naming Diyos, sa gitna ng unos at panganib, kami ay dumudulog sa Iyong awa at kapangyarihan. Ingatan Mo ang bawat pamilya, iligtas Mo ang aming mga komunidad, at bigyan Mo kami ng lakas, tapang, at pag-asa.

Sa ilalim ng Iyong banal na pagkalinga, nawa’y malampasan namin ang pagsubok na ito nang may pagkakaisa at pananampalataya. Panginoon, maawa Ka sa amin at ingatan Mo kami. Amen.

13/08/2026

Aming mapagmahal na Panginoon,
lumalapit po kami sa Iyo bilang isang pamilya. Sa bawat miyembro ng aming tahanan, yakapin Mo kami ng Iyong pagmamahal, ingatan Mo ang bawat isa, at bigyan Mo kami ng lakas, pagkakaisa, at pag-asa.

Sa panahon ng unos, malakas na ulan, at baha na aming nararanasan, maging kanlungan Ka namin, O Panginoon. Ilayo Mo kami sa anumang panganib at gabayan Mo ang aming mga hakbang. Ingatan Mo ang aming mga tahanan, kabuhayan, at higit sa lahat, ang buhay ng bawat miyembro ng aming pamilya. Sa mga sandaling kami ay natatakot, ipaalala Mo sa amin na hindi Mo kami iniiwan. Kapag tila malakas ang unos sa aming paligid, gawin Mong matatag ang aming pananampalataya. Turuan Mo kaming magdamayan, magtulungan, magpatawad, at manatiling nagkakaisa.

Panginoong Hesukristo, sa pamamagitan ng Banal na Krus, nawa'y makita namin ang pag-asa sa gitna ng bawat pagsubok. Maging sandigan Namin ang Iyong Krus kapag kami ay nanghihina, at maging liwanag Mo ang aming gabay sa dilim ng pangamba.

Basbasan Mo ang aming mga magulang, mga anak, kapatid, kamag-anak, at lahat ng aming minamahal. Ingatan Mo rin ang aming mga kapitbahay at lahat ng pamilyang nakararanas ng unos at baha. Bigyan Mo sila ng kaligtasan, pagkain, tahanan, at mga taong handang tumulong.

Panginoon, higit sa lahat, turuan Mo kaming manalig sa Iyong banal na kalooban. Sa gitna ng unos, manatili Ka sa aming tahanan; sa gitna ng takot, manatili Ka sa aming puso; at sa gitna ng pagsubok, manatili Ka sa aming pamilya.

Panginoon, sa pamamagitan ng Banal na Krus, ingatan Mo kami, iligtas Mo kami, at patatagin Mo kami. Amen.