12/07/2023
Santa Maria, Mahal na Birhen ng Bundok ng Carmelo, nagpakita ka kay San Simon Stock sa Cambridge, upang gabayan kami sa aming paglalakbay sa lupa at bigyan ng pag-asa sa aming buhay lalo na sa oras ng paghihirap at tiisin.
Inihahandog namin sa iyo ang aming sarili, puso at damdamin. Pagpalain mo at gabayan ang aming mahal sa buhay, pamilya at bayan. Tanggapin mo ang aming ligaya at lungkot, tagumpay at kabiguan, kahirapan at kasaganahan, sakit at kalusugan. Dalhin mo po ito sa iyong anak na si Hesus upang ito ay maging bukal para sa amin ng grasya at kabanalan.
Isinasamo namin, Katamis-tamisang Ina, na lagi mo kaming samahan. Huwag mo po kaming iiwan at pababayaan lalo na sa panahon ng pagsubok at kapighatian. Akayin mo kami sa lahat ng oras at lugar. Sa sandali ng aming kamatayan dalhin mo kami sa iyong Anak na si Hesus na aming Panginoon upang makamit ang buhay na walang hanggan.
Amen.
Magandang Araw po sa inyong lahat!
Malugod po namin kayong inaanyayahan na dumalo at maki-isa sa pagdiriwang ng Dakilang Kapistahan ng Mahal na Birhen ng Bundok Carmelo sa darating na Linggo.
July 16, 2023 sa ganap na 10:00 ng umaga sa bisita ng Our Lady of Mt. Carmel sa Baranggay ng Meyto, Calumpit Bulacan.
