San Exequiel Moreno Parish

Isinilang si Ezekiel sa lungsod ng Alfaro, La Rioja sa bansang Espanya noong Abril 9, 1848. Ikatlo siya sa anim na anak ng mapagkumbaba at madasaling mag-asawang Felix Moreno at Maria Josefa Diaz. Sa murang edad, batid ni Ezekiel ang pagsisikap ng mga misyonero, kabilang na ang misyon sa Pilipinas. Sa edad na 16, si Ezekiel ay naging relihiyoso ng Orden ng Agustino Recoleto. Ipinadala siya, kasama

ang 16 pang Recoleto sa Pilipinas, upang ipagpatuloy ang kanilang adhikain bilang mga misyonero. Dumating sila noong Pebrero 10, 1870 at namuhay si Ezekiel sa kumbento ng San Nicolas sa Intramuros. Dito siya nagtapos ng pag-aaral ng teolohiya. Sa parehong taon, siya ay naglayag papuntang Jaro, Iloilo upang tumanggap ng minor orders. Siya ay bumalik sa Maynila at inordinahang pari noong Hunyo 1871. Ipinadala siya sa kanyang unang misyon sa Calapan, Oriental Mindoro. Dito, nag-aral siya ng wikang Tagalog sa ilalim ng pagtuturo ng kapatid na si Padre Eustaquio. Itinalaga rin siya patungong Puerto Princesa, Palawan, kung saan siya naging unang kura paroko ng Immaculate Conception Cathedral Parish. Sa Palawan din siya nagkasakit ng malaria. Matapos magpagaling, kanyang tinanggap ang bagong pagkakatalaga bilang kura paroko ng Calapan. Sa edad na 28, siya ang Vicar Forane at Vicar Provincial sa buong isla ng Mindoro. Bilang kura, pinalaganap niya ang debosyon sa Sto. Niño. Si Ezekiel ay ipinadala rin sa Las Piñas noong Hunyo 1876. Dito, kanyang hinarap ang apat na matinding kalamidad ng tagtuyot at kagutuman, smallpox outbreak at malaking sunog. Siya ay naging kura paroko rin sa Sto. Tomas, Batangas; general preacher sa Intramuros; at curate sa Sta. Cruz, Maynila. Kinalaunan, sa Bacoor at Imus, Cavite, naglingkod siya sa gitna ng cholera plague. Kanyang ginugol ang 15 taon ng kanyang buhay sa magiliw na paglilingkod sa Pilipinas mula 1870 hanggang 1885. Nang nahalal bilang superior, siya’y bumalik sa Monteagudo, Espanya at humubog ng mga misyonero papuntang Asya at Amerika. Mula 1888 hanggang sa mga huling buwan ng kanyang buhay, nagsilbi siya bilang kauna-unahang obispo ng Casanare, Colombia. Siya rin ang naging obispo ng Pasto, Colombia. Siya ay may malalim na pamimintuho sa Kabanal-banalang Puso ni Hesus, sa mahal na Inang Birhen ng Daan o Our Lady of the Way at sa Banal na Sakramento. Nang maranasan na niya ang masidhing sakit dulot ng kanser sa ngalangala o palate noong 1905, nagretiro siya at nanatili sa monasteryo ng Monteagudo sa Navarra, España. Dito siya namatay noong Agosto 19, 1906. Sa dalawang pagkakataong hinukay ang kanyang bangkay noong 1915 at 1975, natagpuan itong incorrupt o hindi naagnas. Si San Ezekiel Moreno ay kinilala bilang patron ng mga maysakit ng kanser. Kabilang sa mga himala sa kanyang pamamagitan ang gumaling sa cancer of the palate mula Pasto, sa breast cancer mula Buesaco at sa cancer of the throat mula Negros Occidental. San Ezekiel Moreno, ipanalangin mo po kami.