16/02/2022
📌: DEBOSYON.
TANONG
Kawalan ba ng pananalig at pananampalataya sa Diyos kung ang isang Kristiyano ay mag-impok o mag-imbak ng pagkain bilang paghahanda sa posibleng kagutuman na darating sa hinaharap?
SAGOT
Kabulay, isang praktikal na ugali ang maging mapaghanda sa mga tiyak o posibleng kahirapan na maaaring mangyari sa hinaharap. Gayunman, hindi magiging maganda at mabuti ang paghahanda sa hinaharap kung ang ating mga puso at isipan ay balot ng takot at pangamba. Baka naman sa dami ng ating inimbak ay dito na nakatayo ang ating pag-asa at hindi na sa magagawa ng Diyos? Pinakamahalaga sa lahat ay ang ating SALOOBIN na sa Panginoon ay PUNO tayo ng KAPAYAPAAN sa anumang kaganapan – mahigpit ‘man ito o may kahirapan. Malinaw na sinabi ng Panginoon sa Kanyang sermon sa Bundok na hindi tayo dapat mag-alala para sa araw ng bukas, dahil alam ng ating Ama sa langit ang ating mga pangangailangan. Inaanyayahan ko kayong matiyaga nating basahin ang sinabi ng Panginoong Jesus mula sa Aklat ni San Mateo:
Mateo 6:25-34
[25] “Kaya sinasabi ko sa inyo, huwag kayong mag-alala tungkol sa inyong buhay – kung ano ang inyong kakainin, iinumin o susuotin. Dahil kung binigyan kayo ng Dios ng buhay, siguradong bibigyan din niya kayo ng pagkain at isusuot.
[26] Tingnan ninyo ang mga ibon sa himpapawid. Hindi sila nagtatanim, o nag-aani, o nag-iipon ng pagkain sa bodega, ngunit pinapakain sila ng inyong Amang nasa langit. Hindi baʼt mas mahalaga kayo kaysa sa mga ibon?
[27] Sino sa inyo ang makakapagpahaba ng kanyang buhay nang kahit isang saglit sa pamamagitan ng pag-aalala?
[28] “At bakit kayo nag-aalala tungkol sa pananamit? Tingnan ninyo ang mga bulaklak na tumutubo sa parang. Hindi sila nagtatrabaho o naghahabi.
[29] Ngunit sasabihin ko sa inyo: kahit si Solomon ay hindi nakapagsuot ng damit na kasingganda ng mga bulaklak na ito sa kabila ng kanyang karangyaan.
[30] Kung dinadamitan ng Dios nang ganito ang mga damo sa parang, na buhay ngayon pero kinabukasan ay malalanta at susunugin, kayo pa kaya? Kay liit ng inyong pananampalataya!
[31] Kaya huwag kayong mag-alala kung ano ang inyong kakainin, iinumin, o susuotin.
[32] Ang mga bagay na ito ang pinapahalagahan ng mga taong hindi kumikilala sa Dios. Ngunit alam ng inyong Amang nasa langit na kailangan ninyo ang mga bagay na ito.
[33] Kaya unahin ninyo ang mapabilang sa kaharian ng Dios at ang pagsunod sa kanyang kalooban, at ibibigay niya ang lahat ng pangangailangan ninyo.
[34] Kaya huwag na kayong mag-alala tungkol sa kinabukasan, dahil ang bukas ay may sarili nang alalahanin. Sapat na ang mga alalahaning dumarating sa bawat araw.”
Ang PAGLALAGAK ng ating PANANAMPALATAYA sa Diyos para sa ating mga pangangailangan sa hinaharap ay may kaakibat na PAGTITIWALA rin naman na kaya Niyang ipagkaloob sa atin ang lahat ng ating mga pangangailangan sa buhay na ito at sa darating. Kailanman, ang Diyos na tumawag sa atin ay hindi marunong sumira sa Kanyang mga pangako – ang nais lamang Niya ay mas paglaanan at pagsumikatan natin na hanapin ay hindi lamang ang mga bagay ng mundong ito kundi ang mga bagay patungkol sa buhay na walang hanggan na siyang magdadala sa atin sa tunay na kagalakan at kapayapaan ng buhay.
Colosas 3:1
[1] Binuhay kayong muli kasama ni Cristo, kaya sikapin ninyong makamtan ang mga bagay na nasa langit kung saan naroon si Cristo na nakaupo sa kanan ng Dios.
[2] Doon ninyo ituon ang isip nʼyo, at hindi sa mga makamundong bagay.
[3] Sapagkat namatay na kayo sa dati nʼyong buhay, at ang buhay ninyo ngayon ay nakatago sa Dios kasama ni Cristo.
[4] Si Cristo ang buhay ninyo, at kapag dumating na ang panahon na nahayag na siya, mahahayag din kayo at makikibahagi sa kapangyarihan niya at karangalan.
Sa Diyos lamang natin ialay ang lahat ng Papuri at Pasasalamat!
