22/05/2026
CBCP issues “A Nation’s Prayer for Enlightenment, Conversion and Renewal,” with approved translations in Tagalog, Bicolano, Binisaya, Ilocano, Hiligaynon and Cebuano, following approval during the CBCP Permanent Council meeting on May 20, 2026.
The CBCP Permanent Council said the prayer will be recited beginning Pentecost Sunday and continuing at least through July, according to the CBCP General Secretariat.
NASUDNON NGA PAG-AMPO ALANG SA KALAMDAGAN, PAGKAKABIG, UG PAGBAG-O
Mahigugmaong Amahan, Dios sa kamatuoran ug hustisya,
Imong gipadala ang Imong Bugtong Anak, si Jesu-Kristo,
nga pinaagi sa Iyang Misteryo Paskwal nagpadayag sa Imong kaluoy ug gipakighiuli kami Kanimo ug sa kalibutan.
Miduol kami Kanimo nga nangayo og kaayohan, pagkamatarong,
ug pagbag-o alang sa among nasud.
Ang among nasud nagbarug sa usa ka lisud nga kinasang-an.
Nakita namo nga ang kamatuoran gisalikway, ang hustisya nalangan, ug ang pagkabahinbahin nagapaluya sa pundasyon sa among katilingban.
Nag-ampo kami alang sa mga gitugyanan sa pagpangulo.
Tawga sila pagbalik ngadto sa balaang katungdanan sa ilang buhatan.
Hinaut nga sila moalagad uban sa pagkamatinud-anon, hustisya, ug kaluoy.
Hatagi sila og kaalam aron makalihok uban sa maaninawng paghukom, kalig-on sa paglahutay uban sa integridad, ug pagkamapaubsanon aron dili mangita og panimalos, kondili
pagkamatarong; dili personal nga ambisyon, kondili ang kaayohan sa tanan.
Pasayloa kami sa pagpiyong namo sa unsay matarong,
sa pagdawat og mga pasangil puli sa pagkamay tulubagon,
ug sa pagtugot nga ang pagkawalay paglaum ug pagkabahinbahin makapaluya sa among paglaom alang
sa among katawhan.
Giila namo ang daghang higayon nga nagpabilin kaming hilom atubangan sa kasaypanan, sa dihang gipili namo ang kasayon kay sa konsensya, ang kahadlok kay sa kaisog, ug kawalay pagtagad kay sa responsibilidad.
O Espiritu Santo, bag-oha ang among mga kasingkasing ug lamdagi ang among mga hunahuna.
Ibalik kami gikan sa pagkawalay pagtagad ngadto sa kaluoy,
gikan sa kahilom ngadto sa matinud-anon nga aksyon,
gikan sa pagkabahinbahin ngadto sa panaghiusa, ug gikan sa kawalay paglaum ngadto sa paglaum.
Tudloi kami sa pagpanalipod sa kamatuoran uban sa gugma, sa pagtinguha sa hustisya uban sa kaluoy,
ug sa pagkamahimong instrumento sa kalinaw ug pakighiuli.
Idan-ag ang Imong kahayag sa among nasud.
Ayoha ang mga nabungkag ug ang mga nasamdan,
ug pagbangon ug usa ka katawhan nga dili ibaylo ang kamatuoran alang sa kaharuhay,
ni itugyan ang pagkamaayo ngadto sa kahadlok.
Hinaut nga kini mahimong balaang panahon sa pagkakabig ug pagbag-o alang sa among nasud,
aron mahimo gayod kaming usa ka nasud nga nagkinabuhi diha sa pagtuo, paglaum, ug gugma ubos sa Imong Amahanong pag-atiman.
Kini among gipangayo pinaagi sa among Ginoong Jesu-Kristo, Imong Anak, nga buhi ug nagahari uban Kanimo diha sa panaghiusa sa Espiritu Santo, Dios hangtud sa kahangturan.
Amen.
Santa Maria, Inahan sa katawhang Pilipino ug Reyna sa Kalinaw,
giyahi ug pangaliyupo alang kanamo sa kanunay.
San Lorenzo Ruiz ug San Pedro Calungsod, iampo kami.
San Miguel Arkanghel, iampo kami.
