09/08/2026
PATULOY NA PAG-ULAN AT PAGBAHA - MAG-INGAT AT MANALANGIN
Patuloy ang malalakas na pag-ulan sa ilang bahagi ng Luzon at Visayas dahil sa Southwest Monsoon (Habagat), na patuloy na pinapalakas ng mga bagyong nasa labas ng Philippine Area of Responsibility (PAR). Patuloy din namang binabantayan ang isang Tropical Depression na nasa labas ng PAR.
Sa Cabiao, ilang bayan at lugar ang pinapayuhang mag-ingat dahil sa patuloy na pag-ulan at banta ng pagbaha. Manatiling alerto, iwasan ang mga lugar na bahain at mapanganib, at patuloy na sumubaybay sa mga opisyal na abiso ng mga awtoridad.
Sa gitna ng ganitong panahon, sama-sama tayong manalangin at humingi ng proteksiyon, kalakasan, at awa ng Panginoon para sa bawat pamilya at pamayanan.
Inaanyayahan ang lahat na makiisa sa Oratio Imperata at sama-samang manalangin para sa kaligtasan ng lahat.
Panginoon, maawa ka sa amin at ingatan mo kami.
ORATIO IMPERATA
Laban sa mga kalamidad, malakas na pag-ulan, pagbaha at bagyo
Diyos na makapangyarihan at mahabagin,
buong pagpapakumbaba kaming lumalapit sa Iyo
at humihingi ng Iyong awa at pagkalinga sa panahong kami ay humaharap sa malalakas na pag-ulan at pagbaha.
Panginoon, pahupain mo ang ulan at ilayo mo kami sa baha, pagguho ng lupa, malalakas na hangin, at sa anumang panganib na maaaring idulot ng kalamidad. Kalingain mo ang bawat pamilya, lalo na ang mga bata, matatanda, maysakit, at mga higit na nangangailangan ng Iyong tulong.
Ingatan mo ang aming mga tahanan at kabuhayan, at pagkalooban mo ng ligtas na kanlungan ang mga napilitang lumikas. Basbasan at palakasin mo ang mga rescuers, volunteers, barangay officials, at lahat ng lingkod na buong tapang na tumutulong sa mga nangangailangan. Bigyan mo sila ng karunungan, lakas, at katatagan sa kanilang paglilingkod sa kapwa.
San Juan Nepomuceno, aming patron at tagapamagitan,
ipanalangin mo kami sa Panginoon. Samahan mo ang aming pamayanan sa panahong ito ng pagsubok at ilapit mo sa Diyos ang aming mga panalangin para sa kaligtasan at kapayapaan ng lahat.
Apung Lourdes de Cabiao, Ina naming mapagkalinga,
ipanalangin mo rin kami at ang aming mga pamayanan. Ilukob mo ang iyong manto ng pagkalinga sa lahat ng nangangailangan ng proteksiyon at pag-asa.
Ipanalangin ninyo kami sa inyong Anak na si Hesukristo, upang kami ay manatiling ligtas, matatag, at nagkakaisa sa gitna ng pagsubok na ito. Panginoon, turuan mo kaming manatiling kalmado, magtulungan, at patuloy na magtiwala sa Iyong pag-ibig at awa.
Panginoon, maawa Ka sa amin at iligtas Mo kami. Hinihiling namin ang lahat ng ito sa pamamagitan ni Hesukristo na aming Panginoon.
Amen.
San Juan Nepomuceno, ipanalangin mo kami.
Apung Lourdes de Kabyaw, idalangin mo kami.
