San Nicolas de Tolentino Church of Cabatuan, Iloilo

26/08/2026

26/08/2026

AGOSTO 27 – HUEBES SA IKA-21 NGA SEMANA SANG TUIG
SANTA MONICA

BALASAHON │ 1 Corinto 1:1-9
Ako si Pablo, gintawag nga mangin-apostol ni Kristo Jesus paagi sa kabubut-on sang Dios, kag si Sostenes nga aton utod.

Sa inyo nga mga katapo sang iglesia sang Dios nga yara sa Corinto, sa tanan nga gintawag sang Dios nga mangin-iya balaan nga mga katawhan. Ini nga katawhan nangin-iya sang Dios tungod sang lla pagpakighiusa kay Kristo Jesus, kaupod sang tanan nga mga katawhan bisan diin, nga nagasimba sa aton Ginoong Jesukristo nga ila Ginoo kag aton man:

Kabay nga ang Dios nga aton Amay kag ang Ginoong Jesukristo maghatag sa inyo sing grasya kag paghidait.

Nagapasalamat ako pirme sa akon Dios tungod sa inyo, bangod sang mga kaayuhan nga nahatag niya sa inyo paagi kay Kristo Jesus. Kay sa inyo pagpakighiusa kay Kristo nagmanggaranon kamo sa tanan nga mga butang. Nag-alam kamo sa paghambal sang bug-os nga mensahe sang Dios kag nagdugang sa paghangop sang tanan nga mga kamatuoran. Ang pagpamatuod nahanungod kay Kristo nakapanggamot na sa inyo. Gani wala kamo makulangi sang tagsa ka dulot nga ginhatag sang Dios samtang nagahulat kamo sang pagpahayag sang aton Ginoong Jesukristo. Palig-unon man niya kamo tubtob sa katapusan, agod nga wala sing isaway sa inyo sa Adlaw sang aton Ginoong Jesukristo. Masaligan ang Dios, ang Dios nga nagtawag sa inyo sa pagpakighiambit sa iya Anak nga si Jesukristo nga aton Ginoo.

SALMO SA PAGSABAT 145:2-3, 4-5, 6-7
(S) Dios ko, kag hari ko, magapasalamat ako sa imo sa wala sing katapusan.

Sa tagsa ka adlaw nagapasalamat ako sa imo; dayawon ko ikaw sa wala sing katubtoban. Ang GINOO gamhanan, kag dapat gid dayawon, ang iya pagkagamhanan indi mahangpan. (S)

Ang imo ginhimo pagadayawon halin sa isa ka kaliwatan pakadto sa isa; isugid nila ang imo gamhanan nga mga buhat. Ang mga tawo magahambal sang imo kadungganan kag pagkahalangdon, kag magpamalarølong ako sa imo makatilingala nga mga binuhatan. (S)

Ang mga tawo magahambal sang imo gamhanan nga mga buhat, kag ako magasugid sang imo pagkagamhanan. Magasugid sila nahanungod sang imo kaayo kag magakanta nahanungod sang imo pagkamatarong. (S)

Aleluya, aleluya! Magbantay kamo kag maghanda kamo kay sa takna nga wala ninyo ginapaabot, ang Anak sang Tawo magakari, Aleluya, aleluya!

EBANGHELYO │ Mateo 24:42-51
Si Jesus nagsiling sa iya mga gintuton-an: "Magbantay kamo, kay wala kamo makahibalo kon ano nga adlaw maabot ang inyo Ginoo. Dumdoma ninyo ini! Kon ang tagbalay nakahibalo kon sa ano nga tion sang gab-i ang makawat magaabot, pat-ud gid nga magapulaw sia kag indi siya magtugot nga ang makawat makarungkab sang iya balay. Gani dapat man kamo maghanda pirme, tungod kay sa takna nga wala ninyo ginapaabot, ang Anak sang Tawo magaabot."

"Karon, sin-o bala ang matutom kag maalam nga suloguon? Sia amo ang gintugyanan sang iya agalon sa pagdumala sang iban nga mga suloguon, kag sa paghatag sa ila sang ila pagkaon sa nagakaigo nga tion. Daw ano ka malipayon yadto nga suloguon nga sa pagpauli sang iya agalon masapwan sia nga nagahimo sang iya bulohaton! Nagasiling ako sa inyo, nga sia ang padumalahon sang iya agalon sang tanan niya nga pagkabutang. Pero kon malain sia nga suloguon magasiling sia sa iya kaugalingon, 'Dugay pa mabalik ang akon agalon,' kag magasugod sia sa pagpamintas sang iya kaupod nga mga suloguon, kag magkaon kag mag-inom upod sa mga palahubog. Dayon ang agalon sadto nga suloguon magaabot sa adlaw nga wala niya sia ginapaabot kag sa tion nga wala niya mahibaloi. Ang agalon magahatukhatok sa iya kag magasilot sa iya upod sa mga hipokrito. Didto magahibi sia kag magabagrot sang iya mga ngipon."

25/08/2026

AGOSTO 26 – MIERKOLES SA IKA-21 NGA SEMANA SANG TUIG

BALASAHON │ 2 Tesalonica 3:6-10, 16-18
Mga kautoran, sa ngalan sang aton Ginoong Jesukristo nagasugo kami sa inyo: magpalayo kamo sa mga kautoran nga matamad mag-obra, nga wala nagasunod sa mga pagsulondan nga ginhatag namon sa ila. Kamo inyo nakahibalo gid nga dapat ninyo himuon man ang amon ginhimo. Wala kami magtinamad sang kami kaupod ninyo. Wala kami magbaton sing bulig ni bisan sin-o nga wala namon pagbayari, kundi nagpangabudlay kag nagpanikasog kami sa adlaw kag gab-i, agod nga wala sing isa sa inyo nga mabug-atan sa pagsakdag sa amon. Ginhimo namon ini indi tungod kay wala kami sing kinamatarong sa pagpaabot sang inyo pagsäkdag sa amon, kundi ginhimo namon ini subong sulondan ninyo. Sang kami kaupod pa ninyo, ginsingganan namon kamo, "Ang bisan sin-o nga indi luyag mag-obra indi pagpakaunon."

Kabay nga ang Ginoo gid, nga amo ang ginhalinan sang paghidait, maghatag sa inyo sang paghidait sa tanan nga tion kag sa tanan nga bagay. Ang Ginoo mangin yara sa inyo tanan.

Ako, si Pablo, amo gid ang nagasulat sini nga mga pag-abiabi. Amo ini ang akon pirma sa tanan ko nga mga sulat. Amo ini ang panulat ko.

Kabay nga ang grasya sang aton Ginoong Jesukristo mangin yara sa inyo tanan.

SALMO SA PAGSABAT 128:1-2, 4-5
(S) Bulahan ang mga nagatahod sa GINOO.

Bulahan ang mga nagatahod sa GINOO, nga nagakabuhi suno sa iya mga sugo! Ang imo kinabudlayan mangin tuman sa imo mga kinahanglanon, mangin malipayon ka kag mangin mainuswagon. (S)

Ang tawo nga nagatuman sa GINOO pagabendisyunan kaangay sini. Kabay nga ang GINOO magabendisyon sa imo gikan sa Sion! Kabay nga makita mo ang Jerusalem nga gauswag sa bug-os nga mga inadlaw sang imo kabuhi! (S)

Aleluya, aleluyal Ang nagatuman sang pulong ni Kristo, amo ang tawo nga ang iya gugma sa Dios nahimpit. Aleluya, aleluya!

EBANGHELYO │ Mateo 23:27-32
Si Jesus nagsiling sa mga Fariseo! "Makaluluoy man kamo, mga manunudlo sang Kasugoan, kag mga Fariseo! Mga hipokrito! Kaangay kamo sang mga lulobngan nga ginpintahan sing puti kag matahom tan-awon sa gwa, pero sa sulod sini puno sang tul-an sang mga patay kag sang kagarukan. Sa amo man nga bagay, kon tan-awon kamo sang mga tawo daw sa matarong kamo, pero ang sa sulod ninyo puno sang mga pagpakunokuno kag kalautan."

"Makaluluoy man kamo, mga manunodlo sang Kasugoan kag mga Fariseo! Mga hipokrito! Nagahimo kamo sing matahom nga mga lulobngan para sa mga propeta kag nagapuni sang pantyon sang mga matarong, kag nagasiling kamo, 'Kon kita nagkabuhi sa mga panahon sang aton mga katigulangan, wala kuntani kita maghimo sang ila ginhimo kag magpatay sang mga propeta.' Kon amo ginaako ninyo nga kamo mga kaliwat sang nagpatay sang mga propeta! Hala, padayuna ninyo kag tapusa ang ila ginsugoran!

24/08/2026

AGOSTO 25 – MARTES SA IKA-21 NGA SEMANA SANG TUIG
SAN LUIS SANG FRANCIA, Hari

BALASAHON │ 2 Tesalonica 2:1-3, 14-17
Mga Utod: Nahanungod sang pag-abot sang aton Ginoong Jesukristo kag sang pagtipon sa aton sing tingob sa pag-upod sa iya: nagapakitluoy ako sa inyo, mga kautoran, nga indi kamo dayon magsalangisag sa inyo mga panghunahuna ukon makatublag sa mga nagasiling nga ang Adlaw sang Ginoo nag-abot na. Ayhan may nagtagna ukon nagwali sini, ukon may nagsiling nga kami ang nagsulat sini. Indi ninyo pagtugoti nga pagadayaan kamo ni bisan sin-o sa bisan ano nga paagi. Kay ina nga Adlaw indi mag-abot tubtob nga matabo ang katapusan nga Pagribok kag magapakita ang Isa nga Malaut nga natalana na sa impierno.

Sa sini gintawag kamo sang Dios paagi sa Maayong Balita nga amon ginwali sa inyo. Ginatawag niya kamo agod makaambit kamo sang himaya sang aton Ginoong Jesukristo. Gani, mga kautoran, magpakalig-on kamo kag hupti ninyo ang mga kamatuoran nga amon ginatudlo sa inyo, sa amon pagwali kag sa amon pagsulat.

Kabay nga ang aton Ginoong Jesukristo, kag ang Dios nga aton Amay, nga sa iya kaayo naghigugma kag naghatag sa aton sang walay katapusan nga paglipay kag mapag-on nga paglaum, magpuno sang inyo mga tagipusoon sing kaisog kag magpalig-on sa inyo sa paghimo sa gihapon kag sa paghambal sang tanan nga maayo.

SALMO SA PAGSABAT 96:10, 11-12, 13
(S) Ang GINOO magakari sa paghukom sang duta.

Isugid sa tanan nga mga kapungsoran, "Ang GINOO amo ang hari! Ang duta napahamtang sing malig-on kag indi mauyog; Sia magahukom sang mga katawohan sa katarungan. (S)

Magkasadya kamo, O langit kag duta! Magdaguhob ka, O dagat, kag ang tanan nga tinuga nga yara sa Imo; Magkasadya kamo, O mga latagon, kag ang tagsa ka butang nga yara sa inyo! (S)

Dayon ang mga kahoy sa kagulangan magahinugyaw sa kasadya sa atubangan sang GINOO, kay nagakari sia sa paggahom sang duta, Pagagamhan niya ang tanan nge mga katawohan sang kalibutan sa katarungan kag kamatuoran. (S)

Aleluya, aleluya! Ang pulong sang Dios buhi kag gamhanan, nga nagatungkad sang mga panghunahuna kag mga handom sang tagipusoon sang tawo. Aleluya, aleluya!

EBANGHELYO │ Mateo 23:23-26
Si Jesus nagsiling sa mga Fariseo, "Makaluluoy man kamo, mga manunodlo sang Kasugoan kag mga Fariseo! Mga hipokrito! Nagahatag kamo sa Dios sang ikanapulo nga bahin sang panakot subong sang tanglad, sang sibuyas sang luy-a, - pero ginapatumbayaan ninyo ang labing importante nga mga ginatudio sang Kasugoan, nga amo ang katarungan, kaluoy kag pagtuo. Amo ini ang inyo dapat buhaton, nga wala nagapatumbaya sang iban nga mga kasuguan. Mga bulag nga manugtuytoy! Ginasala ninyo ang mga sapatsapat sa inyo ilimnon, pero ginatulon ninyo ang kamelyo!

"Makaluluoy man kamo nga manunodlo sang Kasugoan kag mga Fariseo! Mga hipokrito! Ginatinluan ninyo ang sa gwa sang inyo baso kag sang pinggan, pero ang sulod sini puno sang mga butang nga inyo nakuha paagi sa palugos kag kahakog. Mga Bulag nga Fariseo! Tinloi anay ang sulod sang baso, kag ang sa gwa magatinlo man!

23/08/2026

AGOSTO 24 – SAN BARTOLOME, Apostol

BALASAHON │ Bugna 21:9-14
Ang isa sang pito ka mga anghel nga may pito ka mga yahong nga puno sang pito ka katapusan nga mga kalalat-an nagpalapit sa akon kag nagsiling, "Dali ka, kag ipakita ko sa imo ang Nobya, ang asawa sang Kordero." Gingamhan ako sang Espiritu, kag gindala ako sang anghel sa putokputokan sang mataas kaayo nga bukid. Ginpakita niya sa akon ang Jerusalem, ang Balaan nga Siudad, nga nagakunsad halin sa langit gikan sa Dios, nga nagabanaag sang kapawa sang presensya sang Dios. Ang siudad nagabanaag kaangay sang malahalon nga bato, kaangay sang haspe, nga matin-aw subong sang Kristal. Ginalibutan ini sang daku kag mataas nga pader, nga may dose ka mga pwerta, kag ginabantayan sang dose ka mga anghel. Sa mga pwerta nasulat ang mga ngalan sang dose ka mga tribo sang Israel. May tatlo ka mga pwerta sa tagsa ka kilid: tatlo sa sidlangan, tatlo sa nabagatnan, tatlo sa aminhan, kag tatlo sa nakatundan. Ang pader sang siudad napasad sa dose ka mga bato, nga nasulatan sang mga ngalan sang dose ka mga apostoles sang Kordero.

SALMO SA PAGSABAT 145:10-11, 12-13, 17-18
(S) Ang tanan mo nga mga Santos, O Ginoo, makahibalo sang mahimayaon pagkahalangdon sang imo ginharian.

Ang tanan mo nga mga tinuga, O GINOO, magadayaw sa imo, kag ang tanan mo nga mga tawo magapasalamat sa imo. Magahambal sila sang himaya sang imo ginharian, kag magasugid sila sang imo gahom. (S)

Agod ang tanan nga mga tawo makahibalo sang imo gamhanan nga mga buhat, kag sang mahimayaon nga pagkahalangdon sang imo ginharian. Ang imo ginharian wala sing katapusan, kag ikaw hari sa walay katubtoban. Ang GINOO matutom sa iya mga ginsaad, kag maluloy-on sa tanan nga iya ginahimo. (S)

Ang GINOO matarong sa tanan nga iya ginahimo, maluloy-on sa tanan niya nga mga binuhatan. Malapit sia sa tanan nga nagapanawag sa iya, nga nagapanawag sa iya sing maminatud-on. (S)

Aleluya, aleluya! Manunudlo, ikaw amo ang Anak sang Dios! Ikaw amo ang hari sang Israel. Aleluya, aleluya!

EBANGHELYO │ Juan 1:45-51
Ginpangita ni Felipe si Natanael, kag ginsugiran sia, "Nakita namon ang tawo nga gintumod ni Moises sa iya ginsulat sa libro sang Kasugoan, nga nahanungod sa iya ang mga propeta nagsulat man. "Sia amo si Jesus nga anak ni Jose nga taga-Nazaret."

Si Natanael nagpamangkot, "May maayo bala nga butang nga magagikan sa Nazaret?

Si Felipe nagsabat, "Dali ka kag tan-awa."

Sang makita ni Jesus si Natanael nga nagapadulong sa iya nagsiling sia nahanungod sa iya, "Yari ang isa ka matuod-tuod nga Israelinhon; wala sia nagadinaya!"

Si Natanael nagpamangkot sa iya, "Paano mo ako nakilala?"

Si Jesus nagsabat, "Nakita ko na ikaw didto sa idalom sang kahoy nga higera, sa wala pa ikaw gintawag ni Felipe."

Nagsabat si Natanael, "Manunodlo, ikaw amo ang Anak sang Dios! Ikaw amo ang Hari sang Israel!"

Nagsiling si Jesus, "Nagatuo bala ikaw tungod kay nagsiling ako sa imo nga nakita ko ikaw sang didto ka sa idalom sang kahoy nga higera? Mas dalagku pa gid sini nga mga butang ang imo makita!" Kag si Jesus nagsiling sa ila, "Matuod gid, makita ninyo ang langit nga nabuksan kag ang mga anghel sang Dios nga nagapasaka-panaog sa ibabaw sang Anak sang Tawo!"

23/08/2026

AGOSTO 23 – IKA-21 NGA DOMINGO SANG TUIG

NAHAUNA NGA BALASAHON │ Isaias 22:19-23
Ang GINOO nagsiling kay Sibna nga pangulo sang templo: "Pahalinon ka sang GINOO sa imo obra, kag kuhaon ka sa imo mataas nga palangakuan!"

Kon mahanabo ini, ipadala ko ang akon alagad nga si Eliaquim nga anak ni Helkias. Ipasuksok ko sa iya ang imo kapa kag ihatag ko sa iya ang tanan nga kagamhanan nga imo anay sang una. Manginkaangay sia sang amay sa mga tawo sang Jerusalem kag Juda. Hatagan ko sia sing bug-os nga kagamhanan sa idalom sang hari, ang kaliwat ni David. Sia ang magauyat sang mga yabi sang opisina; ang iya abrihan wala sing may magasira, kag ang iya masirhan wala sing magaabri. Akon sia palig-unon kaangay sang palpal, kag magahatag sia sing kadungganan sa bug-os niya nga panimalay.

SALMO SA PAGSABAT 138:1-2, 2-3, 6, 8
(S) O GINOO, ang imo gugma nagapadayon sa walay katapusan. Tapusa ang hilikuton nga imo ginsugoran.

Nagapasalamat ako sa imo, O GINOO, sa bug-os ko nga tagipusoon; nagakanta ako sing pagdayaw sa imo atubangan sang mga dios. Nagaduko ako sa atubangan sang imo balaan nga Templo kag nagadayaw sang imo ngalan. (S)

Tungod sang imo mapinadayunon nga gugma kag katutom, tungod kay nagpahayag ka nga ang imo ngalan kag ang imo mga sugo labaw sa tanan. Ginsabat mo ako sang nagpanawag ako sa imo; ginpabakod mo ako sang imo kusog. (S)

Bisan pa nga ikaw yara sa kahitaasan, nagakabalaka ka sa mga kubos, kag ang mga bugalon indi makapanago sa imo. (S)

Tumanon mo ang tanan nga imo ginsaad sa akon, O GINOO, ang imo gugma nagapadayon sa walay katapusan. Tapusa ang hilikuton nga imo ginsugoran. (S)

IKADUHA NGA BALASAHON │ Roma 11:33-36
Daw ano kadamo ang kamanggaran sang Dios! Daw ano kadalom sang iya kaalam kag ihibalo! Sin-o bala ang makasaysay sang iya mga paghukom? Sin-o bala ang makahangop sang iya mga paagi? Ang kasulatan nagasiling:

"Sin-o bala ang makahibalo sang hunahona sang Ginoo? Sin-o bala ang makalaygay sa iya?

Sin-o bala ang may ginhatag sa Dios, nga ang Dios dapat magbayad sa iya?"

Kay ang tanan nga mga butang naghalin sa Dios, kag ini tanan gintuga tungod sa iya kag para sa iya. Sa Dios ang kadungganan nga wala sing katapusan! Kabay pa.

Aleluya, aleluya! Ikaw si Pedro, "Ang Bato" kag sa sini nga bato pagatukoron ko ang akon simbahan. Bisan ang gahom sang kamatayon indi makadaog sa iya. Aleluya, aleluya!

ERANGHELYO │ Mateo 16:13-20
Nagkadto si Jesus sa kadutaan nga malapit sa banwa sang Cesarea Filipo sa diin nagpamangkot sia sa iya mga gintuton-an. "Sin-o bala ang Anak sang Tawo suno sa mga tawo?"

Nagsabat sila, "May nagasiling nga si Juan Bautista. May iban nga nagasiling nga si Elias kag may iban pa gid nga nagasiling, nga si Jeremias ukon iban nga mga propeta."

Nagpamangkot si Jesus sa ila, "Pero suno sa inyo, sin-o bala ako?"

Si Simon Pedro nagsabat, "Ikaw ang Kristo, ang Anak sang Dios nga buhi."

Si Jesus nagsabat, "Bulahan ka, Simon, anak ni Juan! Kay ini nga kamatuoran wala ginpahayag sa imo sang tawo, kundi sang akon Amay sa langit. Kag ako nagasiling sa imo, ikaw si Pedro nga kon sayuron Bato' kag sa sini nga bato pagatukuron ko ang akon iglesia. Bisan ang gahom sang kamatayon indi makadaog sa sini. Ihatag ko sa imo ang mga yabi sang Ginharian sang langit, kag kon ano ang imo ginadumilian sa duta pagadumilian man sa langit, kag kon ano ang imo ginatugotan sa duta, pagatugotan man sa langit.

Dayon nagpaandam si Jesus sa iya mga gintuton-an, nga indi nila pag-isugid sa kay bisan sin-o nga sia amo ang Kristo.

23/08/2026

MARRIAGE BANNS
August 23, 2026

22/08/2026

LIVE: ANG SANTOS NGA MISA
Agosto 23, 2026│7:30 AM
Ika-21 nga Domingo sang Tuig
LIVE from the Parish of San Nicolas de Tolentino
Cabatuan, Iloilo

22/08/2026

LIVE: YOUTH MASS
August 22, 2026│ 3:00 PM
21st Sunday in Ordinary Time
LIVE from the Parish of San Nicolas de Tolentino
Cabatuan, Iloilo