27/07/2026
ANG IYONG NAGING KATAPAT
(Edited-July 26, 2020)
Sa malayong dako ng Dupax Del Sur, tribung Isinay yan
Ika-27 ng Hulyo taong 1980, sa eksaktong araw na iyan
Dakong ika-apat ng umaga, uha'y aking naulinigan
Isang sanggol ang isinilang mula sa aking angkan
Malusog na sanggol ang tumambad sa aking harapan
Kulot at pulang pisngi na may biloy ang aking namasdan
Sa aking puso, ibayong tuwa't saya ang aking naramdaman
Sapagkat nailuwal ang isa pang tagapagmana ng aking pangalan
Omeng anak, sa araw na ito'y iyong kapanganakan
Tatlumpo't isang taon, ganda ng mundo'y iyong nasilayan
Samu't saring mga pangyayari ang iyong naranasan
At ang huli'y ang naganap sa Pikit na iyong pinagbuwisan
Tuwing sasapit ang araw na ito, isang bagay ang diko maiwasan
Ang alalahanin ang mga bagay na iyong naiwan sa aking isipan
Ang iukol sa amin ang iyong pansin kapalit ng sarling kapakanan
Sa hangaring maranasan namin ng iyong inay ang kasiyahan
Sa labing limang taon, muli kong isasabit ang iyong watawat
At sa maghapo'y amin itong pinagmamasdan at sinisiyasat
Na may pagtatanong "Ito ba anak ang iyong naging katapat?"
Dulot ng kaibigan mong may kakulangan ng sapat na pag-iingat
Sa nangyari'y puso ko'y umiiyak at labis na nagdaramdam
Subalit sa kabilang dako nama'y masaya't lungkot ko'y naparam
Nang malanan ko sa kasulatan ang tiyak mong pinatunguhan
Ang kapiling ng iyong Manlilikha sa langit na Kanyang kinaroroonan
Rev. Dr. Lorenzo N. De Guzman Jr. LPT, PhD.
