https://www.facebook.com/561512290625243/

St. Joseph Chapel -Sapang Putik, San Ildefonso,Bulacan, Sapang Putik, San Ildefonso, Bulacan (2026)

25/05/2026

𝐌𝐚𝐲𝐨 𝟐𝟔, 𝟐𝟎𝟐𝟔 | 𝐌𝐚𝐫𝐭𝐞𝐬 𝐧𝐠 𝐈𝐤𝐚-𝟖 𝐋𝐢𝐧𝐠𝐠𝐨 𝐬𝐚 𝐊𝐚𝐫𝐚𝐧𝐢𝐰𝐚𝐧𝐠 𝐏𝐚𝐧𝐚𝐡𝐨𝐧 (𝐈𝐈)

𝘗𝘢𝘨𝘨𝘶𝘯𝘪𝘵𝘢 𝘬𝘢𝘺 𝘚𝘢𝘯 𝘍𝘦𝘭𝘪𝘱𝘦 𝘕𝘦𝘳𝘪, 𝘱𝘢𝘳𝘪

📖 UNANG PAGBASA
1 Pedro 1, 10-16

Ang Salita ng Diyos mula sa unang sulat ni Apostol San Pedro

Mga pinakamamahal, tungkol sa kaligtasang ito, masusing nagsiyasat at nagsuri ang mga propetang humula sa kaloob na itong nakalaan sa inyo. Sinuri nila kung kailan at paano ito mangyayari. Ang panahong ito ang tinutukoy ng Espiritu ni Kristo na sumasakanila nang paunang ipahayag sa kanila ang hirap na titiisin ni Kristo at ang parangal na tatamuhin niya. Nang kanilang ipahayag ang mga katotohanang ito, ipinaunawa sa kanila ng Diyos na ang ginagawa nila’y sa kapakinabangan ninyo – at hindi sa kanila. Ang mga katotohanang ito’y narinig ninyo ngayon sa mga tagapangaral ng Mabuting Balita ng Diyos. Nagsalita sila sa inyo sa kapangyarihan ng Espiritu Santong sinugo sa kanila buhat sa langit. Ang mga katotohanang ito’y pinanabikang maunawaan ng mga anghel sa langit.

Kaya nga ihanda ninyo ang inyong mga isipan. Magpakatatag kayo at lubos na umasa sa pagpapalang tatamuhin ninyo kapag nahayag na si Hesukristo. Bilang mga anak, sundin ninyo ang Diyos at huwag ang masasamang hilig tulad ng ginagawa ninyo noong kayo’y wala pang tunay na pagkaunawa. Yamang ang Diyos na humirang sa inyo ay banal, dapat kayong magpakabanal anuman ang inyong ginagawa, ayon sa nasusulat: “Magpakabanal kayo, sapagkat ako’y banal.”

Ang Salita ng Diyos.

🙏 SALMONG TUGUNAN
Salmo 97, 1. 2-3ab. 3kd-4

Ang D’yos na rin ang naghayag
ng handog n’yang pagliligtas.

Umawit ng bagong awit at sa P**n ay ialay, pagkat yaong ginawa n’ya ay kahanga-hangang tunay!
Sa sariling lakas niya at taglay na kabanalan, walang hirap na natamo yaong hangad na tagumpay.

Ang D’yos na rin ang naghayag
ng handog n’yang pagliligtas.

Ang tagumpay niyang ito’y siya na rin ang naghayag, sa harap ng mga bansa’y nahayag ang pagliligtas.
Ang pangako sa Israel lubos niyang tinutupad.

Ang D’yos na rin ang naghayag
ng handog n’yang pagliligtas.

Tapat siya sa kanila at ang pag-ibig ay wagas.
Ang tagumpay ng ating Diyos kahit saan ay namalas!
Magkaingay na may galak, yaong lahat sa daigdig; Ang P**n ay buong galak na purihin sa pag-awit!

Ang D’yos na rin ang naghayag
ng handog n’yang pagliligtas.

🙏 ALELUYA
Mateo 11, 25

Aleluya! Aleluya!
Papuri sa Diyos Ama
pagkat ipinahayag n’ya
Hari s’ya ng mga aba.
Aleluya! Aleluya!

📜 MABUTING BALITA
Marcos 10, 28-31

Ang Mabuting Balita ng Panginoong ayon kay San Marcos

Noong panahong iyon, nagsalita si Pedro kay Hesus, “Tingnan po ninyo, iniwan namin ang lahat at kami’y sumunod sa inyo.” Sinabi ni Hesus, “Tandaan ninyo ito: ang sinumang mag-iwan ng bahay, o mga kapatid, ina, ama, mga anak, mga lupa, dahil sa akin at sa Mabuting Balita, ay tatanggap ng makasandaang ibayo sa buhay na ito – mga bahay, mga kapatid, mga ina, mga anak, at mga lupa – ngunit may kalakip na pag-uusig. At sa kabilang buhay ay magkakaroon ng buhay na walang hanggan. Ngunit maraming nauuna na magiging huli, at maraming nahuhuli na magiging una.”

Ang Mabuting Balita ng Panginoon.

🙏 PAGNINILAY

Sa sinabi ng Panginoong Hesus, tinitiyak niya sa atin na ang mga sakripisyo na ating ginagawa, ang ating pagiging bukas-loob, ang ating buhay-paglilingkod, ang paghahandog ng ating sarili para sa paghahari ng Diyos ay nakikita niyang lahat. Kung minsan, kapag may taong nangangailangan ng tulong, may mga kapatid tayo na kahit sapat lang sa kanyang pamilya kung ano ang mayroon siya, magbabahagi pa rin siya sa taong nangangailangan. Kung mayroon namang gawain sa parokya o sa ating lugar, kahit marami siyang tatapusin sa bahay ay iiwanan niya upang makatulong sa pamayanang gawain. O kahit na maglingkod sa maysakit nating magulang, o kapitbahay, iniiwan ng iba ang kanilang pamilya upang tulungan ang nangangailangan.
Walang gawain o saloobin natin na di alam ng Diyos. Kung di man mapansin ng iba ang ating mabuting ginagawa, kung walang pumupuri o nagpapasalamat sa atin, huwag pong sasama ang loob natin. Dahil ang Panginoon ang nakakaalam ng lahat. Sa totoo lang, hindi natin kailangan ang papuri ng ating kapwa. Sa iba’t ibang paraan tayo ay magkakaroon ng gantimpala. Maaaring hindi material na bagay kundi kapayapaan at galak ng puso, magandang relasyon sa kapwa at pamilya, at syempre pa, buhay na walang hanggan. Si San Felipe Neri po ay naglingkod nang may galak sa puso, at siya ay laging nagbibigay galak sa mga taong nakakaharap niya.
Ang mga pari, brothers at madre na iniwan ang pamilya para maglingkod ng lubos sa Diyos, dumarami ang aming ina, ama, mga kapatid na sumusuporta sa misyon ng Panginoon. Gayon din po kayong lahat na naglilingkod sa Diyos at sa kapwa, lahat po ng inyong gawain ay nakikita ng Panginoon at kayo ay gagantimpalaan niya.

Sr. Yolanda Dionisio, fsp | Daughters of St. Paul
Paulines Multimedia PH

24/05/2026

𝐌𝐚𝐲𝐨 𝟐𝟓, 𝟐𝟎𝟐𝟔 | 𝐏𝐚𝐠𝐠𝐮𝐧𝐢𝐭𝐚 𝐬𝐚 𝐌𝐚𝐡𝐚𝐥 𝐧𝐚 𝐁𝐢𝐫𝐡𝐞𝐧𝐠 𝐌𝐚𝐫𝐢𝐚, 𝐈𝐧𝐚 𝐧𝐠 𝐒𝐚𝐦𝐛𝐚𝐲𝐚𝐧𝐚𝐧

📖 UNANG PAGBASA
Genesis 3, 9-15. 20

Ang Salita ng Diyos mula sa aklat ng Genesis

Pagkakain ni Adan sa bunga ng puno, tinawag siya ng Panginoon at tinanong, “Saan ka naroon?” “Natakot po ako nang marinig ko kayong nasa hardin; nagtago po ako sapagkat ako’y hubad,” tugon ng lalaki. “Sinong may sabi sa iyong hubad ka?” tanong ng Diyos. “Bakit kumain ka ba ng bungang ipinagbabawal ko?” “Kasi, pinakain po ako ng babaing ibinigay ninyo sa akin,” tugon ng lalaki. “Bakit mo naman ginawa iyon?” tanong ng Diyos sa babae. “Mangyari po’y nilinlang ako ng ahas, kaya ako natuksong kumain,” tugon naman niya. At sinabi ng Panginoon sa ahas: “Sa iyong ginawa’y may parusang dapat, na tanging ikaw lang yaong magdaranas; ikaw ay gagapang, ang hatol kong gawad, at alikabok ang pagkaing dapat. Kayo ng babae’y laging mag-aaway, binhi mo’t binhi niya’y laging maglalaban. Ito ang dudurog ng ulo mong iyan, at ang sakong niya’y ikaw ang tutuklaw.” Eva ang itinawag ni Adan sa kanyang asawa, sapagkat ito ang ina ng sangkatauhan.

Ang Salita ng Diyos.

o kaya:
Mga Gawa 1, 12-14

Ang Salita ng Diyos mula sa Mga Gawa ng Mga Apostol

Pagkaakyat ni Hesus sa langit, ang mga apostol ay nagbalik sa Jerusalem buhat sa Bundok ng mga Olibo, na halos isang kilometro ang layo. Ang mga ito’y sina Pedro, Juan, Santiago, Andres, Felipe, Tomas, Bartolome, Mateo, Santiago na anak ni Alfeo, si Simon, ang Makabayan, at si Judas na anak ni Santiago. Pagdating sa kanilang tinutuluyan sa lungsod, nagtuloy sila sa silid sa itaas. Lagi silang nagsasama-sama sa pananalangin, kasama ang mga babae at si Mariang ina ni Hesus, gayun din ang mga kapatid ni Hesus.

Ang Salita ng Diyos.

🙏 SALMONG TUGUNAN
Salmo 87, 1-2. 3. at 5, 6-7.

Dinggin ang ulat sa inyong mabuting bagay,
O lungsod ng Diyos.

Sa Bundok ng Sion, itinayo ng Diyos ang banal na lungsod, ang lungsod na ito’y higit niyang mahal sa alinmang bayan ng angkan ni Jacob.

Dinggin ang ulat sa inyong mabuting bagay,
O lungsod ng Diyos.

Kaya’t iyong dinggin ang ulat sa iyong mabubuting bagay, O lungsod ng Diyos.
At tungkol sa Sion, yaong sasabihin’y, “Ang lahat ng bansa ay masasakupan, siya’y palalakasin at patatatagin ng Kataas-taasan.”

Dinggin ang ulat sa inyong mabuting bagay,
O lungsod ng Diyos.

Ang P**n ay gagawa, ng isang talaan ng lahat ng taong doo’y mamamayan, ang lahat ng ito ay magsisiawit at pawang sasayaw.

Dinggin ang ulat sa inyong mabuting bagay,
O lungsod ng Diyos.

🙏 ALELUYA

Aleluya, Aleluya!
Birheng Mariang mapalad,
dapat magpuri ang lahat
sa iyo at sa ‘yong Anak.
Aleluya, Aleluya!

📜 MABUTING BALITA
Juan 19, 25-34

Ang Mabuting Balita ng Panginoon ayon kay San Juan

Noong panahong iyon: Nakatayo sa tabi ng krus ni Hesus ang kanyang ina at ang kapatid na babae nitong si Maria, na asawa ni Cleopas. Naroon din si Maria Magdalena. Nang makita ni Hesus ang kanyang ina, at ang minamahal niyang alagad sa tabi nito, kanyang sinabi, “Ginang, narito ang iyong anak!” At sinabi sa alagad, “Narito ang iyong ina!” Mula noon, siya’y pinatira ng alagad na ito sa kanyang bahay.

Alam ni Hesus na naganap na ang lahat ng bagay; at bilang katuparan ng Kasulatan ay sinabi niya, “Nauuhaw ako!” May isang mangkok doon na puno ng maasim na alak. Itinubog nila rito ang isang espongha, ikinabit sa sanga ng isopo at idiniit sa kanyang bibig. Nang masipsip ni Hesus ang alak ay kanyang sinabi, “Naganap na!” Iniyukayok niya ang kanyang ulo at nalagot ang kanyang hininga.

Noo’y Araw ng Paghahanda, at ayaw ng mga Judio na manatili sa krus ang mga bangkay sa Araw ng Pamamahinga sapagkat dakila raw ang araw ng Pamamahingang ito. Kaya’t hiniling nila kay Pilato na ipabali nito ang mga binti ng mga ipinako sa krus, at alisin doon ang mga bangkay. Naparoon nga ang mga kawal at binali ang mga binti ng dalawang ipinakong kasabay ni Hesus. Ngunit pagdating nila kay Hesus at makitang patay na siya, hindi na nila binali ang kanyang binti. Subalit inulos ng sibat ng isa sa mga kawal ang tagiliran ni Hesus, at biglang dumaloy ang dugo at tubig.

Ang Mabuting Balita ng Panginoon.

🙏 PAGNINILAY

“Ang hirap ng buhay!” Ilang ulit na ba nating narinig, o mismong nasabi, ang hinaing na ito? Kung may isang mahalagang aral na itinuturo sa atin ng ebanghelyo ngayon, ito ang pag-uugali ni Maria sa gitna ng sakit at pighati. Ayon sa ebanghelyo, nanatiling tahimik si Maria sa paanan ng krus ni Hesus. Bilang Ina, dama niya ang matinding paghihirap ng kanyang Anak. Ngunit bilang taong may malalim na pananampalataya, pinili niyang magtiwala sa tapat na pag-ibig ng Diyos, kahit hindi niya lubos na nauunawaan ang nangyayari.

Mga kapanalig, bilang mga miyembro ng Simbahan ni Kristo, nawa’y matutuhan din natin ang lakas ng loob at tibay ng pananampalataya ni Maria. Sa gitna ng unos at pighati, huwag tayong magpadaig sa bugso ng damdamin. Iwasan ang padalos-dalos na pasya. Huwag agad magreklamo. Matuto tayong manahimik. At sa ating katahimikan, nawa’y maipahayag natin, tulad ni Maria, ang isang pusong matatag, nagtitiwala, at tapat na umaasa sa Diyos. Amen.

Fr. John Klen Malificiar, ssp | Society of Saint Paul
Paulines Multimedia PH

23/05/2026

𝐌𝐚𝐲𝐨 𝟐𝟒, 𝟐𝟎𝟐𝟔 𝐈 𝐋𝐢𝐧𝐠𝐠𝐨 𝐧𝐠 𝐏𝐞𝐧𝐭𝐞𝐤𝐨𝐬𝐭𝐞𝐬 (𝐀)

📖 UNANG PAGBASA
Mga Gawa 2, 1-11

Ang Salita ng Diyos mula sa Mga Gawa ng Mga Apostol

Nang sumapit ang araw ng Pentekostes, nagkatipon silang lahat sa isang lugar. At biglang narinig ang isang ugong mula sa langit, animo’y hagunot ng malakas na hangin, at napuno nito ang bahay na kinaroroonan nila. May nakita silang wari’y mga dilang apoy na lumapag sa bawat isa sa kanila. At silang lahat ay napuspos ng Espiritu Santo at nagsalita ng iba’t ibang wika, ayon sa ipinagkaloob sa kanila ng Espiritu.

May mga Judiong buhat sa iba’t-ibang bansa, na naninirahan noon sa Jerusalem, mga taong palasamba sa Diyos. Nang marinig ang ugong na ito, nagdatingan ang maraming tao. Namangha sila sapagkat sinasalita ng mga alagad ang mga wika nila. Sa kanilang pagtataka ay kanilang nasabi, “Hindi ba Galileo silang lahat? Bakit ang atin-ating katutubong wika ang naririnig natin sa kanila? Tayo’y mga taga-Partia, mga taga-Media, mga taga-Elam; mga naninirahan sa Mesopotamia, sa Judea at sa Capadocia sa Ponto, at sa Asia. Mayroon pa sa ating taga-Frigia at Panfilia, Egipto at sa mga saklaw ng Libia na sakop ng Cirene, at mga nakikipanirahan mula sa Roma, maging mga Judio at mga naakit sa Judaismo. May mga taga-Creta at Arabia pa rito. Paano sila nakapagsasalita sa ating-ating wika tungkol sa mga kahanga-hangang gawa ng Diyos.”

Ang Salita ng Diyos.

🙏 SALMONG TUGUNAN
Salmo 103, 1ab at 24ak. 29bk-30. 31 at 34

Espiritu mo’y suguin,
P**n, tana’y ‘yong baguhin.

Pinupuri ka P**ng Diyos nitong aking kaluluwa, O Panginoong Diyos, kay dakila mong talaga!
Sa daigdig ikaw roon, kay rami ng iyong likha.
Sa daming nilikha mo’y nalaganapan ang lupa.

Espiritu mo’y suguin,
P**n, tana’y ‘yong baguhin.

Natatakot mangamata’y kung kitlin mo ang hininga; mauuwi sa alabok, pagkat doon mula sila.
Taglay mo ang Espiritu upang buhay ay ibalik, bagumbuhay ay dulot mo sa nilikha sa daigdig.

Espiritu mo’y suguin,
P**n, tana’y ‘yong baguhin.

Sana ang ‘yong karangala’y manatili kailanman, sa lahat ng iyong likha ang madama’y kagalakan.
Ang awit ng aking puso sana naman ay kalugdan, habang aking inaawit ang papuri sa Maykapal.

Espiritu mo’y suguin,
P**n, tana’y ‘yong baguhin.

📖 IKALAWANG PAGBASA
1 Corinto 12, 3b-7. 12-13

Ang Salita ng Diyos mula sa unang sulat ni Apostol San Pablo sa mga taga-Corinto

Mga kapatid:
Hindi masasabi ninuman, “Panginoon si Hesus,” kung hindi siya pinapatnubayan ng Espiritu Santo.

Iba’t iba ang kaloob, ngunit iisa lamang ang Espiritung nagkakaloob ng mga ito. Iba’t iba ang paraan ng paglilingkod, ngunit iisa lamang ang Panginoong pinaglilingkuran. Iba’t iba ang mga gawain ngunit iisa lamang ang Diyos na sumasalahat ng taong gumagawa ng mga iyon. Ang bawat isa’y binigyan ng kaloob na naghahayag na sumasakanya ang Espiritu, para sa ikabubuti ng lahat.

Sapagkat si Kristo’y tulad ng isang katawan na may maraming bahagi; bagamat binubuo ng iba’t ibang bahagi, iisa pa ring katawan. Tayong lahat, maging Judio o Griego, alipin man o malaya, ay bininyagan sa iisang Espiritu upang maging isang katawan. Tayong lahat ay pinainom sa isang Espiritu.

Ang Salita ng Diyos.

🙏 AWIT TUNGKOL SA MABUTING BALITA

Halina, Espiritu,
sa sinag buhat sa ‘yo
kami’y liwanagan mo.

Ama ng maralita,
dulot mo’y pagpapala
upang kami’y magkusa.

Kaibiga’t patnubay,
sa amin mananahan
ang tamis ng ‘yong buhay.

Ginhawang ninanais,
lilim namin sa init,
kapiling bawat saglit.

Lubhang banal na ilaw,
kami’y iyong silayan
ngayon at araw-araw.

Kapag di ka nanahan
ay walang kaganapan
ang buhay nami’t dangal.

Marumi’y palinisin,
lanta’y panariwain,
sakit nami’y gamutin.

Kami’y gawing matapat,
sa pag-ibig mag-alab,
lagi sa tamang landas.

Tugunin aming luhog,
kami’y bigyang malugod
ng ‘yong pitong kaloob.

Gantimpala’y ibigay,
sa hantungan ng buhay
ligayang walang hanggan.

🙏 ALELUYA

Aleluya! Aleluya!
Espiritung aming Tanglaw,
kami’y iyong liwanagan
sa ningas ng pagmamahal.
Aleluya! Aleluya!

📜 MABUTING BALITA
Juan 20, 19-23

Ang Mabuting Balita ng Panginoon ayon kay San Juan

Kinagabihan ng Linggo ding iyon, ang mga alagad ay nagkakatipon. Nakapinid ang mga pinto ng bahay na kanilang pinagtitipunan dahil sa takot nila sa mga Judio. Dumating si Hesus at tumayo sa gitna nila. “Sumainyo ang kapayapaan!” sabi niya. Pagkasabi nito, ipinakita niya ang kanyang mga kamay at ang kanyang tagiliran. Tuwang-tuwa ang mga alagad nang makita ang Panginoon. Sinabi na naman ni Hesus, “Sumainyo ang kapayapaan! Kung paanong sinugo ako ng Ama, gayun din naman, sinusugo ko kayo.” Pagkatapos, sila’y hiningahan niya at sinabi, “Tanggapin ninyo ang Espiritu Santo. Ang patawarin ninyo sa kanilang mga kasalanan ay pinatawag na nga; ang hindi ninyo patawarin ay hindi nga pinatawad.”

Ang Mabuting Balita ng Panginoon.

🙏 PAGNINILAY

Noong Linggo o kaya noong Huwebes (sa mga ilang bahagi ng Estados Unidos), ipinagdiwang natin ang Dakilang Kapistahan ng Pag-akyat ng Panginoon sa Langit. Isinagawa rin natin ang Nobena sa Banal na Espiritu Santo. Ito ang pinakamatandang nobena na ipinagdasal ng mga Kristiyano sapagkat pinaniniwalaan na ito ang ipinagdasal ng Mahal na Birheng Maria at ng mga apostol bilang paghahanda sa pagdating ng Espiritu Santo sa Araw ng Pentekostes noong ika-24 ng Mayo, 33 A.D. Nang bumaba sa kanila ang Espiritu Santo, ipinanganak na ang ating Simbahang Katolika. Ang ating Simbahan ay itinatag ng Panginoong Hesus tatlong taon bago ang kanyang kamatayan, at si San Pedro ang giwang kauna-unahang Santo Papa. Pagkatapos ng pangyayari na ito, ipinahayag ni San Pedro at ng mga Apostol sa maraming mga Hudyo na ang ating Panginoong Hesukristo ay hindi patay ngunit muling nabuhay. Dahil sa Espiritu Santo, naging matatag ang ating Simbahan tungkol sa ating Kristiyanong pananampalataya. Kaya nga ang pangyayaring ito ay tumupad sa Misteryong Paskwal at ang Dakilang Kapistahang ito ay tinatapos ang Panahon ng Pasko ng Muling Pagkabuhay. Ang Espiritu Santo ay ang ikatlong persona sa Banal na Santatlo. Sa kwento ng simula ng Aklat ng Genesis, nilikha ng Diyos ang lalaki at babae at ang mga ito ay hiningahan niya. Itong paghinga ay tinatawag na ‘ruah,’ sa salitang Griyego na may ibig sabihin na “hininga ng buhay”. Kaya nga, kinakanta ngayon ang “Breath of God” na isinulat ni Edwin Hatch, na iniwasto ni Padre Manoling Francisco, SJ, at kinanta ng Bukas Palad Music Ministry. Noong muling nabuhay si Hesus at nagpakita sa kanyang mga apostol, hiningahan niya sila ng Espiritu Santo, gaya ng ginawa ng Ama noong Paglikha ng sanlibutan. Ito yung ‘hangin’ na sinasabi niya kay San Nicodemo, isang Pariseo na naging kaibigan ng ating Panginoon, na dapat tayo ay ipinanganak na muli sa Espiritu sa pamamagitan ng pagdarasal sa Espiritu Santo. Maraming mga simbolo, mga kaloob at mga bunga ng Espiritu Santo ang maaaring lang sabihin na si Hesus ang Panginoon ayon sa ating Ikalawang Pagbasa ngayon. Dahil sa Espiritu Santo na isinugo ng Ama at ng Anak, binigyan ang mga apostol, sa mga unang Kristiyano, mula sa nakaraan hanggang sa ating ngayon ng buhay. Bilang pagtanggap ng Espiritu sa mga Sakramento ng Binyag at Kumpil, tinatawag tayo bilang mga anak ng Diyos, na nagpapahayag ng Mabuting Balita sa isa’t isa. Sa ating pagtatapos ng daan ng Pasko ng Muling Pagkabuhay, ating ipahayag ang Mabuting Balita ng buhay at pag-asa sa iba at magdasal sa Espiritu Santo na patnubayan niya ang lahat ng mga tao.

22/05/2026

𝐌𝐚𝐲𝐨 𝟐𝟑, 𝟐𝟎𝟐𝟔 𝐈 𝐒𝐚𝐛𝐚𝐝𝐨 𝐬𝐚 𝐈𝐤𝐚-𝟕 𝐋𝐢𝐧𝐠𝐠𝐨 𝐧𝐠 𝐏𝐚𝐬𝐤𝐨 𝐧𝐠 𝐏𝐚𝐠𝐤𝐚𝐛𝐮𝐡𝐚𝐲

📖 UNANG PAGBASA
Mga Gawa 28, 16-20. 30-31

Ang Salita ng Diyos mula sa Mga Gawa ng Mga Apostol

Pagdating namin sa Roma, si Pablo’y pinahintulutang umupa ng sariling tirahan kasama ang isang kawal na pinakatanod niya.

Makaraan ang tatlong araw, inanyayahan ni Pablo sa isang pulong ng mga pangunahing Judio sa lungsod. Nang magkatipon na sila, sinabi niya, “Mga kapatid, bagamat wala akong ginawa laban sa ating bansa o sa mga kaugalian ng ating mga ninuno, hinuli ako sa Jerusalem at isinakdal sa kinatawan ng pamahalaang Romano. Matapos akong litisin, ako sana’y palalayain na sapagkat wala naman akong ginawa na dapat parusahan ng kamatayan. Ngunit tumutol ang mga Judio, kaya’t napilitan akong dumulog sa Emperador, bagamat wala akong sakdal laban sa ating mga kababayan. Nagagapos ako ng tanikalang ito dahil kay Hesus, ang pag-asa ng Israel. Iyan ang dahilan kung bakit hiniling kong makausap kayo.”

Humigit-kumulang sa dalawang taong nanirahan si Pablo sa Roma, sa bahay na kanyang inuupahan, at tinanggap niya ang lahat ng nagsadya sa kanya. Hayagan at walang sagabal na nangangaral siya tungkol sa paghahari ng Diyos at sa Panginoong Hesukristo.

Ang Salita ng Diyos.

🙏 SALMONG TUGUNAN
Salmo 10, 4. 5 at 7

P**n, ang mga mabuti
ay kapiling mo parati.

Ang Panginoong Diyos ay matatagpuan sa banal na templo, at doon naman sa mataas na langit, naroon ang trono; at magbuhat doon ay pinagmamasdan ang lahat ng tao, walang maliligid anuman ang gawin ng lahat ng ito.

P**n, ang mga mabuti
ay kapiling mo parati.

Lahat ng mabuti pati ang masama ay sinisiyasat, namumuhing lubos siya sa suwail na wala nang batas.
Ang P**n ay tapat, sa gawang mabuti siya’y nalulugod at sa piling niya, mabubuhay silang sa kanya’y sumunod.

P**n, ang mga mabuti
ay kapiling mo parati.

🙏 ALELUYA
Juan 16, 7. 13

Aleluya! Aleluya!
Espiritung isusugo
totoo ang ituturo,
pangako ni Kristong G**o.
Aleluya! Aleluya!

📜 MABUTING BALITA
Juan 21, 20-25

Ang Mabuting Balita ng Panginoon ayon kay San Juan

Noong panahong iyon, lumingon si Pedro at nakita niyang sumusunod ang alagad na minamahal ni Hesus – yaong humilig sa dibdib ni Hesus nang sila’y naghahapunan at nagtanong, “Panginoon, sino po ang magkakanulo sa inyo?” Nang makita siya ni Pedro, tinanong nito si Hesus, “Panginoon, ano po naman ang mangyayari sa taong ito?” Sumagot si Hesus, Kung ibig kong mabuhay siya hanggang sa pagbabalik ko, ano sa iyo? Sumunod ka sa akin!” Kumalat sa mga kapatid ang balitang hindi mamamatay ang alagad na ito, bagamat hindi sinabi ni Hesus na hindi siya mamamatay, kundi, “Kung ibig kong mabuhay siya hanggang sa pagbabalik ko, ano sa iyo?”

Ito nga ang alagad na nagpapatotoo tungkol sa mga bagay na ito; siya rin ang sumulat ng mga ito, at alam naming tunay ang kanyang patotoo.

At marami pang ginawa si Hesus na kung susulating lahat, inaakala kong hindi magkakasya kahit sa buong daigdig ang mga aklat na masusulat.

Ang Mabuting Balita ng Panginoon.

🙏 PAGNINILAY

Mga ka-shepherd Magandang gabi po sa inyong lahat, nais ko pong ibahagi sa inyo ang aking maikling pagninilay at mga aral na aking natutunan sa Mabuting Balita mula sa Juan 21:20-25, ito na rin po ang huling bahagi ng Ebanghelyo ayon kay San Juan.

Dito po makikita ang pagtatagpo nina Jesus, Pedro, at ng mga “alagad na minamahal” (si Juan) na sumasalamin sa isang napakahalagang ugali ng tao, ang madalas na pagkumpara ng sariling buhay at tadhana sa iba. Nang tanungin po ni Pedro si Jesus kung ano ang mangyayari kay Juan, sinagot siya ni Jesus ng isang diretsahang paalala, “Kung ibig kong siya’y manatili hanggang sa aking pagbabalik, ano sa iyo? Sumunod ka sa akin!”

Kaya naman po sa pagninilay natin dito, ipinapaalala po sa atin ni Jesus na ang pagsubaybay sa Kaniya ay isang personal na tawag. Minsan o madalas, nawawalan tayo ng kapayapaan dahil tinitingnan natin ang buhay ng iba, kung bakit tila mas madali ang buhay nila, mas kaunti ang kanilang pagdurusa, o mas mabilis ang kanilang tagumpay. Ngunit alalahanin natin na ang paalala po ni Jesus kay Pedro ay paalala rin sa atin sa kasalukuyan.

Kaya naman ang mahahalagang aral na nakuha natin dito ay UNA, dapat nating iwasan ang Pagkumpara sa Kapwa, Ang plano po ng Diyos sa bawat tao ay natatangi. Ang pagkumpara natin ng espirituwal na lakbayin o takbo ng buhay sa iba ay nagdadala lamang ng inggit o panghihina ng loob, so dapat focus tayo sa sariling ugnayan sa Diyos. Bukod ito ang Personal na Tawag, “Sumunod ka sa akin!”, Ito po ang pinakahuling utos ni Jesus sa Ebanghelyo ni Juan. Kaya anuman po ang mangyari sa paligid natin, o anuman ang tadhana ng ibang tao, ang tanging tungkulin natin ay panatilihin natin ang katapatan sa pagsunod kay Kristo. Pang-huli, Ang Buhay ni Jesus ay Higit sa Kayang Isulat, Binanggit po sa dulo na kung isusulat ang lahat ng ginawa ni Jesus, hindi po sapat ang buong mundo para sa mga aklat. Ipinapakita po nito na ang kilos at himala ng Diyos ay patuloy na nagaganap sa ating buhay araw-araw, lampas pa sa mga nakasulat sa kasaysayan. Amen.

Bro. Harrel M. Paycana
SLS Shepherding Tribe Santa Rosa
Awit at Papuri Communications

21/05/2026

𝐌𝐚𝐲𝐨 𝟐𝟐, 𝟐𝟎𝟐𝟔 𝐈 𝐁𝐢𝐲𝐞𝐫𝐧𝐞𝐬 𝐬𝐚 𝐈𝐤𝐚-𝟕 𝐋𝐢𝐧𝐠𝐠𝐨 𝐧𝐠 𝐏𝐚𝐬𝐤𝐨 𝐧𝐠 𝐏𝐚𝐠𝐤𝐚𝐛𝐮𝐡𝐚𝐲

𝘗𝘢𝘨𝘨𝘶𝘯𝘪𝘵𝘢 𝘬𝘢𝘺 𝘚𝘢𝘯𝘵𝘢 𝘙𝘪𝘵𝘢 𝘯𝘨 𝘊𝘢𝘴𝘤𝘪𝘢, 𝘯𝘢𝘮𝘢𝘯𝘢𝘵𝘢 𝘴𝘢 𝘋𝘪𝘺𝘰𝘴

📖 UNANG PAGBASA
Mga Gawa 25, 13b-21

Ang Salita ng Diyos mula sa Mga Gawa ng Mga Apostol

Noong mga araw na iyon, dumating sa Cesarea si Haring Agripa at si Berenice upang bumati kay Festo. Nang matagal-tagal na sila roon, inilahad ni Festo sa hari ang tungkol kay Pablo. “Si Felix ay may iniwan ditong isang bilanggo,” wika niya. “Nang ako’y nasa Jerusalem, isinakdal siya sa akin ng mga punong saserdote at ng matatanda ng mga Judio at hininging parusahan siya. Sinagot ko sila na hindi ugali ng mga Romano ang magparusa sa sinumang nasasakdal nang hindi muna nagkakaharap ang magkabilang panig, at nagkakaroon ng pagkakataong makapagtanggol sa sarili ang nasasakdal. Kaya’t nang dumating sila rito, hindi na ako nag-aksaya ng panahon; kinabukasan din, ipinatawag ko sa hukuman ang taong iyon. Nang magkaharap-harap sila, siya nama’y hindi nila ipinagsakdal sa anumang mabigat na pagkakasala na inaakala kong ipararatang nila. Ang pinagtatalunan lang nila ay tungkol sa kanilang relihiyon at sa isang taong ang pangala’y Hesus. Patay na ang taong ito, ngunit ipinipilit naman ni Pablo na siya’y buhay. Hindi ko malaman kung ano ang gagawin sa bagay na ito kaya’t tinanong ko siya kung ibig niyang sa Jerusalem siya litisin. Ngunit tumutol si Pablo at hiniling na ipaubaya sa Emperador ang pagpapasiya sa kanyang usapin. Kaya’t pinabantayan ko siya upang ipadala sa Emperador.”

Ang Salita ng Diyos.

🙏 SALMONG TUGUNAN
Salmo 102, 1-2. 11-12. 19-20ab

Panginoo’y may luklukang
>matatag sa kalangitan.

Panginoo’y papurihan, purihin mo, kaluluwa, ang pangalan niyang banal purihin mo sa tuwina.
Ikaw, aking kaluluwa, ang Diyos ay papurihan, at huwag mong lilimutin yaong kanyang kabutihan.

Panginoo’y may luklukang
matatag sa kalangitan.

Ang agwat ng lupa’t langit, sukatin ma’y hindi kaya, gayun ang pag-ibig ng Diyos, sa may takot sa kanya.
Ang silangan at kanluran kung gaano ang distansya
gayung-gayun ang pagtingin sa sinumang nagkasala.

Panginoo’y may luklukang
matatag sa kalangitan.

Ang P**n nga ang nagtayo ng trono sa kalangitan; mula doon, sa nilikha’y maghaharing walang hanggan.
O purihin ninyo siya, kayong mga anghel ng Diyos, kayong mga nakikinig at sa kanya’y sumusunod!

Panginoo’y may luklukang
matatag sa kalangitan.

🙏 ALELUYA
Juan 14, 26

Aleluya! Aleluya!
Espiritu’y magtuturo
ng aral at pagkukuro
ni Hesus na ating G**o.
Aleluya! Aleluya!

📜 MABUTING BALITA
Juan 21, 15-19

Ang Mabuting Balita ng Panginoon ayon kay San Juan

Nang muling napakita si Hesus sa mga alagad niya at nang makakain sila, tinanong ni Hesus si Simon Pedro, “Simon, anak ni Juan, iniibig mo ba ako nang higit kaysa mga ito?” “Opo, Panginoon, nalalaman ninyong iniibig ko kayo,” tugon niya. Sinabi sa kanya ni Hesus, “Pakanin mo ang aking mga batang tupa.” Muli siyang tinanong ni Hesus, “Simon, anak ni Juan, iniibig mo ba ako?” Sumagot si Pedro, “Opo, Panginoon, nalalaman niyong iniibig ko kayo.” Ani Hesus, “Pangalagaan mo ang aking mga tupa.” Pangatlong ulit na tinanong siya ni Hesus, “Simon, anak ni Juan, iniibig mo ba ako?” Nalungkot si Pedro, sapagkat makaitlo siya tinanong: “Iniibig mo ba ako?” At sumagot siya, “Panginoon, nalalaman po ninyo ang lahat ng bagay; nalalaman ninyong iniibig ko kayo.” Sinabi sa kanya ni Hesus, “Pakanin mo ang aking mga tupa. Tandaan mo: noong kabataan mo pa, ikaw ang nagbibihis sa iyong sarili at lumalakad ka kung saan mo ibig. Ngunit pagtanda mo, iuunat mo ang iyong mga kamay at iba ang magbibihis sa iyo at dadalhin ka kung saan hindi mo ibig.” Sinabi niya ito upang ipakilala kung paano mamamatay si Pedro at sa gayo’y mapararangalan niya ang Diyos. Pagkatapos, sinabi sa kanya ni Hesus, “Sumunod ka sa akin!”

Ang Mabuting Balita ng Panginoon.

🙏 PAGNINILAY

Kapanalig, naranasan mo na bang makagawa ng kasalanan sa isang tao at kailangan mong bumawi upang mawala ang galit sa iyo? Sa ating Mabuting Balita ngayon, baliktad ang nangyari. Si Pedro ang nagtatwa kay Jesus, subalit si Jesus ang gumawa ng paraan upang makabawi sa Kanya si Pedro. Kung mapapansin ninyo, tatlong ulit tinanong ni Jesus si Pedro kung mahal ba siya nito. Sa bawat sagot ni Pedro ay may kaakibat na misyon na ibinibigay sa kanya si Jesus. Sabi ng ilang Bible scholar, ang unang tugon kasi ni Pedro ay mababaw ang pakahulugan nito. Hindi pantay ang pakahulugan nila sa salitang pagmamahal, kaya kailangang ipaunawa kay Pedro ang mas malalim na pakahulugan nito. Kapanalig, ganito tayo kamahal ng Diyos. Tuwing magkakasala tayo sa Kanya, hindi mabilang na pagkakataon ang ibinibigay niya sa atin para makabawi sa Kanya. Ginagamit ba natin nang maayos ang bawat pagkakataong ito upang itama ang ating pagkakamali at manumbalik sa piling ng ating butihing Diyos?
Sa araw na ito, ipinagdiriwang natin ang kapistahan ni Santa Rita. Isa siya sa mga santang hindi nabulok ang katawan at tinatawagan ang kanyang intersasyon sa mga imposibleng kahilingan. Hingin natin ang panalangin ni Santa Rita na tulungan tayong maging tapat kay Jesus at sa ating pananampalataya. Huwag sana nating sayangin ang mga pagkakataong ibinibigay sa atin upang makabawi sa Diyos.

Sr. Lourdes Ranara, fsp | Daughters of Saint Paul
Paulines Multimedia PH

20/05/2026

𝐌𝐚𝐲𝐨 𝟐𝟏, 𝟐𝟎𝟐𝟔 | 𝐇𝐮𝐰𝐞𝐛𝐞𝐬 𝐬𝐚 𝐈𝐤𝐚-𝟕 𝐋𝐢𝐧𝐠𝐠𝐨 𝐧𝐠 𝐏𝐚𝐬𝐤𝐨 𝐧𝐠 𝐏𝐚𝐠𝐤𝐚𝐛𝐮𝐡𝐚𝐲

𝘗𝘢𝘨𝘨𝘶𝘯𝘪𝘵𝘢 𝘬𝘪𝘯𝘢 𝘚𝘢𝘯 𝘒𝘳𝘪𝘴𝘵𝘰𝘧𝘦𝘳𝘰 𝘔𝘢𝘨𝘢𝘭𝘭𝘢𝘯𝘦𝘴, 𝘱𝘢𝘳𝘪 𝘢𝘵 𝘮𝘢𝘳𝘵𝘪𝘳, 𝘢𝘵 𝘮𝘨𝘢 𝘒𝘢𝘴𝘢𝘮𝘢; 𝘢𝘵 𝘚𝘢𝘯 𝘌𝘶𝘨𝘦𝘯𝘪𝘰 𝘥𝘦 𝘔𝘢𝘻𝘦𝘯𝘰𝘥, 𝘰𝘣𝘪𝘴𝘱𝘰

📖 UNANG PAGBASA
Mga Gawa 22, 30; 23, 6-11

Ang Salita ng Diyos mula sa Mga Gawa ng Mga Apostol

Noong mga araw na iyon, ibig matiyak ng pinuno kung ano nga ang sakdal ng mga Judio laban kay Pablo, kaya’t pinagpulong niya kinabukasan ang mga punong saserdote at ang buong Sanedrin, saka kinalagan si Pablo, ipinanaog at iniharap sa kanila.

Alam ni Pablo na doo’y may mga Saduseo at Pariseo, kaya’t sinabi niya nang malakas, “Mga kapatid, ako’y Pariseo, anak ng mga Pariseo. Dahil sa pag-asa kong muling mabubuhay ang mga patay ako’y nililitis ngayon.” Matapos itong sabihin ni Pablo, nagtalu-talo ang mga Pariseo at ang mga Saduseo, at nahati ang kapulungan. Sapagkat ang sabi ng mga Saduseo, hindi muling mabubuhay ang mga patay at walang anghel o espiritu, subalit ang mga Pariseo nama’y naniniwala sa lahat ng ito. At lumakas ang kanilang sigawan. Tumindig ang ilan sa mga eskribang kapanig ng mga Pariseo at malakas na tumutol. “Wala kaming makitang pagkakasala ng taong ito. Ano kung may isang espiritu o isang anghel na nagsalita sa kanya?”

At nang maging mainitan na ang kanilang pagtatalo, natakot ang pinuno na baka lurayin nila si Pablo, kaya’t pinapanaog niya ang mga kawal, ipinakuha si Pablo at ipinapasok sa kuta.

Kinagabihan, tumayo ang Panginoon sa tabi ni Pablo at sinabi sa kanya, “Lakasan mo ang iyong loob! Nagpatotoo ka tungkol sa akin dito sa Jerusalem; ganyan din ang gawin mo sa Roma.”

Ang Salita ng Diyos.

🙏 SALMONG TUGUNAN
Salmo 15, 1-2a at 5. 7-8. 9-10. 11

D’yos ko, ang aking dalangi’y
ako’y iyong tangkilikin.

O Diyos, ako’y ingatan mo, ingatan ang iyong lingkod, ang hangad ko ay maligtas kaya sa ‘yo dumudulog; “Ika’y aking Panginoon,” ang wika ko sa aking Diyos, “Kabutihang tinanggap ko, ay ikaw ang nagkaloob.”
Ikaw lamang, O P**n ko, ang lahat sa aking buhay, ako’y iyong tinutugon sa lahat kong kailangan.

D’yos ko, ang aking dalangi’y
ako’y iyong tangkilikin.

Pinupuri ko ang P**n na sa akin ay patnubay.
Kahit gabi diwa niya ang sa aki’y umaakay.
Nababatid ko na siya’y kasama ko oras-oras.
Sa piling n’ya kailanma’y hindi ako matitinag.

D’yos ko, ang aking dalangi’y
ako’y iyong tangkilikin.

Kaya’t ako’y nagdiriwang, ang diwa ko’y nagagalak.
Ang lagi kong nadarama’y hindi ako matitinag.
Pagkat di mo tutulutang ang mahal mo ay malagak, sa balon ng mga patay upang doon ay maagnas.

D’yos ko, ang aking dalangi’y
ako’y iyong tangkilikin.

Ituturo mo ang landas na buhay ang hahantungan, sa piling mo’y madarama ang lubos na kagalakan; ang tulong mo’y nagdudulot ng ligayang walang hanggan.

D’yos ko, ang aking dalangi’y
ako’y iyong tangkilikin.

🙏 ALELUYA
Juan 17, 21

Aleluya! Aleluya!
Lahat nawa’y magkaisa
kay Kristo at sa D’yos Ama
nang tana’y sumampalataya.
Aleluya! Aleluya!

📜 MABUTING BALITA
Juan 17, 20-26

Ang Mabuting Balita ng Panginoon ayon kay San Juan

Noong panahong iyon, tumingala si Hesus at nanalangin, “Amang banal, hindi lamang ang aking mga alagad ang idinadalangin ko, kundi pati ang mga mananalig sa akin dahil sa kanilang pahayag. Maging isa nawa silang lahat, Ama. Kung paanong ikaw ay nasa akin at ako’y nasa iyo, gayun din naman, maging isa sila sa atin upang maniwala ang sanlibutan na ikaw ang nagsugo sa akin. Ang karangalang ibinigay mo sa akin ay ibinigay ko sa kanila upang sila’y ganap na maging isa, gaya nating iisa: ako’y nasa kanila at ikaw ay nasa akin, upang lubusan silang maging isa. At sa gayun, makikilala ng sanlibutan na sinugo mo ako, at sila’y iniibig mo katulad ng pag-ibig mo sa akin.”

“Ama, nais kong makasama sa aking kinaroroonan ang mga ibinigay mo sa akin, upang mamasdan nila ang karangalang bigay mo sa akin, sapagkat inibig mo na ako bago pa nilikha ang sanlibutan. Makatarungang Ama, hindi ka nakikilala ng sanlibutan, ngunit nakikilala kita; at nalalaman ng mga ibinigay mo sa akin na ikaw ang nagsugo sa akin. Ipinakilala kita sa kanila, at ipakikilala pa, upang ang pag-ibig mo sa akin ay sumapuso nila at ako nama’y sumakanila.”

Ang Mabuting Balita ng Panginoon.

🙏 PAGNINILAY

Ipinagdadasal tayo ni Jesus. Katakataka! Hindi ba si Jesus ay Diyos? At sa kanya tayo humihingi ng grasya? Pakinggan ninyo ito: sa Huling Hapunan, sinabi ni Jesus kay Pedro: “Simon, Simon, tingnan mo, masugid kang pinaghahanap ni Satanas upang salain ka tulad ng trigo, ngunit idinalangin kita na huwag magkulang ang iyong pananampalataya…”
Ipinagdasal ni Jesus si Pedro! Si Jesus ang tanging daan sa Ama – ang tanging Tagapamagitan. Mababasa natin na sa huling hapunan nag-alay si Jesus ng masidhing panalangin sa Ama para sa mga mananampalataya, noon, ngayon, at bukas - sa mga maniniwala sa pananalita ng kanyang mga sugo. Mahal na mahal tayo ni Jesus. Sa kanyang paglisan sa mundo, nagsumamo siya sa Ama na tayo’y ingatan at ilayo sa masama upang sa wakas ay maisama niya sa kanyang kaluwalhatian. Nais niya tayong magkaisa. Magkaisa sa pagsamba, sa paninindigan, sa pag-alaga sa kapwa.
Kapanalig, meron ka bang issue ngayon na gusto mong malutasan? Tukso na napakahirap labanan? Kabutihan na parang imposibleng maisulong? Alam yan ng Ama. Hinihintay Niyang tumawag ka – in Jesus’ name. Paano yong hindi nagdarasal o hindi naniniwala sa kanya? Kailangan ni Jesus ang ating tulong na magpahayag ng Mabuting Balita na ating natanggap. At magdasal para sa ating mga kapatid na malayo sa bahay ng Ama.
Panginoong Jesus, maraming salamat sa iyong walang kupas na pagmamahal. Palakasin mo ang aming pananalig sa iiyo. Amen.

Sr. Vangie Canag, fsp | Daughters of St. Paul
Paulines Multimedia PH

St. Joseph Chapel -Sapang Putik, San Ildefonso,Bulacan

25/05/2026

24/05/2026

23/05/2026

22/05/2026

21/05/2026

20/05/2026

Address

Website

Alerts

Shortcuts

Share

Category