04/04/2026
Ikalawang Araw ng Nobenaryo sa Mabathalang Awa
+Sa Ngalan ng Ama, ng Anak, at ng Espiritu Santo
Mga Dalangin ng Awa
Panimula
Pumanaw Ka, Hesus, subali’t ang Bukal ng Buhay ay bumalong para sa mga kaluluwa at ang Karagatan ng Awa ay bumugso para sa sanlibutan. O Bukal ng buhay, Walang Hanggang Awa ng Diyos, yakapin Mo ang sangkatauhan at ibuhos mong ganap ang Iyong sarili para sa aming lahat.
O Banal na Dugo at Tubig, dumaloy mula sa puso ni Hesus bilang Bukal ng Awa , para sa aming lahat , ako ay nananalig sa Iyo. (3x)
Pagkatapos, magdasal ng isang Ama Namin, isang Aba, Ginoong Maria, at isang Sumasampalataya Ako
Sa lahat ng butil ng “Ama Namin” ay dasalin ang mga panalanging ito:
Ama na Walang Hanggan, iniaalay ko po sa Iyo ang Katawan at dugo, Kaluluwa at PagkaDiyos ng Kamahal-mahalan Mo ang Anak na si Hesukristo, na aming Panginoon at Manunubos, para sa ikapagpatawad ng aming mga sala at sala ng buong sansinukob.
Sa lahat ng butil ng “Aba Ginoong Maria” ay Dasalin naman ang mga panalanging ito:
Alang-alang sa mga Tiniis na Hirap at Kamatayan ni Hesus, kaawaan Mo po kami at ang buong sansinukob.
Bilang pangwakas ay Dasalin ng tatlong ulit ang mga panalanging:
Banal na Diyos, Banal na puspos ng Kapangyarihan, Banal na Walang Hanggan, maawa po Kayo sa amin at sa buong sansinukob. Amen.
MGA INTENSION AT PANALANGIN SA IKALAWANG ARAW
“DALHIN MO SA AKIN NGAYONG ARAW NA ITO ANG MGA KALULUWA NG MARAMING PARI AT MGA RELIHIYOSO at ilubog mo sila sa di masayod Kong pagka-awa. Sila ang nagbigay sa Akin ng lakas na batahin Ko ang Aking mapait na paghihirap. Sa pamamagitan nila, ang Aking pagka-awa ay umagos sa buong sansinukob.”
PANALANGIN:
Napakamaawaing Hesus, na pinagbubuhatan ng lahat ng kabutihan, dagdagan Mo ang Iyong grasiya sa mga lalaki’t babae na konsagrado sa gawaing kabanalan nang sila’s makagawa ng mga karapatdapat na mga gawain ng awa; at nang lahat ng makakita sa kanila ay magpuri sa Ama ng Awa na nasa langit.
Walang Hanggang Ama, ilingon Mo ang Iyong maawaing titig sa mga pinili Mo sa Iyong bakuran lalo na sa mga pari at mga relihiyoso at relihiyosa; at pagkalooban Mo sila ng lakas ng Iyong bendisyon. Dahil sa malaking pag-ibig sa kamahal-mahalang Puso ng Iyong Anak kung saan sila ay nabibigkis, ipagkaloob Mo sa kanila ang Iyong kapangyarihan at liwanag, at nang sila ay makaakay at magturo ng paraan tungo sa kaligtasan at nang may iisang tinig ay umawit ng papuri sa Iyong walang hanggang Awa ngayon at magpasawalang hanggan. Amen.
