https://www.facebook.com/172767867668712/

Sr. San Roque Chapel Choir Maharlika, Purok 1 Maharlika Bislig City Surigao del Sur, Bislig (2026)

09/08/2026

AGOSTO 9, 2026 - DOMINGO

Ikanapulo’g Siyam nga Domingo sa Ordinaryong Panahon

(Green)

Tema: Pagtoo sa Ginoo, Palambuon ug Lig-onon.

Buot usab kitang mosinati sa kinabuhi nga nagalakaw uban ni Jesus. Ang pagtulon-an sa Balaang Kasulatan nagdala kanato sa pagpamalandong: Unsa ba ang mga babag sa atong paglakaw uban ni Jesus? Ang gisaysay sa Ebanghelyo nagpadayag sa unang babag: Kahadlok. Bisan asa, ang kahadlok makapaundang ug makawala sa atong pagsalig sa kaugalingon, ngadto sa uban, ug sa Ginoo. Si Pedro nakahimo sa unang higayon hangtud nga ang kahadlok miigo kaniya. Dili gayud ikatingala nga kon ang Ginoo magtawag ug tawo ngadto kaniya, ang makanunayon niyang pulong mao gayud ang: “Ayaw kahadlok....” Ang Espiritu sa Ginoo mao ang kalinaw, ug ang kalinaw magwagtang sa tanang kahadlok. Ang makatandog nga pulong sa Ebanghelyo karong adlawa mao ang mga pulong ni Pedro - “Ginoo, kon ikaw ka na, palakwa usab ako sa tubig.” Kining mga pulonga nagpadayag og dakung pagtoo ngadto kang Jesus. Apan makaingon ba kita nga kining iyang gipakita nga pagtoo tungod ba lamang kay una, iyang nakita si Jesus nga naglakaw sa tubig taliwala sa mga dagkung balud. Adunay nagsulat: “Leadership can be defined as the art of showing the way by going first.” Alang sa mga desipulo nga naninggit: “Multo kana!”. - Busa ang gibuhat ni Pedro usa ka timaan sa pagkapangulo. Dili ikahibulong nga gipili siya ni Jesus nga pangulo sa pundok sa mga sumusunod.

ANG PAGBASA GIKAN SA UNANG BASAHON SA MGA HARI (1 Kgs. 19:9, 11-13)

Miabot si Elias sa usa ka langob ug mipuyo siya didto; ug giingnan siya sa GINOO, “Unsay gibuhat mo dinhi, Elias?” Ang GINOO miingon, “Lakaw ug barog sa tumoy sa bukid atubangan sa GINOO.” Unya miaagi ang GINOO ug may kusog nga hangin nga mihapak sa kabukiran, ug nangatipak ang ang mga bato, apan ang GINOO wala diha sa hangin, Ug human sa hangin, miabot ang linog, apan ang GINOO wala diha wala diha sa linog. human sa linog, misunod ang kalayo, apan ang GINOO wala diha sa kalayo ug human sa kalayo may hinay ug malumong tingog.

Sa pagkabati niini ni Elias, gitabonan niya ang iyang nawong sa iyang bisti ug migawas siya ug mibarog sa agianan sa langob. Ug may tingog nga miingon kaniya, “Unsay gibuhat mo dinhi Elias?”

Ang Pulong sa GINOO.

Salamat sa DIOS.

SALMO RESPONSORYO

(Ps. 85:9-10, 11-12, 13-14)

T. Ginoo, patan-awa kami sa Imong kaayo, ug ihatag kanamo ang Imong kaluwasan.

Pamati-on ko ang gisangyaw sa Dios; sa Ginoo-kay nagasangyaw siya sa kalinaw. Haduol gayod ang Iyang kaluwasan kanila nga mahadlokon Kaniya, ang himaya nagapuyo sa atong yuta.

T. Ginoo, patan-awa kami sa Imong kaayo, ug ihatag kanamo ang Imong kaluwasan.

Ang kaluoy ug ang kamatuoran magatagbo; ang katarung ug kalinaw maghagkanay. Ang kamatuoran mogitib gikan sa yuta, ug ang katarong modung-aw gikan sa langit.

T. Ginoo, patan-awa kami sa Imong kaayo, ug ihatag kanamo ang Imong kaluwasan.

Ang Ginoo mohatag sa Iyang mga kaayohan; ug ang atong yuta mohatag sa Iyang abot; Ang katarong maglakaw sa Iyang atubangan, ug ang kaluwasan diha sa Iyang pagaagian.

T. Ginoo, patan-awa kami sa Imong kaayo, ug ihatag kanamo ang Imong kaluwasan.

ANG PAGBASA GIKAN SA SULAT NI SAN PABLO NGADTO SA TAGA-ROMA (Rom. 9:1-5)

Mga igsoon: Matood ang giingon ko nga iya ako ni Cristo ug wala ako mamakak. Ang akong konsensya nga gilamdagan sa Espiritu Santo maoy akong saksi nga wala ako magbakak. Gibati ko ang hilabihang kasubo ug kaguol nga walay hunong alang sa akong isigka-Judio-mga kabanay ug mga kadugo ko. Tungod kanila palabihon ko nga tunglohon ako sa Dios ug mahimulag kang Cristo. Sila mao ang piniling katawhan sa Dios; gisagop sila ingon nga mga anak sa Dios ug gipaambit sa iyang himaya; ug nagahimo siyag mga kasabotan uban kanila ug gihatagan sila sa balaod. Ila ang matuod nga pagsimba, ug nakadawat sila sa mga saad sa Dios. Kaliwat sila sa mga patriyarka, ug sa ilang kaliwatan natawo si Cristo. Ang Dios nga labaw sa tanan daygon unta hangtod sa kahangtoran. Amen.

Ang Pulong sa GINOO.

Salamat sa DIOS.

ALELUYA (Ps. 130:5)

A leluya! Aleluya!

Naghulat ako nga mahinangpon sa panabang sa GINOO,

ug misalig ako sa iyang pulong.

Aleluya! Aleluya!

ANG PAGBASA GIKAN SA EBANGHELYO SUMALA NI SAN MATEO (Mt. 14:22-33)

Unya gipasakay ni Jesus ang mga tinun-an sa sakayan ug gipauna niya ngadto sa tabok sa lanaw, ug iyang gipalakaw ang mga tawo. Tapos niya palakta ang mga tawo, mitungas siya nga nag-inusara sa usa ka bungtod aron pag-ampo. Ug sa pagkagabii na, si Jesus nag-inusara didto. Niadtong tungora ang sakayan didto na sa lawod, gikusokuso sa mga balod, kay ang hangin sungsungon man.

Sa may mga alas tres sa kaadlawon, si Jesus miadto kanila nga naglakaw sa tubig. Sa pagkakita sa mga tinun-an kaniya nga naglakaw sa tubig, nangahadlok sila pag-ayo. “Anaay multo!” miingon sila, ug naniyagit sila sa kalisang.

Si Jesus miingon kanila, “Ayaw kamo kahadlok! Ako kini!”

Unya si Pedro miingon, “Ginoo, kon ikaw kana, palakta ako sa tubig nganha kanimo.”

“Dali ngari,” mitubag si Jesus. Busa mikawas si Pedro sa sakayan ug milakaw sa tubig ngadto kang Jesus. Apan sa pagkamatikod niya sa hangin, nahadlok siya ug misugod pagkaunlod. “Ginoo, luwasa ako!” misinggit siya. Dihadiha gidawat siya ni Jesus ug gibira ug miingon si Jesus kaniya, “Pagkadiyutay sa imong pagtuo! Nganong nagduhaduha ka man?” Ug nanakay silang duha sa sakayan, ug milurang ang hangin. Ang mga tinun-an nga didto sa sakayan misimba kang Jesus, ug miingon, “Ikaw gayod ang Anak sa Dios!”

ANG EBANGHELYO SA GINOO.

DAYGON IKAW, O CRISTO.

The Creed is said.

KATILINGBANONG PAG-AMPO

P: Mag-ampo kita isip maunongong katawhan sa Dios nga naglantaw kang JesuCristo. Sa atong kasayuran sa iyang pagdasig sa nagka-awop nga pagtoo ni San Pedro, kita nakamatngon nga ania ra diay siya kanunay uban kanato, ang iyang kamot gituyhad aron sa paglig-on ug pagpabakod kanato: ANAK SA DIOS, LUWASA KAMI.

1. Nga ang Simbahan sa Dios nga tatawng nahiusa libot sa sumusunod ni Pedro ug sa mga apostoles, maggiyahan pinaagi sa gahum sa presensiya sa Dios taliwala sa mga suliran ug mga unos nga ilang nasugamak. Mag-ampo kita sa Ginoo.

2. Nga maanaa unta ang kalinaw ug hustisya sa mga nasud nga gibahin-bahin sa gubat ug sa panagbingkil. Mag-ampo kita sa Ginoo.

3. Nga kadtong gipadpad nga walay tumong sa unos sa kadagatan sa kinabuhi makadangup sa Simbahan nga maoy malinawon nga tagoanan. Mag-ampo kita sa Ginoo.

4. Nga ang mga masakiton makakaplag og kahupayan diha sa makaayong kalooy ni Cristo. Mag-ampo kita sa Ginoo.

5. Nga ang mga magtotoo nga nangamatay makadangat sa langitnong kapahulayan diha sa presensiya sa Ginoo. Mag-ampo kita sa Ginoo.

P: Ginoong Dios, sa imong pagdawat niining mga pag-ampo, hatagi kami sa kalig-on sa pagtoo ug masunoron nga pagsalig sa imong Anak among Manluluwas kinsa nagapuyo ug nagahari uban kanimo hangtod sa kahangturan.

07/08/2026

CEBUANO REFLECTIONS - AUGUST 7, 2026
Friday of the Eighteenth Week in Ordinary Time

GIPASIDAAN NI JESUS ANG IYANG PAG-ANTOS UG KAMATAYON - MATEO (Mt. 16:24-28)

Unya miingon si Jesus sa iyang mga tinun-an, “Ang buot mahimong akong tinun-an kinahanglan nga hikalimtan niya ang iyang kaugalingon, pas-anon niya ang iyang krus, ug mosunod siya kanako. (Mt. 16:24)

Kay ang buot magluwas sa iyang kaugalingong kinabuhi mawad-an hinoon niini; apan ang mawad-an sa iyang kinabuhi tungod kanako makabaton niini. (Mt. 16:25)

May makuha ba ang tawo kon maangkon niya ang tibuok kalibutan apan kawad-an siya sa iyang kinabuhi? Wala gayod! Ang tawo walay bisan unsa nga ikahatag aron mabawi niya ang iyang kinabuhi. (Mt. 16:26)

Kay ang Anak sa Tawo hapit na moabot uban sa himaya sa iyang Amahan, kinuyugan sa iyang mga anghel, ug unya balosan niya ang tagsatagsa sumala sa iyang nabuhat. (Mt. 16:27)

Hinumdomi kini: dinhi aniay pipila nga dili mamatay hangtud nga hikit-an nila ang Anak sa Tawo nga moabot ingon nga Hari.” (Mt. 16:28)

REFLECTIONS - MATEO (Mt. 16:24-28)
... May makuha ba ang tawo... (b.26). Isalikway siya sa kadagkoan sa nasod kay kini ang dangatan ni bisag kinsa nga mosaksi sa kamatuoran ug mobarog kanunay alang sa hustisya ug sa katawhan. Kinahanglang mamatay siya, kay kini ra ang paagi nga maluwas niya ang kalibotan.
... ang buot magluwas... (b. 25). Daghan ang midagan ug mipahilayo sa hagit sa Ebanghelyo busa, walay nahitabo nila ug nagpuyo sila sa naandang kinabuhi. Apan sa ngadtongadto nawala sila sa panumdoman sa mga tawo ug mapapas sa kasaysayan. Hinuon, mapasalamaton ta nga may isog nga mobarog ug andam motahan sa kaugalingon aron pag-alagad sa kinabuhi. Ang ilang mga mithi mikaylap ug nagpadayon hangtod karon. Dili nato malimtan si Padre Rudy Romano ug Tulio Favali, Dionisio Malalay ug uban pang alagad sa Simbahan. Dili sab nato malimtan ang yanong katawhan sama ni Mateo Olivar, Pantoy Pepito, Discoro Kamingawan, Jaime Monteza, Victoria Hatague ug daghan pang aktibo sa katikingbang kristohanon. Wala sila magmakuli paghalad sa ilang kinabuhi ttungod ni Cristoug sa Maayong Balita. Ang ilang ngalan nasilsil sa kasaysayan sa Simbahan. Nahimo ning mas mabulokon gumikan nila.
.. pas-ana ang krus (b. 24). Sa ato pa, kon buot tang mosunod ni Jesus, buhaton nato ang sama sa iyang gibuhat nga mihatod niya sa kamatayon. Ang hamtong nga magtotoo mao ang andam paghalad sa kinabuhi alang sa uban. Sa lain pagkasulti, itaya nato ang kaugalingon alang sa mas hamili ug balaanong kawsa. Busa, inay kaugalingon ray lantawon, palapdan ang panglantaw nga molatas sa naandan diin ang gihatagag gibug-aton dili na ang kaugalingon kondili, ang pagkinabuhi sa katawhan ug sa palibot. (Mc 10:30).

Pamalandongi ang giingon ni Jesus nga tungod nako o alang nako ug dili tungod ug alang sa Diyos, kay ang Diyos naa na sa pagkatawo ni Jesus mismo busa, nagtawag siya aron motubag ta ug motahan sa kaugalingon sa misyon nga iyang gisangon.

===========================

PAMALANDONG - AUGUST 7, 2026
Friday of the Eighteenth Week in Ordinary Time

ANG PAGKAPUKAN SA NINIBE - NAHUM (Na. 2:1, 3; 3:1-3, 6-7)

Ninibe, gisulong ka na! Miabot na ang gahum nga molumpag kanimo. Andama ang imong mga panalipod Bantayi ang dalan! Pangandam alang sa gubat! (Na. 2:1)

P**a ang taming sa mga sundalo nga misulong kanimo, ug p**a usab ang ilang gibisti. Nagpangidlap sama sa kalayo ang ilang mga karwahe ug nagpanikad na ang ilang mga kabayo. (Na. 2:3)

Alaot ang siyudad diin naghitak ang pinatyanay, napuno sa mga bakak ug inilug, ug walay hunong ang pagpangawat! (Na. 3:1)

Pamati sa hinagiyos sa latigo, sa kabanha sa ligid, sa nagdagan nga mga kabayo ug nag-untol-untol nga karwahe! (Na. 3:2)

Misulong na ang mga kabalyero, nagpangidlap ang espada ug nagsinawsinaw ang bangkaw, daghang nangamatay, nagtipun-ug ang mga haya, ug dili kini maihap, nadagma sila sa mga patayng lawas! (Na. 3:3)

“Labayon ko ikawg hugaw ug dumtan ko ikaw, ug himoong talan-awon sa katawhan. (Na. 3:6)

Ug ang tanan nga motan-aw kanimo molikay ug moingon, ‘Nagun-ob ang Ninibe; kinsay mohilak alang kaniya?Asa ako mangitag mga tawo nga molipay kaniya?” (Na. 3:7)

REFLECTIONS - NAHUM (Na. 2:1, 3; 3:1-3, 6-7)

Kining pasiuna nga awit nagpadayag sa sentro nga tema sa panagna ni Nahum; ang Diyos buot nga ilhon nga siya ra ang Diyos sa kalibotan; nga naa siya sa kinaiyahan, ug labaw sa tanan, ang iyang kamatinud-anon sa iyang mga higala.

Masaligon sa mga pulong sa Ginoo, diha sa makalilisang nga balak, si Nahum nagtag-an sa kaalaot sa Ninibe, sa hinayhinay: Nagtimaan ni sa kalingkawasan gikan sa tanang matang sa pagkaulipon. Pinaagi ni Nahum, ang Biblia midawat sa kalipay sa tanang gagmay nga tawo diha sa paglantaw sa mga gamhanan nga nagsalikway sa ilang mga katungod ug nagmando nila pinaagi sa panghadlok.

chords
C Dm
R. Ako ang magpahamtang sa
G C Am Em F G C
kamatayon ug maghatag sa kinabuhi.

verses
C
Hapit na ang adlaw sa ilang
Dm
katalagman,/
G C
ug ang ilang kamatayon duol na kanila!/
F
Sa walay duhaduha ang Ginoo magbuhat sa katarong alang sa iyang
C
katawhan;/
Dm G
sa iyang mga sulugoon maluoy siya.

R. Ako ang magpahamtang...

"Busa hikat-oni ninyo nga ako, ako lamang, mao ang Dios,/ ug walay laing dios gawas kanako./ Ako mao ang nagadala sa kamatayon ug sa kinabuhi,/ako ang nagpahamtang sa mga samad ug ang nag-alima kanila."

R. Ako ang magpahamtang...

"Bairon ko ang akong nagpangidlap nga espada,/ ug ang akong kamu mokuot sa akong gapasan./ Uban sa panimalos panimaslan ko ang akong mga kaaway/ ug balosan ko sila nga nagdumot kanako."

R. Ako ang magpahamtang sa kamatayon ug maghatag sa kinabuhi.

19/07/2026

HULYO 19, 2026-DOMINGO
Ikanapulo’g Unom nga Domingo sa Ordinaryong Panahon
(Green)

Angay nato mahibaloan nga ang usa sa mga mekanismo sa Philippine Media mao ang pagbuhat ug drama aron mapalit sa katawhan. Halimbawa nalamang niini ang pagbuhat ug Bida ug Kontrabida sa mga Balita nato karon. Kon makabantay mo sa mga balita mokuha og opinyon sa usa ka kampo tapos isabong sa opinyon sa laing kampo. Pag adunay sitwasyon, mo kuha dayon sila og tawo nga impluwensyal aron mo diskurso mahitungod niini unya ikumpara sa diskurso sa laing impluwensyal nga tao. Unya, sa panagkambyohay sa mga idea ug mga pulong ang bida dapat madaug ug ang kontra dapat malaglag. Inig kahuman na sa usa ka drama, lain nasad nga drama ang buhaton ug mawala na sa kahanginan kung unsa na ang nahitabo sa una nga drama. Ngano man nga naay stratehiya nga ingon niini? tungod kay ang matag estasyon, bisan sa kagustuhan nila nga mapalapnag kung unsa ang kamatuoran, kinahanglan makakuha sila ug Audience aron mutaas ang ilahang rating aron mokita ang estasyon. Mao na nga dili malikayan nga naa nay mga estorya sa balita nga tawag nato “luto nang daan” kay kabalo na sila nga makakuha sila og audience niini.
Ang kinbuhing husto. Usa sa mga malisud buhaton nga hagit sa Ebanghelyo mao ang pagkab-ot sa kon unsa ang husto. Adunay usa ka obserbasyon ni Dr. Tom Curran, sa iyahang libro nga the 5 Sentences that will Heal your Soul, adunay kalahian ang imahe nga gipakita ang hustisya sa kalibutan ug hustisya sa Ginoo. Ang hustisya sa kalibutan gihulagway kini ni Lady Justice, nga adunay timbangan apan tinaptapan ang mata. Sa Laing Bahin ang imahe sa hustisya sa Ginoo mao ang Prodigal Son. Sa Obserbasyon ni Dr. Tom ang gigamit sa hustisya sa kalibutan mao ang timbangan tungod kay wala man mitan-aw ang hustisya sa tawo kon dili sa sala nga iyang nabuhat. Sa laing bahin ang Ginoo wala ninggamit sa timbangan apan nakabalo siya sa kahimtang sa tawo tungod kay siya nakakita ug makasabot sa makasasala nga tao. Tungod kay ang sukdanan sa Ginoo mao ang kaluoy. “Mercy is when God shows us favor when we deserve the opposite”.
Mao nga masabtan nato sa atong Ebanghelyo karon nganong ang Ginoo sa iyahang sambingay gipasabay niyag patubo ang dautan ug ang mga matarong nga mga tao sa kalinutan. Tungod kay gitan-aw niya ang tanan sa mata sa kaluoy. Mao nga sa katapusan kitang tanang mga tao walay katungod sa paghukom sa atong isigkatao kon wala natu nasuta ang kinatibuk-an. Mao sab kini ang hagit sa atong Santo Papa niadtong Tuig sa Kaluoy nga kitang tanan kinahanglan magbaton sa kinaiya sa Ginoo nga maluloy-on. Kay ang kinabuhing husto mao ang kinabuhi nga nakakita sa kinatibuk-an ug gustong sagupon ang makasasala ug dili ang sala. Ug mao pud kini ang pamaagi aron mahiusa kita. Ang panaghiusa sa katilingban nga ningtan-aw sa iyang isigkatawo sa mata sa gugma ug sa kaluoy. Tungod kay ang kaluoy maoy pagpakita nga kita nahigugma usab.
Ang hagit pamalandong sa atong kaugalingon: Nagpuyo ba kita sa husto nga kinabuhi? Sa pakiguban nato sa atong isigkatawo, unsa nga pamaagi ang atong gigamit: timbangan bah o kaluoy? Sa imong panlantaw sa mga panghitabo karon sa atong palibot husto ba kaha ang imung panlantaw niini?

PASIUNA
Kon tan-awon nato ug pamalandungan ang mga panghitabo sa kalibotan diin anaa ang kagubot ug inhustisya, pagdumot ug mga panagbingkil, tingali mawad-an kita sa pailob. Kon kita ang nahimutang sa lugar sa Ginoo, wagtangon nato ang tanang daotan aron kining mnaong kalibotan mahimong us aka dapit nga malinawon ug maayong puy-an. Tingali nalimot kita nga lahi ang Dios. Ang Dios mapailobon ug dili niya ipamugos ang iyang kabubut-on pinaagi sa iyang kusog, apan pinaagi sa iyang kabubut-on hinayhinayng pagtubo diha sa gugma. Ang iyang Espiritu magtabang kanato diha sa atong mga kahuyang.

Unang Pagbasa Kinaadman 12: 13, 16-19
Ang Dios mapailobon. Ang Dios dili mosalikway bisan sa mga makasasala. Gipakita iya ang iyang kalig-on diha sa iyang pailob ug kaluoy. Sama nga naghatag siya kanatog panahon alang sa pagbag-o, hatagan usab natog higayon ang atong isigkatawo sa pagbag-o.

ANG PAGBASA GIKAN SA BASAHON SA KAALAM NI SOLOMON (Wis. 12: 13, 16-19)

Ang tanang butang ilalom sa imong pag-atiman, ug walay laing dios nga imong kasanghiran sa imong mga hukom. Ang imong kusog mao ang tinubdan sa hustisya. Makapakita ka ug kaluoy sa matag-usa, kay ikaw Ginoo man sa tanan. Nagapakita ka sa imong kusog sa diha nga ang mga tawo may katahap sa kahingpit sa imong gahum, ug gisilotan mo si bisan kinsa nga nahibalo sa imong gahum apan nangahas sa dili pagpanumbaling niini. Bisan aduna kay hingpit nga gahum, apan ikaw usa ka maluloy-on nga maghuhukom. Makabuhat ka unta bisan unsa batok kanamo sa bisan unsang panahon nga gusto mo, apan inay niana, gimandoan mo hinoon kami sa dakong pagpailob.
Pinaagi sa mga butang nga imong nabuhat gitudloan nimo ang imong katawhan nga ang usa ka tawo nga matarong kinahanglan usab nga maluloy-on. Gihatagan mo ang imong katawhan og dakong paglaum pinaagi sa pagtugot kanila sa paghinulsol sa ilang mga sala.

ANG PULONG SA GINOO.
SALAMAT SA DIOS.

SALMO RESPONSORYO
(Ps. 86: 5-6, 9-10, 15-16)

T. Ginoo, maayo Ikaw ug mapasayluon.

Ikaw, O Ginoo, maayo ug mapasayluon, puno sa kaluoy alang sa tanan nga magasangpit kanimo. Patalinghugi, O Ginoo, ang akong pag-ampo ug pamati-a ang tingog sa akong pangamuyo.

T. Ginoo, maayo Ikaw ug mapasayluon.

Ang tanang mga nasud nga imong gibuhat moabot ug mosimba kanimo, O Ginoo, ug maghimaya sa imong ngalan. Kay halangdon ka man ug naghimo ka og katingalahang mga buhat; ikaw lamang mao ang Dios.

T. Ginoo, maayo Ikaw ug mapasayluon.

Ikaw, O Ginoo, maoy usa ka Dios nga maluloy-on ug mahigugmaon, dugay nga masuko, puno sa kaluoy ug kamatinumanon. Lingia ako ug kaloy-i ako; ihatag ang imong kusog ngadto sa imong sulugoon.

T. Ginoo, maayo Ikaw ug mapasayluon.

Ikaduhang Pagbasa Rom 8: 26-27
Ang Espiritu Santo motabang kanimo. Ang atong Cristohanong pagpuyo dili hingpit apan ang Dios nasayod unsa ang anaa sa atong kasingkasing ihatag niya kanato ang Espiritu Santo aron sa paglig-on kanato.

ANG PAGBASA GIKAN SA SULAT NI SAN PABLO NGADTO SA TAGA-ROMA (Rom. 8: 26-27)

Sa samang pagkaagi, sa atong pagkahuyang tabangan kita sa Espiritu, kay wala kita masayod unsaon nato pag-ampo ang Espiritu mismo mangaliyupo sa Dios alang kanato, uban sa mga pag-agulo nga dili ikasaysay. Ug ang Dios nga nasayod sa kasingkasing sa tawo, nasayod unsay gihunahuna sa Espiritu, kay ang Espiritu mangaliyupo sa Dios alang sa iyang katawhan sumala sa iyang kabubut-on.

ANG PULONG SA GINOO.
SALAMAT SA DIOS

ALELUYA (Mt. 11:25)
T. Aleluya.
Dalaygon ikaw, Amahan, Ginoo sa langit ug yuta; kay imong gipadayag sa mga gagmay ang mga misteryo sa gingharian.
T. Aleluya.

ANG PAGBASA GIKAN SA EBANGHELYO SUMALA NI SAN MATEO (Mt. I3: 24-43)

Unya misugilon Si Jesus kanilag laing sambingay: “Ang Gingharian sa langit sama sa usa ka tawo nga nagpugas og maayong binhi didto sa iyang uma. Usa niana ka gabii, samtang nangatulog ang tanan, usa ka kaaway miadto ug misabod og liso sa mga sagbot sagol sa trigo, ug unya mibiya. Sa nakatubo na ang mga tanom ug misugod na sa pagbuswak ang mga uhay, diha pa mailhi ang mga sagbot. Ang mga sulugoon sa tag-iya miduol kaniya ug miingon, ‘Sir, maayong binhi ang gipugas mo sa imong uma, busa diin man gikan ang mga sagbot?’ Siya mitubag, ‘Usa ka kaaway ang naghimo niini.’ Sila nangutana kaniya, ‘Gusto ka bang pangibton namo ang mga sagbot?’ Siya mitubag, Ayaw! Kay sa inyo unyang pagpangibot sa mga sagbot, maapil unyag kaibot ang trigo. Pasagdi ninyo nga ang trigo ug ang mga sagbot magdungag tubo hangtud sa ting-ani, kay ingnon ko ra unya ang mga mangangani: Ibta ninyo pag-una ang mga sagbot, bugkosa kini ug ilabay ngadto sa kalayo; apan tigoma ang trigo ug hiposa didto sa akong kamalig.
Unya misugilon si Jesus kanilag laing sambingay: “Ang Gingharian sa Langit sama sa liso sa mustasa, ang labing gamay sa tanang liso. Gikuha kini sa usa ka tawo ug gipugas didto sa iyang uma, ug sa pagtubo na sa maong binhi, nahimo kini nga labing dako sa tanang tanom. Kini nahimong kahoy, ug nanugpa ang mga langgam ug nagsalag sa iyang mga sanga.”
Si Jesus misugilon na usab og laing sambingay: “Ang Gingharian sa Langit sama sa igpapatubo sa pan. Gikuha kini sa usa ka babaye ug gisagol sa usa ka takos nga harina hangtod mitubo ang tibuok minasa.”
Sa Jesus migamit og mga sambingay aron pagsugilon niining mga butanga ngadto sa mga tawo; wala siyay gisulti kanila bisag unsa kondili pinaagig sambingay. Gihimo niya kini aron matuman ang giingon sa propeta:
“Mogamit akog mga sambingay kon makigsulti ako kanila,
Suginlan ko silag mga butang nga wala pa hibaloi sukad mabuhat ang kalibutan.”
Unya mibiya si Jesus sa mga tawo ug misulod sa balay. Ang iyang mga tinun-an miduol kaniya ug miingon, “Sultihi kami sa kahulugan sa sambingay mahitungod sa mga sagbot sa uma.”
Si Jesus mitubag, “Ang tawo nga nagpugas sa maayong binhi mao ang Anak sa Tawo; ang uma mao ang kalibutan; ang maayong binhi mao ang mga tawo nga sakop sa Gingharian; ang mga sagbot mao ang mga tawo nga sakop sa Yawa; ug ang kaaway nga nagsabod sa mga sagbot mao ang Yawa. Ang pagpangani mao ang katapusan sa kalibutan, ug ang mangangani mao ang mga anghel. Maingon nga ang mga sagbot hipuson ug sunogon, mao usab kini ang mahitabo sa katapusan sa kalibutan: ang Anak sa Tawo magsugo sa iyang mga anghel sa paghipos gikan sa iyang Gingharian sa tanan nga maoy nakaangin sa mga tawo sa pagpakasala, ingon man ang tanan nga nagbuhat og dautan, ug itambog sila ngadto sa hudno nga nagdilaab, diin maghilak sila ug magkagot sa ilang ngipon. Unya ang katawhan sa Dios modan-ag sama sa adlaw didto sa Gingharian sa ilang Amahan. Busa pamati kon may dalunggan kamo!”

ANG EBANGHELYO SA GINOO.
DAYGON IKAW, O CRISTO.

The Creed is said.

KATILINGBANONG PAG-AMPO
P: Mga igsuon, diha sa atong hiniusang pag-ampo, mangamuyo kita sa atong Ginoo sa gasa sa kaalam ug pagsabot sa mga kamatuoran sa kinabuhi nga atong nasinati matag adlaw. Sa matag pag-ampo kita moingon. GINOO, DUNGGA KAMI.

a. Alang sa tibuok Simbahan nga ang grasya sa Ginoo mamahimong dayag diha sa iyang pagpakigbatok sa mga buhat nga dautan. Mag-ampo kita sa Ginoo.

b. Alang sa mga naghupot og katungdanan sa publiko nga pinaagi sa giya sa Ginoo dili unta sila mamahimong sagbot sa katilingban. Mag-ampo kita sa Ginoo.

c. Alang sa mga kaumahan nga makabaton unta kini og maayong abot aron matubag ang mga materyal nga panginahanglan sa katawhan. Mag-ampo kita sa Ginoo.

d. Alang sa mga tawo nga nawad-an na og paglaum sa pagpakabuhi, mga tawo nga puno sa mga pangandoy nga kalibutanon masinati unta nila ang grasya sa Dios nga maoy makabag-o sa ilang kinabuhi. Mag-ampo kita sa Ginoo.

e. Alang kanatong tanan nga ania, karon dinhi atong paningkamotan ang pagpuyo subay sa mga mensahe nga atong nadungog karon ug atong ipaambit ngadto sa uban. Mag-ampo kita sa Ginoo.

P: O Dios Amahan, ania kami sa Imong atubangan puno sa pagtoo ug pagdayeg sa Imong kaayo. Dungga ang among mga pangamuyo nga among gihimo sa ngalan ni Cristo Imong Anak nga among Ginoo. Amen.

Source:
Immaculate Conception Lumbayao Chapel

09/07/2026

HULYO 9, 2026 – HUWEBES
Ikanapulog-Upat nga Semana sa Tuig
(Green)

TUDLING SA EBANGHELYO

Ang panaw sa kinabuhi adunay kaugalingong pagpasikot-sikot. Adunay paliko-liko, adunay "zigzags," kuros-kuros nga dalan, ug usahay adunay mga "dead-ends" nga makahatag kanato og kalibog ug kasubo. Sa matag lakang sa atong pagpanaw, dili malikayan nga makasugat kita og mga pagsulay, kapakyasan, ug mga higayon nga mura'g mawala kita sa hustong direksyon. Usahay mawala kita sa atong gisubay nga dalan tungod sa kahadlok, pagduhaduha, o sa impluwensya sa kalibotan nga nagdala kanato sa sayop nga agianan.
Apan bisan pa niana, anaa kanunay ang kahigayunan sa pagpangita og dalan sa laing paagi. Ang matag sayop mahimo usab nga mahimong leksyon aron kita motubo ug mahimong mas lig-on sa pag-atubang sa kinabuhi. Sama sa giingon ni Paulo Coelho sa iyang 1987 novel nga The Alchemist, "We always know which is the best road to follow, but we follow only the road that we have accustomed to." Kasagaran, mopili kita sa dalan nga atong naanad bisan kabalo ta nga dili kini mao ang labing maayo alang kanato.
Busa, mga igsoon, kon ang kinabuhi usa ka pagpanaw, pili-a ang dalan nga walay daghang mibiyahe-ang dalan nga puno sa pagtuo, paglaum, ug pag-alagad sa Ginoo. Pananglitan, pili-a ang dalan sa Ginoo, dili ang ato lamang kaugalingong gusto. Kay bisan lisod ug makapoy usahay ang maong dalan, kini usab ang dalan nga magdala kanato ngadto sa tinuod nga kalinaw, katuyoan, ug kalipay sa kinabuhi. Hinaut pa unta.

ANG PAGBASA GIKAN SA BASAHON NI PROPETA OSEAS (Hos. 11:1-4,8-9)

Ang GINOO miingon, “Gihigugma ko ang Israel sa bata pa siya, gitawag ko ang akong anak nga didto sa Ehipto. Dihang gipunayan ko sila pagsangpit, nag-anam hinoon silag palayo kanako. Nagpadayon sila sa pagsimba kang Baal, ug sa pagsunog ug insenso sa ilang diosdios. Akoy nagtudlo sa Israel sa paglakaw, ug nagkugos kaniya, apan wala sila masayod nga akoy nag-amoma kanila. Gihigtan ko sila sa mga pisi sa kaluoy, ug lig-ong higot sa gugma, ug nahimo ako nga ilang magtatabang sa pagpagaan sa ilang yugo, ug miduko ako aron sa pagpakaon kanila.”
“Unsaon ko man sa pagbiya kanimo, O Israel? Unsaon ko man sa pagtugyan kanimo ngadto sa laing kamut? Unsaon ko man sa paghimo kanimo nga sama kang Adma? Unsaon ko man sa paghimo kanimo nga sama kang Seboyim? Dili buot ang akong kasingkasing niana, kay misamot ang akong gugmag kaluoy kanimo. Dili ko ipadayon ang pintas kong kasuko; dili ko gub-on pag-usab ang Israel! Kay ako Dios man ug dili tawo, ang Balaan uban kaninyo, ug dili ako moanha kaninyo diha sa kasilag.”

ANG PULONG SA GINOO.
SALAMAT SA DIOS.

SALMO RESPONSORYO
(Ps. 80:2, 3. 15-16)

T. Pakitaa kami sa imong nawong, Ginoo, ug maluwas kami.

O magbalantay sa Israel, pamati, gikan sa imong trono diha sa kerubin, padan-ag, Dasiga ang imong gahum.

T. Pakitaa kami sa imong nawong, Ginoo, ug maluwas kami.

Sa makausa pa, O Ginoo sa kagahuman, dung-awa kami gikan sa langit, ug tan-awa; Atimana pag- ayo kining parasan, ug bantayi ang gitanum sa imong kamut nga tuo (ang anak sa tawo nga imong gihimong makusganon).

T. Pakitaa kami sa imong nawong, Ginoo, ug maluwas kami.

T. Aleluya.
Miabot na gayod ang panahon nga maghari na ang Dios! Busa hinulsoli ug biyai ang inyong mga sala ug tuohi ninyo ang Maayong Balita.
T. Aleluya.

ANG PAGBASA GIKAN SA EBANGHELYO SUMALA NI SAN MATEO (Mt. 10:7-15)

Si Jesus miingon sa iyang mga tinun-an, “Lakaw kamo ug isangyaw nga hapit na maghari ang Dios. Ayoha ninyo ang mga masakiton, banhawa ang mga minatay, hinloi ang mga sanlahon, ug aboga ang mga yawa. Nakadawat kamo nga walay bayad, busa panghatag kamo sa walay pagpangayog bayad. Ayaw kamo pagdalag kuwarta —kuwartang bulawan, plata, o bronsi; ayaw pagdalag puntil sa inyong pagpanaw, ni ilisan, ni sapatos, ni sungkod. Ang mga mamumuo angay hatagan sa iyang kabuhian.”
“Inig-abot ninyo sa usa ka Iungsod kon balangay, pangita kamog tawo nga moabiabi kaninyo, ug pabilin uban kaniya hangtud nga mobiya kamo niadtong dapita. Inigdayon ninyo sa usa ka balay, ingna ang tagbalay, ‘Ang kalinaw mag-uban kaninyo.’ Kon modawat kaninyo ang tagbalay, ibilin kanila ang inyong panghinaut sa kalinaw; apan kondili, bakwia ang inyong panghinaut. Ug kon anaay balay o lungsod nga dili modawat kaninyo o dili mamati kaninyo, biyai kanang dapita ug taktaka ang abog sa inyong tiil. Hinumdomi kini: Sa adlaw sa Paghukom mas maluoy pa ang Dios sa mga tawo sa Sodoma ug sa Gomora kay sa mga tawo nianang lungsora!”

ANG EBANGHELYO SA GINOO.
DAYGON IKAW, O CRISTO.

KATILINGBANONG PAG-AMPO
P: Mag-ampo kita sa Dios Amahan nga nagbuot nga ang tanang tawo maluwas ug kinahanglan masayud sa kamatuoran: MAGHARI KA KANAMO, O DIOS.

1. Nga ang Espiritu Santo mogiya sa Santo Papa, sa mga kaobispohan ug mga kaparian sa ilang pagpasiugda sa katuyoan sa misyon. Mag-ampo kita sa Ginoo.

2. Nga ang mga misyonero mopaila kang Cristo ngadto sa kalibutan dili pinaagi sa gahum o dungog, kundili sa mapainubsanong pagpangalad. Mag-ampo kita sa Ginoo.

3. Nga ang gugma sa Dios ug sa mga silingan makapadasig sa mga layko sa pagduyog sa tahas sa misyon sa Simbahan. Mag-ampo kita sa Ginoo.

4. Nga ang mga Kristiyanos maka-amgo sa ilang mga katungdanan sa pagpakaylap sa Maayong Balita sa kaluwasan sa tanan. Mag-ampo kita sa Ginoo.

5. Nga ang mga batan-ong kalalakinhan ug kababayinhan masibot sa pagtubag sa panawagan ni Cristo ug sa pag-alagad diha sa apostolado sa misyon. Mag-ampo kita sa Ginoo.

P: Dios among Amahan, ikaw ang nagbuot nga ang imong Gingharian isangyaw ug tukoran bisan asa. Pinaagi sa pagpangama ni San Bernabe, itugot nga magmabungahon ang among makugihong paghago. Kini among gipangayo pinaagi ni Cristo among Ginoo. Amen.

Source:
Immaculate Conception Lumbayao Chapel

08/07/2026

HULYO 8, 2026– MIYERKOLES
Ikanapulog-Upat nga Semana Sulod sa Tuig
(Green)

TUDLING SA EBANGHELYO

Ang mga batan-ong misyonero sa kapanahunan karon malagmit mangutana kon inig abot ba nila sa lugar sa ilang misyon aduna bay "cell phone signal" didto. Ang kauswagan sa teknolohiya nga atong nahuptan karon mas makapadali, makapasayon, ug mas makapalapnag sa Pulong sa Ginoo ngadto sa mas labing dakung pundok sa katawhan. Pinaagi sa social media, online nga pagwali, ug dali nga komunikasyon, mas sayon na karon ang pag-abot sa mga tawo bisan pa sa layo nga mga dapit.
Balik sa kaniadto, gibuhat sa mga misyonero ang tanang paagi nga ilang makaya ug giasdang ang nagkalain-laing matang sa mga kalisdanan aron lamang mahatod ang mensahe sa Ginoo. Dayegon gayud ang mga kahago sa mga misyonero nga maoy unang nag-ugmad niadtong dapita, tungod kay bisan walay kasayon sama sa atong naangkon karon, wala sila moundang sa ilang katungdanan. Gigamit sa mga apostoles ang ilang tingog ug lawas aron ikasangyaw ang Pulong sa Ginoo ngadto sa mga tawo, bisan pa sa daghang mga kalisdanan, kakapoy, ug mga hulga sa ilang kinabuhi.
Daw ang kauswagan sa teknolohiya karon dili gihapon makatupong sa kasibot, kaisog, ug pagtoo nga gipakita sa mga apostoles ug sa atong mga unang misyonero. Ang ilang dedikasyon ug gugma sa pag-alagad nagpabiling inspirasyon sa mga misyonero karon aron ipadayon ang buluhaton sa pagwali ug pag-alagad sa Ginoo bisan unsa pa man ang mga hagit sa panahon. Hinaut pa unta.

ANG PAGBASA GIKAN SA BASAHON NI PROPETA OSEAS (Hos. 10:1-3, 7-8, 12)

Ang Israel paras nga himunga. Sa dihang midaghan ang bunga niini, midugang usab siya pagpamuhat og mga halaran; sa pag-uswag sa iyang nasud, gilig-on usab niya ang iyang mga haliging sagrado. Malimbongon ang ilang kasingkasing; kinahanglang antuson nila ang silot sa ilang sala. Kay dugmokon sa GINOO ang mga halaran nila, ug ang ilang mga haliging sagrado. Karon makaingon sila, “Kami walay hari, kay wala man namo kahadloki ang GINOO, unsa may kapuslanan sa hari alang kanato?”
Mahanaw ang hari sa Samaria, daw sinapsap sa kahoy nga naglutaw sa tubig. Gun-obon ang mga halaran sa Aben nga maoy nakaangin sa Israel sa pagpakasala. Sa ilang mga halaran manubo ang mga katunokan ug mga kasagbotan; ug unya moingon sila sa mga bukid, “Taboni kami”; sa kabungtoran moingon, “Pangatumpag kamo kanamo.”
Ipugas ang binhi sa katarong, aron maani ninyo ang bunga sa gugma nga walay paglubad; daroha ang uma ninyong yuta; panahon na nga pangitaon ta ang GINOO, aron ipaulan niya kaninyo ang kaluwasan.

ANG PULONG SA GINOO.
SALAMAT SA DIOS.

SALMO RESPONSORYO
(Ps. 105:2-3, 4-5, 6-7)

T. Pangitaa kanunay ang nawong sa Ginoo.

Awiti siya, awita ang iyang kadayganan, isangyaw ang tanan niyang katingalahang mga buhat. Himayaa ang iyang balaang ngalan; pagsadya kamo, O mga kasingkasing nga nangita sa Ginoo.

T. Pangitaa kanunay ang nawong sa Ginoo.

Paabota ang Ginoo diha sa iyang gahum; paningkamuti ang pag-alagad kaniya kanunay. Hinumdomi ang katingalahang mga buhat nga iyang nahimo; Ang iyang kahibulongang mga buhat, ug ang mga hukom nga iyang gibungat.

T. Pangitaa kanunay ang nawong sa Ginoo.

Kamong mga kaliwat ni Abraham, iyang mga sulogoon, mga anak ni Jacob, ang iyang mga pinili. Siya, ang Ginoo, mao ang atong Dios; sa tibuok kalibutan nagahari ang iyang kahukmanan.

T. Pangitaa kanunay ang nawong sa Ginoo.

ALELUYA (Mk. 1:15)
T. Aleluya.
Miabot na gayod ang panahon nga maghari na ang Dios! Busa hinulsoli ug biyai ang inyong mga sala ug tuohi ninyo ang Maayong Balita.
T. Aleluya.

ANG PAGBASA GIKAN SA EBANGHELYO SUMALA NI SAN MATEO (Mt. 10:1-7)

Gitigom ni Jesus ang iyang napulogduha ka tinun-an ug gihatagan silag gahum sa paghingilin sa mga dautang espiritu ug sa pag-ayo sa tanang sakit ug balatian. Ang mga ngalan sa napulogduha ka apostoles mao kini: ang una si Simon (nga ginganlag Pedro) ug ang iyang igsuon nga si Andres, si Santiago ug ang iyang igsuon nga si Juan, mga anak ni Sebedeo; si Felipe ug si Bartolome; si Tomas ug si Mateo, ang kobrador sa buhis; si Santiago, ang anak ni Alfeo, ug si Tadeo; si Simon, ang patriyota, ug si Judas Iscariote, ang nagbudhi kang Jesus.
Kining napulog-duha gipadala ni Jesus uban niining mga pahimangno: “Ayaw kamo pag-adto sa kayutaan sa mga dili Judio, ni sa bisan unsang lungsod sa Samaria. Adtoa hinoon ninyo ang nangawala nga mga karnero sa nasod sa Israel. Lakaw kamo ug isangyaw nga hapit na maghari ang Dios.”

ANG EBANGHELYO SA GINOO.
DAYGON IKAW, O CRISTO.

KATILINGBANONG PAG-AMPO
P: Isip balaang katawhan sa Dios nga gitawag sa daghang paagi sa pagpakaylap sa Maayong Balita sa Gingharian, atong ihalad ang atong mga panginahanglan sa atubangan sa Amahan kinsa nagapadayon sa pag-amuma kanato: GINOO, DUNGGA KAMI.

1. Nga kadtong gitawag sa Simbahan sa paggiya sa katawhan sa Dios makabaton sa kaisog sa pagpakaylap sa Ebanghelyo ni JesuCristo hangtod sa tumoy sa kalibutan. Mag-ampo kita sa Ginoo.

2. Nga kadtong nangita sa Ginoo makakaplag og katin-awan ug madasig sa pagtubag sa pagdapit sa Dios kanila nga mahiusa kaniya. Mag-ampo kita sa Ginoo.

3. Nga ang mga kabatan-onan makaila sa tingog ni Cristo nga nagtawag kanila ngadto sa kinabuhi sa pagpangalagad. Mag-ampo kita sa Ginoo.

4. Nga ang mga masakiton makadawat sa kahupayan ug kusog gikan sa nag-alima kanila. Mag-ampo kita sa Ginoo.

5. Nga ang atong mga minahal nga nangamatay makapahulay diha sa kalinaw sa Gingharian ni Cristo. Mag-ampo kita sa Ginoo.

P: Langitnong Amahan, sa imong pagtawag kanamo diha sa mga panghitabo sa matag adlaw sa kinabuhi, itugot nga ang imong Espiritu mohatag sa matag usa kanamo sa pag-ingon: “Ginoo, ania ako, mianhi ako aron sa pagtuman sa imong kabubut-on.” Kini among gipangayo pinaagi ni Cristo among Ginoo. Amen.

Source:
Immaculate Conception Lumbayao Chapel

Address

Purok 1 Maharlika Bislig City Surigao Del Sur
Bislig
8311

Telephone

+639811085976

Website

facebook.com

Alerts

Be the first to know and let us send you an email when Sr. San Roque Chapel Choir Maharlika posts news and promotions. Your email address will not be used for any other purpose, and you can unsubscribe at any time.

Contact The Place Of Worship

Send a message to Sr. San Roque Chapel Choir Maharlika:

Sr. San Roque Chapel Choir Maharlika