23/05/2026
𝐏𝐀𝐀𝐍𝐘𝐀𝐘𝐀 | 𝗟𝗶𝗻𝗴𝗴𝗼 𝗻𝗴 𝗣𝗲𝗻𝘁𝗲𝗸𝗼𝘀𝘁𝗲𝘀 | Mayo 24, 2026
Hango sa wikang Griego na Πεντηκοστή (Pentēkostē), ang “Pentekostes” ay nangangahulugang “ikalimampung araw” mula sa Maluwalhating Pagkabuhay ni Hesus.
Mula noong ikaapat na dantaon, ang Pentekostes ay pag-aalaala ng Simbahan sa pagbaba Niya sa mga alagad ni Hesus at unti-unti nang naging pista ng Espiritu Santo. Sa pagbaba ng Banal na Espiritu sa mga Apostoles ay nabalot sila ng tapang ipahayag ang Ebanghelyo at grasya ng Diyos. Ito ang naging hudyat ng pagpapahayag ng Simbahan na itinatag ni Hesus kaya kung minsan, ang araw na ito ay sinasabi ring “Kaarawan ng Simbahang Katolika”
𝗧𝗮𝘆𝗼 𝗮𝗻𝗴 𝗦𝗶𝗺𝗯𝗮𝗵𝗮𝗻.
Ang Pentekostes na simula ng pakikipamuhay sa atin ng Espiritu Santo ay napakadakila sa atin. Siya ang Diwa ng Pag-Ibig at Pagkakaisa ng Diyos na sumasaatin upang maging buhay at gabay natin sa lahat ng oras. Mula ng Siya’y sumanib sa Simbahan patuloy niya itong ginagabayan patungo sa katuparan ng paghahari ng Diyos na siyang inihayag ni Kristo at patuloy na ihahayag ng Simbahan.
Ang Espiritu Santo ay nanatili na sa Simbahan. Siya rin ang tumatanglaw at tumutulong sa mga nagpapahayag ng Mabuting Balita ng pag-ibig ng Diyos at balangkas ng kaligtasan para sa lahat.
Panalangin para sa Linggo ng Pentekostes
Aming Amang Makapangyarihan,
Sa araw na ito ng Pentekostes, inaalala namin ang pagbubuhos ng Iyong Espiritu Santo sa mga apostol. Puspusin Mo rin kami ng Iyong liwanag at lakas, Upang maging matatag sa pananampalataya, mapayapa sa aming mga salita, At matapat sa paglilingkod sa aming kapwa.
Espiritu Santo, aming Patnubay,
Ipagkaloob Mo sa amin ang Iyong pitong kaloob:
Karunungan, unawa, payo, lakas, kaalaman, kabanalan, at takot sa Diyos.
Gisingin Mo ang aming puso upang mas mapalalim ang aming ugnayan sa Diyos at sa kapwa.
Sa gitna ng kaguluhan ng mundo,
Maging gabay Ka nawa sa aming mga desisyon,
Liwanag sa aming mga tanong,
At pag-asa sa oras ng pangangailangan.
Ito ang aming dalangin, Sa ngalan ni Hesus na aming Panginoon at Tagapagligtas.
Amen.
