https://www.facebook.com/109017327426422/

Belison Htdhmm, Sinaja, Belison (2026)

16/01/2022

𝗞𝗔𝗣𝗜𝗘𝗦𝗧𝗔𝗛𝗔𝗡 𝗦𝗔𝗡𝗚 𝗦𝗔𝗡𝗧𝗢 𝗡𝗜𝗡𝗢

𝗦𝗶𝗻-𝗼 𝘀𝗶 𝗦𝗮𝗻𝘁𝗼 𝗡𝗶𝗻𝗼?

Ang Santo Niño amo ang aton Ginoong Jesu-Cristo, nga ginalaragway bilang isa ka nagayuhom nga bata nga naga-uyat sang kalibutan sa iya wala nga kamot kag sa iya tuo amo ang tanda sang Santisima Trinidad.

Ang ulo sang bata may korona; ang iya mga tiil nakatungtong sa pedestal; ang iya lawas naputos sa p**a nga harianon nga kapa nga ginaadornohan sang mga alahas, nga ang punta nagasangyad sa iya mga tiil.

Ang tinaga nga "Santo Niño" isa ka Espanyol nga pulong nga kon sayuron "Holy Child" ukon "Balaan nga bata."

Lucas 1:35 (Maayong Balita Biblia)
Ang anghel nagsabat, “Ang Espiritu Santo magakunsad sa imo, kag ang gahom sang Dios magalikop sa imo. Tungod sini ang 𝗕𝗮𝗹𝗮𝗮𝗻 𝗻𝗴𝗮 𝗕𝗮𝘁𝗮 nga matawo sa imo pagatawgon nga Anak sang Dios.

Lucas 1:35 (La Biblia De Las Américas)
“Respondiendo el ángel, le dijo: El Espíritu Santo vendrá sobre ti, y el poder del Altísimo te cubrirá con su sombra; por eso el 𝗦𝗮𝗻𝘁𝗼 𝗡𝗶𝗻𝗼 que nacerá será llamado Hijo de Dios.”

Luke 1:35 (New American Standard Bible)
"The angel answered and said to her, "The Holy Spirit will come upon you, and the power of the Most High will overshadow you; and for that rea*on the 𝗛𝗼𝗹𝘆 𝗖𝗵𝗶𝗹𝗱 shall be called the Son of God."

𝗔𝗡𝗚 𝗗𝗘𝗕𝗢𝗦𝗬𝗢𝗡 𝗞𝗔𝗬 𝗦𝗔𝗡𝗧𝗢 𝗡𝗜𝗡𝗢 𝗦𝗔𝗡𝗚 𝗠𝗚𝗔 𝗣𝗜𝗟𝗜𝗣𝗜𝗡𝗢

Ang debosyon sang mga Pilipino nga Katoliko kay Santo Niño Jesus nag-umpisa halin sa pag-abot gid sang Kristiano nga pagtuo sa pangpang sang Pilipinas.

Sang mga tuig 1521; ang Portugues nga si Ferdinand de Magallanes (Magellan), sa idalom sa pag-alagad ni Haring Carlos V sang Espanya, nagbiyahe sa pagpangita sa sidlangan nga ruta pakadto sa mga isla sang mga panakotan. Sang Abril 7, 1521, nakadungka sia sa Limasawa, nabagatnan sang Leyte, kag didto nakilala niya ang lokal nga tagdumala nga si Rajah Kulambo, nga nagpakilala sa iya sa tagdumala sang isla sang Cebu nga si Rajah Humabon kag sa Rayna nga si Hara Humamay.

Sang Abril 14, 1521, ginhatagan sila (si Rajah Humabon kag Hara Humamay) ni Magelllan sang tatlo ka mga regalo: isa ka krus, imahe sang Birheng Maria kag imahe ni Santo Niño bilang parte sa ila pagpabautismo. Sang nangin Kristiano nga Katoliko na si Rajah Humabon, ginkuha niya ang Kristiano nga ngalan nga "Haring Carlos," samtang ang iya consorte nga si Hara Humamay ginbautisohan bilang si "Rayna Juana." Suno kay Pigafetta—nga kaupod ni Magellan kag isa ka manunolat, upod sa Rajah, mga 500 ka mga kalalakinhan, upod ang rayna kag 40 ka mga kababainhan ang nakonbertir man paagi kay Padre Valderrama. Sa seremonya, halimbawa, si Rajah Kulambo sang Limasawa nagpakonbertir man kag ginhingalanan liwat bilang Don Juan, samtang ang iya Muslim nga kapitan ginhingalanan liwat nga Don Cristobal.

Sang napatay sang tinawo ni Lap**apu si Magellan sang Abril 27, 1521 sa patag-awayan sa Mactan, nagpauli ang mga kaupod ni Magellan.

Matapos ang 40 ka tuig, sang Abril 27, 1565, si Miguel Lopez de Legazpi nag-abot sa Cebu. Nagtilaw sia sa pagsakop nga mahidinaeton, apang ang iya pagtinguha wala ginbaton. Ginguba niya ang baryo ni Rajah Tupas, sa ila pagpangsulod, nakita sang isa ka Espanyol nga marinero nga si Juan Camos ang isa ka kahon nga nagaunod sang imahe sang Santo Niño.

Ang Agustino nga mga prayle nga kaupod ni Legaspi ginproclamar ang imahe nga milagroso kag nagpatukod sang isa ka simbahan sa amo nga duog kon sa diin nakit-an ang imahe, nakilala subong nga Basilica Minore del Santo Niño.

Ang imahe sang Santo Niño de Cebu ginakabig nga pinakatigulang nga pangrelihiyon nga relikya sa Pilipinas, upod ang Krus ni Magellan.

Ang debosyon kay Santo Niño Jesus, pupolar nga ginatawag "Señor Santo Niño" nagapabilin nga buhi kag mabakod sa Pilipinas tubtob subong.

𝗠𝗚𝗔 𝗗𝗘𝗧𝗔𝗟𝗬𝗘 𝗦𝗔𝗡𝗚 𝗜𝗠𝗔𝗛𝗘 𝗦𝗔𝗡𝗚 𝗦𝗔𝗡𝗧𝗢 𝗡𝗜𝗡𝗢 𝗞𝗔𝗚 𝗔𝗡𝗚 𝗚𝗜𝗡𝗔𝗦𝗜𝗠𝗕𝗢𝗟𝗢 𝗦𝗜𝗡𝗜

▪ 𝗞𝗢𝗥𝗢𝗡𝗔 - Ang ulo may korona bangod nagasimbolo ini nga si Jesu-Cristo amo ang hari naton kag Hari sang mga hari (Bugna 17:14).
▪ 𝗣𝗨𝗟𝗔 𝗡𝗚𝗔 𝗞𝗔𝗣𝗔 - Nagasimbolo sang pagkahari (Mat 27:28).
▪ 𝗕𝗔𝗦𝗧𝗢𝗡 - Ang baston nga salsalon nagasimbolo sang awtoridad, siya amo ang magadumala ukon magagahom sa aton nga tanan (Bugna 19:15, Salmo 2:9).
▪ 𝗚𝗟𝗢𝗕𝗢 𝗡𝗚𝗔 𝗠𝗔𝗬 𝗞𝗥𝗨𝗦 - Ang wala niya nga kamot nagauyat sang globo ukon kalibutan nga may krus bangod ginluwas ni Cristo ang kalibutan paagi sa pagkamatay niya sa krus. Nagasimbolo man ini nga si Cristo amo ang magagahom sang tanan nga kapungsoran sa baston nga salsalon (Bugna 12:5).
▪ 𝗔𝗡𝗚 𝗦𝗔𝗡𝗧𝗜𝗦𝗜𝗠𝗔 𝗧𝗥𝗜𝗡𝗜𝗗𝗔𝗗 - Ang giho ukon ang senyas sa tuo nga kamot nagasimbolo sa Santisima Trinidad: 𝗔𝗻𝗴 𝗱𝘂𝗵𝗮 𝗸𝗮 𝘁𝘂𝗱𝗹𝗼 𝗻𝗴𝗮 𝗻𝗮𝗴𝗮𝘁𝗶𝗻𝗱𝗼𝗴, nagasimbolo sa duha ka mga kinaugali ni Jesu-Cristo: Matuod sia nga tawo (Juan 1:14) kag matuod sia nga Dios (Juan 1:1; Colosas 2:9); 𝗔𝗻𝗴 𝗻𝗮𝗯𝗶𝗹𝗶𝗻 𝗻𝗴𝗮 𝘁𝗮𝘁𝗹𝗼 𝗸𝗮 𝗺𝗴𝗮 𝘁𝘂𝗱𝗹𝗼, nagasimbolo sa tatlo ka persona sang Dios: Ang Amay, ang Anak, kag ang Espiritu Santo (Mateo 28:19).

𝗗𝗜𝗢𝗦𝗗𝗜𝗢𝗦 𝗔𝗡𝗚 𝗦𝗔𝗡𝗧𝗢 𝗡𝗜𝗡𝗢?

Ang imahe sang Santo Niño wala ginasimba bilang isa ka dios, ukon ginhimo sang Simbahan nga Katoliko nga isa ka diosdios ukon ginadiosdios. Maathag ang pagpanudlo sang Simbahan nga Katoliko tuhoy sa mga imahe pareho sa imahe sang Santo Nino:

"Ang pagkilala nga ginahatag sa mga balaan nga mga imahe isa ka "matinahuron nga pagtahod" indi ang pagsimba nga sa Dios gid lamang:

Ang pangrelihiyon nga pagsimba wala ginatudlo sa mga imahe mismo nila, ginakabig nga mga butang lamang, kundi sa idalom sang ila nga kinatuhay nga mga aspeto bilang mga imahe nagatuytoy sa aton sa Dios nga nagpakatawo. Ang paggiho padulong sa imahe wala nagatapus bilang nga sa imahe mismo, apang nagapadulong sa kon sin-o ang sa imahe" [CCC 2132] [Binadbad sa Hiligaynon].

Ang imahe sang Santo Niño indi diosdios bangod si Jesu-Cristo amo ang ginarepresentar sang amo nga imahe. Ang paghimaya, pagpadungog, pagpasalamat, kag pagdayaw wala nagapakadto sa imahe mismo kundi sa kon sin-o ang ginarepresentar sang imahe nga amo ang aton Ginoong Jesu-Cristo nga buhi.

Ang "Santo Nino" wala lamang ini nagatumod sa estatwa ukon imahe mismo, kundi ang ginarepresentar sang imahe nga amo ang bata nga si Jesu-Cristo nga aton Ginoo.

Ang tatlo ka pinakatigulang nga imahe sang Santo Niño sa Pilipinas amo ang masunod: Santo Niño de Cebu, Santo Niño de Tondo, kag Santo Niño de Villa, Arevalo Iloilo.

VIVA SEÑOR SANTO NIÑO!

02/01/2022

𝗔𝗡𝗚 𝗘𝗣𝗜𝗙𝗔𝗡𝗜𝗔 𝗦𝗔𝗡𝗚 𝗚𝗜𝗡𝗢𝗢

𝗘𝗡𝗘𝗥𝗢 𝟮 | Subong nga adlaw ginasaulog sang Santa Iglesia Katolika ang Epifania sang Ginoong Jesu-Cristo ukon The Epiphany of the Lord Jesus Christ, ang Dios nga nahimo tawo. Ini kilala man sang tanan nga "Three Kings."

Ini nagasaulog sa rebelasyon (theophany) sang Dios nga nagpakatawo bilang si Jesu-Cristo.

Ang pulong nga Epifania ukon Epiphany naghalin sa Griego nga pulong "Epiphaneia," buot silingon "Pagpakita" ukon "Manipestasyon."

Ginasaulog sa piesta sang Epifania ang madamo nga mga paagi nga ginpakilala ni Cristo ang iya kaugalingon sa kalibutan, labaw sa tanan sa tatlo ka mga hitabo nga naghayag sang misyon kag pagkadios ni Cristo: ang pagbisita sang mga Mago (Mat. 2:1:12), ang pagbautismo kay Jesus (Mar. 1:9:11), kag ang Milagro sa kasal sa Cana (Juan 2:1-11).

Ang pagsaulog sa subong nga adlaw konektado sa pagbisita sang mga Mago sa Betlehem agod simbahon ang hari sang mga Judeo, si Jesu-Cristo. Suno sa Biblia nagdala sila sang mga regalo nga: Bulawan, Insiyenso, kag Mira.

Ang mga Mago ginakabig nga mga Hentil (ukon tawo nga Indi-Judeo) kag si Jesu-Cristo ginhayag sia sa sini nga mga Hentil nga mga tawo agod ipakita nga natawo Sia para sa kaluwasan indi lamang sa mga Judeo kundi pati man sa tanan nga nga tawo nga indi Judeo.

Suno sa mga dukumento ang mga Mago nga nagbisita kay Jesus amo sanday Melchor, Baltazar kag Gaspar.

“At that time in the reign of Augustus, on 1st January the Magi brought him gifts and worshipped him. The names of the Magi were Bithisarea, Melichior and Gathaspa” (Excepta Latina Barbari).

𝗔𝗡𝗢 𝗔𝗡𝗚 𝗠𝗚𝗔 𝗦𝗜𝗠𝗕𝗢𝗟𝗢 𝗦𝗔𝗡𝗚 𝗥𝗘𝗚𝗔𝗟𝗢?

1. 𝗕𝘂𝗹𝗮𝘄𝗮𝗻 - Nagasimbolo sang pagkahari ni Jesus. Si Cristo Hari.

2. 𝗜𝗻𝘀𝗶𝘆𝗲𝗻𝘀𝗼 - Nagasimbolo sang pagkapari ni Jesu-Cristo. Si Cristo Pari

3. 𝗠𝗶𝗿𝗮 - Nagapresentar sa Pasyon ni Cristo, sa pagpakasakit kag pagkamatay ni Cristo agod luwasan kita sa aton mga sala. Si Cristo Manlulowas

08/12/2021

𝗣𝗔𝗡𝗚𝗔𝗠𝗨𝗬𝗢 𝗦𝗔 𝗜𝗡𝗠𝗔𝗖𝗨𝗟𝗔𝗗𝗔 𝗖𝗢𝗡𝗖𝗘𝗣𝗖𝗜𝗢𝗡

O Maria, Iloy ni Jesus, kag akon man ginahigugma nga iloy, ginakilala kag ginahigugma ko ikaw bilang ang Inmaculada Concepcion. Ang imo kalag labing matahom bangod ini puno sang grasya kag hilway sa tanan nga mga sala.

Maria, Iloy nga labing putli, sa imo pagsabdong ginahatag ko sa imo ang akon lawas kag akon kalag. Hupti ini sa putli kag balaan. O Maria, ginpanamkon nga wala sala, ig-ampo mo kami nga nagadangop sa imo.

Amen.

21/11/2021

𝗣𝗔𝗡𝗚𝗔𝗠𝗨𝗬𝗢 𝗦𝗔 𝗔𝗧𝗢𝗡 𝗚𝗜𝗡𝗢𝗢𝗡𝗚 𝗝𝗘𝗦𝗨𝗦, 𝗖𝗥𝗜𝗦𝗧𝗢𝗡𝗚 𝗛𝗔𝗥𝗜

O Ginoo nga amon Dios, Ikaw lamang ang Labing Balaan nga Hari kag tagdumala sang mga pungsod.

Nagapangamuyo kami sa Imo, Ginoo, sa daku nga kalauman nga mabaton sa Imo, O Diosnon nga Hari, ang kaluoy, kalinong, kinamatarong kag tanan nga maayo nga mga butang.

Amligi, O Ginoo nga amon Hari, ang amon mga pamilya, kag ang duta nga amon kinaanakan.

Bantayi kami nga nagapangamuyo Labing isa nga Matutom.

Amligi kami sa amon mga kaaway kag sa imo mataranong nga paghukom.

Patawara kami, O soberano nga hari, sa amon mga sala batok sa Imo.

Jesus, hari ikaw sang kaluoy.

Nagakabagay kami sang Imo matarong nga paghukom.

Maluoy ka sa amon, O Ginoo, kag patawara kami.

Nagasalig kami sa Imo Daku nga kaluoy.

O makapulunaw nga Hari, nagaduko kami sa atubangan mo kag nagapangamuyo,

Kabay ang imo paghari, Imo ginharian, kilalahon sang kalibutan. Amen.

20/11/2021

𝗦𝗢𝗟𝗘𝗠𝗡𝗜𝗗𝗔𝗗 𝗦𝗔𝗡𝗚 𝗞𝗥𝗜𝗦𝗧𝗢𝗡𝗚 𝗛𝗔𝗥𝗜

𝗡𝗢𝗕𝗜𝗬𝗘𝗠𝗕𝗥𝗘 𝟮𝟭 | Subong nga adlaw, ginasaulog sang Santa Iglesia Katolika ang Solemnidad sang aton Ginoong Jesus, Kristong Hari ukon Solemnity of our Lord Jesus, Christ the King.

Ang Piesta nga ini gintukod ni Pope Pius XI sang 1925 bilang bulong sa sekularismo, nga isa ka pamaagi sang pagkabuhi nga ginapanas ang Dios sa pinsar kag kabuhi sang tawo kag ginahimo ang iya kabuhi pareho nga wala sang Dios. Ang piesta gintakna nga ibantala sa makapukaw kag epektibo nga paagi ang paghari ni Cristo sa mga indibidwal, mga pamilya, sosyodad, mga gobyerno, kag mga nasyon.

Kaangay sa ginsiling niya sa iya Encyclical nga Quas primas, kon sa diin paagi sini gintukod niya ang ini nga piesta, si Pope Pius XI nagalaum nga ang piesta nga ini magahimo sang tatlo ka mga epekto:

1. Nga ang mga nasyon makita nga ang Simbahan may kinamatarong sa kahilwayan, kag immunidad sa estado (Quas Primas 32).

2. Nga makita sang mga pangulo kag mga nasyon nga nakagapos sila nga maghatag respeto kay Cristo (Quas Primas 31).

3. Nga ang mga tumuluo makaangkon sang kusog kag kaisog gikan sa pagsaulog sang piesta, samtang ginapahanumdon sa aton nga si Cristo dapat maghari sa aton mga kasingkasing, mga hunahona, mga pagbuot kag mga lawas (Quas primas 33).

Ang adlaw nga ini amo man ang katapusan nga Dominggo sa Liturhikal nga tuig sa Kalendaryo sang Simbahan. Buot silingon ang masunod nga dominggo yara na kita sa panahon sang adbiento.

Ginakoronahan naton ang pagtakop sang tuig paagi sa pagbantala nga si Jesus amo ang Hari kag Ginoo, sang kalibutan, sang Simbahan, kag sang aton mga kasingkasing. Sa pagsaulog naton sang Kristong Hari, ginabag-o naton ang aton pagkatampad sa Iya kag ang aton luyag nga kuntani magahari sia sing himpit sa aton kabuhi. Bilang isa ka Simbahan, ginabag-o man naton ang aton paglaom nga ang Iya ginharian magaabot sa iya kapunoan kon ang tanan nga mga butang isahon kay Cristo (Efe. 1:10).

Bag-o ang reporma sang Romano nga Kalendaryo sang 1969, ang piesta nga ini orihinal nga ginasaulog sa katapusan nga Dominggo sang Octobre.

CRISTO AMON HARI, UMABOT SA AMON ANG IMO GINHARIAN!

14/11/2021

𝗠𝗚𝗔 𝗕𝗔𝗟𝗔𝗦𝗔𝗛𝗢𝗡 𝗦𝗔 𝗦𝗔𝗡𝗧𝗢𝗦 𝗡𝗚𝗔 𝗠𝗜𝗦𝗔
Nobiyembre 14, 2021
Ika-trenta y tres nga Dominggo sang Ordinaryo nga Panahon (Tuig B)

𝗡𝗔𝗛𝗔𝗨𝗡𝗔 𝗡𝗚𝗔 𝗕𝗔𝗟𝗔𝗦𝗔𝗛𝗢𝗡: Balasahon gikan sa Libro ni Daniel nga Propeta (Daniel 12:1-3):

Nagsiling pa ang daw sa tawo, “Sa sina nga tion, magadala si Micael sang silot nga halin sa Dios. Si Micael nga ini amo ang gamhanan nga pangulo nga manug-apin sang imo mga kasimanwa. Mangin mabudlay gid ang situasyon sa sina nga tion, kag ina nga kabudlayan wala pa gid natabo halin sang pagsugod sang mga nasyon. Pero pagaluwa*on sa sina nga kabudlayan ang kapareho mo nga mga Israelinhon nga ang ila mga ngalan nasulat sa libro nga ginlistahan sang mga may kabuhi nga wala sing katapusan. Pagabanhawon ang madamo nga nagkalamatay. Ang iban sa ila magabaton sang kabuhi nga wala sing katapusan, pero ang iban pakamalauton kag pakahuy-an sa wala sing katapusan. Atong mga nakaintiendi sang kamatuoran kag nagatudlo sa mga tawo nga magkabuhi sing matarong magasilak pareho sang mga bituon sa langit sa wala sing katapusan.

𝗜𝗞𝗔𝗗𝗨𝗛𝗔 𝗡𝗚𝗔 𝗕𝗔𝗟𝗔𝗦𝗔𝗛𝗢𝗡; Balasahon gikan sa sulat sa mga Hebreo (Hebreo 10:11-14, 18):

Ang mga pari adlaw-adlaw gid ang ila serbisyo didto sa simbahan sa paghalad sa Dios. Ugaling ang ila mga halad nga palareho man lang indi gid makakuha sang mga sala sang mga tawo. Pero si Cristo kaisa gid lang naghalad para sa aton mga sala kag indi na gid kinahanglan nga liwaton pa. Pagkatapos nagpungko siya sa tuo sang Dios. Kag subong didto na siya nagahulat hasta sa tion nga paampuon sang Dios sa iya ang iya mga kaaway. Gani paagi sa isa ka halad, kita nga mga ginlimpyuhan na sa sala ginhimo niya nga wala sing kakulangan sa wala sing katapusan. ... Gani tungod kay ang aton mga sala napatawad na, indi na kinahanglan nga magsagi pa kita halad para sa aton mga sala.

𝗘𝗕𝗔𝗡𝗚𝗛𝗘𝗟𝗬𝗢: Balasahon gikan sa Santos nga Ebanghelyo suno may San Marcos (Marcos 13:24-32):

“Pagkatapos sang pag-antos sa sina nga tiyempo, ang adlaw magadulom, ang bulan indi na magsanag, kag ang mga bituon magakalahulog. Ang mga butang sa langit pagapatalangon sa ila kinaandan nga alagyan. Dayon ako nga Anak sang Tawo makita sa mga panganod nga nagabalik diri sa kalibutan nga may puwerte nga gahom kag kadungganan. Suguon ko ang akon mga anghel sa pagtipon sang akon mga pinili halin sa tanan nga lugar sang kalibutan.” “Magtuon kamo sang leksyon sa kahoy nga higera. Kon ang iya mga sanga nagapanalingsing na, mahibaluan ninyo nga madali na lang ang tig-ilinit. Sa amo man nga bagay, kon makita ninyo nga nagakalatabo na ini nga mga butang nga akon ginasugid sa inyo, mahibaluan ninyo nga madali na lang ako mag-abot. Sa pagkamatuod, magakalatuman ini tanan nga butang sa wala pa mapatay ang mga tawo sa sini nga henerasyon. Madula ang langit kag ang duta, pero ang akon mga pulong indi gid madula kundi matuman gid ini.” “Kon parte sa adlaw ukon oras sang akon pag-abot, wala gid sing may nakahibalo bisan ang mga anghel sa langit ukon ako nga Anak sang Dios, kundi ang Amay gid lang.

13/11/2021

𝗛𝗔𝗡𝗗𝗨𝗠𝗔𝗡𝗔𝗡 𝗡𝗜 𝗦𝗔𝗡𝗧𝗔 𝗙𝗥𝗔𝗡𝗖𝗘𝗦𝗖𝗔 𝗦𝗔𝗩𝗘𝗥𝗜𝗢 𝗖𝗔𝗕𝗥𝗜𝗡𝗜

𝗡𝗢𝗕𝗜𝗬𝗘𝗠𝗕𝗥𝗘 𝟭𝟯 | Subong nga adlaw, ginasaulog sang Santa Iglesia Katolika ang Handumanan ni Santa Francesca Saverio Cabrini ukon Memorial of Saint Frances Xavier Cabrini.

Isa isa ka Italyano-Americano nga madre. Sia amo ang nagtukod sang the Missionary Sisters of the Sacred Heart of Jesus nga amo ang nagapanguna nga suporta sa iya mga ka-Italyano nga mga imigrante sa Estados Unidos.

𝗞𝗔𝗕𝗨𝗛𝗜

Si Santa Francesca natawo nga si Maria Francesca Cabrini sang Hulyo 15, 1850, sa Sant'Angelo Lodigiano, sa Lombard nga Probinsiya sang Lodi, anay sakop sang Emperyo Austriano. Sia ang kinamanghoran sa trese ka mga anak sang mga mangunguma nga sanday Agostino Cabrini kag Stella Oldini. Apat gid lang ang nakaliwas sa ila pagdaku.

Nagdako sia sa mga istorya sang mga misyonero kag nagpinsar sia nga magsulod sa isa ka relihiyoso nga orden. Bangod sa iya maluya nga ikaayong lawas, wala sia ginpasugtan nga magpakigbahin sa Daughters of the Sacred Heart nga nangin iya mga manunodlo kag sa ila pagtuytoy nakuha niya ang iya sertipiko sa pagpanudlo.

Sang 1880, upod sa pito ka mga lamharon nga mga kababainhan, gintukod niya ang Institute of the Missionary Sisters of the Sacred Heart of Jesus.

Madiskarte sia subong nga mapinangamuyuon, nagapangita sia sang mga tawo nga sarang makadonar sang iya mga kinahanglanon sa kwarta, oras, pagtrabaho, kag supporta. Sia kag ang mga upod gusto mangin misyonero sa China; nagkadto sia sa Roma para makakuha para makapamati kay Papa Leo XIII. Ginsingganan sia sang Papa nga "Indi magkadto sa sidlangan, kundi sa nakatundan" sa New York indi sa Tsina nga iya ginaekspektar. Buligan niya ang linibo ka mga imigrante nga mga Italyano nga yara na sa Estados Unidos.

Sang 1889, ang New York daw sa na puno sang kagamo kag kapigadohon, kag sa sini nga bag-o nga kalibutan, nagpadayon sia kag iya nga kaupod. Naghiwat si Cabrini sang Katesismo kag edukasyon para sa mga Italyano nga mga Imigrante kag maghatag sang mga kinahanglanon sang madamo nga mga ilo. Nagpatukod sia sang mga eskwelahan kag mga balay ampunan bisan sa dako nga probabilidad.

Sa madali nga panahon, madamo sang mga pag-ampo kay Cabrini nga magbukas sang mga eskwelahan sa bug-os nga kalibutan. Nagpanglakton sia sa Europa, Central kag South America kag sa bug-os nga Estados Unidos. Nakapatindog sia 67 ka mga institusyon, mga eskwelahan, ospital, kag mga balay alaypan.

Ang iya mga aktibidad wala kapahuwayan tubtob nga napatay sia sang Disyembre 22, 1917, sa Chicago.

SAN FRANCESCA SAVERIO CABRINI, IG-AMPO MO KAMI!

11/11/2021

𝗛𝗔𝗡𝗗𝗨𝗠𝗔𝗡𝗔𝗡 𝗡𝗜 𝗦𝗔𝗡 𝗠𝗔𝗥𝗧𝗜𝗡 𝗗𝗘 𝗧𝗢𝗨𝗥𝗦

𝗡𝗢𝗕𝗜𝗬𝗘𝗠𝗕𝗥𝗘 𝟭𝟭 | Subong nga adlaw, ginasaulog sang Santa Iglesia Katolika ang Handumanan ni San Martin de Tours ukon Saint Martin of Tours.

Ikatlo sia nga Obispo sang Tours. Nagserbe sia sa Romano nga kalbaryo sang Gaul, pero nagbiya sia sa serbisyo militar mga 361 AD, sang nangin gintuton-an sia San Hilario sang Poiters, nga nagpatukod sang monasteryo sa Liguge. Ginconsagrahan sia bilang Obispo sang Caesarodunum (Tours) sang 371. Bilang Obispo aktibo sia sa pagsupil sang bilin sang Gallo-Roman nga relihiyon, apang nagapamatok sia sa bayolente nga pagpanghingabot sa Priscillianista nga sekta sang mga ascetiko.

𝗞𝗔𝗕𝗨𝗛𝗜

Si San Martin natawo mga tuig 316 ukon 336 sa karon pungsod Hungary. Ang iya mga ginikanan mga pagano. Ang iya Amay isa ka opisyal sang militar sang Emperyo Romano. Sang bata pa sia, ginsaylo ang iya Amay sa Pavia sa Norte nga Italya kag diri sia nakuha sa Kristianismo. Nakabaton sia sang doctrina sang sia nagaedad 10 anyos. Bilang bata sia sang isa ka suldado, napilitan sia magsulod sa Romano nga pagkasuldado sang 15 anyos sia.

Nagapanika*og sia sa kabuhi nga mapainubuson kag tadlong sa militar, nga nagapanghatag sing damo sang iya sweldo sa mga pigado. Ang iya pagkamaalwan nagkadto sa panibag-o nga kabuhi nga insidente.

Nakasugata sia sang isa ka tawo nga nagapakalimos sa Amiens. Ang nagapakilimos wala sang panapton kag natugnawan. Samtang nagalabay ang iya mga kaupod nga mga suldado, nag-untat si San Martin, ginkakas niya ang iya kapa kag gintunga ini gamit ang iya espada. Ginhatag niya ang katunga sa nagapakalimos kag ang katunga iya man. Sang amo nga gab-i, nakabaton si San Martin sang isa ka talan-awon kon sa diin nagpakita sa iya si Cristo nga nagasuksok sang tunga nga kapa nga iya ginhatag sa nagapakilimos nga tawo. Ang talan-awon naghambal sa iya, "Martin, ginpabayuan ako sang isa lamang ka catecumeno," ang Catecumeno isa ka konbertir sa Kristianismo nga ginadoctrinahan ukon ginapreparar antes bautisohan, sang una nga mga siglo sang Kristianismo, isa ini ka malaba nga proseso sang pagpanudlo.

Nahibaloan ni San Martin nga tiempo na niya magsulod sa Simbahan. Nagpabilin sia sa militar sang duha ka tuig pagkatapos sang iya bautismo, apang luyag niya nga ihalad ang iya kabuhi sa Dios sing lubos.

Pagkatapos mabuhi bilang Katoliko sa pila ka mga panahon, nagpanglakaton si San Martin sa pagkita kay Obispo Hilario sang Poiters, isa ka lantip nga teologo. Ang dedikasyon ni San Martin sa pagtuo nag pabilib sa Obispo.

Sang 371 AD ginkuha sia bilang obispo sang Tours, indi niya kuntani gusto kuhaon ang amo nga katungdanan, gin-into lang sia sang mga tawo nga naluyagan sia magdumala sang lokal nga simbahan.

Bilang Obispo nagpatukod sia sang sistema nga parokya agod dumalahan ang iya Diyocesis. Nagabisita sia sa mga parokya indi magnubo sa isa sa kada tuig. Ginbatuan man ni San Martin ang paganismo, partikular ang Druid nga Relihiyon nga lapnagon sang amo nga tiempo. Matutom sia sa pagbantala sang Ebanghelyo ni Jesu-Cristo kag madamo sing may nakadaog sa pagtuong Kristiano.

Sang 372 nagpatukod sia sang isa ka abbey sa Marmoutier agod makaretreat sia didto kag magkabuhi nga monghe upod sa mga gintuton-an nga iya nakumbinsi.

Ang Simbahan kag Emperyo Romano pareho nga nag-agi sang kabudlayan sang tiempo nga obispo si San Martin. Ang Priscillianismo
nga isa ka erehis nga pagpanudlo nga lakip ang kaluwasan paagi sa isa ka sistema sang sekreto nga kaalam, nagtuga sang seryoso nga nga problema sa Gaul kag Espanya nga ang mga awtoridad sibil ginsentensiyahan ang mga erehes sang kamatayon. Apang si San Martin upod sa Papa, kag San Ambrosio sang Milan, ginpamatukan ang sentensiya nga kamatayon sa mga Priscilliano.

Si San Martin napatay sa Candes-Saint-Martin, Gaul sang 397.

SAN MARTIN DE TOURS, IG-AMPO MO KAMI!

03/11/2021

𝗛𝗔𝗡𝗗𝗨𝗠𝗔𝗡𝗔𝗡 𝗡𝗜 𝗦𝗔𝗡 𝗠𝗔𝗥𝗧𝗜𝗡 𝗗𝗘 𝗣𝗢𝗥𝗥𝗘𝗦

𝗡𝗢𝗕𝗜𝗬𝗘𝗠𝗕𝗥𝗘 𝟯 | Subong nga adaw ginasaulog sang Santa Iglesia Katolika ang Handumanann ni San Martin de Porres ukon Memorial of Saint Martin de Porres.

Isa sia ka Peruvian Lay Brother sang orden nga Dominicano. Kilala sia sa binuhatan sa ngalan sang mga pigado, pagpatukod sang nga balay-alaypan kag Ospital sa mga kabataan. Lakip sa mga milagro nga ginapatunggod sa iya amo ang paglutaw sa ere (Levitation), bilokasyon, milagroso nga kaalam, hinali nga pag-ayo, kag abilidad nga magpakig-istorya sa mga sapat.

𝗞𝗔𝗕𝗨𝗛𝗜

Si San Martin de Porres natawo sa siyudad sang Lima, Viceroyalty sang Peru, sang Disyembre, 1579. Ilehitimo nga anak sang isa ka dungganon nga Espanyol, Don Juan de Porras y de la Peña, kag Ana Velázquez, isa ka ginpawa nga ulipon nga taga-Africa kag tumandok. May utod sia nga babayi, si Juana de Porres natawo 1581.

Pagkatapos mabata ang iya utod, gin-abandonar sang ila amay ang ila pamilya. Ginasuporatahan sang ila iloy sila nga mga kabataan paagi sa pagpanglabada.

Nagdako sia sa kapigadohon, pagkatapos nga nageskwela duha ka tuig sa elementarya, ginbutang sia sa barber/surgeon kon sa diin nakatuon sia magpanggunting buhok kag medikal nga bulohaton.

Samtang nagadaku sia, nakaexpernsya sia sing tuman nga pagpangsuya bangod halo ang iya rasa. Sa Peru, sa ila layi, ang mga kaanakan sang mga Africano kag Indiano indi pwedi mangin bug-os nga miembro sang relihiyoso nga orden. Maluloy-on kag nalangkag nga magserbe, nagbulontaryo sia sa mga Dominicano sa edad nga 15 anyos kag ginabuligan tatap ang mga masakiton sa ospital sang monasteryo. Nangin Dominican oblate, ukon lay monastic sia, sang 1601. Bisan indi nakaandan nga magbaton sang mullato sa relihiyoso nga orden sa Peru, ginakabig ginpain si San Martin kag nangin Domincan Lay Brother sia sang 1610.

Kilala sia sa pagdebosyon sa Eukaristiya kag dalayon nga pagpangamuyo, kag paglikaw sa pagkaon sang karne bilang akto sang iya esktrikto nga disiplina. Sa pagdugang sang iya bulohaton sa ospital, nagapanghatag man si San Martin sang pagkaon kag limos sa mga pigado kag nagakinahanglan sa Lima kag abyan sia ni Santa Rosa de Lima, nga isa ka lay Dominican.

Para sa nga kabataan sang Lima, nagpatukod sia sang eskwelahan, kag balay-alaypan para sa mga bata nga gin-abandonar sa siyudad sang Lima. Napatay sia sang November 3 1639 sa edad nga aged 59.

SAN MARTIN DE PORRES, IG-AMPO MO KAMI!

02/11/2021

𝗔𝗡𝗚 𝗣𝗜𝗘𝗦𝗧𝗔 𝗠𝗜𝗡𝗔𝗧𝗔𝗬

𝗡𝗢𝗕𝗜𝗬𝗘𝗠𝗕𝗥𝗘 𝟮 | Subong nga adlaw, ginasaulog sang Santa Iglesia Katolika ang Piesta Minatay nga ginatawag man Tigkalalag/Kalag-kalag ukon All Souls Day.

Ang adlaw nga ini nagadumdom sa mga tumuluo ni Jesu-Cristo ukon sa aton mga mahal sa kabuhi nga nagtaliwan. Adlaw ini sa pagpangamuyo kag handumanan para sa mga kalag sang mga minatay.

𝗞𝗔𝗦𝗔𝗬𝗦𝗔𝗬𝗔𝗡

Wala mahibal-i ang eksakto nga ginhalinan sang Piesta Minatay, apang ma*obra 1,200 anyos na ini. Mabalikan sang Simbahan nga Orthodox ang ila Piesta Minatay sang tuig 893, sang ginpagindiian ang pag-ampo ni Emperador Leo VI nga ihalad ang isa ka simbahan sa kadungganan sang iya Asawa, kundi ginhalad ini para sa kalag sang mga Cristiano.

Sang ika-7 ukon ika-8 nga siglo, ang tanan nga mga simbahan sa bilog nga kalibutan ginabasa ang "Oficio sang mga patay" ukon "The Office of the dead" nga pangamuyo. Isa ka Misa Requiem para sa nagtaliwan ang ginahalad man. Ginabisita sang mga tawo ang mga lulobngan sang ila miembro sa pamilya.

Ang tradisyon sa pagdesignar sang isa ka adlaw agod dumdomon kag magpangamuyo para sa mga kalag nag-umpisa kay Odilo. Isa sia ka abad (abbot) sang Cluny Abbey nga yara sa Francia. Halin sa lokal nga piesta sa iya monasteryo, amat-amat ini naglapnag sa iban nga mga simbahan tubtob sa katapusan sang ika-10 nga siglo.

𝗣𝗔𝗔𝗡𝗢 𝗡𝗔𝗧𝗢𝗡 𝗠𝗔𝗕𝗨𝗟𝗜𝗚𝗔𝗡 𝗔𝗡𝗚 𝗞𝗔𝗟𝗔𝗚 𝗦𝗔𝗡𝗚 𝗔𝗧𝗢𝗡 𝗣𝗜𝗡𝗔𝗟𝗔𝗡𝗚𝗚𝗔 𝗡𝗚𝗔 𝗡𝗔𝗚𝗧𝗔𝗟𝗜𝗪𝗔𝗡?

Ang mga tumuluo sa duta, pinaagi sa pagpakig-upod sang mga santo sarang makapahaganhagan sang pag-antos sang mga kalag sa purgatoryo paagi sa:

+ Pangamuyo
+ Pagpuasa
+ Pagbuhat sang Maayo
+ Paagi sa mga Indulhensiya kag
+ Paagi sa paghalad sang balaan nga Misa para sa ila.

𝗣𝗔𝗡𝗚𝗔𝗠𝗨𝗬𝗢 𝗣𝗔𝗥𝗔 𝗦𝗔 𝗠𝗚𝗔 𝗠𝗜𝗡𝗔𝗧𝗔𝗬

𝗣𝗮𝗻𝗴𝗮𝗺𝘂𝘆𝗼 𝗻𝗶 𝗦𝗮𝗻𝘁𝗮 𝗚𝗲𝗿𝘁𝗿𝘂𝗱𝗶𝘀:

Walay katubtoban nga Amay, ginahalad ko sa Imo ang Labing Mahalalon nga Dugo sang Imo Diosnon nga Anak, si Jesus, kaupod sa mga misa nga ginasiling sa bug-os nga kalibutan subong, para sa tanan nga balaan nga mga kalag sa purgatoryo, para sa mga makasasala nga sa bisan diin, para sa mga makasasala sa katilingban nga simbahan, sa akon kaugalingon nga puloy-an, kag sa sulod sang akon pamilya. Amen.

01/11/2021

𝗜𝗡𝗗𝗜 𝗞𝗜𝗡𝗔𝗛𝗔𝗡𝗚𝗟𝗔𝗡 𝗦𝗔𝗡𝗚 𝗞𝗔𝗟𝗔𝗚 𝗔𝗡𝗚 𝗛𝗔𝗟𝗔𝗗 𝗡𝗚𝗔 𝗣𝗔𝗚𝗞𝗔𝗢𝗡

Nangin tradisyon na sang kadam-an nga pamilya ang maghalad kaangay sang pagkaon, ilimnon, sigarilyo kag iban pa nga nahamut-an sang ila minatay sa tigkalalag.

Masami ginahimo gid ini sa balay, nagabutang pagkaon kag iban pa sa ila altar, kag ang iban ginadala pa sa patyo, ginabutang sa lulobngan, kag ginapatihan nga makakaon ukon makainom pa ang mga kalag.

Ang amo nga bulohaton produkto sang "sala nga paghangop" sa ginharian sang nagakabuhi kag minatay. Ang Simbahan wala ginatolerar ang amo nga bulohaton, bangod ang kalag indi na ini makakaon sang mga pisikal nga pagkaon, nga iya ka nagakabuhi; Ang kinahanglan sang aton mga minatay amo ang espirituhanon nga pagkaon.

Kita nga mga buhi ang dapat magkaon sang aton mga handa, bisan ano pa dira kadamo kag kanamit ang imo ihalad masubayan lang na indi gid na makaon sang imo napatay nga mahal sa kabuhi, indi malain nga dumdumon naton sila sa ila mga paborito nga mga pagkaon ukon ilimnon, pero dapat naton maintiendihan nga indi ina makabulig kag kinahanglan nila.

𝗔𝗡𝗢 𝗔𝗡𝗚 𝗞𝗜𝗡𝗔𝗛𝗔𝗡𝗚𝗟𝗔𝗡 𝗦𝗔𝗡𝗚 𝗔𝗧𝗢𝗡 𝗠𝗚𝗔 𝗠𝗜𝗡𝗔𝗧𝗔𝗬?

Mabuligan naton ang mga kalag sang mga minatay paagi sa aton:

1. 𝗣𝗔𝗡𝗚𝗔𝗠𝗨𝗬𝗢

Ang simbahan nga Katoliko nagatudlo sa pila na ka siglo nga ang aton pangamuyo amo ang nagabulig sa mga minatay. Ginasalig naton ang ila kalag sa kaluoy sang Dios kag ginapangamuyuan sila.

Ang pagpakig-upod sa mga minatay. Sa bug-os nga hunahona sa sini nga pagpakig-upod sa bug-os nga Mistikal nga Lawas ni Jesu-Cristo, ang simbahan sa iya nagapanglakaton nga mga miembro, gikan pa sa pinaka-una nga mga inadlaw sang Kristohanon nga relihiyon, ginakilala na kag ginahatagan na sang daku nga katahuran ang pagdumdom sa mga minatay; kag bangod isa ka balaan kag isa ka mapinuslanon nga hunahunaon nga pangamuyuan ang mga minatay agod nga sila mahilway sa ila mga sala ginahalad niya ang iya panaad para sa ila." Ang aton pangamuyo sa ila indi lamang sa pagbulig sa ila, kundi pati man sa paghimo sang pagpangabay nila para sa aton (CCC 958)

Mabuligan man naton sila sa aton personal nga pagpangamuyo, pagpangamuyo sang Santo Rosaryo, ukon kapilyeto sang Diosnon nga Kaluoy, Novena, kag iban pa.

2. 𝗣𝗔𝗚𝗛𝗔𝗟𝗔𝗗 𝗦𝗔𝗡𝗚 𝗦𝗔𝗡𝗧𝗢𝗦 𝗡𝗚𝗔 𝗠𝗜𝗦𝗔

Ang Misa amo ang pinakamataas nga porma sang pangamuyo sa simbahan, kag ang pinakaepektibo nga pangamuyo nga mahimo nga masiling sa ngalan sang mga nagtaliwan. Sa mga Misa sang mga patay, kag labi na gid sa Misa sang lubong, "Ang Simbahan nagahalad sang sakripisyo sang Eukaristiya sang Pascua ni Cristo para sa mga patay agod nga, bangod kay ang tanan nga mga miembro sang lawas ni Cristo nagapagkig-upod sa isa kag isa, kon ano ang pangabay sang espirituhanon nga bulig sa iban, mahimo nga makadala sang paglaom nga kalipay sa iban ("General Instruction of the Roman Missal," 379)

Ginadayaw man sang Simbahan ang paghatag limos, mga indulhensiya, kag bulohaton nga penetencia sa ngalan sang mga minatay kag para sa ila benipisyo.

BULIGAN NATON KAG DUMDUMON NATON SILA.

𝗣𝗔𝗡𝗚𝗔𝗠𝗨𝗬𝗢 𝗡𝗜 𝗦𝗔𝗡𝗧𝗔 𝗚𝗘𝗥𝗧𝗥𝗨𝗗𝗜𝗦

Walay katubtoban nga Amay, ginahalad ko sa Imo ang Labing Mahalalon nga Dugo sang Imo Diosnon nga Anak, si Jesus, kaupod sa mga misa nga ginasiling sa bug-os nga kalibutan subong, para sa tanan nga balaan nga mga kalag sa purgatoryo, para sa mga makasasala nga sa bisan diin, para sa mga makasasala sa katilingban nga simbahan, sa akon kaugalingon nga puloy-an, kag sa sulod sang akon pamilya. Amen.

01/11/2021

𝗦𝗢𝗟𝗘𝗠𝗡𝗜𝗗𝗔𝗗 𝗦𝗔𝗡𝗚 𝗧𝗔𝗡𝗔𝗡 𝗡𝗚𝗔 𝗠𝗚𝗔 𝗦𝗔𝗡𝗧𝗢

𝗡𝗢𝗕𝗜𝗬𝗘𝗠𝗕𝗥𝗘 𝟭 | Subong nga adlaw ginasaulog sang Santa Iglesia Katolika ang Solemnidad sang tanan nga mga Santo ukon Solemnity of All Saints Day.

Ang mga Santo amo ang mga tawo nga nakadangat na sa langit. Ang adlaw nga ini nagapadungog sa tanan nga mga Santo. May mga Santo nga ginhingalanan sang Simbahan nga Katoliko paagi sa kanonisasiyon kag beatifikasiyon apang may ara man nga wala nahingalani. Buot silingon Santo ang isa ka tawo nga ara na sa langit nacanonize/beatify man ukon wala.

𝗞𝗔𝗦𝗔𝗬𝗦𝗔𝗬𝗔𝗡

Ang pagpadungog sa tanan nga mga santo wala sing pat-od nga nakahibalo bangod ginsaulog ini sa nagkalain lain nga mga petsa kag mga lugar.

Suno kay Efraem sang Syrus (napatay c. 373) nagasaulog sang piesta sang tanan nga mga martir ang nakatungdan nga Simbahan kon Mayo 13, ang amo nga petsa amo ang ginpili ni Papa Bonifacio IV sang ginhalad niya ang Pantheon sang Roma sa pagpadungog sa Bulahan nga Birheng Maria kag tanan nga mga Martir sang 609 AD.

Sa pagdumala ni Papa Gregorio III (731-741) ginsaylo niya ang Adlaw sang mga Santo sa Nobiyembre 1. Ginlakip niya ang mga Santo pati man ang mga martir sa selebrasyon, sa pagdedikar sang isa ka kapilya sa Basilika ni San Pedro sa Roma sang Nobiyembre 1 sa pagpadungog sa tanan nga mga Santo.

Sang tuig 837 ginmando ni Papa Gregorio IV nga obserbaran ini sang tanan nga Katoliko sa bug-os nga Kalibutan.

𝗔𝗡𝗚 𝗠𝗚𝗔 𝗦𝗔𝗡𝗧𝗢 𝗦𝗔 𝗟𝗔𝗡𝗚𝗜𝗧 𝗡𝗔𝗚𝗔𝗣𝗔𝗡𝗚𝗔𝗕𝗔𝗬 𝗞𝗔𝗚 𝗡𝗔𝗚𝗔𝗣𝗔𝗡𝗚𝗔𝗠𝗨𝗬𝗢 𝗦𝗔 𝗗𝗜𝗢𝗦 𝗣𝗔𝗥𝗔 𝗦𝗔 𝗔𝗧𝗢𝗡

Ang Katesismo sang Simbahan nga katoliko nagatudlo sa aton:

"Kay mas lapit nga nagahiusa kay Cristo.... Wala sila nagauntat magpangabay, bilang gintanyag nila ang mga merito nga naangkon nila sa kalibutan paagi sa isa ka Manugpatunga sa Dios kag sa tawo, si Jesu-Cristo" (CCC 956).

"Ang pagpangabay sang mga santo amo ang ila labing ginbayaw nga serbisyo sa plano sang Dios. Sarang kita kag kinahanglan naton mag-ampo sa ila nga magpangabay sa aton kag sa bug-os nga kalibutan" (CCC 2683).

Sa Biblia, mabasa naton nga ang mga tumuluo ukon katawhan sang Dios nga ara sa langit nagalahad sang ila pangamuyo sa Dios. Gani sarang kita makapanawag sa ila.

Bugna 5:8
Pagkakuha niya sang kasulatan, ang apat ka buhi nga mga tinuga kag ang 24 ka manugdumala nagluhod sa pagsimba sa Karnero. Ang kada isa sa ila may yahong nga bulawan nga puno sang insenso nga amo ang mga pangamuyo sang mga katawhan sang Dios.

Bugna 8:3
May isa pa gid ka anghel nga nagpalapit sa halaran. May ginauyatan siya nga bulawan nga suludlan sang insenso. Ginhatagan siya sing madamo nga insenso agod iupod sa mga pangamuyo sang tanan nga tumuluo kag ihalad sa halaran nga bulawan nga ara sa atubangan sang trono.

Bugna 8:4
Gani nagtub-ok paibabaw ang a*o sang ginsunog nga insenso kaupod sang mga pangamuyo sang mga katawhan sang Dios halin sa mga kamot sang anghel nga nagatindog sa atubangan sang Dios.

TANAN NGA MGA SANTO, IG-AMPO NINYO KAMI!

Belison Htdhmm

16/01/2022

02/01/2022

08/12/2021

21/11/2021

20/11/2021

14/11/2021

13/11/2021

11/11/2021

03/11/2021

02/11/2021

01/11/2021

01/11/2021

Address

Opening Hours

Website

Alerts

Shortcuts

Share

Category