10/07/2026
“Sapagkat kung saan may dalawa o tatlong nagkakatipon sa Aking pangalan, naroon Ako sa piling nila.”
Matthew 18:20
Madalas nating gamitin ang talatang ito kapag may prayer meeting o worship gathering. Totoo namang kasama natin ang Diyos kapag nagtitipon tayo. Pero kung babasahin natin ang buong konteksto, may mas malalim pang ibig sabihin ang sinabi ni Jesus.
Sa bahaging ito ng Matthew 18, itinuturo ni Jesus kung paano haharapin ang isang kapatid na nagkasala.
Una, kausapin muna siya nang kayong dalawa lang.
Kapag hindi siya nakinig, magsama ng isa o dalawang tao para tumulong.
Kung hindi pa rin siya makinig, dalhin ang usapin sa church.
At kung patuloy pa rin siyang tumatanggi, saka siya ituring na parang hindi pa nakakakilala sa Diyos.
Pagkatapos ipaliwanag ang prosesong ito, saka sinabi ni Jesus:
“Kung saan may dalawa o tatlong nagkakatipon sa Aking pangalan, naroon Ako sa piling nila.”
Ibig sabihin, habang sinusunod natin ang tamang proseso nang may pagpapakumbaba, pag-ibig, at biyaya, kasama natin si Jesus. Hindi Niya tayo iniiwan sa mahihirap na pag-uusap o sa mga desisyong kailangan nating gawin.
Sa buong Biblia, binibigyan tayo ng Diyos ng gabay kung paano haharapin ang iba't ibang sitwasyon, maging tungkol sa relasyon, kasalanan, pera, o iba pang hamon sa buhay. At kapag hindi malinaw ang dapat gawin, maaari tayong humingi ng gabay sa Banal na Espiritu at sa mga spiritual leaders na inilagay ng Diyos sa ating buhay.
Alam ni Jesus na darating ang mga hindi pagkakaunawaan at pagsubok. Kaya itinuro Niya sa Kanyang mga alagad na manalangin, humingi ng karunungan sa Diyos, at magtiwala na sasamahan Niya sila sa bawat hakbang ng proseso.
Minsan gusto natin ng mabilis na solusyon. Pero madalas, ang Diyos ay hindi lang interesado sa resulta. Interesado rin Siya sa proseso, dahil doon Niya tayo hinuhubog, tinuturuan, at pinalalapit sa Kanya.
Kaya kapag may pinagdadaanan tayo ngayon, tandaan natin ito: Hindi tayo naglalakad nang mag-isa. Kasama natin si Jesus sa bawat hakbang ng proseso.
