Ang Batingaw - Saint Augustine Parish Baliwag, Bulacan

25/05/2026

25/05/2026

MAYO 25 | Paggunita kay Maria, Ina ng Simbahan (Mary, Mother of the Church)

Ito ay itinatag ni Papa Francisco at ipinagdiriwang tuwing Lunes pagkatapos ng Linggo ng Pentekostes o ang Dakilang Kapistahan ng Pagbaba ng Espiritu Santo kay Maria at mga Apostol at pagsilang ng Inang Simbahan. Nawa sa pamamagitan ni Maria, Ina at Reyna ng Simbahan, tayo ay patuloy niyang ipanalangin, na ito ay kanyang dalisayin.

Si San Jose rin naman ang patron ng Santa Iglesia na palaging katulong ni Maria sa pangangalaga ng Simbahang Katolika.

24/05/2026

𝐕𝐄𝐑𝐁𝐔𝐌 𝐃𝐎𝐌𝐈𝐍𝐈 : 𝐌𝐠𝐚 𝐏𝐚𝐠𝐛𝐚𝐬𝐚 𝐬𝐚 𝐚𝐫𝐚𝐰-𝐚𝐫𝐚𝐰 |

UNANG PAGBASA
Genesis 3, 9-15. 20

Pagbasa mula sa aklat ng Genesis

Pagkakain ni Adan sa bunga ng puno, tinawag siya ng Panginoon at tinanong,
“Saan ka naroon?”
“Natakot po ako nang marinig ko kayong nasa hardin; nagtago po ako sapagkat ako’y hubad,” tugon ng lalaki.
“Sinong may sabi sa iyong hubad ka?” tanong ng Diyos. “Bakit kumain ka ba ng bungang ipinagbabawal ko?”
“Kasi, pinakain po ako ng babaing ibinigay ninyo sa akin,” tugon ng lalaki.
“Bakit mo naman ginawa iyon?” tanong ng Diyos sa babae.
“Mangyari po’y nilinlang ako ng ahas, kaya ako natuksong kumain,” tugon naman niya.
At sinabi ng Panginoon sa ahas:
“Sa iyong ginawa’y may parusang dapat,
na tanging ikaw lang yaong magdaranas;
ikaw ay gagapang, ang hatol kong gawad,
at alikabok ang pagkaing dapat.
Kayo ng babae’y laging mag-aaway, binhi mo’t binhi niya’y laging maglalaban.
Ito ang dudurog ng ulo mong iyan, at ang sakong niya’y ikaw ang tutuklaw.”
Eva ang itinawag ni Adan sa kanyang asawa, sapagkat ito ang ina ng sangkatauhan.

Ang Salita ng Diyos.

o kaya:
Mga Gawa 1, 12-14

Pagbasa mula sa Mga Gawa ng Mga Apostol

Pagkaakyat ni Hesus sa langit, ang mga apostol ay nagbalik sa Jerusalem buhat sa Bundok ng mga Olibo, na halos isang kilometro ang layo. Ang mga ito’y sina Pedro, Juan, Santiago, Andres, Felipe, Tomas, Bartolome, Mateo, Santiago na anak ni Alfeo, si Simon, ang Makabayan, at si Judas na anak ni Santiago. Pagdating sa kanilang tinutuluyan sa lungsod, nagtuloy sila sa silid sa itaas. Lagi silang nagsasama-sama sa pananalangin, kasama ang mga babae at si Mariang ina ni Hesus, gayun din ang mga kapatid ni Hesus.

Ang Salita ng Diyos.

SALMONG TUGUNAN
Salmo 87, 1-2. 3. at 5, 6-7.

Dinggin ang ulat sa inyong mabuting bagay,
O lungsod ng Diyos.

Sa Bundok ng Sion,
itinayo ng Diyos ang banal na lungsod,
ang lungsod na ito’y higit niyang mahal
sa alinmang bayan ng angkan ni Jacob.

Dinggin ang ulat sa inyong mabuting bagay,
O lungsod ng Diyos.

Kaya’t iyong dinggin ang ulat sa iyong mabubuting bagay,
O lungsod ng Diyos.
At tungkol sa Sion, yaong sasabihin’y,
“Ang lahat ng bansa ay masasakupan,
siya’y palalakasin at patatatagin ng Kataas-taasan.”

Dinggin ang ulat sa inyong mabuting bagay,
O lungsod ng Diyos.

Ang P**n ay gagawa,
ng isang talaan ng lahat ng taong doo’y mamamayan,
ang lahat ng ito ay magsisiawit at pawang sasayaw.

Dinggin ang ulat sa inyong mabuting bagay,
O lungsod ng Diyos.

o kaya:
Judith 13:18bkde. 19

Pinupuri kang lubusan
ng lahat sa ating bayan.

Anak, sumasaiyo ang pagpapala ng Diyos na Kataas-taasan.
Higit kang pinagpala kaysa lahat ng babae sa lupa.
Purihin ang Panginoon, ang Diyos na lumalang sa langit at lupa.

Pinupuri kang lubusan
ng lahat sa ating bayan.

Ang pananalig sa Diyos na nag-udyok sa iyo
ay hindi na mapaparam sa isip ng mga tao
habang ginugunita nila ang kapangyarihan ng Diyos.

Pinupuri kang lubusan
ng lahat sa ating bayan.

ALELUYA

Aleluya, Aleluya!
Birheng Mariang mapalad,
dapat magpuri ang lahat
sa iyo at sa ‘yong Anak.
Aleluya, Aleluya!

MABUTING BALITA
Juan 19, 25-34

Ang Mabuting Balita ng Panginoon ayon kay San Juan

Noong panahong iyon: Nakatayo sa tabi ng krus ni Hesus ang kanyang ina at ang kapatid na babae nitong si Maria, na asawa ni Cleopas. Naroon din si Maria Magdalena. Nang makita ni Hesus ang kanyang ina, at ang minamahal niyang alagad sa tabi nito, kanyang sinabi, “Ginang, narito ang iyong anak!” At sinabi sa alagad, “Narito ang iyong ina!” Mula noon, siya’y pinatira ng alagad na ito sa kanyang bahay.

Alam ni Hesus na naganap na ang lahat ng bagay; at bilang katuparan ng Kasulatan ay sinabi niya, “Nauuhaw ako!” May isang mangkok doon na puno ng maasim na alak. Itinubog nila rito ang isang espongha, ikinabit sa sanga ng isopo at idiniit sa kanyang bibig. Nang masipsip ni Hesus ang alak ay kanyang sinabi, “Naganap na!” Iniyukayok niya ang kanyang ulo at nalagot ang kanyang hininga.

Noo’y Araw ng Paghahanda, at ayaw ng mga Judio na manatili sa krus ang mga bangkay sa Araw ng Pamamahinga sapagkat dakila raw ang araw ng Pamamahingang ito. Kaya’t hiniling nila kay Pilato na ipabali nito ang mga binti ng mga ipinako sa krus, at alisin doon ang mga bangkay. Naparoon nga ang mga kawal at binali ang mga binti ng dalawang ipinakong kasabay ni Hesus. Ngunit pagdating nila kay Hesus at makitang patay na siya, hindi na nila binali ang kanyang binti. Subalit inulos ng sibat ng isa sa mga kawal ang tagiliran ni Hesus, at biglang dumaloy ang dugo at tubig.

Ang Mabuting Balita ng Panginoon.

(mga teksto mula sa awitatpapuri.com)

24/05/2026

𝐀𝐍𝐆 𝐁𝐀𝐓𝐈𝐍𝐆𝐀𝐖 𝐍𝐄𝐖𝐒 | PAGSARIWA NG PANGAKO SA PAGLILINGKOD NG ANG BATINGAW - SOCCOM

Ipinagdiwang ngayong Linggo ng Pentekostes, Mayo 24, 2026, sa ganap na ika-8:30 ng umaga, ang Pagsariwa ng Pangako ng Ang Batingaw – Commission on Social Communications sa banal na pagdiriwang ng Santa Misa na ginanap sa pangunguna ni Rev. Fr. Francis Protacio S. Cortez III, OSA. Pinangunahan naman ni Sis. Lea Reyes kasama ang mga kasapi ng komisyon ang sama-samang pagpapanibago ng kanilang pangako ng tapat na paglilingkod sa Simbahan sa pamamagitan ng makabuluhan at maka-Kristiyanong komunikasyon.

Sa kaniyang homiliya, binigyang-diin ni Fr. Cortez na ang pagdating ng Espiritu Santo ay paanyaya sa bawat Kristiyano na lumabas at magpahayag ng Mabuting Balita nang may tapang, pananampalataya, at pagmamahal. Aniya, tulad ng mga Apostol na isinugo matapos tanggapin ang Espiritu Santo, ang mga lingkod ng komunikasyon ay tinatawag ding maging mga buhay na saksi ni Kristo sa makabagong panahon. Hinimok niya ang komisyon na gamitin ang kanilang talento at kakayahan hindi lamang upang magbahagi ng impormasyon kundi upang maging daluyan ng katotohanan, pag-asa, at pagkakaisa sa pamayanan.

Naging makabuluhan ang pagdiriwang bilang pagpapatibay sa misyon ng Ang Batingaw – Commission on Social Communications na maging tinig ng Simbahan at kasangkapan ng ebanghelisasyon sa gitna ng mabilis na pagbabago ng daigdig ng media at komunikasyon. Sa pagtatapos ng banal na pagdiriwang, muling inialay ng mga kasapi ang kanilang sarili sa paglilingkod, tangan ang gabay at lakas ng Espiritu Santo bilang mga tagapagpatotoo ni Kristo sa makabagong panahon.

Photos by: ALF, MAS - Baliwag
Written by: JCP, Ang Batingaw

24/05/2026

𝐅𝐋𝐎𝐑𝐄𝐒 𝐃𝐄 𝐌𝐀𝐑𝐈𝐀 𝐌𝐌𝐗𝐗𝐕𝐈 | Unang Araw ng Nobenaryo para sa Flores de Maria

Sinimulan nitong Biyernes, ika-22 ng Mayo 2026, ang taunang tradisyon ng paggawad ng parangal at debosyon sa Mahal na Birheng Maria sa pagsisimula ng Unang Araw ng Nobenaryo para sa Flores de Maria 2026 sa Pandiyosesis na Dambana at Parokya ng San Agustin sa Lungsod ng Baliwag, Bulacan. Sa araw na ito ay ginunita rin ang kapistahan ni Sta. Rita de Cascia.

Sinimulan ang taimtim na pagdarasal ng Santo Rosario at Nobena sa ganap na ika-3:30 ng hapon na pinangunahan ng Apostolado ng Panalangin at Kapatirang Nazareno. Kasama rin sa mga nakiisa sa banal na gawain ang Commission on Social Communications, Tibag SPPC, Cofradia del Patriarca San Jose de Baliuag, at ang Legion of Mary.

​Sinundan ito ng Banal na Misa sa ganap na ika-5:30 ng hapon na pinangunahan ng Kura Paroko ng Parokya ng Nuestra Señora Delas Flores na si Padre Gino Carlo B. Herrera.

Ayon sa kaniyang homilya, "Ngayong unang araw ng pagnonobena natin, sa pagbibigay natin ng bulaklak at sa pagpapakita natin ng pagmamahal sa Mahal na Birheng Maria. Kahit ano man pangyayari yan na imposible, sa paghahandog natin ng bulaklak, ipagdasal mo pa rin sa Diyos. Kapag mayroon kang hinihiling at ipinagdarasal, wag mong susukuan. Kahit gano ka imposible ito, ipanalangin mo pa rin sa Diyos."

​Isinagawa ang tradisyunal na Pag-aalay ng Kandila, Bulaklak, at ang Pagkokorona sa Mahal na Birheng Maria na isinagawa nina Bb. Riona Maria Amelita Reynosa Tengco Castro, Bb. Maria Monica Anne Therese Tengco, kasama ang Bulacan Teen Model Search 2026 Winners.

​Inaasahan na magpapatuloy pakikiisa ng mga deboto at nag-aalay ng bulaklak sa mga susunod pang araw ng nobenaryo bilang pagpapakita ng buhay na debosyon at pagkakaisa ng pamayanang Katoliko sa lungsod ng Baliwag.

𝐀𝐯𝐞 𝐌𝐚𝐫𝐢𝐚 𝐏𝐮𝐫𝐢𝐬𝐢𝐦𝐚; 𝐒𝐢𝐧 𝐏𝐞𝐜𝐚𝐝𝐨 𝐂𝐨𝐧𝐜𝐞𝐛𝐢𝐝𝐚!

Photos by: KEJ. Ang Batingaw
Written by: HAT, Ang Batingaw

24/05/2026

PANALANGIN SA GABI

Sa ngalan ng Ama, at ng Anak, at ng Espiritu Santo, Amen.

Panginoon,
ipinagdiwang namin ngayon ang misteryo ng pagbangon ni Kristo sa isang bagong buhay. Makapahinga nawa kami sa iyong kapayapaan, na ligtas sa lahat ng sa ami’y maaaring magpahamak at bumangon muli kaming masigla at puno ng galak upang purihin ka sa buong maghapon at magdamag. Hinihiling namin ito sa pamamagitan ni Kristong aming Panginoon.
Amen.

24/05/2026

𝐏𝐀𝐍𝐀𝐋𝐀𝐍𝐆𝐈𝐍 𝐒𝐀 𝐍𝐔𝐄𝐒𝐓𝐑𝐀 𝐒𝐄Ñ𝐎𝐑𝐀 𝐃𝐄 𝐋𝐀 𝐏𝐀𝐙 𝐘 𝐁𝐔𝐄𝐍 𝐕𝐈𝐀𝐉𝐄

Masintahing Ina, sumasamo at dumudulog kami sa iyo. Tulungan mo kaming magpasalamat sa Panginoon sa lahat ng mga grasya at pagpapalang ipinagkaloob Niya sa amin. Sa tulong at awa mo, lingapin mo po ang mga naglalakbay, lalo na ang mga nangingibang bansa, upang maluwalhating makarating sa kanilang paroroonan. Kami rin pong lahat ay iyong gabayan at akayin sa aming paglalakbay sa buhay.
Sa aming pagtahak sa buhay na puno ng pag-aalinlangan at pangamba, pagkalooban po ninyo kami ng lakas at tapang na tahakin ang landas ng iyong Mahal na Anak.

Mahal na Ina, lumalapit po kami sa iyo na dulutan mo ng mapayapang kalinga ang aming tahanan. Tulungan mo po kami na maitaguyod nang maayos at matuwid ang aming pamilya. Sa aming paglalakbay sa buhay, palakasin at patatagin mo ang bawat isa sa amin na makabuo ng isang pamayanang pinaghaharian ng iyong Mahal na Anak.

(Banggitin ang kahilingan)

Sa pamamagitan mo Inang Mahal pagpalain at tangkilikin mo po ang aming paglalakbay upang mabuhay kami sa kapayapaan at marating namin ang kaluwalhatian ng buhay na walang hanggan. Amen.

Nuestra Señora De La Paz Y Buen Viaje de Tibag,
Ipanalangin mo kami.

24/05/2026

𝐀𝐍𝐆 𝐁𝐀𝐓𝐈𝐍𝐆𝐀𝐖 𝐍𝐄𝐖𝐒 | 25TH SACERDOTAL ANNIVERSARY OF REVEREND FATHER EDMUNDO DIZON SANTOS, PRIEST-SON OF BALIWAG CITY

Photos by: KEJ, Ang Batingaw

24/05/2026

𝐓𝐎𝐓𝐔𝐒 𝐓𝐔𝐔𝐒 | 𝐏𝐑𝐄𝐒𝐁𝐘𝐓𝐄𝐑𝐎𝐒 𝐌𝐌𝐗𝐗𝐕𝐈

Malugod naming inaanyayahan ang lahat na saksihan ang
𝐎𝐑𝐃𝐈𝐍𝐀𝐒𝐘𝐎𝐍 𝐒𝐀 𝐏𝐀𝐆𝐊𝐀𝐏𝐀𝐑𝐈 ni

𝐑𝐑𝐄𝐁𝐄𝐑𝐄𝐍𝐃𝐎 𝐉𝐎𝐇𝐍 𝐏𝐀𝐔𝐋 𝐕𝐈𝐋𝐋𝐀𝐑𝐔𝐁𝐈𝐀 𝐓𝐎𝐑𝐑𝐄𝐒
mula sa Barangay Bagong Nayon, Lungsod ng Baliwag —
isang 𝘈𝘯𝘢𝘬 𝘯𝘢 𝘓𝘪𝘯𝘨𝘬𝘰𝘥 𝘮𝘶𝘭𝘢 𝘴𝘢 𝘗𝘢𝘯𝘥𝘪𝘺𝘰𝘴𝘦𝘴𝘪𝘴 𝘯𝘢 𝘋𝘢𝘮𝘣𝘢𝘯𝘢 𝘢𝘵 𝘗𝘢𝘳𝘰𝘬𝘺𝘢 𝘯𝘨 𝘚𝘢𝘯 𝘈𝘨𝘶𝘴𝘵𝘪𝘯

Ang kanyang ordinasyon ay isasagawa bukas, Mayo 25, 2026 sa ganap na 9:00am
sa Metropolitan Cathedral of Saint John the Evangelist, Dagupan City, Pangasinan

sa pamamagitan ng pagpatong ng mga kamay ni
+ 𝐒𝐎𝐂𝐑𝐀𝐓𝐄𝐒 𝐁. 𝐕𝐈𝐋𝐋𝐄𝐆𝐀𝐒, 𝐃.𝐃.
Arsobispo ng Lingayen - Dagupan

24/05/2026

𝐑𝐄𝐘𝐍𝐀 𝐍𝐆 𝐋𝐀𝐍𝐆𝐈𝐓 (𝐑𝐞𝐠𝐢𝐧𝐚 𝐂𝐚𝐞𝐥𝐢) : 𝐀𝐰𝐢𝐭 𝐬𝐚 𝐌𝐚𝐡𝐚𝐥 𝐧𝐚 𝐈𝐧𝐚 𝐬𝐚 𝐏𝐚𝐧𝐚𝐡𝐨𝐧 𝐧𝐠 𝐏𝐚𝐬𝐤𝐨 𝐧𝐠 𝐏𝐚𝐠𝐤𝐚𝐛𝐮𝐡𝐚𝐲

Reyna ng Langit, magalak ka! Alleluia!
Sapagkat ang minarapat mong taglayin, Alleluia!

Ay muling nabuhay ayon sa salita, Alleluia!
Ipanalangin mo kami sa Diyos, Alleluia!

Magalak ka at magpakaligaya,
O Birheng Maria, Alleluia!

Sapagkat ang Panginoon,
ay tunay na muling nabuhay, Alleluia!

𝐑𝐄𝐘𝐍𝐀 𝐍𝐆 𝐋𝐀𝐍𝐆𝐈𝐓
Nilikha para sa Concepcion Alay-Awit Choir;
Himig: Jojo Gatmaitan;
Orihinal na Pagsasaayos: (+) Engr. Angelo Logo;
Karagdagang pagsasaayos para sa Vox Animæ:
Victor Joseph Manuel at Janine Vergel; at
Digital recording: Vox Animæ, Ian Philip
Orchestration: Jeddi Cris Celeste
Sound Engineer: Ian Philip Ortiz

YOUTUBE LINK: https://youtu.be/1ym7EqmPw1A

©VoxAnimae

24/05/2026

05.24.2026 | BANAL NA MISA | 4:00 N.H | Dambana ni San Agustin de Baliwag

[LIVE] Pagdiriwang ng Banal na Misa
DAKILANG KAPISTAHAN NG PENTEKOSTES
(Ang Pagpanaog ng Espiritu Santo | Kaarawan ng Simbahan)
IKATLONG ARAW NG NOBENARYO SA KARANGALAN NG
NUESTRA SEÑORA DE LAS FLORES

“Tanggapin ninyo ang Espiritu Santo.” - San Juan 20:22

YOUTUBE LINK; https://youtube.com/live/K4fku2ZQ2-s?feature=share