29/07/2026
HULYO 29 | Paggunita kay Santa Marta, Santa Maria at San Lazaro ng Betania
SANTA MARTA DE BETANIA
Samantalang naglalakbay, si Hesus ay pumasok sa isang maliit na bayan – dalawang milya sa silangang Jerusalem – na kung tawagin ay Betania. Siya ay tinanggap sa bahay ng isang babaeng nagngangalang MARTA (sa Arameo, Ginang) na may isang kapatid na ang ngalan ay Maria. Samantalang si Marta ay naliligalig sa maraming gawain, siya’y lumapit at nagwika: “Panginoon, hindi ka ba nababahala na ang aking kapatid ay iniwan akong naglilingkod na mag-isa? Sabihin Mo nga sa kanya na ako’y tulungan.” Sumagot sa kanya ang Panginoon, “Marta, Marta, nagpapakapagod at naliligalig sa maraming bagay. Sa katunayan, isang bagay lamang ang kinakailangan. Pinili ni Maria ang magaling na bahagi na hindi aalisin sa kanya.” (Lc 10:38-42)
SAN LAZARO DE BETANIA
Nang si Lazaro ay magkasakit, pinasabihan nina Marta at Maria si Hesus na ang Kanyang kaibigan ay may sakit subali’t hindi agad nagpunta si Hesus sa Betania. Si Lazaro ay namatay at apat na araw nang nakalibing nang si Jesus ay dumating. Naghimutok ang magkapatid na sina Marta at Maria kay Hesus at silang lahat ay nangagsitangis.Malaki ang pananalig ng magkapatid kay Hesus. Kung kaya’t nagtungo si Hesus sa libingan ni Lazaro kahit sinabihan na ni Martang nangangamoy na ang patay. Doon nga’y nanangis si Hesus ayon sa banal na kasulatan sa sobrang pagmamahal sa kaibigan at matapos manalangin ay iniutos Niyang alisin ang batong nagpipinid sa yungib at Siya ay sumigaw, “Lazaro, lumabas ka.” Lumabas nga si Lazaro na may balot pang mga kayo sa katawan. Ipinaalis ni Hesus ang mga nakabalot na kayo at pinahayo si Lazaro.
SANTA MARIA NG BETANIA
Kapatid nina Lazaro at Marta. Nang si Hesus ay dumalaw sa kanilang tahanan, naupo siya sa may paanan nito upang makinig sa Kanyang itinuturo. Nang magbalik si Hesus sa Betania na kung saan isang hapunan ang inihanda para sa Kanya, kumuha si Maria ng isang bote ng mamahaling pabangong galing sa katas ng dalisay na nardo, at ibinuhos sa mga paa ni Hesus. Pagkatapos, pinunasan niya ito ng kanyang buhok.
