E.cclessia

03/09/2024

Heyyyy!!! Long time no see guys! Check out our latest work in TikTok through this link:

1068 Followers, 444 Following, 29.9k Likes - Watch awesome short videos created by jilofication

12/05/2024

E.cclesia goes to Legazpi City!

20/07/2023

E.cclesia goes to Baguio Cathedral

29/01/2023

Pagbati sa ika-38 taong pagkakatatag ng Roman Catholic Diocese of Gumaca

08/03/2022

Cathedral of the Divine Infant Jesus of Prague and St. Mark
Infanta, Quezon

19/06/2021

Missing our posts?
Hopefully, we may upload new content soon!
For the meantime, see our compilation, take a screenshot of your favorite, and comment down below!

13/05/2021

Our Lady of Fatima, pray for us!

01/04/2021

Online Daan ng Krus at Visita Iglesia

IKALABING-APAT NA ESTASYON – INILAGAY SI HESUS SA LIBINGAN

Sinasamba ka namin at pinasasalamatan, Panginoong Hesukristo.
Sapagkat sa pamamagitan ng Iyong Mahal na Krus ay iniligtas Mo ang sandaigdigan.

PAGBASA:
Pagsapit ng dilim, dumating si Jose, ang isang mayamang taga-Arimatea na tagasunod din ni Jesus. Hiningi niya kay Pilato ang bangkay ni Jesus, kaya't iniutos ni Pilato na ibigay ito kay Jose. Nang makuha na ang bangkay, binalutan niya ito ng malinis na tela ng lino. Inilagay niya ito sa kanyang bagong libingan na ipinauka niya sa bato. Pagkatapos, iginulong niya sa pintuan ang isang malaking batong panakip, at saka umalis.

PAGNINILAY:
Sa ilang mga pagkakataon nababalitaan natin ang tungkol sa mga Overseas Filipino Workers na naging daan ng pagbabalikloob ng mga pamilya at kaibigang kasama nila sa trabaho. Maraming mga OFWs ang naging matapat sa kanilang pananampalatayang
Kristiyano at sa pamamagitan ng kanilang halimbawa, marami ang naakay sa pananampalatayang ito.

Sinabi ni Papa Francisco na ang bawat isa ay kailangang maantig ng kaaliwan at pang-aakit ng mapagligtas na pagibig ng Diyos, na mahiwagang kumikilos sa bawat isa nang higit at lumalampas pa sa kanilang mga kamalian at pagkukulang. Ang Simbahan ay lumalago hindi sa pamamagitan ng pangungumberte sa pananampalataya kundi “sa pamamagitan ng panghihikayat tungo sa pananampalataya.”

PANALANGIN:
Panginoon, pagkalooban Mo kami ng Iyong pagkahabag upang sa tuwina’y makapagbigay kami sa mga nangangailangan. Basbasan Mo ang lahat ng mga Overseas Filipino Workers lalo na yaong mga pinili Mong maging daan ng pagpapahayag ng pananampalataya sa pamamagitan ng pagsaksi sa Iyong Salita at sa pagiging daan sa pagbabalik-loob bunga ng
“panghihikayat” sa pamamagitan ng aming uri ng pamumhay. Gantimpalaan Mo sila, Panginoon sa kanilang pananampalataya at sa kanilang pagiging mapagbigay. Amen.

Ama Namin…
Aba Ginoong Maria…
Luwalhati …

Panginoong Hesus na Nakapako sa Krus, Kaawaan mo Kami

01/04/2021

Online Daan ng Krus at Visita Iglesia

IKALABINTATLONG ESTASYON – ANG PAGPANAW NI HESUS SA KRUS

Sinasamba ka namin at pinasasalamatan, Panginoong Hesukristo.
Sapagkat sa pamamagitan ng Iyong Mahal na Krus ay iniligtas Mo ang sandaigdigan.

PAGBASA:
Nang magtatanghaling-tapat na, hanggang sa ikatlo ng hapon, nagdilim sa buong lupain. Nawalan ng liwanag ang araw at ang tabing ng Templo'y napunit sa gitna. Sumigaw
nang malakas si Jesus, “Ama, sa mga kamay mo'y ipinagkakatiwala ko ang aking espiritu!” At pagkasabi nito, nalagot ang kanyang hininga.

PAGNINILAY:
Ang Pontifical Mission Societies ang may pangunahing papel sa pagtataguyod at pagpapayaman ng diwa ng misyon sa Bayan ng Diyos. Gampanin din nila ang itaguyod ang bokasyon para sa missio ad gentes at sa panghihikayat ng suportang pampinansyal mula sa mga mananampalataya sa pagtataguyod ng misyon.

Sa katunayan, nahikayat na ni Papa Benedicto XV ang bawat isa na itaguyod ang misyon sapagkat nakararanas na ang Simbahan ng pag-unti ng bilang ng mga misyonero. Sinabi niya: “May pagtatangi naming hinihimok ang mga Katoliko na magkaloob ng kanilang mapagbigay na suporta at tulong sa mga organisasyong itinatag para suportahan ang misyon.” Ang mga organisasyong ito ay ang mga sumusunod: ang Pontifical Society for the Propagation of the Faith, Pontifical Society of the Holy Childhood, Pontifical Society of St. Peter the Apostle, at ang Pontifical Missionary Union.

PANALANGIN:
Panginoon, pagkalooban Mo kami ng matibay na pagtitiwala sa Iyo upang kapag dumating na ang katapusan ng aming oras dito sa lupa ay makarating sa Iyo ang aming kaluluwa nang walang pagkaantalà. Idinadalangin namin ang pag-unlad sa kabatirang pangmisyon, sa pagbibigay-buhay rito, at ang bokasyon sa pagmimisyon upang ang Salita ng Diyos ay maipahayag sa mga nag-aasam sa Kanya sa kanilang mga puso. Amen.

Ama Namin…
Aba Ginoong Maria…
Luwalhati …

Panginoong Hesus na Nakapako sa Krus, Kaawaan mo Kami

01/04/2021

Online Daan ng Krus at Visita Iglesia

IKALABINDALAWANG ESTASYON – ANG BIRHENG MARIA AT SI SAN JUAN SA PAANAN NG KRUS

Sinasamba ka namin at pinasasalamatan, Panginoong Hesukristo.
Sapagkat sa pamamagitan ng Iyong Mahal na Krus ay iniligtas Mo ang sandaigdigan.

PAGBASA:
Nakatayo sa tabi ng krus ni Jesus ang kanyang ina at ang kapatid nitong babae, si Maria na asawa ni Cleopas, at si Maria Magdalena. Nang makita ni Jesus ang kanyang ina at ang minamahal niyang alagad na nasa tabi nito, sinabi niya, “Ina, ituring mo siyang sariling anak!” At sinabi niya sa alagad, “Ituring mo siyang iyong ina!” Mula noon, sa bahay na ng alagad na ito tumira ang ina ni Jesus.

PAGNINILAY: Ang pagdedebosyon ng mga tao (popular piety) ay kilala bilang ang “kaban ng yaman ng bayan ng Diyos.” Ang mga misyonero at misyonera noong mga nakalipas na panahon ang nagpakilala sa mga gawain ng pagdedebosyon ng mga tao na naipapahayag sa maraming mga pamamaraan, at sapagkat ang mga ito’y hango mula sa pananampalataya, marapat itong pahalagahan at itaguyod. Sa Pilipinas, ang mga debosyong ito ay naging kadluan ng komunyon, panalangin, at pagpapanibago ng Simbahan. Itinaguyod ng mga misyonero at misyonera ang mga gawain ng pagdedebosyon bilang paraan ng pagpapakalat ng mensahe ng Mabuting Balita, ng pagbabalikloob, at ng pananatili ng Kristiyanong pananampalataya.

PANALANGIN:
Panginoon, pagkalooban Mo kami ng katiyagaan upang manatiling naroon sa tabi
ng mga nangangailangan. Panatilihin Mo ang kadalisayan ng pananampalataya ng mga deboto at ang yaman ng mga debosyong ito. Tulungan Mo kaming kilalanin ang katapatan ng kanilang pagdedebosyon at hayaan Mong matuto kami sa kanilang malalim na karanasan at pagpapahayag ng pananampalataya. Amen.

Ama Namin…
Aba Ginoong Maria…
Luwalhati …

Panginoong Hesus na Nakapako sa Krus, Kaawaan mo Kami

01/04/2021

online Daan ng Krus at Visita Iglesia

IKALABING-ISANG ESTASYON – IPINANGAKO NI HESUS ANG KANYANG KAHARIAN SA MABUTING MAGNANAKAW

Sinasamba ka namin at pinasasalamatan, Panginoong Hesukristo.
Sapagkat sa pamamagitan ng Iyong Mahal na Krus ay iniligtas Mo ang sandaigdigan.

PAGBASA:
Tinuya rin siya ng isa sa mga salaring nakapako sa tabi niya, “Hindi ba ikaw ang Cristo? Iligtas mo ang iyong sarili at pati na rin kami.”Ngunit pinagsabihan naman ito ng kanyang kasama, “Wala ka na bang takot sa Diyos? Ikaw ay pinaparusahan ding tulad niya!
Tama lamang na tayo'y parusahan nang ganito dahil sa ating mga ginawa; ngunit ang taong
ito'y walang ginawang masama.” At sinabi pa nito, “Jesus, alalahanin mo ako kapag naghahari ka na.” Sumagot si Jesus, “Sinasabi ko sa iyo, isasama kita ngayon sa Paraiso.”

PAGNINILAY:
Isang di-pangkaraniwang pangyayari sa panahon nating kasalukuyan ang pagdami ng
mga paring diyosesano na naglalaan ng kanilang sarili sa missio ad gentes na maituturing na isang pag-unlad sa maraming mga simbahang lokal sa ngayon. Umunlad ang bokasyon sa pagpapari at buhay pagmimisyon sa ilang mga diyosesis dahilan sa mga obispong nagpapadala ng kanilang mga pari sa misyon.

Noong taong 1919, si Papa Benedicto XV ay nagpahayag sa mga obispo: “Huwag kayong palilinlang sa mga nagmamarunong; huwang hayaan ang pangangatuwiran ng tao na makahadlang sa inyo sa pag-aakalang kabawasan sa inyong diyosesis ang mga paring ipinapadala ninyo sa misyon. Upang mapagpunan ang lugar ng bawat paring ipinapadala ninyo sa misyon, ang Diyos ang Siyang magkakaloob sa inyo ng maraming pari, at mga paring laan, para sa mga gawain sa inyong diyosesis.”

PANALANGIN:
Panginoon, pagkalooban Mo kami ng katiyagaan upang hindi kami huminto sa paghahanap sa Iyo. Idinadalangin namin ang mga paring diyosesano na nasa pagmimisyon ngayon upang sila’y magabayan at maingatan sa lahat ng kanilang mga pagpapagal. Amen.

Ama Namin…
Aba Ginoong Maria…
Luwalhati …

Panginoong Hesus na Nakapako sa Krus, Kaawaan mo Kami

01/04/2021

Online Daan ng Krus at Visita Igleisa

IKASAMPUNG ESTASYON – SI HESUS AY IPINAKO SA KRUS

Sinasamba ka namin at pinasasalamatan, Panginoong Hesukristo.
Sapagkat sa pamamagitan ng Iyong Mahal na Krus ay iniligtas Mo ang sandaigdigan.

PAGBASA:
Nang dumating sila sa isang bundok na tinatawag na Bungo, ipinako nila si Jesus sa krus. Ipinako rin ang dalawang kriminal, isa sa kanyang kanan at isa sa kaliwa. Sinabi ni Jesus, “Ama, patawarin mo sila sapagkat hindi nila nalalaman ang kanilang ginagawa.”

PAGNINILAY:
Ang Missio ad Gentes ay hindi maihihiwalay sa misyong mangalaga sa sangnilikha at sa lupa na ating pangkalahatang tahanan. Ang pangangalaga sa kapaligiran ay katumbas na rin sa pangangalaga sa sangkatauhan. Sa Mabuting Balita ayon kay San Marcos, ipinahahayag sa atin na isinugo ni Hesus ang Kanyang mga alagad upang ipahayag ang Mabuting Balita sa lahat ng mga nilikha na tahasan namang tumutukoy sa ating bokasyon bilang mga katiwala ng sangnilikha. Ngunit kailangan nating muli’t-muling isipin ang ating sarili bilang nag-iisang pamilya na naninirahan sa iisang pangkalahatang tahanan.

Ang pagnanais nating mangalaga sa ating pangkalahatang tahanan, ay nakatutulong sa atin upang makapasok sa misyon ng pakikipagdiyalogo sa mga bansa at mga relihiyon upang makakilos tayo nang sama-sama sa pangangalaga sa isa’t-isa sa pamamagitan ng ating pagbibigay-pansin sa lupa bilang ating pangkalahatang tahanan.

PANALANGIN:
Panginoon, pagkalooban Mo kami ng mahabaging puso upang maihatid namin ang pakikipagkasundo at kapatawaran sa lahat. Palalimin Mo ang aming pananampalataya upang makapagtatag kami ng makabuluhang pakikipag-ugnayan sa Iyo, sa mga tao, at sa buong sangnilikha. Amen.

Ama Namin…
Aba Ginoong Maria…
Luwalhati …

Panginoong Hesus na Nakapako sa Krus, Kaawaan mo Kami