17/07/2026
💐 Kagalakan Sa Katotohanan💐 ..PANGARAW-ARAW NA DEBOSYON
Pastor Chris Oyakhilome
17 Hulyo 2026
SUPILIN ANG IYONG KATAWAN
Kaya nga, mga kapatid, ipinamamanhik ko
sa inyo, alang-alang sa mga kahabagan ng
Diyos, na inyong ihandog ang inyong mga
katawan bilang haing buhay, banal, kalugud-
lugod sa Diyos, na siya ninyong makatuwirang paglilingkod (Roma 12:1).
Yamang nauunawaan na ang iyong espiritu ang Dakong Kabanalbanalan at siyang dapat manguna, na ang iyong kaluluwa ay sanay na sumunod, may isa pang mahalagang bahagi
na dapat tugunan: ang iyong katawan. Ang katawan ay hindi kusang umaayon sa buhay ng Diyos na nasa iyong espiritu; ito’y dapat kontrolin.
Kaya sinabi ng Salita, “…ihandog ninyo ang inyong mga katawan bilang haing buhay…” Ginawa na ng Diyos ang Kanyang bahagi sa muling paglikha ng iyong espiritu, ngunit
ang pagpapasakop ng iyong katawan, ang pag-aalay nito bilang haing buhay, ay iyong pananagutan. Nagbigay pa ng karagdagang
liwanag si Apostol Pablo: “Ngunit pinipigil ko ang aking katawan, at sinusupil ito…” (1 Corinto 9:27).
Ibig sabihin, ang katawan ay dapat disiplinahin at sanayin upang umayon sa iyong espiritu. May mga hilig ang katawan;
tumutugon ito sa mga damdamin, pagnanasa, at panlabas na tukso. Nais nitong kumilos batay sa nararamdaman. Ngunit ikaw ay isang espiritu, hindi katawan; ikaw ay naninirahan sa katawan. Kaya’t hindi mo maaaring hayaang pamunuan ka ng iyong mga pandama. Sabi ng Biblia, “Sapagkat kung kayo’y mamumuhay ayon sa laman, kayo’y mamamatay…” (Roma 8:13).
Ang pamumuhay ayon sa laman ay ang makontrol ng katawan at ng mga hilig nito, ngunit hindi iyan ang iyong buhay. Ikaw ay nabubuhay sa Espiritu, at gaya ng pagtatapos ng Roma 8:13, “…ngunit kung sa pamamagitan ng Espiritu ay pinapatay
ninyo ang mga gawa ng katawan, kayo’y mabubuhay.” Ibig sabihin, sa pamamagitan ng Espiritu Santo, pinapatay mo ang
mga gawa ng katawan, nilalampasan ang mga hilig nito, at dinadala ito sa pagsunod sa kalooban at layunin ng Diyos.
Hindi ito pagpigil lamang; ito’y pagiging bihasa. Ang iyong espiritu, na kaisa ng Espiritu Santo at puspos ng buhay ng Diyos,
ang siyang namumuno. Ang iyong kaluluwa, na binago ng Salita, ay sumasang-ayon. Pagkatapos, ang iyong katawan ay nadadala
sa pagsunod. Ito ang ganap na kaayusan ng buhay Kristiyano: espiritu, kaluluwa, at katawan na nakaayon sa Salita ng Diyos.
Huwag mong hayaang diktahan ng iyong katawan ang iyong buhay o kontrolin ang iyong mga tugon. Maging ito man ay kahinaan, pagnanasa, o anumang uri ng presyon; manguna mula sa iyong espiritu. Ihandog mo ang iyong katawan sa Diyos. Gawin mo itong naglilingkod sa Kanyang layunin. Kung maramdaman mo ang sintomas ng sakit, ipahayag: “Hindi! Ang
aking katawan ay templo ng Espiritu Santo; kaya’t ito’y hindi tinatablan ng sakit, karamdaman, at panghihina.” Tumanggi
kang hayaang pumasok ang sakit sa iyong katawan; bahagi ito ng pagpapanatili ng iyong katawan na nakaayon at nakasuko
sa Diyos.
PANALANGIN
Mahal na Ama, nagpapasalamat ako sa kapangyarihan ng iyong Espiritu sa akin. Ang aking katawan ay templo ng Espiritu Santo, at inihahandog ko ito bilang haing buhay, dinadala sa pagpapasakop sa iyong kalooban at mga daan. Tumanggi akong pamunuan ng mga pandama o likas na hilig. Ako’y lumalakad na kaayon ng Espiritu, nakaayon sa iyong ganap na kalooban sa lahat ng oras, sa Pangalan ni Jesus. Amen.
KARAGDAGANG PAGAARAL:
1 Corinto 9:27; Roma 8:12-13;
Galacia 5:24-25
Isang Taon Plano sa Pagbabasa ng Biblia:
Mga gawa 25:1-12 & Awits 7-10
Dalawang Taon Plano sa Pagbabasa ng Biblia:
Galacia 5:1-12 & Isaias 37
