San Lorenzo Ruiz Parish Youth Ministry

15/08/2026

𝗚𝗼𝗦𝗽𝗲𝗹𝗹𝗲𝗱 𝗯𝘆 𝘁𝗵𝗲 𝗬𝗼𝘂𝘁𝗵: 𝗕𝗮𝗹𝗶𝗸-𝘁𝗮𝗻𝗮𝘄 𝘀𝗮 𝗻𝗮𝗸𝗮𝗿𝗮𝗮𝗻𝗴 𝗔𝗿𝗮𝗹

AGOSTO 9, 2026 | 𝗜𝗞𝗔-19 𝗟𝗜𝗡𝗚𝗚𝗢 𝗦𝗔 𝗞𝗔𝗥𝗔𝗡𝗜𝗪𝗔𝗡𝗚 𝗣𝗔𝗡𝗔𝗛𝗢𝗡 (𝗔)
MABUTING BALITA: ‎Mateo 14: 22-33

Noong panahong iyon, matapos pakainin ang mga tao, agad pinakasakay ni Hesus sa bangka ang kanyang mga alagad at pinauna sa kabilang ibayo samantalang pinauuwi niya ang mga tao. Pagkaalis ng mga ito, umahon siya sa burol upang manalangin. Nag-iisa siyang inabot doon ng gabi. Samantala, nasa laot na noon ang bangka at sinasalpok ng mga alon sapagkat pasalungat sa hangin. At nang madaling araw na’y sumunod sa kanila si Hesus na naglalakad sa ibabaw ng tubig. Kinilabutan sa takot ang mga alagad nang makita nilang may lumalakad sa ibabaw ng tubig. “Multo!” sigaw nila. Ngunit agad siyang nagsalita at sinabi sa kanila, “Huwag kayong matakot; si Hesus ito!” At nagsalita si Pedro, “Panginoon, kung talagang kayo iyan, papariyanin ninyo ako sa ibabaw ng tubig.” Sumagot siya, “Halika.” Kaya’t lumunsad si Pedro sa bangka at lumakad sa ibabaw ng tubig, palapit kay Hesus. Ngunit nang mapansin niya ang hangin, siya’y natakot at nagsimulang lumubog. “Sagipin ninyo ako, Panginoon!” sigaw niya. Agad siyang inabot ni Hesus. “Napakaliit ng iyong pananalig!” sabi niya kay Pedro. “Bakit ka nag-alinlangan?” Pagkasakay nila sa bangka, tumigil ang hangin. At sinamba siya ng mga nasa bangka. “Tunay na kayo ang Anak ng Diyos!” sabi nila.
‎-----------------------------------------------------------
‎
𝗣𝗔𝗚𝗡𝗜𝗡𝗜𝗟𝗔𝗬
‎
Sa panahon ngayon, napakaraming problema ang humahampas sa bawat isa sa atin. Mga problemang sinusubukan ang ating pananalig at pananampalataya sa Panginoon. May pagkakataong nakakalimutan nating humawak nang mahigpit sa Kaniya.

Tandaan lamang natin, na Siya ay palaging nakikinig sa ating mga hinaing. Hindi Niya tayo pababayaan, sapagkat hahawakan niya nang mahigpit ang ating mga kamay at sasagipin tayo sa tiyak na pagkalunod.

Tibayan ang pananampalataya sa lahat ng oras dahil ang Panginoon natin ang siyang mag-aahon sa ating pagkalunod.

---------------------------------------------------------

11/08/2026

09/08/2026

𝐀𝐁𝐈𝐒𝐎 𝐏𝐔𝐁𝐋𝐈𝐊𝐎 | 09 Agosto 2026

Bunsod ng mataas na baha na ating dinaranas, at dahil binaha na rin po ang loob ng ating simabahan, pansamantalang KANSELADO ang mga pang-Linggong Misa ngayong umaga sa simbahan ng ating parokya.

Samantala ay TULOY po ang Banal na Misa sa simbahan ng ating parokya ng ika-5:30 ng hapon.

Panatilihin po nating ligtas ang bawat isa.

—Rev. Fr. Reymar Arca
Parish Priest,
San Lorenzo Ruiz Parish-Aniban

-------------------------------------------------------------------------

Sa ganitong pagkakataon, HUWAG TAYONG MANGAMBA. Tulad ng mga paalala ng Ebanghelyo sa Linggong ito, Ibaling lamang natin ang ating isip at pagtitiwala sa Panginoon. Siya ay tunay na mahabagin at nagliligtas.

Tayo po ay inaanyayahang manalangin sa agarang pagbabalik-normal ng sitwasyon sa ating mga komunidad. Patuloy din po tayong pinaaalalahanan na mag-ingat at manatiling laging nakahanda.

08/08/2026

𝗚𝗼𝗦𝗽𝗲𝗹𝗹𝗲𝗱 𝗯𝘆 𝘁𝗵𝗲 𝗬𝗼𝘂𝘁𝗵: 𝗕𝗮𝗹𝗶𝗸-𝘁𝗮𝗻𝗮𝘄 𝘀𝗮 𝗻𝗮𝗸𝗮𝗿𝗮𝗮𝗻𝗴 𝗔𝗿𝗮𝗹

AGOSTO 2, 2026 | 𝗜𝗞𝗔-18 𝗟𝗜𝗡𝗚𝗚𝗢 𝗦𝗔 𝗞𝗔𝗥𝗔𝗡𝗜𝗪𝗔𝗡𝗚 𝗣𝗔𝗡𝗔𝗛𝗢𝗡 (𝗔)
MABUTING BALITA: ‎Mateo 14: 13-21

Noong panahong iyon, nang marinig ni Hesus ang pagkamatay ni Juan Bautista, siya’y sumakay sa isang bangka at nag-iisang pumunta sa isang ilang na lugar. Nang mabalitaan naman iyon ng mga tao, sila’y lumabas ng bayan at lakad na sumunod sa kanya. Paglunsad ni Hesus sa dalampasigan, nakita niya ang napakaraming taong yaon. Nahabag siya sa kanila at pinagaling niya ang mga maysakit na dala nila.

Nang dapit-hapon na’y lumapit sa kanya ang mga alagad. Sinabi nila, “Ilang ang pook na ito at malapit nang lumubog ang araw. Papuntahin na po ninyo sa mga nayon ang mga tao upang makabili ng kanilang makakain.” “Hindi na sila kailangang umalis pa,” sabi ni Hesus. “Kayo ang magbigay sa kanila ng makakain.” Sumagot sila, “Lilima po ang tinapay at dadalawa ang isda natin.” “Dalhin ninyo rito,” sabi niya. Pinaupo niya sa damuhan ang mga tao, kinuha ang limang tinapay at dalawang isda; tumingala siya sa langit at nagpasalamat sa Diyos. Pinagpira-piraso niya ang mga tinapay at iniutos sa mga alagad na ipamigay iyon sa mga tao. Kumain silang lahat at nabusog. Tinipon ng mga alagad ang lumabis, at sila’y nakapuno ng labindalawang bakol ng hati-hating tinapay. May limanlibong lalaki ang kumain, bukod pa sa mga babae at mga bata.

‎-----------------------------------------------------------
‎
𝗣𝗔𝗚𝗡𝗜𝗡𝗜𝗟𝗔𝗬
‎
Narinig natin sa Ebanghelyo nitong nagdaang Linggo ang kuwento ng pagpapakain ni Hesus sa libu-libong tao gamit lamang ang limang tinapay at dalawang isda. Isang paalala ito na sa Diyos, walang imposible, lalo na kung may pananampalataya at pagtitiwala tayo sa Kanya.
‎
‎Sa paningin ng tao, tila imposibleng mapakain ang napakaraming tao sa kakaunting pagkain. Ngunit nang ialay ito kay Hesus, ang kaunti ay naging sapat at naging biyaya para sa lahat. Hindi nagsimula ang himala sa dami ng tinapay at isda, kundi sa pagtitiwala ng mga alagad at sa kanilang pagsunod sa Panginoon.
‎
‎Ang himalang ito ay hindi lamang tungkol sa pagkain. Ipinakikita rin nito kung paano tayo patuloy na binubusog ni Kristo sa pamamagitan ng Banal na Eukaristiya, ang Tinapay ng Buhay. Dito tayo kumukuha ng lakas upang magmahal, maglingkod, at magbahagi sa ating kapwa.
‎
‎Bilang mga Kristiyano, madalas nating iniisip na kulang ang ating kakayahan, oras, lakas, o kahit ang ating maitutulong. Ngunit itinuturo sa atin ng Ebanghelyo na hindi ang dami ng ating taglay ang mahalaga, kundi ang ating pusong handang magtiwala at magbahagi. Kapag inialay natin ang kahit maliit na mayroon tayo sa Panginoon, kaya niya itong paramihin at gawing pagpapala sa mas marami.
‎
‎Nawa'y maging paalala ito sa ating lahat na huwag matakot magbahagi ng ating oras, talento, at pagmamahal, sapagkat sa kamay ng Diyos, ang anumang maliit na handog ay maaaring maging malaking biyaya para sa marami.

---------------------------------------------------------

01/08/2026

𝗚𝗼𝗦𝗽𝗲𝗹𝗹𝗲𝗱 𝗯𝘆 𝘁𝗵𝗲 𝗬𝗼𝘂𝘁𝗵: 𝗕𝗮𝗹𝗶𝗸-𝘁𝗮𝗻𝗮𝘄 𝘀𝗮 𝗻𝗮𝗸𝗮𝗿𝗮𝗮𝗻𝗴 𝗔𝗿𝗮𝗹

HULYO 26, 2026 | 𝗜𝗞𝗔-17 𝗟𝗜𝗡𝗚𝗚𝗢 𝗦𝗔 𝗞𝗔𝗥𝗔𝗡𝗜𝗪𝗔𝗡𝗚 𝗣𝗔𝗡𝗔𝗛𝗢𝗡 (𝗔)
MABUTING BALITA: ‎Mateo 13: 44-52

Noong panahong iyon, sinabi ni Hesus sa mga tao: “Ang paghahari ng Diyos ay katulad ng kayamanang nakabaon sa isang bukid. Nahukay ito ng isang tao at tinabunan uli. Sa laking tuwa, siya’y humayo at ipinagbili ang lahat ng ari-arian niya at binili ang bukid na iyon.

Gayun din naman, ang paghahari ng Diyos ay katulad nito: may isang mangangalakal na naghahanap ng mamahaling perlas. Nang makakita ng isang perlas na napakahalaga, siya’y humayo at ipinagbili ang lahat ng kanyang ari-arian at binili iyon.

“Ang paghahari ng Diyos ay katulad din ng isang malaking lambat na inihagis sa dagat at nakahuli ng sari-saring isda. Nang mapuno ay hinila ito sa pampang. At naupo ang mga tao upang pagbukud-bukirin ang mga isda: tinipon nila sa mga sisidlan ang mabubuti, ngunit itinapon ang mga walang kuwenta. Gayun din ang mangyayari sa katapusan ng daigdig. Darating ang mga anghel at ihihiwalay ang mga makasalanan sa mga banal, at ihahagis ang mga makasalanan sa maningas na pugon. Doo’y mananangis sila at magngangalit ang kanilang ngipin.

“Nauunawaan na ba ninyo ang lahat ng ito?” tanong ni Hesus. “Opo,” sagot nila. At sinabi niya sa kanila, “Kaya nga, ang bawat eskriba na kumikilala sa paghahari ng Diyos ay tulad ng isang puno ng sambahayan na kumukuha ng mga bagay na bago at luma sa kanyang taguan.”

‎-----------------------------------------------------------
‎
𝗣𝗔𝗚𝗡𝗜𝗡𝗜𝗟𝗔𝗬
‎
Sa ating buhay, kadalasan, ang pinipili natin ay ang kaligayahan o ang mga bagay na makapagpapasaya sa atin sa mundong ito. Ngunit bakit ang pakiramdam natin ay parang may kulang pa sa lahat ng ito?

Sa ebanghelyo noong nakaraang Linggo, itinuturo sa atin ng ating Panginoong Hesukristo na may mas higit pa na kailangan nating pagtuunan ng pansin kaysa mga bagay sa mundong ito at sa mga sarili nating kagustuhan. Iyon ay walang iba kundi ang paghahari ng Diyos. At paano ba natin matatamo ang paghahari ng Diyos? Para sa akin, iyon ay sa pamamagitan pa rin ng pagsunod sa ating Panginoong Hesukristo. Siya lamang ang tamang daan patungo sa kaharian ng Diyos.

Ngunit hindi magiging madali ang pagtahak natin patungo sa paghahari ng Diyos kung hindi tayo magsusumikap na mamuhay sa kabutihan at kaayusan. Dahil katulad ng mangangalakal, mangingisda, at ng nagbungkal ng lupa, titipunin ng Diyos ang bago at luma habang ibubukod naman ang mabubuti sa masasama.

Para sa akin, ang kaharian ng Diyos ay naipagkaloob na sa atin nang tayo’y isinalang na sa mundong ito. Gayunpaman, natitiyak kong may mga bagay pa tayong dapat bitawan upang tayo ay makapagpanibago ng buhay. Ganito ang pagsunod kay Hesus - ang ating Daan patungo sa kaharian ng Diyos na ating tinatamasa.

---------------------------------------------------------
Abangan ang susunod pang pagpapaskil sa mga darating na Linggo 📝

27/07/2026

𝗣𝗔𝗡𝗢𝗢𝗥𝗜𝗡 | Ang natatanging pagtatanghal handog ng mga kabataan ni Ka Ensoy ng San Lorenzo Ruiz Parish Youth Ministry (SLRPYM) para sa mga lolo't lola ng ating sambayanan sa pagdiriwang ng 6𝒕𝒉 𝑾𝒐𝒓𝒍𝒅 𝒅𝒂𝒚 𝒇𝒐𝒓 𝑮𝒓𝒂𝒏𝒅𝒑𝒂𝒓𝒆𝒏𝒕𝒔 𝒂𝒏𝒅 𝒕𝒉𝒆 𝑬𝒍𝒅𝒆𝒓𝒍𝒚 na ginanap kahapon, ika-26 ng Hulyo, 2026.

Mabuhay ang Kabataang Lingkod ni Ka Ensoy!
--𝑺𝒆𝒓𝒗𝒊𝒕𝒆 𝑰𝒏 𝑰𝒖𝒗𝒆𝒏𝒕𝒖𝒕𝒆--
___________________________________________________________________

Videos from Sis. Jastine Caacbay and Bro. Nino John Eduardo

25/07/2026

𝗧𝗜𝗡𝗚𝗡𝗔𝗡 | Ang muling pagsasama-sama ng mga ng mga miyembro ng Parish Youth Ministry ng ating parokya kaninang hapon, ika-25 ng Hulyo.

Ilang litrato ng huling pagsasanay ng ilang mga kabataan ng ating parokya para sa natatanging pagtatanghal na kanilang ihahandog ngayong Linggo sa pagdiriwang ng Grandparents and Elderly Day.

© SLRPYM Core Council

25/07/2026

𝗚𝗼𝗦𝗽𝗲𝗹𝗹𝗲𝗱 𝗯𝘆 𝘁𝗵𝗲 𝗬𝗼𝘂𝘁𝗵: 𝗕𝗮𝗹𝗶𝗸-𝘁𝗮𝗻𝗮𝘄 𝘀𝗮 𝗻𝗮𝗸𝗮𝗿𝗮𝗮𝗻𝗴 𝗔𝗿𝗮𝗹

HULYO 19, 2026 | 𝗜𝗞𝗔-16 𝗟𝗜𝗡𝗚𝗚𝗢 𝗦𝗔 𝗞𝗔𝗥𝗔𝗡𝗜𝗪𝗔𝗡𝗚 𝗣𝗔𝗡𝗔𝗛𝗢𝗡 (𝗔)
MABUTING BALITA: ‎Mateo 13: 24-43 o Mateo 13: 24-30

‎Noong panahong iyon, inilahad ni Hesus ang talinghagang ito sa mga tao. “Ang paghahari ng Diyos ay katulad nito: may isang taong naghasik ng mabuting binhi sa kanyang bukid. Isang gabi, samantalang natutulog ang mga tao, dumating ang kanyang kaaway at naghasik ng masasamang damo sa triguhan. Nang tumubo ang trigo at magkauhay, lumitaw rin ang masasamang damo. Kaya’t lumapit ang mga alipin sa puno ng sambahayan at sinabi rito, ‘Hindi po ba mabuting binhi ang inihasik ninyo sa inyong bukid? Bakit po may damo ngayon?’ Sumagot siya, ‘Isang kaaway ang may kagagawan nito.’ Tinanong siya ng mga utusan, ‘Bubunutin po ba namin ang mga iyon?’ ‘Huwag,’ sagot niya. ‘Baka mabunot pati trigo. Hayaan na ninyong lumago kapwa hanggang sa anihan. Pag-aani’y sasabihin ko sa mga tagapag-ani: Tipunin muna ninyo ang mga damo at inyong pagbigkis-bigkisin upang sunugin, at ang trigo’y inyong tipunin sa aking kamalig.’”
‎
‎-----------------------------------------------------------
‎𝗣𝗔𝗚𝗡𝗜𝗡𝗜𝗟𝗔𝗬
‎
Sa buhay, hindi natin maiiwasan ang pagkakaroon ng mabuti at masama. Minsan, mapapatanong tayo kung bakit maraming kasamaan ang nangyayari sa mundo. Sa pagbukas pa lamang ng telebisyon, pagtingin sa ating cellphone, at maging sa pagsilip sa ating sariling pintuan at bintana, sari-saring balita tungkol sa paghihirap at kawalang-katarungan ang ating naririnig at nakikita. Kaya hindi natin maiwasang itanong: "Bakit tila hindi nawawala ang kasamaan? Bakit hinahayaan ito ng Diyos?"

Sinasabi ng iba na ang masamang damo ay matagal mawala, ngunit ipinapaalala sa atin ng Ebanghelyo na ang Diyos ay nagbibigay ng pagkakataon sa bawat isa na magbago, magsisi, at magbalik-loob sa Kanya. Hindi Siya agad humahatol dahil Siya ay mapagpasensya at maawain.

Kaya huwag tayong maging tulad ng masamang damo na madaling humusga sa pagkakamali ng iba. Sa halip, tanungin natin ang ating sarili: "Ako ba ay namumuhay ayon sa kalooban ng Diyos? Ako ba ay nagiging mabuting halimbawa sa aking kapwa?"
Tulad ng trigo, tinatawag tayo upang mamunga ng kabutihan sa gitna ng mundong puno ng pagsubok at kasamaan. Sa halip na ituon ang ating pansin sa pagkukulang ng iba, mas mahalagang pagtuunan natin ang ating sariling pagbabago. Maging instrumento tayo ng pagmamahal, pagpapatawad, at kabutihan sa araw-araw.

Hindi tayo tinawag upang humusga, kundi upang mamunga ng kabutihan habang hinihintay ang paghuhukom ng Diyos. Habang may panahon, piliin nating magbago at mamuhay ayon sa Kanyang kalooban. Sapagkat ang mahalaga ay hindi ang pagkukulang ng iba, kundi kung paano tayo naging tapat at mabuting anak ng Diyos.

Ang paghihintay ng Diyos ay hindi tanda ng pagwawalang-bahala sa kasamaan, kundi patunay ng Kanyang dakilang pag-ibig at awa. Nawa'y piliin nating maging mabuting trigo na patuloy na namumunga ng kabutihan at pagmamahal sa kapwa.

---------------------------------------------------------
Abangan ang susunod pang pagpapaskil sa mga darating na Linggo 📝

18/07/2026

𝗧𝗜𝗡𝗚𝗡𝗔𝗡 | Ang muling pagsasama-sama ng mga lider-kabataan ng Bikaryato ng San Miguel Arkanghel sa isinagawang pulong na ginanap sa ating parokya kaninang hapon, ika-18 ng Hulyo.

Nagkaroon ng kumustahan at pagpapakilala ang ilang mga lider-kabataan, kasama ang kanilang mga katuwang bilang paghahanda sa ilang mga gawain ng Ministri sa Kabataan ng Diyosesis lalo na sa paparating na World Youth Day sa susunod na taon. Naging matagumpay ang kumustahan sapagkat nagkaroon ang bawat isa ng pagkakataong makapagbahagi ng mga karanasan sa buhay paglilingkod na kanila ring magagamit sa pagpapaunlad ng samahan.

Kasabay rin ng naging pulong ang pagsasanay naman ng ilang mga kabataan ng ating parokya para sa natatanging pagtatanghal na kanilang ihahandog sa susunod na Linggo sa pagdiriwang ng Grandparents and Elderly Day.

Pasasalamat sa ating Kura Paroko sa natatanging suporta sa araw na ito.

Natatanging pasasalamat rin sa Bikaryato ng San Miguel Arkanghel sa pagbisita sa munting parokya ng San Lorenzo Ruiz.

© Bro. Kervin Gregorio & Sis. Jonna Fe Padernal | SLRPYM Core Council