13/05/2025
Y IMPUNG TUDING AT I APUNG LOURDES.
Qñg Balen ning Cabiao ating metung a malating Barrio carin ing ausan dang "Gulut" uling macagulut ya qñg Pisamban ning Balen, Ing Parroquia de San Juan Nepomoceno. Carin quetang mesabing barrio macatalacad ya ing mumuna escuela a ausan dang "Gabaldon"
Deng manucnangan queting mesabing Barrio Taal lang Capampañgan o Puru lang Capampañgan a mayap capilubluban ampong magmalasaquit la qñg capara dang tau pane lang masaya at macatiman deng tau manucnangan qñg barrio a ita. E melambat inaus deng "Barrio Maligaya " ing dating ausan dang gulut.
Lacuas pang Mesaya qñg Barrio Maligaya iniang datang ya busal da ing cuadru a maqui laman retrato nang Apung Lourdes a menibat qñg Barrio Cabetican.
I Gertrudes Dizon a mayayaus “Impong Tuding” metung yang taung e megaral dapat metung ya naman misteriosong matua. Mi'san a aldo, meninap ya ing matuang Tuding, casabi ne canu ing metung a matuang babai a papunta carin Barrio Cabetican, Bacolor, Pampanga. Papatagunan ne ning matuang casabi na qñg Fiesta ning Virgen de Lourdes at carin cuanan ne ing larauan na at iyuli ne carin barrio Maligaya.
"Itang aquit mung larauan a macatiman q***a iyuli me” nganang mengamanu ning matua. Tiparan na ning matuang Tuding ing yutus na caya ning matua agyamang ene balu ing Barrio Cabetican; caras na qñg cabalenan Baculud, pengutang ne nung nucarin ya ing Barrio Cabetican at carin pin miras ya quetang bisitas ning Virgen de Lourdes. Carin diptan na ing pangacu na a simba ya ing matua; carin ne apagmasdan ing malagung larauan nang Apung Lourdes cayari nang tiparan ing queang mumuna pangacu linual ya at carin menaquit yang “Palimus” miyaliwa retrato. Carin ne iquit ing metung a larauan nang Apung lourdes a macatiman para caya. Dapot, malungcut ya ing matua uling culang lang pera ding queang panlimus quetang larauan; Sactu lamu para qñg pamangan ning matua nia minuli ya malungcut ing matuang Tuding qñg carelang bale, ene daralan ing larauan a mesabi.
DAPOT MENGASDAN YA ING MATUA!
Cabuclat na qñg queang Bandala (bayong) carin macalub ya ing estampa ning Virgen de Lourdes! Mepaui ing queang lungcut uling iquit ne iting larauan macatiman ya. Geua neng altarina qñg carelang bale ing mesabing Estampa. Calabas ning pilan aldo ing asaua nang Impung Tuding, apansinan nang mabasa qñg lande ning bale inaus ne ing matuang Tuding uling bala na ing carin ya mini ing matuang Tuding dapot sinabi na ena gauan ita. Cabang pupulisan da ing danum, apansinan da ing danum, manibatan ya qñg altarina. Mine la qñg altar a nung ya macabili ing estampa nang Apung Lourdes at carin iquit da qñg caring sarili dang mata ing estampa ya ing maglual danum.
Agad-agad lang siniclaud deng aduang miyasaua at carin mengadi lang metung a daque ning Santo Rosario.
E miglambat mebalita iting mala milyari qñg mabilug a Nueva Ecija; manibat canita darayuan dane ing malati bale nang Impung Tuding; dacal lareng mengapaldan careng mialiuang saquit a pupunta carin.
Ating metung a mabandi ing melunus qñg bale nang Impung Tuding uling bina yang malati a pota malasac ya uling tune daracal la reng tau pupunta ban deng aquit ing mesabing cuadru. Memie yang donasyun a gabun qñg tulid ning bale nang Impung Tuding a malyari rang pitalacaran metung a malati bisitas. Cayari nang meyari mitalacad ning bisitas cabang lilipat de ing mal a larauan managas yang danum at ing danum papatak qñg gabun quetang pipatacan nang parti ning danum cabud cabud mica sibul a memalwal a danum a marimla at malinong tune macapaldan.
Dacal a mala; emu pang catauan nune na pang caladua mu naman ing mengapaldan uli ning pamagsantung da carin qñg mapag mala nang larauan Apung Lourdes.
Balang mapupus neman canu ing Eneru bayu ya mag fiesta Candelaria ating metung a matuang babai a macapamuti malan a macababat a asul a macapandung yang macaba cule maputi; mag palimus ya iti careng bale pupuntalan na ing sangcan na: Ing pamagtau qñg fiesta ning Virgen de Lourdes carin Barrio Maligaya. Ania deng devotus na manata neng ca fiestan nang Apung Lourdes saglulu lang maqui pila bamu macapangan quetang yapag dang "pacauasa" uling paniualan da ing pamangan a yapag da neng Cafiesta nang Apung Loures panulu ya inya ngarang mangamano:
"Ang handa ni Apong Lourdes ay gamot"
Qñg Paninap pepaquit ya ing metung a matuang babai cang Impung Tuding at utusan neng gauang metung a sulo a de laru (anti mong lampara) at itangad ne qñg cuadru. Ninu man ing cuma at icuscus ya ing laru qñg parti ning catauan a masaquit, mipaldan ya.
Tune pin macule at malalam ing devocion dareng tau cang Apung Lourdes qñg Cabiao. Ela sapat ding istoria uling malamang balang metung caring queang devotus atin lang sarili rang istoria nung macananu lang mipaldan caring saquit da at macananu nang binie ning Apung Guinu ing aniaran da capamilatan nang Apung Lourdes.
