https://www.facebook.com/108039180694584/

Ang Pulong sang Dios - Daily Mass Readings in Hiligaynon, Bacolod (2026)

30/08/2025

BALASAHON PARA SA SANTOS NGA MISA
AGOSTO 31 – DOMINGO
Ika-22 nga Domingo sa Ordinaryo nga Panahon

NAHAUNA NGA BALASAHON
Sirac 3: 17-18. 20. 28-29

Ang pagbasa gikan sa Libro ni Sirac.

Anak ko, magmatarong kag magmalulo sa imo mga bulohaton kag pagapalanggaon ikaw labi sang sa nagpatuyang nga manughatag. Sa nagadaku ikaw labi pa gid nga magpaubos ka, kag ang Ginoo magapakita sang iya kaayo sa imo.

Bisan nga daku ang gahom sang Ginoo, ginabaton niya ang pagsimba sang mapainuboson. Wala sing bulong para sa masakit sang isa ka tawo nga bugalon, tungod kay ang kalautan nakapanggamot na sa iya. Ang mabinatyagon nga tawo magahupot sang maayo nga mga pulong sa iya tagipusoon. Ang nagapamati nga dulonggan amo ang ginahandom sang maalam.

Ang Pulong sang Dios.
S: Salamat sa Dios.

SALMO SA PAGSABAT
Salmo 68: 4-5. 6-7. 10-11

O Dios, tungod sang Imo kaayo ginhatagan Mo ang mga imol sang ila mga kinahanglanon.

1. Ang mga matarong magakasadya, kag magahinugyaw sa atubang sang Dios magakalipay sila. Mag-amba kamo sa Dios, mag-amba sing mga pagdayaw sa Iya ngalan; ang Iya ngalan amo ang Ginoo, magkalipay kamo sa Iya atubangan. (S)
2. Ang Dios, nga nagapuyo sa Iya balaan nga Templo, nagaatipan sang mga ilo kag nagatatap sang mga balo nga babayi. Nagahatag Sia sing puloy-an sa nagaisahanon; kag ginahilway Niya kag ginapauswag ang mga binilanggo. (S)
3. Nagpadala Ikaw sang bugana nga ulan; kag ginhimo Mo nga mapatubasan ang lamgod nga duta; didto naghimo sing puloy-an ang Imo mga tawo, sa Imo kaayo ginhatagan Mo ang mga imol sang ila kinahanglanon. (S)

IKADUHA NGA BALASAHON
Hebreo 12: 18-19. 22-24

Ang pagbasa gikan sa Sulat sa mga Hebreo.

Mga utod: Wala kamo magkari sa sarang ninyo matandog, subong sang pagkadto sang mga taga-Israel sa bukid sang Sinai nga may nagadabdab nga kalayo, kadudolman kag makangitungito nga kadulom, bagyo, tunog sang isa ka trumpeta, kag sang isa ka tingog. Sang mabatian sang mga tawo ang tingog, nagapakiluoy sila nga indi na sila pagpabation bisan isa lang ka pulong. Sa baylo nagpalapit kamo sa bukid sang Sion kag sa siyudad sang Dios nga buhi, ang langitnon nga Jerusalem, nga may linibo ka mga anghel. Nagpalapit kamo sa malipayon nga pagtilipon sang panganay nga mga anak sang Dios, nga ang ila ngalan nasulat sa langit.

Nagpalapit kamo sa Dios, nga amo ang hukom sang tanan nga mga tawo, kag sa mga espiritu sang matarong nga mga tawo nga ginhimpit. Nagpalapit kamo kay Jesus, nga amo ang nagpatigayon sang bag-o nga kasugtanan.

Ang Pulong sang Dios.
S: Salamat sa Dios.

ALELUYA

Aleluya! Itakod ang Akon gota sa inyo, siling sang Ginoo, kag magtuon kamo sa Akon, kay Ako malulo kag mapainuboson sing tagipusoon. Aleluya!

EBANGHELYO Lucas 14: 1. 7-14

Ang pagbasa sang Santos nga Ebanghelyo suno kay San Lucas.
S: Himaya sa Imo, O Ginoo.

Nahanabo nga sang nakasulod si Jesus naghatag sia sa ila sining palanggiran, "Kon may mag-agda sa imo sa punsyon sang kasal indi ka magpungko sa pinasulabi nga pulongkoan, kay basi may inagda sia nga labing dungganon pa sa imo, kag ang nag-agda sa inyo nga duha magapalapit sa imo kag magsiling, ' Sia ang papungkoa dira.' Mahuy-an ka kag mapilitan ka sa pagpungko sa kubos nga pulongkoan. Sa baylo, kon ginaagda ka, kadto ka kag magpungko sa labing kubos nga pulongkoan, agod nga kon mag-abot ang nag-agda sa imo, magasiling sia, 'abyan, diri ka pungko upod sa mga dungganon.' Ini magapadungog sa imo, sa atubangan sang iban nga mga inagda. Kay ang nagapakataas sang iya kaugalingon pagapauboson kag ang nagapakaubos sang iya kaugalingon pagapataason."

Dayon si Jesus nagsiling sa nag-agda sa iya, "Kon ikaw nagahatag sing panyaga ukon panyapon, indi pag-agdaha ang imo mga abyan, ukon ang imo mga utod, ukon ang imo mga himata, ukon ang imo kasilingan nga manggaranon basi sila man magaagda sa imo, kag mabaton mo na ang imo balos. Kon naghiwat ka sang punsyon, agdaha ang mga imol, ang mga pingkaw, ang mga piang kag ang mga bulag. Mangin bulahan ka kay indi sila makabalos sa imo. Ang Dios ang magabalos sa imo sa pagkabanhaw sang mga matarong."

Ang Ebanghelyo sang Ginoo.
S: Dayawon ka, O Ginoong Jesukristo.

-------------------------------------

29/08/2025

BALASAHON PARA SA SANTOS NGA MISA
AGOSTO 30 – SABADO
Ika-21 nga Semana sa Ordinaryo nga Panahon

BALASAHON
1 Tesalonica 4: 9-11

Ang pagbasa gikan sa Nahauna nga Sulat ni San Pablo nga Apostol, sa mga taga-Tesalonica.

Mga utod: wala na sing kinahanglan sulatan pa kamo nahanugod sa paghigugma sa pareho ninyo nga mga tumoluo. Kay kamo gid gintudloan sang Dios sa paghigumaanay. Kag amo gid ini ang inyo pagsinalayo upod sa tanan nga mga kautoran sa bug-os nga Macedonia. Gani nagapakiluoy kami sa inyo, mga utod, nga ang inyo paghigugma magdugang pa gid.
Magtinguha kamo sa pagkabuhi sing malinong, nga nagahimo sang inyo kaugalingon nga bulohaton, kag nagapangabudlay para sa inyo kaugalingon nga palangabuhian, subong sang ginsiling namon sadto sa inyo.

Ang Pulong sang Dios.
S: Salamat sa Dios.

SALMO SA PAGSABAT
Salmo 98: 1. 7-8. 9

Ang Ginoo nagakari sa paggahom sa duta!

1. Magkanta kamo sing bag-o nga ambahanon sa Ginoo, kay nakahimo Sia sang makatilingala nga mga butang! Paagi sa Iya kaugalingon nga gahom kag balaan nga kusog, nagdaog Sia. (S)
2. Magdaguhob ka, O dagat, kag tanan nga tinuga nga yara sa Imo; magkanta, O duta, kag tanan nga nagapuyo dira sa Imo! Magpamalakpak kamo, O mga kadagatan; O mga kabakuloran, magkanta kamo sing tingub sa kalipay sa atubangan sang Ginoo. (S)
3. Kay nagakari Sia sa paggahom sa duta, pagagamahan Niya ang tanan nga katawuhan sa kalibutan suno sa katarungan kag kamatuoran. (S)

ALELUYA

Aleluya! Ginahatag Ko sa inyo ang isa ka bag-o nga sugo: maghigugmaanay kamo. Subong nga Ako naghigugma sa inyo, sa amo man nga bagay dapat kamo maghigugmaanay. Aleluya!

EBANGHELYO
Mateo 25: 14-30

Ang pagbasa sang Santos nga Ebanghelyo suno kay San Mateo.
S: Himaya sa Imo, O Ginoo.

Si Jesus nagsiling sa iya mga gintuton-an: “Ang Ginharian sang langit kaangay sing isa ka tawo nga manuglakat sa iban nga lugar. Gintawag niya ang iya mga suloguon kag gintugyan niya sa ila ang iya mga pagkabutang. Ginhatagan niya ang kada isa sa ila suno sa iya ikasarang. Ginhatagan niya ang isa sing P5,000, ang isa sing P2,000, kag ang isa pa gid sing P1,000; dayon naglakat sia. Ang suloguon nga nakabaton sing P5,000 naglakat kag iya ginpatikang ang iya kuwarta, kag nakaganansya sia sing P5,000. Amo man ang nakabaton sing P2,000 nakaganansya sia sing P2,000. Pero ang nakabaton sang P1,000 naglakat kag nagkutkot sa duta, kag ginlubong niya ang kuwarta sang iya agalon.

Sa tapos ang malawig nga panahon nagbalik ang agalon kag nagpakighusay sa iya mga suloguon. Ang suloguon nga nakabaton sing P5,000 nagsulod kag nagdala sing P5,000.

Nagsiling sia, ‘Agalon ginhatagan mo ako sing P5,000. Yari pa gid ang P5,000 nga akon naganansya.’

Ang iya agalon nagsiling sa iya, ‘Maayo gid, maayo kag matutom nga suloguon. Tungod kay maayo ka magpatikang sang diutay nga kantidad, karon itugyan ko sa imo ang dalagku pa gid nga kantidad. Dali diri kag mag-ambit sang akon kalipay!
Dayon ang suloguon nga nakabaton sing P2,000 nagsulod kag nagsiling, ‘Agalon, ginhatagan mo ako sing P2,000. Yari pa gid ang P2,000 nga ako naganansya.’

Ang iya agalon nagsiling, ‘Maayo gid, maayo kag matutom nga suloguon! Tungod kay maayo ka magpatikang sang diutay nga kantidad, karon itugyan ko sa imo ang dalagku pa gid nga kantidad.

Dali diri kag mag-ambit sang akon kalipay! Dayon ang suloguon nga nakabaton sing P1,000 nagsulod kag nagsiling, ‘Agalon, nakahibalo ako nga mabudlay ka nga tawo, kay nagaani ikaw sa wala mo matamni kag nagatipon sang patubas nga wala mo masab-ugi. Hinadlukan ako kag naglakat ako kag gintago ang imo kuwarta sa duta. Yari ang kuwarta.’

Ang iya agalon nagsiling, ‘Malain kag matamad nga suloguon! Nakahibalo ka gali nga ako nagaani sa wala ko matamni kag nagapatubas sa wala ko masab-ugi? Kuntani ginpatago mo sa bangko ang akon kuwarta, agod sa akon pagbalik, makuha ko ang akon kuwarta upod sang iya saka. Karon kuhaa ninyo ang kuwarta sa iya kag ihatag sa suloguon nga nakabaton sing P10,000. Kay ang tagsa nga may iya, hatagan pa gid, kag magasulobra ang iya pagkabutang. Pero sia nga wala sing iya, bisan ang diutay niya nga pagkabutang kuhaon pa.

Nahanungod sining walay pulos nga suloguon, ihaboy sia ninyo didto sa kadudolman sa gwa. Didto magahibi sia kag magabagrot ang iya mga ngipon.’ “

Ang Ebanghelyo sang Ginoo.
S: Dayawon ka, O Ginoong Jesukristo.

-------------------------------------

28/08/2025

BALASAHON PARA SA SANTOS NGA MISA
AGOSTO 29 – BIERNES
Ang Pagkasakit ni San Juan Bautista, Martir

BALASAHON
Jeremias 1: 17-19

Ang pagbasa gikan sa Libro ni Jeremias nga Propeta.

Umabot sa akon ang pulong sang Ginoo nga nagasiling: “Magpakaisog ka! Lakat ka, kag isugid sa ila ang tanan nga akon ginsugo sa imo nga isiling. Karon, indi ka magkahadlok sa ila, kay kon indi, pahadlukon ko pa gid ikaw sa ila atubangan. Pamati ka, Jeremias! Ang tagsa-tagsa nga nagapuyo sa sining duta: ang mga hari sang Juda, ang mga opisyales, ang mga pari, kag ang mga tawo magapamatok sa imo. Pero karon nga adlaw, ihatag ko sa imo ang ikasarang sa pagbato sa ila.

Mangin-kaangay ikaw sang isa ka siyudad nga napamakuran sing maayo, sang isa ka pader nga saway. Indi sila makadaog sa imo, kay yari ako sa pag-apin sa imo. Ako, ang Ginoo, nagahambal sini.” .

Ang pulong sang Dios.
S: Salamat sa Dios.

SALMO SA PAGSABAT
Salmo 71: 1-2; 3-4a; 5-6ab; 15ab kag 17

Magabantala ako sang Imo kaayo.

1. Upod sa Imo, O Ginoo, indi ako maano; indi gid pag-itugot nga malutos ako! Tungod kay matarong ka, buligi ako kag tabangi ako! Pamatii ako kag luwasa ako! (S)
2. Ikaw mangindalangpan ko nga mapag-on, kag malig-on nga pamakod sa pag-apin sa akon, Ikaw akon dalanggapan kag mangangapin. O Dios ko, luwasa ako sa malaut nga mga tawo. (S)
3. Ang akon paglaum, O Ginoo, yara sa Imo, nagsalig ako sa Imo halin sang pamatan-on pa ako. Nagsalig ako sa Imo sa bug-os ko nga kabuhi, gin-apinan Mo ako halin pa sang akon pagkatawo. (S)
4. Magasugid ako sang Imo pagkamatarong, sa bug-os nga adlaw magahambal ako nahanungod sang Imo kaluwasan. Gintudloan Mo ako halin sang pamatan-on pa ako kag tubtob karon ginasugid ko ang Imo makatilingala nga mga binuhatan. (S)

ALELUYA

Aleluya! Bulahan ang mga ginahingabot tungod kay ginatuman nila ang ginapa-abot sang Dios sa ila kay ila ang Ginharian sang langit. Aleluya!

EBANGHELYO
Marcos 6: 17-29

Ang pagbasa sang Santos nga Ebanghelyo suno kay San Marcos.
S: Himaya sa Imo, O Ginoo.

Si Herodes mismo amo ang nagmando nga ipadakop si Juan, ipagapos kag ipabilanggo. Ginhimo niya ini tungod kay Herodias nga iya ginpangasawa bisan ini sia asawa sang iya utod nga si Felipe. Pirme lang sia ginahambalan ni Juan Bautista, “Indi matarong ang imo pagpangasawa sang asawa sang imo utod!”

Gani gindumtan ni Herodias si Juan kag gintuyo niya nga patyon, pero indi sia makahimo sini tungod kay Herodes. Nahadlok si Herodes sa kay Juan tungod kay nahibal-an niya nga si Juan matarong kag balaan nga tawo. Gani, gin-apinan niya si Juan nga indi maano. Naluyag sia magpamati kay Juan wala sapayan nga nagakatublag sia sa kada pagpamati niya sa iya.

Sang ulihi nag-abot gid ang kahigayunan nga ginahulat ni Herodias.

Kaadlawan yadto ni Herodes kag naghiwat sia sang isa ka punsyon para sa mataas nga mga punoan sang banwa, mga opisyales sang mga soldado kag lutaw nga mga pumoluyo sang Galilea. Ang anak nga babayi ni Herodias nagsulod kag nagsaot, kag naglingaw sa kay Herodes kag sang iya mga dinapit.

Gani ang hari nagsiling sa dalagita, “Pangayo ka sang bisan ano kay ihatag ko sa imo.” Kag nagsiling pa sia, “Ginasumpa ko nga ihatag ko sa imo ang bisan ano nga pangayuon mo, bisan pa ang katunga sang akon ginharian.”

Tungod sini naggwa ang dalagita kag nagpamangkot sa iya iloy, “Ano bala ang pangayuon ko?”

Ang iloy nagsabat, “Ang ulo ni Juan Bautista.”

Gilayon nagdalidali sa pagbalik ang dalagita sa hari kag nagsiling, “Gusto ko nga ihatag mo sa akon sa gilayon ang ulo ni Juan Bautista sa isa ka bandihado!”

Nagpasubo gid ini sa hari, pero indi na sia makabalibad tungod kay nagpanumpa sia sa atubangan sang iya mga dinapit. Gani ginsugo niya sa gilayon ang isa ka soldado sa pagdala sa iya sang ulo ni Juan. Nagkadto ang soldado sa prisuhan kag ginpugotan si Juan. Kag gindala niya ang ulo nga natungtong sa isa ka bandihado kag ginhatag ini sa dalagita nga amo ang naghatag sini sa iya iloy. Sang mabatian ini sang mga gintuton-an ni Juan, ginkadtuan nila kag ginkuha ang iya bangkay kag ginlubong.

Ang Ebanghelyo sang Ginoo.
S: Dayawon ka, O Ginoong Jesukristo.

-------------------------------------

27/08/2025

BALASAHON PARA SA SANTOS NGA MISA
AGOSTO 28 – HUEBES
Kapistahan ni San Agustin, Obispo kag Doktor

BALASAHON
1 Tesalonica 3: 7-13

Ang pagbasa gikan sa Nahauna nga Sulat ni San Pablo nga Apostol, sa mga taga-Tesalonica.
Mga utod, sa tanan namon nga mga kabudlayan kag mga pag-antos napalig-on kami tungod sa inyo. Ang inyo pagtuo amo ang nagpalig-on sa amon, kay karon naumpawan kami sa amon paghibalo nga malig-on kamo sa Ginoo. Daw ano ang amon pagpasalamat sa Dios nahanungod sa inyo! Nagapasalamat kami tungod sang kalipay nga amon naangkon sa atubangan sang Dios tungod sa inyo. Sa adlaw kag gab-i nagapangamuyo kami sing hugot sa tagipusoon nga magkitaay kita kag madugangan namon ang nakulang sa inyo pagtuo.

Kabay nga ang Dios mismo nga aton Amay, kag ang aton Ginoong Jesus maghatag sang kahigayunan nga makakadto kami dira sa inyo! Kabay nga ang Ginoo magpatubo sang inyo gugma sa isa kag isa kag sa tanan nga mga tawo, kag mangin daku ini subong sang amon paghigugma sa inyo.

Sa sini nga paagi mapalig-on niya ang inyo mga tagipusoon, kag manginhimpit kamo kag manginbalaan sa atubangan sang aton Dios nga Amay, kon mag-abot ang aton Ginoong Jesus kaupod sang iya kaugalingon nga mga tawo.

Ang Pulong sang Dios.
S: Salamat sa Dios.

SALMO SA PAGSABAT
Salmo 90: 3-5. 12-13. 14. 17

O Ginoo, pun-a kami sa tagsa ka aga sang Imo mapinadayunon nga gugma.

1. Ginamanduan Mo ang mga tawo sa pagbalik sa ila ginhalinan, ginahimo Mo sila liwat nga duta. Ang isa ka libo ka tuig para sa Imo subong lang sang isa ka adlaw; kaangay lang sila sang kahapon nga nagligad na, subong sang isa ka malip-ot nga takna sa kagab-ihon. (S)
2. Tudloi kami kon daw ano kalip-ot sang amon kabuhi, agod nga manginmainamdamon kami. O Ginoo, tubtob pa bala san-o Ikaw malugpayan? Kaluoyi man ang Imo mga alagad! (S)
3. Pun-a kami sa tagsa ka aga sang Imo mapinadayunon nga gugma, agod magkanta kag magkalipay kami sa bug-os namon nga kabuhi. Ginoo nga amon Dios, kabay nga bendisyunan Mo kami, kag hatagi kami sing kadalag-an sa tanan namon nga amon ginahimo. Huo, hatagi kami sing kauswagan sa tanan nga amon ginahimo. (S)

ALELUYA

Aleluya! Magbantay kamo kag maghanda kamo kay sa takna nga wala ninyo ginapa-abot, ang Anak sang Tawo magakari. Aleluya!

EBANGHELYO
Mateo 24: 42-51

Ang pagbasa sang Santos nga Ebanghelyo suno kay San Mateo.
S: Himaya sa Imo, O Ginoo.

Si Jesus nagsiling sa iya mga gintuton-an: “Magbantay kamo, kay wala kamo makahibalo kon ano nga adlaw maabot ang inyo Ginoo. Dumdoma ninyo ini! Kon ang tagbalay nakahibalo kon sa ano nga tion sang gab-i ang makawat maga-abot, magapulaw sia kuntani agod indi pagsudlon sang makawat ang iya balay. Gani maghanda man kamo, kay sa takna nga wala ninyo ginapaabot, ang Anak sang Tawo magakari.”

“Kon amo, sin-o ang masaligan kag maalam nga suloguon? Sia amo ang gintugyanan sang iya agalon sa pagdumala sang iban nga mga suloguon, kag sa paghatag sa ila sang ila pagkaon sa nagakaigo nga tion. Bulahan yadto nga suloguon nga sa pagpauli sang iya agalon masapwan sia nga nagahimo sang iya bulohaton!

Nagasiling ako sa inyo, nga sia ang padumalahon sang iya agalon sang tanan niya nga pagkabutang.

Pero kon malain sia nga suloguon magasiling sia sa iya kaugalingon, ‘Dugay pa mabalik ang akon agalon,’ kag magasugod sia sa pagpamintas sang iya kaupod nga suloguon, kag magkaon kag mag-inom upod sa mga palahubog. Dayon ang agalon sadto nga suloguon magaabot sa tion nga wala niya ginapaabot kag sa tion nga wala niya mahibaloi. Ang agalon magahatukhatok sa iya kag magasilot sa iya upod sa mga salimpapaw. Didto magahibi sia kag magabagrot sang iya mga ngipon.”

Ang Ebanghelyo sang Ginoo.
S: Dayawon ka, O Ginoong Jesukristo.

-------------------------------------

26/08/2025

BALASAHON PARA SA SANTOS NGA MISA
AGOSTO 27 – MIERKOLES
Kapistahan ni Santa Monica

BALASAHON
1 Tesalonica 2: 9-13

Ang pagbasa gikan sa Nahauna nga Sulat ni San Pablo nga Apostol, sa mga taga-Tesalonica.

Mga kautoran, matuod gid nga indi ninyo malipatan kon daw ano ang amon pagpangabudlay kag paghimulat! Nagapangabudlay kami sa adlaw kag sa gab-i agod nga indi kamo mabug-atan sa pagsakdag sa amon samtang nagawali kami sa inyo sang Maayong Balita gikan sa Dios.

Mga saksi namon kamo, kag subong man ang Dios: ang amon pagginawi sa tunga ninyo putli, matarong kag di-salawayon. Nahibaluan ninyo nga ginakabig namon ang tagsatagsa sa inyo subong sang pagkabig sang isa ka amay sa anak.

Ginlaygayan namon kamo nga magmalig-on, ginlipay namon kamo, kag nagpadayon kami sa paglaygay sa inyo sa pagkabuhi suno sa nahamut-an sang Dios, nga nagatawag sa inyo sa pag-ambit sang iya kaugalingon nga Ginharian kag himaya.

Tungod man sini, nagapasalamat kami sa Dios sa gihapon. Sang pagdala namon sa inyo sang pulong sang Dios, ginpamatian ninyo ini kag ginbaton, indi subong pulong sang tawo, kundi subong pulong sang Dios, nga sa pagkamatuod amo gid man ini. Kay ang Dios nagapanghikot sa inyo nga nagatuo.

Ang Pulong sang Dios.
S: Salamat sa Dios.

SALMO SA PAGSABAT
Salmo 139: 7-8. 9-10. 11-12

O Ginoo, gin-usisa Mo ako, kag nakilala Mo ako.

1. Diin bala ako makadto agod makapalagyo sa Imo Espiritu? Diin ako makadto agod makapalagyo sa Imo atubangan? Kon magsaka ako sa langit, didto Ikaw, kon maghigda ako sa duog sang mga patay, didto man Ikaw. (S)
2. Kon maglupad ako sa unhan sang sidlangan, ukon magpuyo sa pinakalayo nga duog sang nakatundan, didto Ikaw sa pagtuytoy sa akon, didto Ikaw sa pagbulig sa akon. (S)
3. Mapangayo ko ang kadudulman sa pagtago sa akon, ukon ang kapawa sa palibot nakon nga magmangin gab-i, pero bisan ang kadudulman indi madulom para sa Imo, kag ang kagab-ihon subong kasanag sang adlaw. (S)

ALELUYA

Aleluya! Ang nagatuman sang pulong ni Kristo, amo ang tawo nga ang iya gugma sa Dios nahimpit. Aleluya!

EBANGHELYO
Mateo 23: 27-32

Ang pagbasa sang Santos nga Ebanghelyo suno kay San Mateo.
S: Himaya sa Imo, O Ginoo.

Si Jesus nagsiling sa mga Fariseo! “Kailo man kamo, mga manunudlo sang Kasugoan, kag mga Fariseo! Mga salimpapaw! Kaangay kamo sang mga lulobngan nga ginpintahan sing puti kag matahom tan-awon sa gwa, pero puno sang tul-an sang mga patay kag sang kagarukan sa sulod. Kamo amo man! Kon tan-awon kamo sang mga tawo daw sa matarong kamo, pero ang sa sulod ninyo puno sang mga kabutigan kag kalautan.”

“Kailo man kamo, mga manunodlo sang kasugoan kag mga Fariseo! Mga salimpapaw! Nagahimo kamo sing matahom nga mga lulobngan para sa mga propeta kag nagapuni sang pantyon sang mga matarong, kag nagasiling kamo, ‘Kon kita nagkabuhi sa mga panahon sang aton mga ginikanan, wala kuntani kita maghimo sang ila ginhimo kag magpatay sang mga propeta.’

Kon amo ginaako ninyo nga kamo mga kaliwat sang nagpatay sang mga propeta! Sigi, padayuna ninyo kag tapusa ang ila ginsugoran!

Ang Ebanghelyo sang Ginoo.
S: Dayawon ka, O Ginoong Jesukristo.

-------------------------------------

25/08/2025

BALASAHON PARA SA SANTOS NGA MISA
AGOSTO 26 - MARTES
Ika-21 nga Semana sa Ordinaryo nga Panahon

BALASAHON
1 Tesalonica 2: 1-8

Ang pagbasa gikan sa Nahauna nga Sulat ni San Pablo nga Apostol, sa mga taga-Tesalonica.

Mga kautoran, kamo gid nakahibalo nga ang amon pagduaw sa inyo indi kapaslawan. Nakahibalo kamo kon daw ano ang pagpaantos kag pagpakahuya sa amon sa Filipos sa wala pa kami makakadto sa inyo sa Tesalonica. Pero ang aton Dios naghatag sa amon sing kaisog sa pagsugid sa inyo sang Maayong Balita nga nagahalin sa Iya, bisan pa nga may madamo nga mga pagpamatok. Kay ang amon laygay sa inyo wala nagagikan sa sayop ukon sa mga malain nga tinutuyo, ukon sa daya. Sa baylo, nagahambal kami sa gihapon suno sa luyag sang Dios, kay ginpakamaayo kami sang Dios kag gintugyanan sang Maayong Balita. Wala kami nagapahamuot sa tawo, kundi sa Dios nga amo ang nagatilaw sang amon mga tinutuyo. Kay nahibaluan gid ninyo nga wala kami nagagamit sang mga pulong sa pagdayawdayaw sa inyo, ukon sa pagtabuntabon sang amon pagkahakog. Ang Dios amo gid ang amon saksi! Wala kami nagapangita nga ang mga tawo magpadungog sa amon, bisan kamo ukon sa iban, bisan pa nga nakapaabot kuntani kami sini sa inyo subong nga mga apostoles ni Kristo. Sa baylo, malulo kami sang kaupod pa kami ninyo, subong sang kalulo sang isa ka iloy nga nagabatiti sang iya mga anak. Tungod sang amon gugma sa inyo, handa kami sa pagpaambit sa inyo indi lamang sang Maayong Balita gikan sa Dios, kundi bisan pa sang amon kabuhi. Mahal gid kamo sa amon!

Ang Pulong sang Dios.
S: Salamat sa Dios.

SALMO SA PAGSABAT
Salmo 139: 1-3. 4-6

O Ginoo, gin-usisa Mo ako, kag nakilala Mo ako.

1. O Ginoo, gin-usisa Mo ako, kag nakilala Mo ako. Nahibaluan Mo ang tanan nga ginahimo ko; gikan sa malayo nahangpan Mo ang akon mga panghunahona. Makita Mo ako bisan nagaobra ukon nagapahuway ako, nahibaluan Mo ang tanan ko nga mga ginahimo. (S)
2. Bisan sa wala pa ako makahambal nahibaluan Mo na ang akon inugsiling. Yari Ka sa palibot ko, sa atubangan, sa likod, sa kilid, ginaapinan Mo ako sang Imo gahom. Ang Imo nahibaluan nahanungod sa akon tama ka makatilingala, tama kadalom para sa akon paghangop. (S)

ALELUYA

Aleluya! Ang pulong sang Dios buhi kag gamhanan, nga nagatungkad sang mga panghunahona kag mga handom sang tagipusoon sang tawo. Aleluya!

EBANGHELYO
Mateo 23: 23-26

Ang pagbasa sang Santos nga Ebanghelyo suno kay San Mateo.
S: Himaya sa Imo, O Ginoo.

Si Jesus nagsiling sa mga Fariseo, "Kailo man kamo mga manunodlo sang Kasugoan kag mga Fariseo! Mga salimpapaw! Nagahatag kamo sa Dios sang ikanapulo nga bahin sang panakot subong sang tanglad, sang sibuyas, sang luy-a, pero ginapatumbayaan ninyo ang labing importante nga mga ginatudlo sang kasugoan, nga amo ang katarungan, kaluoy kag pagtuo. Amo ini ang inyo dapat buhaton, nga wala nagapatumbaya sang iban, bulag nga mga manugtuytoy! Ginasala ninyo ang mga sapatsapat sa ilimnon, pero ginahalunhon ninyo ang kamelyo!

"Kailo man kamo mga manunodlo sang Kasugoan kag mga Fariseo! Mga salimpapaw! Ginatinluan ninyo ang sa gwa sang baso kag sang pinggan, pero ang sulod sini puno sang mga butang nga inyo nakuha paagi sa paglugos kag kahakog.

Mga Fariseo nga bulag! Tinloi anay ang sulod sang baso, kag ang sa gwa magatinlo man!

Ang Ebanghelyo sang Ginoo.
S: Dayawon ka, O Ginoong Jesukristo.

-------------------------------------

24/08/2025

BALASAHON PARA SA SANTOS NGA MISA
AGOSTO 25 – LUNES
Kapistahan ni San Luis sang Francia, Hari

BALASAHON
1 Tesalonica 1: 1-5. 8-10

Ang pagbasa gikan sa Kamunoan sang Nahauna nga Sulat ni San Pablo nga Apostol, sa mga taga-Tesalonica.

Pang-abiabi halin kay Pablo, kay Silas, kag kay Timoteo – Sa mga katapo sang iglesia sa Tesalonica, nga iya sang Dios nga Amay kag Ginoong Jesukristo.
Kabay nga ang grasya kag paghidait manginyara sa inyo.
Nagapasalamat kami sa gihapon sa Dios tungod sa tanan, kag ginsambit namon kamo sa gihapon sa amon pangamuyo. Kay ginadumdom namon sa atubangan sang aton Dios nga Amay kon daw ano ang pagbutang ninyo sa buhat sang inyo pagtuo, kon daw ano ang pagtulod sang inyo gugma sa inyo pagpangabudlay sing tudotudo, kag kon daw ano ka lig-on sang inyo paglaum sa Ginoong Jesukristo.

Nakahibalo kami, mga kautoran, nga ang Dios nagahiguma sa inyo kag nagpili sa inyo nga mangin iya. Kay gindala namon ang Maayong Balita sa inyo, indi lamang sa mga pulong kundi sa gahom man kag sa Espiritu Santo, kag sa bug-os nga pagsalig sa iya kamatuoran. Nakahibalo kamo sang amon pagginawi sang kaupod pa kami ninyo, kay yadto para sa inyo kaayuhan. Gani, wala na sing kinahanglan nga maghambal pa kami. Tanan yadto nga mga tawo nagasugid kon daw ano ang pagbaton ninyo sa amon, sang pagduaw namon dira sa inyo, kag kon daw ano ang pagbiya ninyo sa mga diosdios. Karon nagaalagad kamo sa matuod kag buhi nga Dios, kag nagahulat sa iya Anak nga magakari gikan sa langit, ang iya Anak nga si Jesus nga iya ginbanhaw sa mga minatay, kag magaluwas sa aton sa kaakig sang Dios nga magaabot.

Ang Pulong sang Dios.
S: Salamat sa Dios.

SALMO SA PAGSABAT
Salmo 149: 1-2. 3-4. 5-6. 9

Ang Ginoo nagakalipay sa iya mga tawo.

1. Magkanta sing bag-o nga ambahanon sa Ginoo, dayawa ninyo sia sa pagtilipon sang iya matutom nga mga tawo! Magkasadya ka O Israel, tungod sang imo Manunoga; Maghinugyaw kamo, O mga pumoluyo sang Sion, tungod sang inyo hari! (S)
2. Dayawa ninyo nga may pagsinaot ang iya ngalan; magtukar kamo sing mga bumbo kag mga arpa sa pagdayaw sa iya. Ang Ginoo nagakalipay sa iya mga tawo; Ginapadunggan niya ang mga mapainuboson sing pagdaog. (S)
3. Maghinugyaw ang mga tawo sang Dios sa ila pagdaog, kag mag-amba sing masinadyahon sa ila mga piesta. Magsinggit sila sing mabaskog sa ila pagdayaw sa Dios, amo ini ang pagdaog sang mga tawo sang Dios. (S)

ALELUYA

Aleluya! Ang akon mga karnero nagapamati sa akon tingog; siling sang Ginoo; kilala ko sila kag nagasunod sila sa akon. Aleluya!

EBANGHELYO
Mateo 23: 13-22

Ang pagbasa sang Santos nga Ebanghelyo suno kay San Mateo.
S: Himaya sa Imo, O Ginoo.

Si Jesus nagsiling sa mga Fariseo, “Kailo man kamo, mga manunodlo sang Kasugoan kag mga Fariseo! Mga salimpapaw! Ginatakpan ninyo ang puwertahan sang Ginharian sang langit sa mga tawo, pero kamo inyo wala nagasulod kag ginabalabagan pa ninyo ang nagatinguha sa pagsulod!

“Kailo man kamo, mga manunodlo sang Kasugoan kag mga Fariseo! Mga salimpapaw! Ginatabok ninyo ang mga kadagatan kag ginalatas ang mga kadutaan sa pagkonbertir sang isa ka tawo, kag kon makonbertir na gani sia, ginahimo ninyo nga doble pa kalian sang sa inyo nga bagay sa impiyerno!

Kailo man kamo, mga bulag nga manugtuytoy! Nagatudlo kamo ‘Kon ang tawo magsumpa sa templo, indi kinahanglan nga tumanon niya ang iya sumpa. Pero kon magsumpa sia sa bulawan nga yara sa templo, kinahanglan tumanon niya ang iya sumpa.’ Buangboang kag mga bulag! Diin bala ang pasulabihon, ang bulawan ukon ang templo nga nagapabalaan sang bulawan? Nagatudlo man kamo, ‘Kon ang tawo magsumpa sa altar, indi kinahanglan tumanon niya ang iya sumpa, pero kung magsumpa sia sa dulot nga yara sa ibabaw sang altar kinahanglan tumanon niya ang iya sumpa.’ Mga bulag gid kamo! Diin bala ang pasulabihon, ang dulot ukon ang altar nga nagapabalaan sa dulot? Gani kon ang tawo magsumpa sa altar, nagasumpa sia sa altar kag sa tanan nga dulot nga nga yara sa altar. Kag kon ang tawo magasumpa sa templo, nagasumpa sia sa templo kag sa Dios nga nagapuyo didto. Kag kon ang tawo magsumpa sa langit, nagasumpa sia sa trono sang Dios kag sa iya nga nagalingkod didto.”

Ang Ebanghelyo sang Ginoo.
S: Dayawon ka, O Ginoong Jesukristo.

-------------------------------------

23/08/2025

BALASAHON PARA SA SANTOS NGA MISA
AGOSTO 24 – DOMINGO
Ika-21 nga Domingo sa Ordinaryo nga Panahon

NAHAUNA NGA BALASAHON
Isaias 66: 18-21

Ang pagbasa gikan sa Libro ni Isaias nga Propeta.

Amo ini ang ginsiling sang Ginoo: Nahibal-an Ko ang ila mga hunahona kag mga binuhatan. Magakari Ako sa pagtipon sang mga katawuhan sang tanan nga mga kapungsoran.

Kon matipon Ko sila, makita nila kon ano ang mahimo sang Akon gahom, kag mahibaloan nila nga Ako ang nagasilot sa ila. Pero ang iban sa ila ipadala Ko sa mga pungsod kag sa malayo nga mga kadutaan nga wala pa makabati sang Akon pagkagamhanan kag kusog. Ipadala Ko sila sa España, sa Libya kag sa Lidya upod sa ila matanda nga manugpana, kag sa Tubal kag sa Gresya. Isugid nila sa sini nga mga pungsod ang Akon pagkagamhanan. Pagadalhon nila pabalik ang tanan ninyo nga mga kasimanwa halin sa mga pungsod subong sa isa ka regalo sa Akon. Pagadalhon nila sila nga nagasakay sa mga kabayo, sa mga mula, sa mga kamelyo, sa mga karuwahi sa inaway kag mga karo, sa Akon balaan nga bukid sa Jerusalem subong nga ang mga Israelinhon nagadala sing halad nga kalan-on sa Templo sa natinloan nga mga sulodlan. Himuon Ko ang iban sa ila nga mga pari kag mga Levita.

Ang pulong sang Dios
S: Salamat sa Dios.

SALMO SA PAGSABAT
Salmo 117: 1-2

Lakat kamo sa bug-os nga kalibutan sa pagbantala sang Maayong Balita.
1. Dayawa ninyo ang Ginoo, tanan nga mga kapungsoran! Dayawa ninyo Sia, tanan nga mga katawohan! (S.)
2. Ang Iya mapinadayunon nga gugma para sa aton malig-on kag ang Iya katutom wala sing katapusan. (S.)

IKADUHA NGA BALASAHON
Hebreo 12: 5-7. 11-13

Ang pagbasa gikan sa Sulat sa mga Hebreo.

Mga utod: Nalimtan bala ninyo ang mga laygay nga ginhambal sang Dios sa inyo subong Iya mga anak?
“Anak Ko,
Magpamati ka
Kon ang Ginoo nagadisiplina sa imo,
Kag indi ka magpakaluya
Kon Sia magsabdong sa imo.
Kay ang Ginoo nagadisiplina
Sang tagsatagsa nga Iya ginahigugma,
Kag nagasilot sang tagsatagsa
Nga ginabaton Niya subong anak.”

Batasa ang inyo ginaantos subong isa ka pagdisiplina sang isa ka amay. Kay ang inyo pag-antos nagapakita nga ang Dios nagakabig sa inyo nga iya mga anak. May anak bala nga wala ginadisiplina sang iya amay? Sa tion nga ginadisiplina kita, ang hunahona naton nga ginhatagan kita sing kalisod kag indi kalipay. Pero sa ulihi ang mga ginadisiplina paagi sa mga silot nagaagom sing mahidaiton nga bunga sang isa ka matarong nga kabuhi. Gani ibayaw ang inyo ginakapoy nga mga kamot, kag pabakura ang inyo maluya nga mga tuhod! Padayuna ang paglakat sa matadlong nga mga dalan, agod nga ang piang nga tiil indi magliw-as, kundi mag-ayo.

Ang pulong sang Dios.
S: Salamat sa Dios.

ALELUYA

Aleluya! Ako amo ang dalan, ang kamatuoran, kag ang kabuhi, siling sang Ginoo; wala sing may makakadto sa Amay kon indi paagi sa Akon. Aleluya!

EBANGHELYO

Lucas 13: 22-30

Ang pagbasa gikan sa Santos nga Ebanghelyo suno kay San Lucas.
S: Himaya sa Imo, O Ginoo.

Samtang nagapakadto si Jesus sa Jerusalem nagpanudlo Sia sa mga baryo kag mga banwa nga Iya gin-agihan. Karon may nagpamangkot sa Iya, “Ginoo, diutay lang bala ang maluwas?” Si Jesus nagsabat sa ila, “Magtinguha kamo sa pagsulod sa makitid nga puwertahan. Kay nagasiling Ako sa inyo nga madamo ang magtinguha sa pagsulod, pero indi makasulod. Ang pangulo sang balay magabangon kag magapanira sang puwertahan. Kon didto pa kamo sa gwa kag magapanuktok kamo magasiling sia, wala ako makahibalo kon taga-diin kamo.’ Magsabat kamo, ‘Nagkaon kag nag-inom kami upod sa imo kag nagpanudlo ka sa amon banwa.’ Magasilling sia liwat, ‘Wala ako makahibalo kon taga-diin kamo. Palayo kamo sa akon. Tanan kamo nga manugbuhat sang kalautan!’ Daw ano ang paghinibi kag pagbinagrot sang mga ngipon, kon makita ninyo si Abraham, si Isaac, kag si Jacob kag ang tanan nga mga propeta sa Ginharian sang Dios, samtang kamo inyo wala pagpasudla. May mga tawo nga magaabot halin sa sidlangan kag nakatundan, halin sa amihan kag bagatnan kag magapungko sa pagkaon sa punsyon sa Ginharian sang Dios. May naulihi karon nga mauna, kag may mga nauna karon nga maulihi.”

Ang Ebanghelyo sang Ginoo.
S: Dayawon ka, O Ginoong Jesukristo.

-------------------------------------

Ang Pulong sang Dios - Daily Mass Readings in Hiligaynon

30/08/2025

29/08/2025

28/08/2025

27/08/2025

26/08/2025

25/08/2025

24/08/2025

23/08/2025

Address

Website

Alerts

Shortcuts

Share

Category