26/04/2025
ANG PAGDIRIWANG NG IKA-88 TAONG ANIBERSARYO NG PAGKAKATATAG NG PAROKYA NG NUESTRA SEÑORA DE LA MERCED, BAHAY PARE, CANDABA, PAMPANGA
Abril 26, 2025 | Sabado
Ika-26 ng Abril, taong 1937 nang pormal at opisyal na tawaging isang parokya ang isang simpleng bahay-bakasyunan ng mga kaparian sa noo'y Hacienda de Bahay Pare, ang ikalawang barrio na naging isang ganap na Parokya sa buong lalawigan ng Pampanga. Bagamat noon lamang naging opisyal, pinaniniwalaang panahon pa lamang ng mga Kastila ay may mga pari na sa lugar na ito.
Sa tulong ni Reb. Padre Ruperto T. del Rosario, dating Kura Paroko ng San Agustin, Baliwag, napetisyon upang maging Parokya ang komunidad ng Bahay Pare, Candaba, Pampanga. Sa kanyang sulat sa Lubhang Kgg. Miguel O'Doherty, Arsobispo ng Maynila, sinabi ni Padre del Rosario na lubhang malayo ang Bahay Pare kung kaya naman ang mga tao rito ay hindi na ganoon madalas makapagsimba sa bayan ng Baliwag.
Marahil, ito ang naging dahilan kung kaya naitayo ang isang pamparokyang simbahan na ang sentro ay ang Bahay Pare at ang mga sakop ay ang mga barrio ng Pangclara, Pulong Gubat, Vizal Sto. Niño, Vizal San Pablo, Paligui, Talang, Dulong Ilog, Dalayap at Pulong Palazan mula sa bayan ng Candaba at Pulong Bayabas naman mula sa Bayan ng San Rafael. (Ang mga sumusunod ay hindi pa mga barangay noon: Vizal Sto. Cristo, Tenejero, Mangga, Barit at Pansumaloc.)
Taong 1948 naman nang panandaliang itatag ang Parokya ng Señor Salvador sa Salapungan, Candaba, ngunit daglian din itong naisara dahil na rin sa epekto ng digmaan. Kung kaya naman, mula noon hanggang taong 1985, ay naging sakop rin ng ating Parokya ang mga barangay ng Salapungan. (Magumbali, Lourdes, Mandili, Tagulod, Cauayang Bugtong, Barangca at Mapaniqui.) Taong 1983 naman nang maitatag ang Parokya ng Birhen ng Lourdes sa Talang, na siya namang naghiwalay sa mga barrio ng Dalayap, Mangga, Tenejero, Barit at Talang sa mga sakop ng ating Parokya, kung saan sa kasalukuyan ay siyam (9) ang mga barangay na sakop ng ating Parokya, kabilang na ang mga sumusunod: Bahay Pare, Dulong Ilog, Paligui, Pangclara, Pulong Gubat, Pulong Palazan, Vizal San Pablo, Vizal Sto. Cristo, at Vizal Sto. Niño.
Sa paglipas rin ng panahon, ay marami na ring naging kura paroko at Pari ang ating Parokya ng Nuestra Señora de la Merced, at sila ay ang mga sumusunod:
1. Reb. Pde. Felipe Manalang (1937--?)
2. Reb. Pde. Simplicio Fernandez (1950-1952)
3. Reb. Pde. Roberto Dela Cruz (1952-1966)
4. Reb. Pde. Benjamin Henson (1966-1970)
5. Reb. Pde. Apolonio Mallari (1970-1971)
6. Reb. Pde. Lope Hernandez (1971-1975)
7. Reb. Pde. Benjamin Paraan (1975-1980)
8. Reb. Pde. Diosdado Austria (1980-1982)
9. Reb. Pde. Lorenzo Sarmiento (1982-1984)
10. Reb. Pde. Ermelito Simbulan (1984-1988)
11. Reb. Pde. Manuel Sta. Maria (1988-1993)
12. Reb. Pde. Allan Sicat (1993-2001)
13. Reb. Pde. Resurrecion Diwa (2001-2005)
14. Reb. Pde. Eymard Ocampo (2005-2007)
15. Reb. Pde. Stephen Susi (2007-2013)
16. Reb. Pde. Pedrito Sitchon (2013-2019)
17. Reb. Pde. Aristotle Dela Cruz (2019-2023)
18. Reb. Pde. John Cenon Tulio (2023-Kasalukuyan)
Sa ating natatanging pagdiriwang ng ating ika-88 taong Anibersaryo ng Pagkakatatag bilang isang parokya, tayo'y sama-samang magpasalamat sa natatanging biyayang ito na kaloob sa atin bilang sambayanan ng Diyos na sama-samang nagpupuri sa Panginoon, nagdedebosyon sa Mahal na Ina, Nuestra Señora de la Merced, tungo sa pagiging buhay na dambana ng pananampalataya at awa ng Diyos.
Mapagpala at maligayang ika-88 taong Anibersaryo, mga ka-parokya! Viva Redentor! Viva Nuestra!
