31/10/2025
October 31 ๐ด | ๐๐ฒ๐ฎ๐๐ ๐ผ๐ณ ๐๐ฝ๐๐ป๐ด ๐ ๐ฎ๐บ๐ฎ๐ฐ๐ฎ๐น๐๐น๐
Manalangin tamu,
Lalapit cu Keca o Apung Mamacalulu, cambe ning beyatan ning caladua cu, cambe ring lingasngas at pigagap cu, cambe ring capagsubucan a รกrapan cu, cambe ring bage liligalig king pusu at caisipan cu, cambe ring pamangailangan da reng taung caluguran cu, cambe ring pamicasala't keinan cu, cambe ning mabule cung casalpantayanan, cambe ning matbud cung capanaligan, cambe ning dimut cung lugud.
Lalapit cu Keca nung macananung lepitan na Ca nitang babaing cayayagasan daya, ban calupa na, atagkil ke agyang ing laylayan na mu ning imalan Mu at cumayap cu.
Lalapit cu Keca nung macananung lepitan na Ca nitang taung maki-ketung, ban tagkilan mu cu't pacayapan, ban linisan mu cu caladua't catawan, ban dinan mu cung bayung bie at parasan.
Lalรกpit cu la naman Keca deng pacamalan cu king bie. Calupa da retang taung memitbit ketang paralitiku at memusbus king bubungan
ban iculdas de at ilapit Keca itang cacaluguran dang ating capansanan, Acu man pu Ginu buri co sang ilapit Keca deng caluguran cu king bie
ban ila man damdaman do ring amanu Mung macapasno at ban ing upaya ning calam Mu munie bayung sicanan caring tud dang mangalgal at maybug dang masira lub, ban ena la mitakid pasibayu o malili king paglacad da.
Lalapit cu Keca o Apung Mamacalulu, nung macananu na cang lepitan nitang babaing Cananea, a megmacalunus alang-alang king mรกsakit a anac na, at menalig king degulan ning pusu Mu, ning lunus Mu at masabal careng alang acarapat. Kalupa na, lalapit cung anting asung manenaya king pamangan a mababalag ibat king lamesa ning cayang amu.
Lalapit cu Keca, calupa na nitang babaing micasala a ume da nang basibasan detang taung mapanusga, uling balu cung mapaglunus ca at Ica mung bucud ing macapangatmu king sablang caculangan cu, ca mung bucud ing macapanacap king camarinayan cu, Ica mung bucud ing macapibangun canacu ibat king pangalugmuc cu.
Lalapit cu Keca, calupa nang San Pedro
iniang pepakit Ca keya at maibug yang lumbug king dine na, iniang inagcat meng mangan at mipasiag pasibayu king lugud na, sumangid ning gewa nang pamaglingad Keca.
Lalapit cu Keca, antimo retang alagad king Emaus, ban calupa da, acayabe da Ca king paglakad cu, atalastas cuing sablang mangapalyari king bie cu, at ban capamilatan ding banal Mung amanu ing pusu cung dirimla at daralumdum micapali ya at miyaslagan-sala, at ban akilala da Ca potang casulu da Ca at mirinan cung sicanan-lub marap pasibayu careng bage tatacasan cu.
Susรบcu cu Keca, O Apung Mamacalulu, ing sablang canacu, uling ica mung bucud ing Ginu cu at Dios ning bie cu Icang mabibie at mag-ari cambe ning lbpa at ning Espiritu Santo, mangga man king alang angga. Amen.
Apung Mamacalulu, Pacaluluan mu cami!
