08/07/2026
O a*o uma, ou te vaai ai i tagata i luga o TikTok ma isi upega tafailagi o loo fiafia i le olaga, sisiva, talie, ma faamanatuina taimi fiafia. Ae i le taimi lava e tasi, o loo iai isi o loo mafatia i taua, mafuiʻe, maʻi, maliu o ē pele, fasiotiga tagata, aiga ua malepelepe, ma le tele o faiga taufaasese. Ua oo lava ina faasalalau feeseeseaiga a tane ma avā i luga o upega tafailagi mo le lalolagi atoa e matamata ai. Ua faateleina le taufaasese. Ua faateleina le amioleaga. Ua atili ai ona iloa le pogisa o lenei lalolagi.
O isi atunuu o loo faanoanoa ma tagi ona o taua ma mala, ae o isi atunuu o loo fiafia ma faatumulia malae i taaloga ma faafiafiaga. O isi ua matitiva ma fia aai, ae o isi ua tigaina i gasegase ona o le soona aai ma le tele o le tamaoaiga. O nisi faigāmalo o loo faaalu piliona o tupe e fausia ai auupega ma sauniuni ai mo ni taua tetele i le lumanaʻi. I Samoa, ua tele le taimi ua alu i finauga faapolokiki ma mataupu i Faamasinoga. Ua faaitiitia le faaaloalo, ua lē toe iloa e le toʻatele le vā tapuia i le va o taitai ma tagata, ma ua foliga mai ua suia uiga sa tausia ai lo tatou atunuu.
Ae i le Ekalesia ua fausia e Iesu Keriso, ia outou manatua Lana folafolaga:
“Ou te atiina aʻe loʻu Ekalesia, e lē mafai foʻi e faitotoʻa o Seoli ona manumalo i ai.” Mataio 16:18
Le Ekalesia e, e lē o le taimi lenei e faavaivai ai pe faalavelaveina ai i mea o lenei lalolagi. O le taimi lenei e tutumau ai i le faatuatua, tumau i le Upu a le Atua, ma tatalo ma le faamaoni mo le faaolataga o o tatou aiga, uō, ma ē pele.
Na fetalai Iesu o i tatou o le masima o le lalolagi ma le malamalama o le lalolagi. A o iai pea tagata amiotonu i le lalolagi, o loo taofia pea e le Atua Lana faamasinoga atoatoa ona o Lona alofa tunoa ma Lona onosai, ma o loo faaauau pea ona valaau tagata uma ia salamo ma liliu atu ia Keriso.
Ae pe a aveesea e Keriso Lana Ekalesia i le Siitiaga, ona oo mai ai lea o le a*o o le faamasinoga ua valoia i le Tusi Paia.
O le asō o loo tumau pea le a*o o le alofa tunoa. O loo avanoa pea le salamo. O loo maua pea le faaolataga ia Iesu Keriso.
Ia tatalo pea mo ē pele ia te oe. Ia folafola pea le Talalelei. Ia tumau i le upu moni. Ia avea pea ma masima ma malamalama i lenei lalolagi ua tumu i le pogisa.
Aua neʻi faasesēina outou i mea o lenei lalolagi. Ia siitia pea o outou mata iā Keriso, auā ua latalata mai lo tatou faaolataga.
