Rev. Iosefa Lale Peteru

01/09/2026

PRAISE TO THE LORD. PART 2.
ASO SA: 30/08/2026
Rev. Lale Peteru.

Scripture: Salamo 150:1 – 6.
TEXT: Psalm 150: Ia matuā vivi’i atu i le Atua.
1 ‘Ia outou vivi’i atu iā Ieova. ‘Ia ‘outou vivi’i atu i le Atua i lona malumalu; ‘ia vivi’i atu ‘outou iā te ia i le va nimonimo o i ai lona mālosi.
2 ‘Ia ‘outou vivi’i atu iā te ia ‘ona o ana mea mamana; vivi’i atu iā te ia e tusa ma lona silisili ‘ese.
3 ‘Ia ‘outou vivi’i atu iā te ia i le leo o le pu; vivi’i atu iā te ia i le nāpeli ‘ātoa ma le kitara.
4 ‘Ia ‘outou vivi’i atu iā te ia i le t**a ma le siva; vivi’i atu iā te ia i le menima ma le fa’aili. 5 ‘Ia ‘outou vivi’i atu iā te ia i sumepalo ta’alili; vivi’i atu iā te ia i sumepalo leo tetele.
6 ‘Ia vivi’i atu iā Ieova o mea ‘uma lava e mānava. ‘Ia ‘outou vivi’i atu iā Ieova.

WEEK’S IBRA – Provisions from God. Tausiga mai le Atua.
IBRA TODAY: Praise to the Lord. Vi’iga i le Ali’i.
INTRODUCTION.
‘Ua ‘autū māfaufauga ma faitauga Tusi Pa’ia i le nei Aso Sa i le - “Praise to the Lord. Vi’iga i le Ali’i.”

O lo o fa’asolo faitauga ma māfaufauga i le Tusi a le Perofeta o Isaia; ‘ae ‘ua ‘ou suia le Tusi faitau i le Salamo.
Fai mai le Misionare o Pratt, “o le Vi’i,” o le fatuga sili lea ‘ona lauiloa i tagata Sāmoa. The most common of all Sāmoan Poetry. It is used in praise of chiefs.
O le uiga lea, na fa’aaogā ai e Misionare na fa’aliliuina le Tusi Pa’ia i le Gagana Samoa, le ‘Upu-Vivi’i, e fa’asamoa ai le ‘upu- “Praise.”

PRAISE IN THE SĀMOAN CONTEXT.
E tele ‘upu o le Gagana Sāmoa e tutusa ma le Vivi’i.
1. Vi’i, vivi’i, vi’iga, vi’ivi’iga.
2. Pese, Lagi, Taulagi,
3. Fa’afetai -
4. Fa’amanū -
5. Fa’ane’ene’e, fa’ane’ene’ega, fa’ane’etaga,
6. Mitamita, mitamitaga,
7. ‘Alaga, ‘Ālalaga,

*TALOTALOGA I ATUA, FAIVA & TA’ALOGA,
8. Talo – To wave a piece of siapo over the dead, begging him to take calamities and deceases with him.
>Maua ai le ‘upu Talotaloga, tatalo.
9. Tāpua’i, tāpua’iga, sauniga, Taulaga.
10. Lau, laulau, lāuga.

NUNU AVAGA – FA’AIPOIPOGA.
11. Tini, Tiniō. Tinitiniō.
12. Mua o!
13. Siva, sa’a, sa’asa’a, sā’aga, sa’asa’aga.

MANUMĀLŌ & TO’ILALO I TAUA.
14. Fa’aumu – Fe’ei,
15. Măui – To excel in the game of Tāga ti’a.
>Fa’a-măui - Jususu.
16. Fa’asifo, Ifo, punonou, ole, olega, fa’atoga.
>Fa’asifo – To bow down in acknowledgement of being conquered. To devote to destruction.
Atonu e i ai ma nisi ‘upu.

FA’AAOGĀINA I LE TALALELEI KERISIANO.
O le tele o ‘upu Sāmoa ia, o vi’iga o lātou ali’i po o matai sili. O lea fo’i na fa’aaogāina ai e Misionare o le LMS i le fa’aliliuina o le Tusi Pa’ia, i le Gagana Sāmoa. (Contextualize & Conceptualize).
1. O le fa’alupe ma fa’alagilagi o lātou Fa’asinomaga.

2. O vi’iga i o lātou aitu o le vavau:
O nisi o aga tāua a Sāmoa anamua, pei o le
*“Taulaga” – O mea ia na ‘ave i aitu o tagata anamua, e fa’amalie ai le atua a’o alo i faiva ‘ese’ese (To appease or bribe).
O lea fo’i ‘ua faigatā ai ‘ona suia talitonuga ia, i le Matā’upu Silisili fa’akerisiano.
O taulaga iā Iēsu, o le vi’iga i le Atua P**e Aoao.
O le fa’aaliga o le loto salamō mai agasala.
O le fa’atuatua iā Iēsu na Maliu ma Toetu, ‘ua fa’aolaina ai.
E lē o se fa’amalieina o le Atua (to appease). O le amio o le loto ‘ua malie i le Alofa o le Atua.

3. O le lāfoa’ia o atua o le vavau.
>Pei o le ‘upu – “Fa’asifo.” O le si’ilima (surrender), ‘Ua talia le to’ilalo.
O le fa’aaogāina i le Matā’upu Silisili Kerisiano, o le Salamō lea. O le lāfoa’ia o le olaga tuai.
2 Corinthians 5:17 – "Therefore, if anyone is in Christ, the new creation has come: The old has gone, the new is here!"

O LE VI’IGA A EPERU.
I le Gagana Eperu, e tele fo’i ‘upu e fa’amatala ai le uiga “Vivi’i – Praise.”
Peita’i, o le vi’iga a tagata Eperu, e fa’atūtasi iā Ieova lo lātou Atua Silisili’ese. ‘Ua tātou maua i Tusi Pa’ia, le uiga loloto o Vi’iga a Eperu.
‘Ua fa’amatala au’ili’ili iā lātou vi’iga lo lātou fa’atuatua, Ava ma le Migao, fa’afetai, ma le agaga Tāpua’i iā Ieova. O le fa’ane’ene’ega iā Ieova, o le Mātaisau na faia le Foafoaga ‘uma. Le Lagi ma le Lalolagi ma mea ‘ua tumu ai.

O LE TAUALUGA O SALAMO
O le Salamo, 150 o le taualuga lea o Vi’iga ‘uma. ‘ua a’oa’o mai le vivi’i o mea ‘uma o le Foafoaga.

E 4 mea tāua.
1.Vivi’i i so’o se mea: (Praise in every place). –
Salamo 150: 1 ‘Ia outou vivi’i atu iā Ieova. ‘Ia ‘outou vivi’i atu i le Atua i lona malumalu; ‘ia vivi’i atu ‘outou iā te ia i le va nimonimo o i ai lona mālosi.
2. Māfua’aga o le vivi’i: (Praise for every reason): –‘Ia ‘anoa le vi’iga. ‘Ia vivi’i ‘ona o galuega mamana ma le silisili’ese a Ieova. O ana fuafuaga Pa’ia. E lē se fa’avi’ivi’i, ‘ina ‘ia tali mai i mana’o.
3. ‘Ia vivi’i mea ‘ese’ese: (Praise with every expression). – 3 ‘Ia ‘outou vivi’i atu iā te ia i le leo o le pu; vivi’i atu iā te ia i le nāpeli ‘ātoa ma le kitara. 4 ‘Ia ‘outou vivi’i atu iā te ia i le t**a ma le siva; vivi’i atu iā te ia i le menima ma le fa’aili. 5 ‘Ia ‘outou vivi’i atu iā te ia i sumepalo ta’alili; vivi’i atu iā te ia i sumepalo leo tetele.
These represent different classes of people and forms of worship, showing that God desires diverse expressions of praise.

4.‘IA MANATUA IEOVA I LE TA O LOU FATU.
"Remember God in every stroke of your heart"
O Vi’iga a tagata Eperu, o fa’asino ala ia, i amio e tatau ‘ona ola ai le tagata. O le māfutaga ma Ieova, e 24/7. E leai se sekone o le ola, e fa’asamasamanoa ai le tagata.
O le mea lea, na fa’aigoa ai e Isarā’elu le Agaga o le Atua, i le ‘upu “RUAH.” O le ‘upu fo’i lea e fa’aigoa ai le savili, matagi, mānava – Spirit, wind, breath. (Life giving force).
E le i le tautala ma ta’uta’u i taimi ‘uma, a’o le ola ai. Taimi o le Lelei, ma taimi o Māsei.
O le Salamo 150, ‘ua fa’aalia ai le Ute o le Tapua’iga a Eperu mai le tagata to’atasi, (Apera’amo), o le fa’apotopotoga (Isarā’elu le nu’u filifilia), e o’o i mea ‘uma o le Foafoaga.

O LE FEAGAIGA FOU-THE NEW COVENANT.
‘Ua taualuga Vi’iga i le “Feagaiga Fou – The New Covenant). ‘Ua lē gata ai le vivi’i i le Malumalu o le Atua i Ierusalema, ma Isarā’elu le nu’u filifilia, a’o le Malumalu Pa’ia o le Atua. –
“O tagata ‘ua fa’atuatua ma talitonu iā Ieova, le Atua Silisili e to’atasi; e ala i le Maliu ma le Toetū o Iēsu Keriso.

O a mai lo tātou ola vivi’i?

‘Ona o Iēsu Keriso,

AMENE.

Send a message to learn more

31/08/2026

PROVISIONS FROM GOD-PART 1.
ASO SA: 30/08/2026
Rev. Lale Peteru.

Scripture: *Kenese 3:16 – 20; * Kenese 22:2-10.

TEXT: Kenese 3:21 ‘Ua faia fo’i ‘ofu pa‘u e Ieova le Atua mo Atamu ma lana avā, ua fa’a’ofu ai iā te i lā’ua.

Genesis 3: 21 And the Lord God made garments of skins for the man and for his wife and clothed them.

WEEK’S IBRA – Provisions from God. O le Atua na te ‘aumai.
IBRA TODAY: Praise to the Lord. Vi’iga i le Ali’i.

INTRODUCTION.
For this week’s readings, we shall see the provision from God for His people.
‘Ua ‘ou manatu, o le a tātou o muamua e vā’ili le uiga Fōa’i mai o le Atua, ‘ona tātou o ai lea e vā’ili le “Vi’iga i le Atua.”

1. GOD’S PROVISION. O LE ATUA E ‘AUMAI.
‘Ua ‘autū manatu i le ‘upu – “Provision- ‘Aumai.”
*‘Ua so’o fau le Matā’upu o le vaiaso ‘ua tuana’i-
>O le Atamai o le Atua Foafoa – Widom of God.
*Ma le Matā’upu o le vaiaso nei- Provisions from God.
>“O le Atua na te ‘aumai.”

*Bible Dictionary: In theology, "provision" refers to God’s act of supplying all that is necessary for human needs, including physical sustenance, spiritual guidance, and the opportunity for salvation.

E SO’OFAU LE FOAFOA MA LE ‘AUMAI.
*Fau – The beams in the round end of the Samoan fale.
**So’o fau – O le fa’afululupe, e soso’o ai le fau ma le isi fau. >Dovetail lap wood joint of the fale round end beams.

Na tātou faitau i le tala i le agasala a le ulua’i tagata i le Aso Sa ‘ua te’a, ‘ina ‘ua ‘ai le Lā’au na fa’asā e le Atua. E ui ‘ina folafola i ai, o le “Oti” le taunu’uga. Na fa’ailoa atu fo’i e le Atua fa’asalaga, o le Gata, ma Atamu ma Eva.
Peita’i, i le ulua’i taimi o le soliga o le ‘Afioga Pa’ia a le Atua, o lo o lavatoto le manu’a o le agasala, ‘ae fai mai le Tala a le Kenese 3:21;
*Ua faia fo’i ‘ofu pa‘u e Ieova le Atua mo Atamu ma lana avā, ‘ua fa’a’ofu ai iā te i lā’ua.

“21 And the Lord God made garments of skins for the man and for his wife and clothed them.

O LE ‘ANOFALE O LE ATUA ‘AUMAI.
O le mata’utia lea ma le ofoofogia o Ieova.
(1). O le Alofa Amiotonu – Fa’amasinoga tonu. (Just Penalty).
O le Atua e Amiotonu & Fa’amasino tonu. E le i fa’amanupō’ia i ofaga Atamu ma ‘Eva. Na folafola i ai e le Atua le taunu’uga, pe a le usita’i. O le lē usita’i o Atamu ma ‘Eva, ‘ua tupu ai le nātura agasala i tagata ‘uma.
*Roma 3:23 ‘Auā ‘ua agasala tagata ‘uma lava, ma ‘ua lē o’o i le vi’iga mai le Atua.

(2). O le Atua Alofa e Fa’amāgalo: Forgiveness.
*Forgiveness in the Bible is a “release” or a “dismissal” of something. - Tatala noataga & Fa’asa’oloto.”
O le Alofa Fa’amāgalo o le Atua, iā Iēsu Keriso,
(i). O le Fa’amasinoga Amiotonu le na a le Atua.
(ii). ‘Ua tatalaina ai noataga ‘uma, e tusa ma agasala e tatau ‘ona fa’asalaina ai.
(iii). ‘Ua fa’asa’olotoina fo’i tagata mai agasala ‘uma.

O le Maliu o Iēsu Keriso, o le Fa’amasinoga Amiotonu lenā a le Atua ma lana P**e Aoao.
E le’i Maliu Keriso, ‘ona o fāufāuga leaga a Ta’ita’i o le Lotu Iutaia; po o le P**e a Pilato ma le Mālō o Roma. LEAI!

*Ioane 19:10Ona fa’apea mai lea o Pilato iā te ia, “E te lē gagana mai ‘ea iā te a’u? Po ‘ua e lē iloa, o iā te a’u le p**e e fa’asātauro iā te ‘oe, o iā te a’u fo’i le p**e e tatala iā te ‘oe?”
11 ‘Ua tali atu Iēsu, “E leai sau p**e iā te a’u, ‘ana lē tu’uina mai iā te ‘oe mai lugā; o le mea lea e tele ai le leaga o lē na ia tu’uina mai a‘u iā te ‘oe.”

(3). O le Alofa e toe ‘a’apa mai: (Fa’aola ma tausi).
Mai lava i le ‘āmataga o le Tusi Pa’ia, o fa’aalia ai le Alofa ‘A’apa mai ma Tausi mai o le Atua; e ui ‘ina leaga tagata.

E lē fa'atōina pe Sōloa i le 'au fuefue e le Atua se tagata.

MATĀ’UPU SILISILI O LE ATUA ‘AUMAI: (Provision in Theological Context).
O le Atua e lē gata ‘ina ia ‘aumai pei ‘ona ia foafoa, a o le Atua fo’i na te “Tausi ma puipui lana foafoaga.”
I le liu tino tagata o le Atua iā Iēsu Keriso, ma soifua fa’atasi ma tagata, o lona Maliu ma lona Toetū mai, o le fa’aaliga ‘ato’atoa lea o le Atua na te ‘Aumai.

FŌLIGA VA’AIA O LE ATUA ‘AUMAI:
‘Ua fa’aalia i le foafoaga le finagalo ‘aumai o le Atua.
1.O le tino & Agaga: (Physical and Spiritual Supply).
(i).‘Ua ‘aumai e le Atua le fa’amalieina o mana’oga tatau o le tino, i mea ‘ese’ese o le foafoaga (God provides for daily needs).
(ii).E leoleo ma puipui mai le Atua. (sustenance).
(iii).E ta’iala le Agaga Pa’ia. (spiritual growth).

2. O le Fa’aolataga mo tagata ‘uma. (Universal Access to Salvation):
O le Alofa Tūnoa o le Atua ma lana Tala Lelei o lana Fa’aolataga, ‘ua avanoa mo tagata ‘uma. E lē na o Isarā’elu. E lē na o tagata ‘ua lotu Kerisiano. So’o se tagata ola i le lalolagi.

3.Tiute o le tagata – (Human Responsibility):
While God provides, humans are responsible for responding in faith and obedience.
O le tiute o tagata ola ‘uma, o le fa’atuatua iā Iēsu Keriso, ‘ua o’o mai ai le Mālō o le Atua i le lalolagi. O le faitoto’a lea i le Fa’aolataga.
‘Ia usita’i i Tūlafono ma a’oa’oga a le Atua, ‘ua i le Tusi Pa’ia. ‘Ia fa’alagolago ma fa’amoemoe i le Agaga Pa’ia, e fa’amālosia ai le Ola Fa’ale-agaga.

EKALESIA I LE FEAGAIGA FOU. (The early Christian community).
‘Ua fa’amatalaina i le Tusi o Galuega 2:44 – 45, le afio ifo o le Agaga Pa’ia i le Aso Penetekoso. Na papatisoina ai tagata i laulau faiva afi. ‘Ua gagana mai i lātou i Gagana ‘ese’ese. O le mana lilo lea, o le Atua, ‘ua ‘aumai ai le fe’au mai le Atua, ‘ia o e fa’asalalau atu le Tala Lelei iā Iēsu Keriso, i tulu’iga ‘uma o le lalolagi.

O LE ATUA E LĒ TUFA-LA’AIA AI SE TAGATA.
O le Atua na te ‘aumai. O le Atua Amiotonu ma Fa’amasino tonu. O le Atua lufilufi lima lelei. E lē limavale. E lē fa'aitu'au pe fa'ailoga tagata. E lē tufa-la’aia se tagata i lana Fa’asoa.
*Galuega 2:44-45,
44 ‘Ua fa’atasia fo’i e ‘ua fa’atuatua ‘uma lava, ‘ua tu’u tele a lātou mea ‘uma lava; 45 ‘ua fa’atau atu fo’i o lātou fanua ma ‘oloa, ma ‘ua tufatufa le tau o ia mea i tagata ‘uma, ‘ua fa’atatau i le mativa o le tagata.”

O tagata Kerisiano moni, e ola feālolofaa’i ma fetausia’i.
O fa’aaliga na o le Alofa Tausi ma le Alofa Fa’asoa mai o le Atua, i tagata ‘ua fa’atuatua.

‘Ua Toetū Iēsu ma afio a’e i le Lagi, ‘ae ‘ua afio ifo le Agaga Pa’ia. O le Mana lilo lea ‘ua fa’aauauina le finagalo ‘aumai o Keriso.

O le Atua ‘aumai. E lē se Atua tuli tagata.

‘Ona o Iēsu,
AMENE.

Send a message to learn more

27/08/2026

WISDOM – ATAMAI O LE ATUA
ASO SA: 23/08/2026
Rev. Lale Peteru

TEXT: Genesis 1:1-5
1Na faia e le Atua le lagi ma le lalolagi i le ‘āmataga. 2Sa so’ona nunumi le lalolagi ma ‘ua gaogao, sa ufitia fo’i le moana i le pōuliuli; na fegāoioia’i fo’i le Agaga o le Atua i le fogātai. 3Ua fetalai mai le Atua, ‘Ia mālamalama; ‘ona mālamalama ai lea. 4 ‘Ua silasila atu le Atua i le mālamalama, ‘ua lelei; ‘ona tu’u ‘ese’ese ai lea e le Atua o le mālamalama ma le pōuliuli. 5 ‘Ua fa’aigoa e le Atua le mālamalama, O le ao; a ‘ua fa’aigoa e ia le pōuliuli, O le po. O le afiafi ma le taeao o le ulua’i aso lea.

WEEK’S IBRA- Wisdom – Atamai.
IBRA TODAY: A heart seeking wisdom. Loto sā’ili i le Atamai.

INTRODUCTION
This week we are exploring the wisdom of God.
‘Ua ‘ou suia le Tusi Faitau pei ‘ona fa’atulaga mai e le Faitauaso mo le asō. ‘Ua ‘ou ‘aumaia le tala i le Foafoaga a le Atua i le Kenese 1:1 - 5.
O fuaitau ia, o lo o afīfī ai le Poto ma le Atamai o le Atua, na foafoa ai mea ‘uma. Mai le Ulua’i aso, e o’o i le Aso 6. ‘Ona mālolo ai lea o ia i le Aso Fitu, ma fa’apa’iaina ai.
Na taualuga le foafoaga, i le faia o le ulua’i tagata i lona fa’atusa Pa’ia i le palapala. Na mānava i pogai-isu, ma ‘avea ai ma tagata ola. Na tu’u fo’i i ai ma le Tūlafono e ola ai. ‘Āfai e lē usita’ia, o le a oti.
O le Tala o le Vavau (Myth). ‘Ua fa’amatala ai le Misiterio o le Foafoaga.

O LE ATUA ATAMAI I LE FEAGAIGA TUAI.
‘Ua fa’amatalaina i le Feagaiga Tuai, o le Poto ma le Atamai o le Atua, na faia ai le Foafoaga ‘uma.
*Genesis 1:1 In the beginning God created the heaven and the earth.
‘Ua fa’amautūina i tūsiga ia, na foafoa e le Atua mea ‘uma, i le Poto ma le Atamai.

‘UA TU’UMATĀMAGA LE FOAFOAGA.
O le ‘upu “Tu’umatāmaga.” E fausia mai ‘upu e 3.
*Tu’u – To lay down
*Mata – The boundary or edge.
*Maga – Branch- tree, road, river or anything forked.
I Tūsiga a Eperu i le Feagaiga Tuai, ‘ua lē gata ‘ina foa mea ta’itasi ‘uma, ‘ae ‘ua ta’oto fo’i tūlafono e ola ai mea ta’itasi. O le tūlaga maoa’e lea o le Mātaisau o le Atua Silisili ‘ese. God is the designer and builder.

AU’ILI’ILIINA O LE FOAFOAGA POTO.
1.Kenese 1: 1 - “Na faia e le Atua le lagi ma le lalolagi i le ‘āmataga.
O le fuai’upu lea, ‘ua fa’amatala ai le ulua’i taimi na ‘āmata ai le foafoaga. (Time).

2.Kenese 1: 2- “Sa so’ona nunumi le lalolagi ma ‘ua gāogāo, sa ufitia fo’i le moana i le pōuliuli; na fegāoioia’i fo’i le Agaga o le Atua i le fogātai.”
‘Ua fa’amatala ai fōliga sa i ai mea ‘uma.
It describes the initial state of the earth as formless and void, with darkness over the deep waters, and a divine wind (or Spirit) moving over the waters.
O le Agaga Pa’ia o le Atua na fegaoioia’i i luga o le gāogāo ma le leai o se mea.

3. Kenese 1:3- ‘Ua fetalai mai le Atua, ‘Ia mālamalama; ‘ona mālamalama ai lea.
O le ulua’i mea na faia e le Atua, o le Mālamalama. O lea fo’i na fa’avae ai le a’oa’oga Fa’amatā’upu Silisili, o le Poto, o le Mālamalama lava lea. O le Pogisa, e noa. ‘Auā e lē mafai ‘ona iloa se mea i le Pōgisā.
O le isi mea tāua i le fuai’upu lea; “ O le Mamana o ‘Upu po o fetalaiga a le Atua.” Na o le ‘upu lava na malele atu, ‘ona liu tino lea o le fa’atonuga.
God commands light to exist, demonstrating the power of divine speech.

4. Kenese 1:4, ‘Ua silasila atu le Atua i le mālamalama, ‘ua lelei; ‘ona tu’u ‘ese’ese ai lea e le Atua o le mālamalama ma le pōuliuli.
‘Ua fa’amatalaina e le Matā’upu Silisili i le fuai’upu lea, le Tōfā Fetālaa’i, ma le Tōfā Liuliu a le Atua Silisili. O le Tōfā fa’avae i le Lelei.
God evaluates creation as good and establishes the separation between light and darkness.

5. Kenese 1:5- ‘Ua fa’aigoa e le Atua le Mālamalama, “O le ao.” A ‘ua fa’aigoa e ia le pōuliuli, “O le po.”
O le afiafi ma le taeao o le ulua’i aso lea.
‘Ua tātou mautaia i le fuai’upu lea, le vāevāeina e le Atua o le “Mālamalama ma le Pōuliuli.” Na ia fa’aigoa fo’i le Ao (Day), ma le Po (Night). O le ‘āmataga lea o taimi. Afiafi ma le Taeao, o le ulua’i aso lea o le foafoaga.

(i) ‘Ua fa’aalia ai le Silisili’ese o le Atua (It illustrates God’s sovereignty,
(ii). Le fa’atonuina o le Gaogao (the ordering of chaos), (iii). Le fa’atulagaina o Taimi. (the establishment of time and natural cycles).

TALATALAINA O LE UIGA O LE TAIMI.
*Talatala – To increase beyond the boundary.
A talatala le vāevāeina o le Ao ma le Po,
*E maua ai Afiafi, Taeao, Aoauli, vaeluapō, vaveao.
*E maua ai sekone, minute, itulā, aso, vaiaso, māsina, tausaga.
*E fa’apea fo’i Tau - Seasons: – Tau Māfanafana, (Summer), Tau To’ulu (Fall-Autumn), Tau Mālūlū (Winter), Tau Tutupu po o le Tau Totogo a’e o lā’au (Spring).
*E tofu itūaso ia, ma uiga.

O LE POTO SILISILI O LE ATUA.
I le taualuga o le Foafoaga a le Atua, na ia faia ai le tagata i lona fa’atusa pa’ia i le palapala. Na mānava i pogaiisu o le fa’atusa, ‘ona ‘avea ai lea ma tagata ola. O le paleali’i lea o lana Foafoaga ‘uma.
Na tu’u e p**e i le fa’ato’aga. Pau lava le tūlafono, ‘aua ne’i pa’i i le Lā’au e iloa ai le Lelei ma le Leaga.
O le Lelei ma Leaga, o ata fa’atusa na o le Mālamalama ma le Pōuliuli na mua’i faia i le aso muamua.
O lea fo’i na fa’atonuina ai e le Atua le ulua’i tagata, ‘ia ‘aua ne’i pa’i i le Lā’au ne’i o la iloa le Leaga. O le taunu’u, o le Oti.
‘Ua tātou iloa le taunu’uga o le ulua’i tagata. Na la ‘aia le fua o le Lā’au. Na lē usita’i i le Atua, ‘ae ‘ua usita’i i le Gata, le Perenise o le pōgisā. O le p**e o Leaga, o i ai le Oti. ‘Na malaia ai ma le Foafoaga ‘uma. ‘Ua oti fo’i le ulua’i tagata.

‘UA FOLAFOLAINA LE FA’AOLATAGA.
Kenese 3:15 O le ulua’i Evagelia lea. O le ulua’i folafolaina lea o le Fa’aolataga a le Atua.
*The Protoevangelium - “first gospel.” The earliest announcement of God’s plan of redemption.

‘Ua fa’ata’oto ai, a’oa’oga fa’avae fou o le Matā’upu Silisili, i le Atua.
1. O le fete’ena’iga a le Lelei ma le Leaga.
(Ongoing Struggle Between Good and Evil).
O le fete’ena’iga e a’afia ai le ulua’i tagata ma le Gata. O le taua i le va o le agasala ma le amiotonu. O le a fa’aauau ifo i fānau a le fafine ma fānau a le Gata i tupulaga ‘uma.

*O Fānau a le fafine, o suli tagata ia o Atamu ma ‘Eva.
*O fānau a le Gata (metaphorical), o tagata ‘ua amio fa’atemoni. Tagata ‘ua fiafia e fai amio leaga, ‘ae le o amio Lelei, pei ‘ona finagalo ai le Atua.
O lea na fa’atusa i ai e Iēsu Ta’ita’i o le Lotu Iutaia.

*Mataio 12:34, Fānau a gata fe’ai e, outou o lo’o leaga, e mafaia fa’apēfea ‘ona outou ‘upu lelei? ‘Auā o le tele o mea i le loto e tautala mai ai le gutu; 35 ‘ua ‘au mai mea lelei e le tagata amio lelei i mea lelei ‘ua teu i lona loto; o le tagata amio leaga fo’i, ‘ua ‘au mai mea leaga i mea leaga ‘ua teu i lona loto.

2. O le Mesia ‘ua Folafolaina: (Messianic Prophecy).
*O lau fānau fo’i ma lana fānau; na te tu‘imomomoina lou ulu.
‘Ua fa’auigaina i le Matā’upu Silisili iā Iēsu Keriso. O le suli fānau mai le fafine; o le a ia fa’ato’ilaloina le agasala ma Sātani.
*A o ‘oe (gata), e te tu‘imomomoina lona mulivae:”–“Bruising of the heel.”
‘Ua fa’atatau i le maliu o Iēsu Keriso i le Sātauro. “O le Oti,” o le fa’atusa le o le ulu o Sātani.

3. O le Atamai Fa’aola o le Atua. (Foundation for Redemption).
O le fa’aaliga fo’i lea o le Fa’aolataga mai le Lagi. E ui ‘ina ‘ua agasala le ulua’i tagata, ‘ae ‘ua toe fa’aalia le Alofa Mutimutivale o le Atua. ‘Ua fa’ata’oto ai le Fa’aolataga a le Atua. (God’s plan for redemption).

GOD’S REDEMPTIVE PLAN.
‘Ua tātou fa’alogo so’o i le fuaitau lea; “O le plan a le Atua.” O le Plan a le Atua, o lana Fa’aolataga lea na folafolaina mai ‘ina ‘ua agasala le ulua’i tagata i Etena. O le fa’aaliga lea o lona Atamai Pa’ia, pei ‘ona faia ai lana ulua’i Fa’amasinoga i le Va o Atamu ma Eva ma le Gata i Etena. Na folafola ai, o le a fānau mai le Tama, na te tu’imomomo le ulu o le gata; ‘ae o le a tu’i momomo e le gata, lona mulivae.
O le fa’amasinoga amiotonu na fa’aalia ai le Alofa fa’aola o le Atua i lana tagata.

O LE ATAMAI O LE ATUA IĀ IĒSU KERISO.
O Iēsu Keriso, o le fa’aaliga lea o le Atamai o le Atua. O le Alofa Lāvea’i lea o le Atua. O le Alofa Fa’amāgalo.
Pei ‘ona fai mai Ioane 3:16, “For God so loved the world, that he gave his only Son, that whoever believes in him should not perish but have eternal life.
*O lona fānau mai fa’apei o se tagata, pei ‘ona vālo’ia e Perofeta.
*O lona soifua ‘ātoa, ma ana a’oa’oga o le Mālō o le Atua.
*O lona Maliu i le Sātauro, ma lona Toetū mai, ‘ua taunu’u ai le P**e Aoao a le Atua.
O le Toto o Keriso na maligi i le Sātauro, ‘ua ‘uma ai le tāua o Taulaga na faia i le toto o manu; ma Taulaga na faia i mea o le tino.

TALITONUGA O IUTAIA. (Judaism).
O le talitonuga o Iutaia, o le afio mai o le Mesia, o le o’o mai lea o le fīlēmū i le lalolagi ‘uma. O le a lē toe i ai ni taua ma ni fevāevāea’iga. O le a toe pei o le ulua’i Foafoaga a le Atua na i ai i Etena.

TALITONUGA O KERISIANO.
E fa’avae fo’i talitonuga o Kerisiano i Tūsiga a Perofeta Eperu i le Feagaiga Tuai.
*Isaia 7:14-O le mea lea e tu’uina mai ai e le Ali’i lava le fa’ailoga iā te ‘outou; fa’auta, e to le taupou, ma fānau mai se tama tane; na te fa’aigoa fo’i iā te ia o Emanuelu. (God with us).

*Galuega 2: 1Ua o’o atu fo’i i le aso Penetekoso, sa i ai i lātou ‘uma lava i le mea e tasi ma le loto gatasi. 2Ona fa’afuase’i mai lea o le ta’alili mai le lagi, peisea’ī o le matagi ‘ua agi tele mai, ‘ua tumu ‘uma ai le fale sa lātou nonofo ai. 3Ua iloa fo’i e i lātou o laulaufaiva peisea’ī o le afi ‘ua vāevāeina, ‘ua nofo i o lātou luga tai’to’atasi. 4 ‘Ua fa’atutumuina fo’i i lātou ‘uma i le Agaga Paia, ‘ua afua ai ‘ona tautala i gagana ‘ese’ese, pei ‘ona foa’iina mai e le Agaga o le gagana iā te i lātou.

O le o’o mai o le Atamai o le Atua; o le afio ifo lea o le Agaga Pa’ia i tagata.
Le Agaga Pa’ia, lea na te ‘aumaia meaalofa ma le mālosi i tagata.
E faia ai fa’ai’uga Alofa e tusa ma le finagalo o le Atua.

‘Ona o Iēsu,
AMENE.

25/08/2026

KU'U ALOHA - AUE LE ALOFA I LA'U PELE.

18/08/2026

‘UA MATUA LE FA’ATUATUA
ASO SA: 16/08/2026
Rev. Lale Peteru

TEXT: Matthew 14:25-31
25Ua maliu atu Iēsu iā te i lātou i le leoleoga e fa o le po, ‘ua savali i luga o le vai. 26Ua iloa mai e le ‘au so’o o ia ‘ua savali i luga o le vai, ‘ona lātou atuatuvale ai lea, ‘ua fa’apea ane, “O le aitu; ‘ona lātou uiō ai lea i le mātata’u.
27Ona fetalai atu loa lea o Iēsu iā te i lātou, ‘ua fa’apea atu, “Ia outou loto tetele; o a‘u lava, ‘aua tou te mātata’u.
28Ua tali mai Peteru iā te ia, ‘ua fa’apea mai, “Le Ali’i e, ‘āfai o ‘oe, ‘ia e fetalai mai iā te a’u, ‘ou te alu atu iā te ‘oe i luga o le vai.”
29Ona fetalai atu ai lea o ia, “Inā sau ia.” ‘Ona alu ifo ai lea o Peteru nai le va’a, ‘ua savali i luga o le vai e alu iā Iēsu. 30Ua va’ai ia i le matagi ‘ua tetele, ‘ona fefe ai lea; ‘ona āfua ai lea ‘ona goto, ‘ua alaga, ‘ua fa’apea mai, “Le Ali’i e, ‘ia e fa’aola mai iā te a’u.”
31 ‘Ona ‘a’apa atu loa lea e Iēsu o lona ‘a’ao, ‘ua tago iā te ia, ‘ua fa’apea atu iā te ia, “O ‘oe na lē fa’atuatua itiiti, se a le mea ‘ua e māsalosalo vale ai?”

WEEK’S IBRA: Seasons of life. 2 Maturity.
TODAY’S IBRA THEME: Hard work deserves respect. E fa’aaloaloina le galue fa’amāoni.

INTRODUCTION.
‘Ua ‘ou suia le Tusi Faitau e Lāuga ai.
O lo o fa’aauau māfaufauga i le ‘Autū mai le vaiaso ‘ua te’a– “Seasons of Life – Vaitau o le Olaga.”
1.O le vaiaso ‘ua te’a, na fa’asolo māfaufauga i le ‘autū, “Nurture - Fa’afaileleina o le Ola.”

2.A’o le vaiaso nei, ‘ua liliu ane māfaufauga i le, –“Seasons of Life - “Maturity – ‘Ua matua.”
*Cambridge Dictionary: Maturity - Fully developed physically; full-grown.
*Theology: Maturity - is a lifelong process of growing in knowledge, character, and practical faith, anchored in Scripture and empowered by the Spirit.
O le va’ai lea Fa’amatā’upu Sislisili. O le soifuaga matua, ‘ua aofia ai le tino, māfaufau, loto ma le agaga. ‘Ua maua’a a’oa’oga a le Tusi Pa’ia, i le ola. ‘Ua ta’iala fo’i le musumusuga a le Agaga Pa’ia.

‘AUTŪ ASO SA: - “Hard work deserves respect. E fa’aaloalogia le galue fa’amāoni.”
O la’u fa’asāmoa lea. ‘Ua ‘ou suia le galue mālosi, i le galue fa’amāoni. O le fa’amāoni i ala o le Atua, o lagi soifua na, o le Ola Fa’atuatua, ‘ua matua.

DEVELOPMENT.
‘Ua ta’oto Polokalame fa’avae a Ekalesia Kerisiano e fa’afailele ma fa’aolaola ai le Ola o tagata.
‘Ae ‘oute fia tautala i Polokalame a le EFKS mo le fausia o le Ola Fa’ale-agaga o tagata Sāmoa mai le itiiti.
1. O le A’oga Faife’au.
>Faitau Pi. E fa’amāsani ai tamaiti i Mata’itusi ma Fa’aleoga.

II. Vasega muamua e o’o i le Vasega 6.
>‘Ua fa’aa’oa’o ai ‘ona tusitusi ma faitau tusi.
>‘Ua a’oa’o ai fo’i Matā’upu o le Poto Salalau, Tala o le Tusi Pa’ia, Matā’upu Silisili Fa’avae ma Talitonuga Fa’avae o le Ekalesia a Keriso.

III. O le Lotu a Tamaiti.
>E a’oa’o ai fa’atinoga o Tala o le Tusi Pa’ia.
>E a’o ai tauloto ma Pesega Fa’aleagaga (Songs).

IV. Fa’alāpotopotoga mo tagata mātutua.
(i) ‘Au Taumafai – Christian Endeavor. Bible Study.
>O su’esu’e i Tusi Pa’ia.
(ii). ‘Au Leoleo – Fono Tatalo. Prayer Meeting.

V. Parachurch organizations- Leadership training.
(i). Boys Brigade – 1940s.
(ii). Girls Brigade.
(iii). A’oga Aso Sa & Autalavou.- 1960s.

MATURITY – ‘UA MATUA.
O Polokalame ‘uma ia ma nisi, sa a’oa’oina ai le Olaga Fa’atuatua o tagata. ‘Auā e lē sologa lelei le Olaga. O taimi ‘ua lelei, o taimi fo’i ‘ua māsei. A’o taimi o faigatā, ma puapuagā, e lu’itauina ai le Ola Fa’atuatua.
O itūaso ia, e naunau ai le tagata fa’atuatua i le fia inu o lona agaga i le Fa’amasinoga Amiotonu a le Atua.

TĀTOU SU’ESU’E I LE MATAIO 14:1 – 33.
1. Mataio 14:1 – 13. O le tipi’esea o le ulu o Ioane le Papatiso: ‘Ua atuvale Herota Anetipa ‘ina ‘ua fetuleni atu tagata i le fa’aaloalo i le Papatisoga a Ioane. O fa’aaliga ia o le mata’utia o le si’omaga o le galuega a Iēsu.
2. Mataio 14:14 – 21.
O le fāgaina o le motu o tagata e 5,000 i ‘āreto e 5 ma I’a e 2. ‘Ua fa’aalia pea le mana o Iēsu, i vāvega.

O LE FA’ATUATUA ‘UA MATUA.
Na silafia e Iēsu, o le fasiotia o Ioane, o se fa’amata’u i tagata ‘ua mulimuli mai. Peita’i, o le fafagaina o le 5,000 i areto e 5, ma I’a e 2, o se vāvega e fa’atupu mālosi i le fa’atuatua o ona So’o.
Na ‘auina atu ona so’o i le va’a, i le isi itū; ‘ae alu na o ia i le mauga e tatalo. O le Tatalo, o le ‘au’upega e tāuluuluola ai le Fa’atuatua; se’i o’o ‘ina Matua (full-grown).

O TOFOTOFOGA O LE FA’ATUATUA.
Le malaga lea na afatia ai i totonu o le vasa. E lē gata o le mālosi o le matagi, a’o galu mālolosi. ‘Ua vāivāi fo’i e tau alo. ‘Ua fefefe.

O LEOLEOGA O LE PO.
Fai mai le tala a Mataio, na silafia e Iēsu le atuatuvale o ona so’o, ‘ae fa’ato’ā maliu ane Iēsu i le Leoleoga e 4 o le po. O le vaevaeina o le Po i Leoleoga, o le faiga a Fitafita Roma. E 4 vaega o Leoleoga o le Po.
1.6.00pm – 9.00pm.
2.9.00pm – 12.00am.
3.12.00am – 3.00am.
4.3.00am – 6.00am.
O Leoleoga ia, mo le saogalēmū i le pōgisā. O le Leoleoga, e fa’atino i le mataala. O le Leoleoga e 4, o le vaega tūgā lea o le po. O le itupō lea, ‘ua vāivāi le mataala. ‘Ua ‘e’eva ma ma’a’a laumata e pupula.
A’o le itūaso lea, e iloa ai le Fa’atuatua ‘ua matua. O le itūaso o le Tatalo fa’atauānau i le Atua ‘ia afio ifo lona mataala, ‘auā ‘ua ‘uma le mālosi fa’ale tino.

‘UA SAVALI IĒSU I LUGA O LE VAI.
Fai mai Mataio, ‘ua alu le po o māfatia le ‘au so’o i le tauivi ma le matagi ma le galu. ‘Ae i le taimi o le Leoleoga e 4, ‘ae va’aia loa Iēsu, ‘ua savali mai luga o galu ma le sou o le vasa. Na manatu le ‘au so’o, o se aitu. ‘Auā e leai se tagata ola, e savali mai luga o le vai, i le afā ma le sou o le vasa.
Peita’i, Mataio 14: 27: Ona fetalai atu loa lea o Iēsu iā te i lātou, ‘ua fa’apea atu, “Ia outou loto tetele; o a‘u lava, ‘aua tou te mātata’u.
Na oso vave fo’i Peteru i le fia fa’amāonia po o Iēsu moni lea. Fai mai Peteru,
*Mataio 14: 28 ‘Ua tali mai Peteru iā te ia, ‘ua fa’apea mai, “Le Ali’i e, ‘āfai o ‘oe, ‘ia e fetalai mai iā te a’u, ‘ou te alu atu iā te ‘oe i luga o le vai.”
‘Ua fia fa’amāonia e Peteru le tulaga Atua o Iēsu, i ona lagona fa’atagata.
*Mataio 14: 29 ‘Ona fetalai atu ai lea o ia, “Inā sau ia.” ‘Ona alu ifo ai lea o Peteru nai le va’a, ‘ua savali i luga o le vai e alu iā Iēsu. 30 ‘Ua va’ai ia i le matagi ‘ua tetele, ‘ona fefe ai lea; ‘ona āfua ai lea ‘ona goto, ‘ua alaga, ‘ua fa’apea mai, “Le Ali’i e, ‘ia e fa’aola mai iā te a’u.”

‘AUA LE VA’AI I LE GALU.
Na mana’o Peteru, e fia savali i luga o le vai, fa’apei o Iēsu. Na talia e Iēsu. O lo o pōgisā Peteru, e 5 mea ogaoga o lo o tutupu i le taimi lea.
(i).O lo o agi le Afā (ii). O le galu ma le sou. (iii). O le suāvai, e lē mafai ‘ona savali ai se tagata.
(iv). O le Leoleoga e 4, – o le ītūlā pōgisā.
(v). ‘Ua matuā vāivāi. ‘Ua ‘uma le mālosi fa’atagata.

O IĒSU, O LE FĪLĒMŪ O IA.
I le lutaluta o le Tau, ma le mata’utia o va’aiga ‘uma ia, ‘ae savali mai ai Iēsu e lē fa’agae’etia.
Galo nimo iā Peteru, e lē mafai e le nātura tagata, ‘ona fīlēmū i mea ogaoga ‘ua tutupu o le Olaga.
Fai mai le tala, na o sina taimi na tāula’i ai lana va’ai iā Iēsu, ‘ae ‘ua va’ai ifo i le galu, ‘ona fefe ai lea. Na afua ai ‘ona goto ifo. Na toe ‘alaga atu iā Iēsu i le fia ola.
Fai mai le tala,
*Mataio 14: 31 ‘Ona ‘a’apa atu loa lea e Iēsu o lona ‘a’ao, ‘ua tago iā te ia, ‘ua fa’apea atu iā te ia, “O ‘oe na lē fa’atuatua itiiti, se a le mea ‘ua e māsalosalo vale ai?”
O le taimi lava e ‘ave ‘ese ai o tātou loto mai le Atua, tatou te goto ifo ai.

O LE FA’ATUATUA MOTO.
E faigofie ‘ona taulagi lo tātou fa’atuatua, i taimi o le solo lelei. Taimi o le saogalēmū. Taimi o le mālosi ma le mālōlōina. Taimi o le tamāo’āiga ma tāgolima. A’o le fa’atuatua moto le na.

O LE FILEMŪ O LE ATUA I LE GALU & AFĀ.
O le matagi ma le Galu ma pōgisā o le Leoleoga e 4, lea na fefefe ai le ‘Au So’o, ‘ae na savali mai ai Iēsu ma le lē fa’agae’etia.
O mea lava ia o lo o tutupu i o tātou Olaga i ‘Āiga, Nu’u, Mālō e fa’apea fo’i i Ekalesia.

‘AUA LE VA’AI I LE GALU.
O mea mata’utia o le Foafoaga, ‘ua na o le Atua na te p**ea. Pei ‘ona fai mai le Failauga i le Aso Sa ‘ua te’a.
*Failauga 3: O le mea ma lona tausaga i mea ‘uma, ma ona lava po i mea ‘uma lava i lalo o le lagi.
O le matua o le fa’atuatua, tātou te ola ai ma le iloa, ‘ua tu’u matā-maga e le Atua mea ‘uma. E i ai mea e le au i ai le mafai o le tagata.

O ROMA FOU! O LE PŪLOU ‘APA.
O fa’alagiga ia o le A’oga i Leulumoega Fou. O le Pūlou ‘Apa, o le mālosi fa’afitafita o le Mālō o Roma. O miti na a le Ekalesia Sāmoa, mo le lumana’i manuia. Na ‘avea ai Leulumoega pei o le mālosi fa’afitafita o le Mālō o Roma, e tāpena mai ai tama e o i Mālua.

O LE TINEI-AFI.
*O le Tinei Afi. – O le fale lea sa i Leulumoega Fou, e susunu ai afi o olaga tuai, na alu atu ma le tagata i lona ‘aiga ma lona nu’u i tua. E a’o ai le fa’alogo, usita’i ma le ‘onosa’i.
‘Ia ulufale i Mālua; ‘ua Matua le fa’atuatua. ‘Ua sui le amio. ‘Ua fa’alogo ma usita’i. ‘Ua saunia fo’i le ola e fai ma Va’a ma Ipu o le Tala Lelei a Keriso.
O le ‘auala lea na ui mai ai o tātou mātua i ulua’i tausaga o le Galuega Fa’afaife’au. (Late 19th Cent - Early 1900Cent). O lātou na, na o atu Fa’amisionare i Papua ma isi motu o le Pasefika, ma maliliu ai.

A LĒ MAUA I LEULUMOEGA, E MAUA I MĀLUA, A LĒ MAUA I MĀLUA, E MAUA I TUA.
O tupulaga na, na faia le ‘Upu Tausi; “A lē maua ‘oe i Leulumoega, e maua i Mālua. A lē maua loa ‘oe i Mālua, e maua la ‘oe i tua; i le Galuega Fa’afaife’au i le nu’u.”
‘Auā o le a e alu ma nisi uiga vāivāi, e le’i susunuina ‘ia mu ‘uma i le Tinei-Afi i Leulumoega ma Mālua.

TOE VALA’AUINA REV. OKA FAUOLO E P**E I MALUA.
Fai mai Rev. Oka Fau’olo, o le finagalo o le ‘Au Toea’ina, na toe tōfia ai lā’ua ma lona faletua o So’oletaua, e P**e i le Kolisi i Mālua i le fa’ai’uga o le 1979/80. O le Miti a Tamā o le Ekalesia i taimi ia.
‘Ua toe 20 tausaga, ‘ona ‘uma lea o le Meleniuma 1.
O tupulaga lalovaoa, lātou te fa’aulufale le Ekalesia i le Meleniuma 2.
E tatau ‘ona tapena lelei ‘ia matua lo lātou Fa’atuatua (Spiritual Maturity), e fetaia’i ai ma suiga fou o le Lalolagi, i le Meleniuma 2.
(i). ‘Ua fa’atupula’ia le Tamāo’aiga o Sāmoa.
>‘Ua tupu fo’i le fa’a’oloaina o le ‘au faigaluega.
(ii). ‘Ua fotua’i mai Tekonolosi fou. O le a suia faiga.
O le a lu’itauina ai le Misiona a Keriso. O Afā ma Galu Lolo na, e matuā lōfia ai le Ekalesia a Keriso.

O LE LU’ITAUINA O LE FA’ATUATUA.
O le P**ega a Rev. Oka ma So’o Fauolo, na ma ulufale ai i le Kolisi i Mālua. E to’atele faife’au ‘ua tūla’i mai nei i Tofi Toea’ina ma Ta’ita’i o le EFKS fa’apea fo’i le EFKAS, na mātou a’o’oga ‘uma iā Rev. Oka ma So’oletaua.
Na lagona le leo o le uiō ma le muimui. ‘Auā ‘ua toe fa’aolaola e Rev. Oka Fau’olo ma So’oletaua le P**ega Fa’a-pūlou ‘apa a Roma Fou. Le Olaga Fa’a-Tinei-Afi i Leulumoega Fou.
Na manatu A’oa’o ma Faletua, ‘ua sāuā tele le Polokalame a Rev. Oka ma So’o. To’atele A’oa’o na fa’asala e Oka. E fa’alua ‘ona fa’asala a’u e Oka.
(i) ‘Ona e le’i malie Oka i le pupu’u o le ‘otiga o lo’u lauulu.
(ii). ‘Ona ‘ua lē fa’afo’i atu le suo, ma tu’u i le mea e tu’u ai i le fale o mea-faigaluega.
Na mātou toe galulue ma Oka ma So’oletaua i le P**ega a Apia i Sisifo, ma toe fa’amatala mai ai e Oka, le uiga o lona vala’auina e le ‘Au Toea’ina, e Toe Fuata’i le Kolisi i Mālua, ‘ona o suiga fou ‘ua fa’aolioli mai. E tatau ‘ona mālosi ma mautū le fa’atuatua o le ‘au faigaluega o tupulaga fou.

FA’AALIGA O LE FA’ATUATUA MATUA O REV. OKA FAUOLO.
Na mōlia Oka i luma o le ‘Au Toea’ina po o le 1997? ‘Ona ‘ua alu atu Oka i le pasi i le Aso To’ona’i na fai ai Fiafia a Tupulaga Talavou, ‘otegia fa’atasi ai ma le ‘Au Toea’ina o fai pea fiafia, ‘ae ‘ua ta le vavao o Faigalotu a Mālua i le 6.00pm.
Na Fono le ‘Au Toea’ina, ma poloa’iina ‘Oka, ‘ia tu i luma o le Fono Tele, e fa’ato’ese i le ‘Au Toea’ina.

I le taeao o le Aso Gafua na tau aofia ai le Fono Tele; na tu ai Oka ma fa’apea ana ‘upu.
“Talu lava ‘ina fa’au’u i lā’ua e fai ma faife’au mai le 1950s, sa p**e lava le Ekalesia i o la Ola. A fai mai e o i fea? Na fa’alologo lava usita’i ma o. O le usita’i lava lea iā Keriso, le Ao o le Ekalesia.
‘Afai la e i ai se amio ‘ua sesē a lā’ua ma lona to’alua i luma o le Atua, ‘ia fa’amāgalo mai lā’ua e le Atua.
‘Ae ‘āfai ‘ua lagomia le Tōfā a le ‘Au Toea’ina, ‘ona o le fa’atinoga a la tiute; o le mea la le na a le ‘Au Toea’ina. O le a la le uiga o le Sa o le faigālotu o le Fono Tele, e Leoleo e Mālua ma Leulumoega mai anamuā? E lē fa’apea a i ai Toea’ina, ‘ona soli ai lea o le Vavao o Faigalotu.”
‘Ona toe nofo lea i lalo.

I le matamata ita o le P**e a le ‘Au Toea’ina, ‘ona ‘ua tīgā i le alu atu o Oka tāofi Fiafia, ma ‘otegia fa’atasi ai ma Toea’ina sa i ai, ‘ona ‘ua ta le Vavao o le Faigalotu Afiafi, e le’i fefe ai Oka. Ha ha.
E le’i va’ai Oka i le P**e a Toea’ina, na fa’amata’u mai. Na tāula’i lana va’ai, “Ua ta le Vavao mo Faigalotu. ‘Ia fao fale tagata ‘uma, e fai lotu iā Iēsu.”

PESE AUALOFA - REV. OKA FAU’OLO & SO’O.
‘Ina ‘ua maliu Oka Fau’olo, na ma tūsia ma Vini le Pese aualofa mo Rev. Oka ma So’o. I lo ma talitonuga, fa’afetai ‘ua ma a’o’oga fa’afaife’au iā Oka ma So’o. E lē toe maua se isi e pei o Oka i le Ekalesia Sāmoa. O se ‘au’auna e matua i le fa’atuatua. E loloto lana Tōfā fa’ale-aganu’u Sāmoa. E mata’u i le Atua. E lē fefe fo’i i se tagata ola.

Na tu’itu’i mai e Nanai Viellani le ma potu i le 6.00am. Fai mai, “Ua maliu Oka.” Na ‘ou nofo a’e i luga, ma saofa’i loa i le piano. Na vave oso mai le fati i lo’u māfaufau. Na puna mai manatu ma ‘upu.
E 1.30pm, ‘ua ‘uma ‘ona fatu le Vi’i o Oka. E le’i tau su’eina ni ‘upu e fa’amatala ai lea ‘au’auna aogā a Keriso.
Na fa’apea mai le mātou Ekalesia EFKSNZ New Vision, o le a totogi o mātou pāsese ma le fānau e malaga i Sāmoa e ‘auai i Toe Sauniga o Rev. Oka Fau’olo; e lagiina ai le Pese aualofa i lea ‘au’auna a Keriso, ‘ua Matua lona Fa’atuatua.
Na mātou malaga i Sāmoa. Na usu ai le Vi'i o Oka Fau'olo, i lona Sauniga Fa'ale-āiga iā Ligaliga. Ma lona Toe Sauniga i le Malumalu EFKS i Fusi Safotulafai, 'ina 'ua 'uma le Molimau a So'oletaua.

O LE TALI O LE VI'I O REV. OKA FAUOLO:
Oka se, ‘Ua mālō le tau.,
Le faiva e ‘a’au aga’i i le āu.
Sa e tolo i le tai gau,
Sa e tofu i le tai tatau.
O lou Matai lea ‘ua vāla’au,
“Oka! Sau ua māe’a au fe’au.”

Fai mai le tatalo a Iēsu i le mauga o Olive, “Lo’u Tamā e, ‘aua le faia lo’u loto; a’o lou finagalo.”
E le’i fefe Iēsu i mea leaga ma sāuaga, e o’o i le Sātauro ma le Oti. ‘Aiseā? E P**e aoao le Atua.

'AUA LE FEFE I TAGATA, 'AE 'IA MATA'U I LE ATUA.
‘Aua tatou te va’ai i Galu ma Afā o fa’afītāuli, o fetuleni mai. E māgoto ai. Tāula’i le va’ai iā Iēsu.
Fa'ato'a fefe lava le tagata o le Atua, 'ina 'ua agasala i le Atua.

O le fa’amāoniga lenā, ‘ua matua lou fa’atuatua.

‘Ona o Iēsu,
AMENE.

*Ua 'ou tu'u fa'atasia le Lauga o le Vaiaso 'ua tuana'i ma le Lauga o le vaiaso nei.

Send a message to learn more